Category: ಸಿನಿ ಸುದ್ದಿ

ದಕ್ಷಿಣ ಭಾರತದ ನಟಿ ಶ್ರುತಿ ಹರಿಹರನ್‌ ನಟನೆಯ ‘ವಧಂ’ ವೆಬ್‌ ಸರಣಿ ಗಮನ ಸೆಳೆಯುತ್ತಿದೆ. ಸಿನಿಮಾಗಳ ವಿಶಿಷ್ಟ ಪಾತ್ರಗಳಲ್ಲಿ ಅವರನ್ನು ನೋಡಿದ್ದ ಅಭಿಮಾನಿಗಳು ತಮಿಳು ವೆಬ್‌ ಸರಣಿಯಲ್ಲಿ ಅವರನ್ನು ಪೊಲೀಸ್‌ ಅಧಿಕಾರಿಯನ್ನಾಗಿ ಕಂಡು ಥ್ರಿಲ್ಲಾಗಿದ್ದಾರೆ. ವೆಂಕಟೇಶ್ ಬಾಬು ನಿರ್ದೇಶನದ ಸರಣಿ ಮೊನ್ನೆ ಎಂಎಕ್ಸ್‌ ಪ್ಲೇಯರ್‌ನಲ್ಲಿ ಪ್ರೀಮಿಯರ್ ಆಗಿದ್ದು, ಥ್ರಿಲ್ಲರ್‌ ಕಥಾನಕದಿಂದ ಸರಣಿ ನೋಡುಗರನ್ನು ಸೆಳೆಯುತ್ತಿದೆ. ಶ್ರುತಿ ಇಲ್ಲಿ ಪೊಲೀಸ್ ಅಧಿಕಾರಿ ‘ಶಕ್ತಿ ಪಾಂಡಿಯನ್‌’ ಪಾತ್ರದಲ್ಲಿ ನಟಿಸುತ್ತಿದ್ದಾರೆ.

“ನಟಿಯಾಗಿ ನಾನು ಸದಾ ಸವಾಲಿನ ಪಾತ್ರಗಳನ್ನು ಎದುರುನೋಡುತ್ತೇನೆ. ಸಾಂಪ್ರದಾಯಿಕ ಪಾತ್ರಗಳಲ್ಲಷ್ಟೇ ನಟಿಸುವುದು ಬೇಜಾರು. ನ್ಯಾಯಕ್ಕಾಗಿ ಹೋರಾಟ ನಡೆಸುವ, ಪ್ರಭಾವಿ ಕೊಲೆಗಾರ ರಾಜಕಾರಣಿಯನ್ನು ಎದುರು ಹಾಕಿಕೊಂಡು ಸವಾಲು ಸ್ವೀಕರಿಸುವ ಶಕ್ತಿ ಪಾತ್ರದಲ್ಲಿ ನಾನು ತಲ್ಲೀನಳಾಗಿದ್ದೇನೆ” ಎನ್ನುತ್ತಾರೆ ಶ್ರುತಿ. ಸರಣಿಯಲ್ಲಿ ಭರ್ಜರಿ ಆಕ್ಷನ್ ಸನ್ನಿವೇಶಗಳಿವೆ. ಇಂತಹ ಪಾತ್ರವನ್ನು ನಿಭಾಯಿಸುವಲ್ಲಿ ತಮಗೆ ನೆರವಾಗುತ್ತಿರುವ ನಿರ್ದೇಶಕರನ್ನು ಶ್ರುತಿ ಸ್ಮರಿಸುತ್ತಾರೆ.

ಐಪಿಎಸ್ ಅಧಿಕಾರಿ ಶಕ್ತಿ ಪಾಂಡಿಯನ್‌ ತಮ್ಮ ಮಹಿಳಾ ಸಹೋದ್ಯೋಗಿಗಳೊಂದಿಗೆ ಪ್ರಭಾವಿ ರಾಜಕಾರಣಿಯೊಬ್ಬರು ನಡೆಸಿದ ಕೊಲೆಯನ್ನು ಭೇದಿಸಲು ಹೊರಡುತ್ತಾರೆ. ಮಹಿಳಾ ಅಧಿಕಾರಿಯಾಗಿ ಅವರಿಗೆ ಸಾಕಷ್ಟು ತೊಡಕುಗಳು ಎದುರಾಗುತ್ತವೆ. ಈ ಎಲ್ಲಾ ಬೆದರಿಕೆ, ತೊಡಕುಗಳನ್ನು ಮೆಟ್ಟಿನಿಂತು ಅವರು ಹೇಗೆ ಕೊಲೆಗಾರನನ್ನು ಅಪರಾಧಿ ಸ್ಥಾನದಲ್ಲಿ ನಿಲ್ಲಿಸುತ್ತಾರೆ ಎನ್ನುವುದು ಸರಣಿಯ ಕಥಾವಸ್ತು. “ಇದು ಸೂಪರ್‌ ಥ್ರಿಲ್ಲರ್ – ಡ್ರಾಮಾ. ನಟಿ ಶ್ರುತಿ ಪಾತ್ರವನ್ನು ಜೀವಿಸಿದ್ದಾರೆ” ಎನ್ನುತ್ತಾರೆ ನಿರ್ದೇಶಕ ವೆಂಕಟೇಶ್ ಬಾಬು. ಸರಣಿಯ ಇತರೆ ಪ್ರಮುಖ ಪಾತ್ರಗಳಲ್ಲಿ ಅಶ್ವಥಿ ವಾರಿಯರ್‌, ಸೆಮ್ಮಲಾರ್ ಅನ್ನನ್‌, ಪ್ರಿತೀಷಾ ಪ್ರೇಮಕುಮಾರನ್‌, ವಿವೇಕ್ ರಾಜಗೋಪಾಲ್‌ ನಟಿಸಿದ್ದಾರೆ.

ಹೆಣ್ಣಿಗೆ ಸೀರೆ ಯಾಕೆ ಅಂದಾ? ಬೆಳ್ಳಿತೆರೆ ಮೇಲೆ ಮಾದಕ ನಟಿ ಶ್ರೀದೇವಿಕಾ ಅವರಿಗೆ ಕ್ರೇಜಿಸ್ಟಾರ್ ರವಿಚಂದ್ರನ್ ಹೀಗೇಕೆ ಕೇಳಿದ್ರೋ ಗೊತ್ತಿಲ್ಲ, ಆದರೆ ಹೆಣ್ಣಿಗೆ ಸೀರೇನೆ ಚಂದ ಅಲ್ವಾ? ಇಲ್ಲಿ ಹೌದು ಅಂತ, ಸಖತ್ ಆದ ಸೀರೆಯುಟ್ಟು ದೀವಿನಾದ ಪೋಸು ನೀಡುತ್ತಾರೆ ಗ್ಲಾಮರಸ್ ನಟಿ ಹರಿಪ್ರಿಯಾ.

