Category: ಸಿನಿ ಸುದ್ದಿ

ಜನಪ್ರಿಯ ನಟಿ ತಾರಾ ಅನುರಾಧ ತಮ್ಮ ಇದುವರೆಗಿನ ತಮ್ಮ ಸಿನಿಜರ್ನಿಯಲ್ಲಿ ಪಡೆದ ಪ್ರಶಸ್ತಿಗಳೆಷ್ಟು ? ರಾಷ್ಟ್ರ ಪ್ರಶಸ