ಆದ್ರೆ, ಗ್ಲಾಮರಸ್ ನಟಿ ಹರಿಪ್ರಿಯಾ ಅಂದಾಕ್ಷಣ ಸಿನಿಮಾ ಪ್ರೇಕ್ಷಕರಿಗೆ ನೆನಪಾಗೋದು ʼನೀರ್ ದೋಸೆ ʼಚಿತ್ರದ ಕುಮುದಾ ಪಾತ್ರ. ಜಗ್ಗೇಶ್ ಅಭಿನಯದ ಈ ಚಿತ್ರದಲ್ಲಿ ಹರಿಪ್ರಿಯಾ ಅಭಿನಯಿಸಿದ್ದು ವೇಶೆ ಪಾತ್ರ.ಈ ಕುಮುದಾ ಸಿಕ್ಕಾಪಟ್ಟೆ ಹಾಟ್. ಉಡುಗೆ, ತೊಡುಗೆ ಮಾತ್ರವಲ್ಲ ಅವರ ಮಾತು ಕೂಡ ಅಷ್ಟೇ ಹಸಿ ಬಿಸಿ. ಹಾಗಾಗಿ ಸಿನಿಮಾ ಅಂದಾಕ್ಷಣ ಕನ್ನಡ ಸಿನಿಮಾ ಪ್ರೇಕ್ಷಕ ನಿಗೆ ಹಾಟ್ ಹರಿಪ್ರಿಯಾ ನೆನಪಾದರೂ, ನಿಜ ಜೀವನದಲ್ಲಿ ಅವರು ಇರೋದೇ ಬೇರೆ.

ಪಕ್ಕಾ ಸಂಪ್ರದಾಯ ಸ್ಥ ಕುಟುಂಬದ ಹಿನ್ನೆಲೆ ಹರಿಪ್ರಿಯಾ ಅವರದು. ಶುದ್ಧ ದೈವ ಭಕ್ತೆ. ಹಾಗೆಯೇ ಸೀರೆಯೇ ಅವರ ನೆಚ್ಚಿ‌ನ ಉಡುಗೆ. ಸೋಷಲ್ ಮೀಡಿಯಾದಲ್ಲಿ ಅವರ ಇನ್ಸ್ಟಾ, ಪೇಸ್ ಬುಕ್ , ಟ್ವಿಟರ್ ಖಾತೆ ತೆರೆದರೆ ದಿನ ನಿತ್ಯ ತರಾಹೇವಾರಿ ಬಣ್ಣದ ಸೀರೆಗಳುಟ್ಟು ಪೋಸು ನೀಡಿರುವುದು ನಿಮಗೂ ಗೊತ್ತು. ಅಷ್ಟೇ ಅಲ್ಲ, ತೆರೆ ಮೇಲೂ ಹರಿಪ್ರಿಯಾ ಸೀರೆಯಲ್ಲಿ ಕಾಣಿಸಿಕೊಂಡರೆ ಚೆಂದ.

ಹಾಗಂತ ಅವರ ಅಭಿಮಾನಿಗಳು ಬಯಸುತ್ತಾರಂತೆ. ಮುನಿರತ್ನ ಕುರುಕ್ಷೇತ್ರದಲ್ಲಿ ನಟಿ ಹರಿಪ್ರಿಯಾ ಚೆಂದದ ಸೀರೆಯುಟ್ಟು ಕಾಣಿಸಿಕೊಂಡಿದ್ದಕ್ಕೂ ಆಗಾಧ ಮೆಚ್ಚುಗೆ ಸಿಕ್ಕಿತ್ತು. ಇದೇ ಕಾರಣಕ್ಕೋ ಏನೋ, ಸೀರೆಯಲ್ಲಿ ಸದಾ ಮಿಂಚುತ್ತಾರೆ ನಟಿ ಹರಿಪ್ರಿಯಾ‌.

ಅಂದ ಹಾಗೆ ಹರಿಪ್ರಿಯಾ ಈಗ ಕನ್ನಡದ ಬ್ಯುಸಿ ನಟಿಯರಲ್ಲಿ ಒಬ್ಬರು. ಉಗ್ರಂ ನಂತರ ಹರಿಪ್ರಿಯಾ ಅವರದ್ದು ಸೆಕೆಂಡ್ ಇನ್ನಿಂಗ್ಸ್.‌ಉಗ್ರಂ ಮೂಲಕ ಸಿಕ್ಕ ದೊಡ್ಡ ಸಕ್ಸಸ್ ನಂತರ ಹರಿಪ್ರಿಯಾ , ನೀರ್ ದೋಸೆ ಮೂಲಕ ಫಿನಿಕ್ಸ್ ನಂತೆ ಎದ್ದು ಕುಳಿತರು.ಸಾಲು ಸಾಲು ಸಿನಿಮಾಗಳು ಅವರ ಕೈಯಲ್ಲಿವೆ. ಈಗಷ್ಟೇ ಅವರು ವಿಜಯ್ ಪ್ರಸಾದ್ ನಿರ್ದೇಶನದ’ ಪೆಟ್ರೋಮ್ಯಾಕ್ಸ್’ ಚಿತ್ರರ ಚಿತ್ರೀಕರಣ ಮುಗಿಸಿದ್ದಾರೆ.

ಚಿರಂಜೀವಿ ಸರ್ಜಾ ನಟನೆಯ ಕೊನೆಯ ಸಿನಿಮಾ ‘ರಾಜಾ ಮಾರ್ತಾಂಡ’ ತೆರೆಗೆ ಸಿದ್ಧವಾಗುತ್ತಿದೆ. ಚಿರಂಜೀವಿ ಪಾತ್ರಕ್ಕೆ ಅವರ ಸಹೋದರ ಧ್ರುವ ಡಬ್‌ ಮಾಡಿದ್ದಾರೆ.  ಫೆಬ್ರವರಿ 19ರಂದು ಚಿತ್ರದ ಟ್ರೇಲರ್ ಬಿಡುಗಡೆಯಾಗಲಿದೆ. ವಿಶೇಷವೆಂದರೆ ಈ ಟ್ರೇಲರ್‌ ಅನ್ನು ಚಿರಂಜೀವಿ ಪುಟಾಣಿ ಪುತ್ರನ ಕೈಗಳಿಂದ ಲಾಂಚ್‌ ಮಾಡಿಸಲಾಗುತ್ತಿದೆ! ಚಿತ್ರದ ನಿರ್ದೇಶಕ ರಾಮ್‌ನಾರಾಯಣ್‌ ತಮ್ಮ ಫೇಸ್‌ಬುಕ್‌ ಪೇಜ್‌ನಲ್ಲಿ ಈ ಸುದ್ದಿ ಹಂಚಿಕೊಂಡಿದ್ದಾರೆ. ತೊಟ್ಟಿಲಲ್ಲಿರುವ ಜ್ಯೂ.ಚಿರು ಜೊತೆಗಿನ ಸೆಲ್ಫಿ ಹಾಕಿ ಅವರು ಈ ಸುದ್ದಿಯನ್ನು ಬರೆದಿದ್ದಾರೆ.

ಜ್ಯೂ.ಚಿರಂಜೀವಿಯಿಂದ ‌ಟ್ರೇಲರ್ ಲಾಂಚ್ ಮಾಡಿಸುವ ಐಡಿಯಾಗೆ ನಟಿ  ಮೇಘನಾ ರಾಜ್‌ ಅವರೂ ಖುಷಿಯಾಗಿದ್ದಾರೆ. ಪುಟಾಣಿಯಿಂದ ಟ್ರೇಲರ್ ಬಿಡುಗಡೆಯಾಗುತ್ತಿರುವುದು ಬಹುಶಃ ಕನ್ನಡ ಚಿತ್ರರಂಗದ ಮಟ್ಟಿಗೂ ಹೊಸದು. ಇನ್ನು ಚಿರಂಜೀವಿ ನಟನೆಯ ಕೊನೆಯ ಸಿನಿಮಾ ಎನ್ನುವ ಕಾರಣಕ್ಕೆ ‘ರಾಜಾಮಾರ್ತಾಂಡ’ ಕುರಿತು ನಿರೀಕ್ಷೆ ಹೆಚ್ಚಿದೆ. ಈಗಾಗಲೇ ಅಣ್ಣನ ಪಾತ್ರಕ್ಕೆ ಧ್ರುವ ಸರ್ಜಾ ಡಬ್ ಮಾಡಲು ಶುರುಮಾಡಿದ್ದಾರೆ.

ಟ್ರೇಲರ್‌ಗೆ ಬೇಕಾದ ಡಬ್ಬಿಂಗ್ ಕೆಲಸ ಮುಗಿಸಿರುವ ಧ್ರುವ ತಮ್ಮ ‘ಪೊಗರು’ ಚಿತ್ರದ ಬಿಡುಗಡೆಯಲ್ಲಿ ಬ್ಯುಸಿಯಾಗಿದ್ದಾರೆ. ಇದಾದ ನಂತರ ಅವರು ಪೂರ್ಣಪ್ರಮಾಣದಲ್ಲಿ ಆ ಸಿನಿಮಾದ ಡಬ್ಬಿಂಗ್‌ನಲ್ಲಿ ತೊಡಗಿಸಿಕೊಳ್ಳಲಿದ್ದಾರಂತೆ.  ಟ್ರೇಲರ್ ಬಿಡುಗಡೆಯ ಕೆಲವು ದಿನಗಳಲ್ಲಿ ‘ರಾಜಾಮಾರ್ತಾಂಡ’ ಬಿಡುಗಡೆ ದಿನಾಂಕ ಘೋಷಣೆಯಾಗಲಿದೆ. ನಟ ದರ್ಶನ್‌ ಕೂಡ ಈ ಸಿನಿಮಾದ ಬೆನ್ನಿಗೆ ನಿಂತಿದ್ದಾರೆ. ಚಿತ್ರದಲ್ಲಿ ದರ್ಶನ್ ಹಿನ್ನೆಲೆ ದನಿ ಇರಲಿದೆ. ಈ ಮೂಲಕ ಅಗಲಿದ ಗೆಳೆಯನಿಗೆ ಅವರ ಕಡೆಯಿಂದ ಶ್ರ‌ದ್ಧಾಂಜಲಿ ಅರ್ಪಣೆಯಾಗುತ್ತಿದೆ.

“ದುನಿಯಾ” ವಿಜಯ್‌ ಅಭಿನಯದ “ಸಲಗ” ಸಿನಿಮಾ ರಿಲೀಸ್‌ಗೆ ಮುನ್ನವೇ ಜೋರು ಸದ್ದು ಮಾಡುತ್ತಿದೆ. ಇತ್ತೀಚೆಗಷ್ಟೇ ವಿಜಯ್‌ ಅವರ ಗೋವಾದ ಅಭಿಮಾನಿಯೊಬ್ಬ ತನ್ನ ಕೈ ಮೇಲೆ “ಸಲಗ” ಎಂಬ ಹೆಸರನ್ನು ಹಚ್ಚೆ ಹಾಕಿಸಿಕೊಂಡಿದ್ದು ಗೊತ್ತೇ ಇದೆ. ಈಗ ಮತ್ತೊಬ್ಬ ಅಭಿಮಾನಿ ತನ್ನ ಎದೆಯ ಮೇಲೆಯೇ “ಸಲಗ” ಹೆಸರನ್ನ ಹಾಕಿಸಿಕೊಂಡು ಅಭಿಮಾನ ಮೆರೆದಿದ್ದಾನೆ. ಹೌದು, ಅಭಿಮಾನಿ ಎದೆಯ ಮೇಲೆ ರಾರಾಜಿಸುತ್ತಿರುವ “ಸಲಗ” ಹೆಸರು ನೋಡಿದ ʼದುನಿಯಾʼ ವಿಜಯ್‌ ಅಭಿಮಾನಿಯ ಪ್ರೀತಿಯ ಅಭಿಮಾನಿಗೆ ಫಿದಾ ಆಗಿದ್ದಾರೆ.

ಸದ್ಯಕ್ಕೆ ಈಗ “ದುನಿಯಾ” ವಿಜಯ್ ಅಭಿಮಾನಿಗಳಿಂದ ಟ್ಯಾಟೋ‌ ಅಭಿಯಾನ ಕೊಂಚ ಜೋರಾಗಿಯೇ ನಡೆಯುತ್ತಿದೆ. ಅದರಲ್ಲೂ ಒಂದು ರೀತಿ ಈ ಅಭಿಯಾನ ಸೆನ್ಸೇಷನ್ ಕೂಡ ಕ್ರಿಯೇಟ್ ಮಾಡುತ್ತಿದೆ. ದಿನ ಕಳೆದಂತೆ “ಸಲಗ” ಚಿತ್ರದ ಕ್ರೇಜ್ ಹೆಚ್ಚುತ್ತಲೇ ಇದೆ. ವಿಜಯ್ ಅಭಿಮಾನಿಗಳು‌ ತಮ್ಮ‌ ಪ್ರೀತಿಯ ನಟನ ಸಿನಿಮಾ‌ ಮೇಲೆ‌ ತುಸು ಹೆಚ್ಚಾಗಿಯೇ ಪ್ರೀತಿ ಬೆಳೆಸಿಕೊಂಡಿದ್ದಾರೆ. ಈಗಾಗಲೇ ಟೀಸರ್ ಹಾಗೂ ರಿಲೀಸ್ ಆಗಿರುವ ಹಾಡುಗಳಿಗೆ ಫ್ಯಾನ್ಸ್‌ ಫಿದಾ ಆಗಿದ್ದಾರೆ.

“ಸಲಗ” ಥಿಯೇಟರ್‌ಗೆ ಬರುವುದನ್ನು ಕಾತರದಿಂದಲೇ ಅಭಿಮಾನಿಗಳು ಕಾಯುತ್ತಿದ್ದಾರೆ. ಈಗಾಗಲೇ ತಮ್ಮದೇ ಆದ ರೀತಿಯಲ್ಲೇ ಅವರು ಅಭಿಮಾನವನ್ನು ತೋರಿಸುತ್ತಿದ್ದಾರೆ. ಗೋವಾ ಕನ್ನಡಿಗನೊಬ್ಬ ತನ್ನ ಕೈ ಮೇಲೆ‌‌ ಟ್ಯಾಟೋ‌ ಹಾಕಿಸಿಕೊಂಡು ಅಭಿಮಾನ ತೋರಿದ್ದ ಬೆನ್ನಲ್ಲೇ ಈಗ ಇನ್ನೊಬ್ಬ ಅಭಿಮಾನಿ ತನ್ನ ಎದೆ ಮೇಲೇನೆ “ಸಲಗ” ಟ್ಯಾಟೋ‌ ಹಾಕಿಸಿಕೊಂಡು, ಖುದ್ದು ತಮ್ಮ ಪ್ರೀತಿಯ ನಟ ವಿಜಯ್‌ ಮನೆಗೆ ಬಂದು ಅವರ ಕೈಯಲ್ಲೇ ಆ ಟ್ಯಾಟೋ ಕವರ್‌ ಅನ್ನು ಬಿಚ್ಚಿಸಿಕೊಂಡಿದ್ದಾನೆ. ಅಭಿಮಾನಿಯ ಈ ಅಭಿಮಾನಕ್ಕೆ ವಿಜಯ್‌ ಅವರೇ ಖುದ್ದು ಭಾವುಕರಾಗಿ ಅಭಿಮಾನಿಗೆ ಶರಣಗಿದ್ದಾರೆ.

ಬಹುಭಾ‍ಷಾ ನಟ ಮಾಧವನ್‌ ಸಿನಿಮಾ ಸಾಧನೆ ಪರಿಗಣಿಸಿ ಕೊಲ್ಹಾಪುರದ ಡಿ.ವೈ.ಪಾಟೀಲ್‌ ಶಿಕ್ಷಣ ಸಂಸ್ಥೆ ಗೌರವ ಡಾಕ್ಟರೇಟ್ ನೀಡಿ ಗೌರವಿಸಿದೆ. ಮೊನ್ನೆ ಶಿಕ್ಷಣ ಸಂಸ್ಥೆಯ ಒಂಬತ್ತನೇ ಶೈಕ್ಷಣಿಕ ಸಮಾಂಭದಲ್ಲಿ ಮಾಧವನ್‌ ಈ ಗೌರವ ಸ್ವೀಕರಿಸಿದ್ದಾರೆ. ಈ ಪುರಸ್ಕಾರದಿಂದ ಹೆಮ್ಮೆಯಿಂದ ಬೀಗುತ್ತಿರುವ ಐವತ್ತರ ಹರೆಯದ ಮಾಧವನ್, “ಈ ಗೌರವವನ್ನು ನಾನು ವಿನಯದಿಂದ ಸ್ವೀಕರಿಸುತ್ತೇನೆ. ಈ ಮನ್ನಣೆ ನನಗೆ ಹೆಚ್ಚಿನ ಜವಾಬ್ದಾರಿ ಹೊರಿಸಿದೆ. ಮುಂದೆ ಇನ್ನಷ್ಟು ಒಳ್ಳೆಯ ಮಾದರಿ ಸಿನಿಮಾ, ಪಾತ್ರಗಳಲ್ಲಿ ಕಾಣಿಸಿಕೊಳ್ಳುತ್ತೇನೆ” ಎಂದಿದ್ದಾರೆ.

ಮಾಧವನ್‌ ಸಿನಿಮಾಗೆ ಅಡಿಯಿಟ್ಟಿದ್ದು ತೊಂಬತ್ತರ ದಶಕದ ಕೊನೆಯಲ್ಲಿ. ಮಣಿರತ್ನಂ ನಿರ್ದೇಶನದ ‘ಅಲೈಪಾಯಿದೆ’ (2000) ಅವರ ವೃತ್ತಿ ಬದುಕಿಗೆ ದೊಡ್ಡ ತಿರುವು ನೀಡಿದ ಸಿನಿಮಾ. ಆನಂತರ ರೆಹ್ನಾ ಹೈ ತೇರಾ ದಿಲ್‌ ಮೇ, 3 ಈಡಿಯಟ್ಸ್‌, ತನು ವೆಡ್ಸ್ ಮನ, ವಿಕ್ರಂ ವೇದಾ ಸೇರಿದಂತೆ ಹತ್ತಾರು ಸಿನಿಮಾಗಳಲ್ಲಿ ಗಮನ ಸೆಳೆದರು.

ಅಮೇಜಾನ್‌ ಪ್ರೈಮ್‌ನ ‘ಬ್ರೀಥ್‌’ನೊಂದಿಗೆ ಓಟಿಟಿಗೆ ಪದಾರ್ಪಣೆ ಮಾಡಿದ ಮಾಧವನ್‌ ಇತ್ತೀಚಿನ ‘ಮಾರಾ’ ರೊಮ್ಯಾಂಟಿಕ್ ಸಿನಿಮಾಗಳಲ್ಲಿ ಮಿಂಚಿದ್ದರು. ಇದು ದುಲ್ಕರ್ ಸಲ್ಮಾನ್‌ ನಟನೆಯ ‘ಚಾರ್ಲಿ’ ಮಲಯಾಳಂ ಚಿತ್ರದ ರೀಮೇಕ್‌. ಇದೀಗ ಅವರು ನಟಿಸಿ, ನಿರ್ದೇಶಿಸಿರುವ ‘ರಾಕೆಟ್ರೀ: ದಿ ನಂಬಿ ಎಫೆಕ್ಟ್‌’ ತೆರೆಗೆ ಸಿದ್ಧವಾಗಿದೆ. ISRO ದಲ್ಲಿ ವಿಜ್ಞಾನಿಯಾಗಿದ್ದ ನಂಬಿ ನಾರಾಯಣನ್‌ ಅವರ ಜೀವನ ಆಧರಿಸಿದ ಚಿತ್ರವಿದು.

ಅಲಂಕೃತ ಶ್ರೀವಾತ್ಸವ್ ನಿರ್ಮಾಣ, ನಿರ್ದೇಶನದ ‘ಬಾಂಬೆ ಬೇಗಮ್ಸ್‌’ ನೆಟ್‌ಫ್ಲಿಕ್ಸ್‌ ಸರಣಿಯಲ್ಲಿ ಕಾರವಾರ ಮೂಲದ ಕನ್ನಡತಿ ಆದ್ಯಾ ಆನಂದ್ ನಟಿಸಿದ್ದಾರೆ. ಮೊನ್ನೆ ಸರಣಿಯ ಟ್ರೈಲರ್ ಬಿಡುಗಡೆಯಾಗಿದ್ದು, ಮಾರ್ಚ್‌ 8ರ ಮಹಿಳಾ ದಿನದಂದು ಸರಣಿ ಪ್ರೀಮಿಯರ್ ಆಗಲಿದೆ. ಆಧುನಿಕ ಮುಂಬಯಿಯ ವಿವಿಧ ಕ್ಷೇತ್ರಗಳಲ್ಲಿ ತೊಡಗಿಸಿಕೊಂಡಿರುವ ಐವರು ಮಹಿಳೆಯರ ಸುತ್ತ ಹೆಣೆದ ಕತೆ ‘ಬಾಂಬೆ ಬೇಗಮ್ಸ್‌’. ಪೂಜಾ ಭಟ್‌, ಶಹಾನಾ ಗೋಸ್ವಾಮಿ, ಅಮೃತಾ ಸುಭಾ‍ಷ್‌, ಪ್ಲಬಿತಾ ಠಾಕೂರ್‌ ಮತ್ತು ಆದ್ಯಾ ಆನಂದ್‌ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.

ಸಿಂಗಾಪೂರದಲ್ಲಿ ನೆಲೆಸಿರುವ ಉತ್ತರ ಕನ್ನಡ ಮೂಲದ ಆನಂದ್ ನಾಯಕ್‌ ಮತ್ತು ಪ್ರಿಯಾ ದಂಪತಿ ಪುತ್ರಿ ಆದ್ಯಾ ಆನಂದ್‌. ಮಡಿಕೇರಿಯಲ್ಲಿ ಜನಿಸಿದ ಆದ್ಯಾ ಬೆಳೆದದ್ದು ಸಿಂಗಾಪೂರದಲ್ಲಿ. ಏಳನೇ ವಯಸ್ಸಿಗೆ ಆಕ್ಟಿಂಗ್, ಮಾಡೆಲಿಂಗ್‌ನಲ್ಲಿ ತೊಡಗಿಸಿಕೊಂಡಿದ್ದ ಆದ್ಯಾ ಸಿಂಗಾಪೂರದಲ್ಲಿ ರಂಗಭೂಮಿ ತರಬೇತಿ ಪಡೆದರು. ಬಾಲಿವುಡ್‌ನ ಅನುಪಮ್ ಖೇರ್‌ ಮತ್ತು ಅತುಲ್ ಮೊಂಗಿಯಾ ಇನ್‌ಸ್ಟಿಟ್ಯೂಟ್‌ಗಳಲ್ಲಿಯೂ ತರಬೇತಿ ಪಡೆದಿದ್ದಾರೆ. ‘ಎ ಯಲ್ಲೋ ಬರ್ಡ್’ ಸಿನಿಮಾ, ‘ಒನ್ ಹವರ್ ಟು ಡೇಲೈಟ್‌’ ಮತ್ತು ‘ಸ್ಕೈ ಸಿಟಿ’ ಕಿರುಚಿತ್ರಗಳಲ್ಲಿ ನಟಿಸಿದ್ದಾರೆ. ಅವರು ನಟಿಸಿದ್ದ ‘ಎ ಯಲ್ಲೋ ಬರ್ಡ್‌’ ಸಿನಿಮಾ ಪ್ರತಿಷ್ಠಿತ ಕಾನ್ ಚಿತ್ರೋತ್ಸವದಲ್ಲಿ ಪ್ರದರ್ಶನಗೊಂಡಿತ್ತು.

ಸೋನಿ ಟೀವಿಯ ಸೂಪರ್ ಡ್ಯಾನ್ಸ್‌ ಸಿಂಗಾಪೂರ್‌ನ ವಿಜೇತೆ ಆದ್ಯಾ. ಸಿಂಗಾಪೂರ್‌ನ ಜನಪ್ರಿಯ ‘ವ್ಹೂಪೀಸ್‌ ವರ್ಲ್ಡ್‌’ ಸರಣಿಯ ನಾಲ್ಕು ಸೀಸನ್‌ಗಳು, ‘ಲಯನ್ ಮಮ್ಸ್‌’ನ 2 ಮತ್ತು 3ನೇ ಸರಣಿ, ‘ವರ್ಲ್ಡ್‌ ವಿಜ್‌ ಸ್ಲೈಮ್‌ ಪಿಟ್‌’, ‘ಮೆನಂತು ಇಂಟರ್‌ನ್ಯಾಷನಲ್‌’ ಸೇರಿದಂತೆ ಹಲವು ಕಿರುತೆರೆ ಧಾರಾವಾಹಿಗಳಲ್ಲಿ ನಟಿಸಿದ್ದಾರೆ.

ಝೀ ಟೀವಿಯಲ್ಲಿ ಆದ್ಯಾ ನಿರೂಪಿಸಿದ್ದ ‘ಬ್ರೈನ್ ಬೂಸ್ಟರ್ಸ್‌’ ಕಾರ್ಯಕ್ರಮ ಹದಿನೆಂಟು ದೇಶಗಳಲ್ಲಿ ಎರಡು ಸೀಸನ್‌ಗಳಲ್ಲಿ ಪ್ರಸಾರ ಕಂಡಿದೆ.‘ಬಾಂಬೆ ಬೇಗಮ್ಸ್‌’ ವೆಬ್‌ ಸರಣಿ ಆಡಿಷನ್‌ನಲ್ಲಿ 500ಕ್ಕೂ ಹೆಚ್ಚು ಯುವತಿಯರು ಭಾಗವಹಿಸಿದ್ದರು. ಕೊನೆಗೆ ‘ಶಾಯ್ ಇರಾನಿ’ ಪಾತ್ರಕ್ಕೆ ಆದ್ಯಾ ಆಯ್ಕೆಯಾಗಿದ್ದಾರೆ. ಮಾತೃಭಾಷೆ ಕನ್ನಡದ ಜೊತೆ ಹಿಂದಿ ಮತ್ತು ಇಂಗ್ಲಿಷನ್ನು ಸೊಗಸಾಗಿ ಮಾತನಾಡುವ ಆದ್ಯಾ ಮುಂದಿನ ದಿನಗಳಲ್ಲಿ ಕನ್ನಡ, ಹಿಂದಿ ಸಿನಿಮಾಗಳಲ್ಲಿ ನಟಿಸುವ ಇರಾದೆ ಹೊಂದಿದ್ದಾರೆ.

ಸಿನಿಮಾ ಮತ್ತು ಕಿರುತೆರೆ ನಟಿ ಎರಿಕಾ ಫರ್ನಾಂಡಿಸ್‌ ಕನ್ನಡ ಕಿರುತೆರೆಗೆ ಬರುತ್ತಿದ್ದಾರೆ. ಕನ್ನಡದ ಜನಪ್ರಿಯ ‘ಜೊತೆಜೊತೆಯಲಿ’ ಸರಣಿಯ ‘ರಾಜನಂದಿನಿ’ ಪಾತ್ರದಲ್ಲಿ ಅವರು ಕಾಣಿಸಿಕೊಳ್ಳುವುದು ಬಹುತೇಕ ಖಚಿತವಾಗಿದೆ. ಈ ಹಿಂದೆ ಕನ್ನಡ ಚಿತ್ರಗಳಲ್ಲಿ ನಟಿಸಿದ್ದ ಎರಿಕಾ ಇದೀಗ ಅನಿರುದ್ಧ ಜೋಡಿಯಾಗಿ ಕನ್ನಡ ಧಾರಾವಾಹಿಗೆ ಪದಾರ್ಪಣೆ ಮಾಡುತ್ತಿದ್ದಾರೆ. ಅವರ ಪಾತ್ರ ಧಾರಾವಾಹಿಗೆ ಒಂದು ವಿಶಿಷ್ಟ ತಿರುವು ನೀಡಲಿದ್ದು, ಇದು ನಟಿಗೆ ಮಹತ್ವದ ಪಾತ್ರವಾಗಲಿದೆ. ‘ಕಸೌತಿ ಜಿಂದಗೀ ಕೆ’ ಹಿಂದಿ ಸರಣಿಯಲ್ಲಿ ಜನಪ್ರಿಯತೆ ಗಳಿಸಿರುವ ಎರಿಕಾ ಕನ್ನಡ ಕಿರುತೆರೆಯಲ್ಲೂ ಸದ್ದು ಮಾಡಲು ಸಜ್ಜಾಗಿದ್ದಾರೆ.

ಮುಂಬಯಿ ಮೂಲದ ಎರಿಕಾ 2013ರಲ್ಲಿ ಪುನೀತ್‌ ರಾಜಕುಮಾರ್ ಅಭಿನಯದ ‘ನಿನ್ನಿಂದಲೇ’ ಚಿತ್ರದೊಂದಿಗೆ ಸ್ಯಾಂಡಲ್‌ವುಡ್‌ಗೆ ಬಂದಿದ್ದರು. ಅದಾಗಿ ಎರಡು ವರ್ಷಗಳ ನಂತರ ಅವರು ನಟಿಸಿದ್ದ ಕನ್ನಡ ಸಿನಿಮಾ ‘ಬುಗುರಿ’. ಅಲ್ಲಿ ಅವರಿಗೆ ಗಣೇಶ್ ಹೀರೋ. ಒಂದೊಂದು ತಮಿಳು, ತೆಲುಗು, ಹಿಂದಿ ಚಿತ್ರದಲ್ಲಿ ನಟಿಸಿದ ಅವರು ಹಿಂದಿ ಕಿರುತೆರೆಯಲ್ಲಿ ಬ್ಯುಸಿಯಾಗಿದ್ದರು. ಇದೀಗ ‘ಜೊತೆಜೊತೆಯಲಿ’ ಧಾರಾವಾಹಿಯಲ್ಲಿ ನಾಯಕನಟ ಆರ್ಯವರ್ಧನ್‌ ಅವರ ಮೊದಲ ಪತ್ನಿ ‘ರಾಜನಂದಿನಿ’ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

ಈಗಾಗಲೇ ಅನಿರುದ್ಧ ಮತ್ತು ಎರಿಕಾ ಅವರ ಫೋಟೋಶೂಟ್ ನಡೆದ ಬಗ್ಗೆ ಸುಳಿವು ಸಿಕ್ಕಿದೆ. ಮುಂದಿನ ಕೆಲವು ದಿನಗಳಲ್ಲಿ ನಟಿಯ ಸೀರಿಯಲ್ ಪ್ರವೇಶದ ಬಗ್ಗೆ ಅಧಿಕೃತಿ ಮಾಹಿತಿ ಹೊರಬೀಳಬಹುದು.

ಪ್ರಶಾಂತ್ ನೀಲ್‌ ಮತ್ತು ಯಶ್ ಜೋಡಿಯ ‘ಕೆಜಿಎಫ್‌’ ಸಿನಿಮಾ ಜಗತ್ತಿನ ಗಮನ ಸೆಳೆದದ್ದು ಸರಿಯಷ್ಟೆ. ಸ್ಟೈಲಿಶ್ ಮೇಕಿಂಗ್‌ನಿಂದಾಗಿ ಸಿನಿಮಾ ಸಾಗರದಾಚೆಗೂ ಅಭಿಮಾನಿಗಳನ್ನು ಸೃಷ್ಟಿಸಿಕೊಂಡಿತು. ಇದೀಗ ‘ಕೆಜಿಎಫ್‌-2’ ನಿರೀಕ್ಷೆ ಹೆಚ್ಚಿಸಿದೆ. ಅಮೇರಿಕಾದ ವ್ರೆಸ್ಲರ್‌ ವಿಲ್ಲಿ ಮ್ಯಾಕ್‌ ಮೊನ್ನೆ ತಮ್ಮ ಟ್ವಿಟರ್ ಅಕೌಂಟ್‌ನಲ್ಲಿ ಕೆಜಿಎಫ್‌ – 2 ಟ್ರೈಲರ್ ಹಂಚಿಕೊಂಡು, “ಇದೊಂದು ಅದ್ಭುತ ಟ್ರೈಲರ್‌. ನಾನು ಚಿತ್ರಕ್ಕಾಗಿ ದೊಡ್ಡ ನಿರೀಕ್ಷೆಯೊಂದಿಗೆ ಕಾಯುತ್ತಿದ್ದೇನೆ” ಎಂದು ಬರೆದಿದ್ದಾರೆ. ಕೆಜಿಎಫ್ ಸರಣಿಯ ಮೊದಲ ಸಿನಿಮಾವನ್ನು ಅವರು ತುಂಬಾ ಇಷ್ಟಪಟ್ಟಿದ್ದರಂತೆ. ಇದೀಗ ಸರಣಿ ಸಿನಿಮಾವನ್ನು ಎದುರು ನೋಡುತ್ತಿದ್ದಾರೆ. ಅವರ ಈ ಟ್ವೀಟ್‌ ಕನ್ನಡ ಸಿನಿಮಾ ತಂತ್ರಜ್ಞರು ಸೃಷ್ಟಿಸಿದ ಸಂಚಲನಕ್ಕೆ ಸಾಕ್ಷ್ಯ ನುಡಿಯುತ್ತಿದೆ.

ಕನ್ನಡದ ನಟನೊಬ್ಬ ದೂರದ ಅಮೇರಿಕಾದ ಸೆಲೆಬ್ರಿಟಿ ಅಭಿಮಾನಿಯಿಂದ ಪ್ರಶಂಸೆಗೆ ಒಳಗಾಗಿರುವುದು ಯಶ್ ಅಭಿಮಾನಿಗಳಿಗೆ ಖುಷಿ ತಂದಿದೆ. ಅಭಿಮಾನಿಗಳು ತಮ್ಮ ಸೋಷಿಯಲ್ ಮೀಡಿಯಾ ಅಕೌಂಟ್‌ಗಳಲ್ಲಿ ವಿಲ್ಲಿ ಮ್ಯಾಕ್ ಟ್ವೀಟನ್ನು ಹಂಚಿಕೊಂಡಿದ್ದಾರೆ. ಇದೀಗ ಕೆಜಿಎಫ್‌  2 ಚಿತ್ರದ ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳ ಬಿರುಸಿನಿಂದ ಸಾಗಿದ್ದು, ಜುಲೈ 16ರಂದು ಹಲವು ಭಾಷೆಗಳಲ್ಲಿ ಚಿತ್ರ ತೆರೆಕಾಣಲಿದೆ. ಸರಣಿ ಚಿತ್ರದಲ್ಲಿ ಬಾಲಿವುಡ್ ನಟ ಸಂಜಯ್ ದತ್‌ ಅವರು ‘ಅಧೀರ’ ಖಳ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ನಟಿ ರವೀನಾ ಟಂಡನ್‌ ಅವರಿಗೆ ಪ್ರಧಾನಿ ‘ರಮಿಕಾ ಸೇನ್‌’ ಪಾತ್ರವಿದೆ.

ವರನಟ ಡಾ. ರಾಜ್‌ ಕುಮಾರ್‌ ಪ್ರತಿಮೆ ಸ್ಥಾಪನೆ ವಿವಾದದಲ್ಲಿ ಬೆಂಗಳೂರಿನ ಶಾಂತಿನಗರ ವಿಧಾನ ಸಭಾ ಕ್ಷೇತ್ರದ ಶಾಸಕ ಎನ್.‌ ಎ. ಹ್ಯಾರಿಸ್‌ ಕೊನೆಗೂ ಕ್ಷಮೆ ಕೋರಿದ್ದಾರೆ.

” ನಾನು ಅಣ್ಣಾವ್ರ ಪಕ್ಕಾ ಅಭಿಮಾನಿ. ಅವರ ಬಗ್ಗೆ ಅಪಾರ ಗೌರವವಿದೆ. ಅನೇಕ ಸಲ ಅವರನ್ನು ನೇರವಾಗಿ ಭೇಟಿ ಮಾಡಿ ಮಾತನಾಡಿದ್ದೇನೆ. ಅವರ ಬಗ್ಗೆ ನಾನೆಂದಿಗೂ ಅಗೌರವ ತೋರಿಲ್ಲ. ಯಾರು ಹೇಗೆ ಅರ್ಥೈಸಿದ್ದಾರೋ ನಂಗೆ ಗೊತ್ತಿಲ್ಲ. ವಾಸ್ತವದಲ್ಲಿ ಶಾಂತಿನಗರದಲ್ಲಿ ರಾಜ್‌ ಕುಮಾರ್‌ ಪ್ರತಿಮೆ ಬರೋದಿಕ್ಕೆ ನಾನು ಕೂಡ ಕಾರಣ. ಆದರೆ ಯಾರು ಈ ರೀತಿ ಅಪ ಪ್ರಚಾರ ಮಾಡಿದ್ದರೋ ಅರ್ಥ ಆಗುತ್ತಿಲ್ಲ. ಈ ರೀತಿ ಯಾವುದೇ ಮಾತು ನಾನು ಆಡಿಲ್ಲʼ ಎಂದು ಸ್ಪಷ್ಟನೆ ನೀಡಿದ್ದಾರೆ.

ಆದರೆ ಶಾಸಕ ಹ್ಯಾರಿಸ್‌ ವಿರುದ್ಧ ಸೋಷಲ್‌ ಮೀಡಿಯಾದಲ್ಲಿ ಭಾರೀ ವಿರೋಧ ವ್ಯಕ್ತವಾಗಿದೆ. ಯಾವುದೋ ಭಾಷಿಗನನ್ನು ಇಲ್ಲಿ ಬಿಟ್ಟುಕೊಂಡಿದ್ದರಿಂದಲೇ ಇವತ್ತು ಕನ್ನಡ ಮತ್ತು ಕನ್ನಡದ ಸಾಧಕರಿಗೆ ಅವಮಾನ ಆಗುತ್ತಿದೆ ಎಂದು ಕನ್ನಡ ಸಂಘಟನೆಗಳ ಕಾರ್ಯಕರ್ತರು ಹ್ಯಾರಿಸ್‌ ಅವರನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ. ಇದಾಗುತ್ತಿದ್ದರೆ ಎಚ್ಚೆತ್ತುಕೊಂಡ ಶಾಸಕ ಎನ್.ಎ. ಹ್ಯಾರಿಸ್‌  ತಾವು ಹಾಗೆ ಹೇಳಿಲ್ಲ ಎಂದು ವಿಡಿಯೋ ಮಾಡಿ ಸೋಷಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ಹಾಗಾದ್ರೆ ವಾಸ್ತವ ಏನು? ಹ್ಯಾರಿಸ್‌ ಹಾಗೆ ಹೇಳಿಲ್ಲವೇ?

ವಿವಾದ ಅಗಿದ್ದು ಹೀಗೆ..

ಶಾಂತಿನಗರ ವಿಧಾನ ಸಭಾ ಕ್ಷೇತ್ರದಲ್ಲಿನ ಶಾಂತಿ ಸಾಗರ್‌ ಹೊಟೇಲ್‌ ಬಳಿ   ಡಾ. ರಾಜ್‌ ಕುಮಾರ್‌ ಪ್ರತಿಮೆ ಸ್ಥಾಪನೆ ಮಾಡುವುದಾಗಿ ಕನ್ನಡ ಸಂಘಟನೆಗಳು ಕೋರಿದ್ದವು ಎನ್ನಲಾಗಿದೆ.  ಜತೆಗೆ ಡಾ. ರಾಜ್‌ ಕುಮಾರ್‌ ಹೆಸರಲ್ಲಿ ಒಂದು ಬೋರ್ಡ್‌ ಹಾಕಿಸಲು ಕೂಡ ಅನುಮತಿ ಕೇಳಿದ್ದರು.  ಇತ್ತೀಚೆಗೆ ಅದರ ಪರಿಶೀಲನೆಗೆ ಹೋಗಿದ್ದ ಶಾಸಕ ಹ್ಯಾರಿಸ್‌, ಪ್ರತಿಮೆಗಳೆಲ್ಲ ರಸ್ತೆಗಳಿಗೆ ಬೇಕಾ? ಬೇಕಾದ್ರೆ ಮನೆಯಲ್ಲೇ ಹಾಕಿಸಿಕೊಳ್ಳಿ. ಇವರಿಗೆ ಬುದ್ದಿ ಇಲ್ಲ. ಹೇಳಿದ್ರೆ ಇನ್ನೇನೋ ಮಾಡ್ತಾರೆ ಎಂದಿದ್ದಾರೆ. ಅವರು ಮಾತನಾಡಿರುವ  ಆಡಿಯೋ , ವಿಡಿಯೋ ಸೋಷಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿದೆ.

ಕನ್ನಡ ಸಂಘಟನೆಗಳ ಕಾರ್ಯಕರ್ತರೇ ಅದನ್ನು ಸೋಷಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ.ಈ ವಿಚಾರ ಸೋಷಲ್‌ ಮೀಡಿಯಾದಲ್ಲಿ ಹರಿದಾಡುತ್ತಿದ್ದಂತೆ ಭಾರೀ ವಿವಾದವೇ ಸೃಷ್ಟಿಯಾಯಿತು. ಕನ್ನಡ ಸಂಘಟನೆಗಳು ವಿರೋಧ ವ್ಯಕ್ತಪಡಿಸಿ, ಹ್ಯಾರಿಸ್‌ ಅವರನ್ನು ತರಾಟೆಗೆ ತೆಗೆದುಕೊಂಡಿದ್ದರು.ಇದು ವಿವಾದ ಸೃಷ್ಟಿಸುತ್ತಿದ್ದಂತೆ ಎಚ್ಚೆತ್ತುಕೊಂಡ ಎನ್.‌ ಎ. ಹ್ಯಾರಿಸ್‌ ತಾವು ಹಾಗೆ ಮಾತನಾಡಿಲ್ಲ. ರಾಜ್‌ ಕುಮಾರ್‌ ಅವರ ಬಗ್ಗೆ ಗೌರವವಿದೆ ಅಂತ ವಿವಾದದಿಂದ ತಪ್ಪಿಸಿಕೊಳ್ಳುವ ಯತ್ನ ನಡೆಸಿದ್ದಾರೆ.

‌

ಈಗ ಎಲ್ಲರಿಗೂ ಆ ಮನೆಯದ್ದೇ ಚಿಂತೆ!
ಅರೇ ಹೀಗೆಂದಾಕ್ಷಣ, ಒಂದಷ್ಟು ಪ್ರಶ್ನೆಗಳು ಮೂಡಿಬರೋದು ಸಹಜ. ಇಲ್ಲೀಗ ಹೇಳಹೊರಟಿರುವುದು ಬಿಗ್‌ಬಾಸ್‌ ಮನೆ ಕುರಿತು. ಹೌದು, ಕಲರ್ಸ್ ಕನ್ನಡ ವಾಹಿನಿಯಲ್ಲಿ “ಬಿಗ್ ಬಾಸ್ ಸೀಸನ್ 8” ಕ್ಕೆ ಕ್ಷಣಗಣನೆ ಶುರುವಾಗಿದೆ. ನಟ ಸುದೀಪ್ ಈ ಕಾರ್ಯಕ್ರಮವನ್ನು ನಡೆಸಿಕೊಡುತ್ತಿದ್ದಾರೆ. ಈ ಹಿಂದೆ ನಡೆಸಿಕೊಟ್ಟಿರುವ ಅಷ್ಟೂ ಸೀಸನ್‌ಗಳೂ ಸಾಕಷ್ಟು ಮೆಚ್ಚುಗೆ ಪಡೆದಿವೆ. ಈಗ ಎಂಟನೇ ಆವೃತ್ತಿಗೆ ಸಜ್ಜಾಗಿದೆ ಬಿಗ್‌ಬಾಸ್‌ ಟೀಮ್.‌ ಫೆಬ್ರವರಿ 28ರ ಸಂಜೆ 6ಕ್ಕೆ “ಬಿಗ್‌ಬಾಸ್‌” ಗ್ರ್ಯಾಂಡ್‌ ಓಪನಿಂಗ್‌ ಪಡೆಯಲಿದೆ. ಸದ್ಯಕ್ಕೆ ಬಿಗ್‌ಬಾಸ್‌ ಮನೆಗೆ ಈ ಬಾರಿ ಯಾರೆಲ್ಲಾ ಹೋಗಲಿದ್ದಾರೆ ಎಂಬುದು ಇನ್ನೂ ಗೌಪ್ಯವಾಗಿದೆ.

ಆ ಪಟ್ಟಿಯಲ್ಲಿ ಯಾರೆಲ್ಲಾ ಇದ್ದಾರೆ ಎಂಬುದು ಬಿಗ್‌ಬಾಸ್‌ ನಡೆಸಿಕೊಡಲಿರುವ ಸುದೀಪ ಅವರನ್ನೊಳಗೊಂಡಂತೆ ಬಿಗ್‌ಬಾಸ್‌ ತಂಡಕ್ಕೆ ಮಾತ್ರ ಗೊತ್ತಿದೆ. ಸದ್ಯಕ್ಕೆ ಎಲ್ಲರಿಗೂ ಬಿಗ್‌ಬಾಸ್‌ ಮೇಲೆ ಕಣ್ಣು. ಆದರೆ, ಬಿಗ್‌ಬಾಸ್‌ ಮಾತ್ರ ಆ ಮನೆಯೊಳಗಿರುವ ಸ್ಪರ್ಧಿಗಳ ಮೇಲೆ ಕಣ್ಣು. ಇಲ್ಲಿ ಯಾರ ಕಣ್ಣು ಯಾರ ಮೇಲಿದೆಯೋ ಗೊತ್ತಿಲ್ಲ. ಆದರೆ, ಈ ಬಾರಿ ಒಂದಷ್ಟು ಕುತೂಹಲ ಕೆರಳಿಸಿರುವುದಂತೂ ನಿಜ. ಅದಕ್ಕೆ ಕಾರಣ, ಇನ್ನೂ ಸ್ಪರ್ಧಿಗಳು ಯಾರು ಅನ್ನೂವುದು. ಅಂದಹಾಗೆ, ಇತ್ತೀಚೆಗಷ್ಟೇ, ಸುದೀಪ್‌ ಸ್ವಾಮೀಜಿ ಗೆಟಪ್‌ನಲ್ಲಿ ಕಾಣಿಸಿಕೊಂಡು, ಬಿಗ್‌ಬಾಸ್‌ ಮನೆ ಆರಂಭಕ್ಕೆ ದಿನಾಂಕ ನಿಗದಿ ಮಾಡಿದ್ದರು. ವಿಭಿನ್ನ ಯೋಚನೆಯ ಜಾಹಿರಾತು ಮೂಲಕ ಬಿಗ್‌ಬಾಸ್‌ ಸೀಸನ್‌ ೮ಕ್ಕೆ ಡೇಟ್‌ ಫಿಕ್ಸ್‌ ಮಾಡಲಾಗಿದೆ. ಸದ್ಯಕ್ಕೆ ನೂರು ದಿನಗಳ ಕಾಲ ಆ ಮನೆಯಲ್ಲಿ ಯಾರೆಲ್ಲಾ ಇರುತ್ತಾರೆ, ಈ ಬಾರಿ ಎಂಥೆಂಥಾ ಪ್ರಸಂಗಗಳು ನಡೆಯುತ್ತವೆ ಎನ್ನುವುದನ್ನು ಕಾದು ನೋಡಬೇಕಿದೆ.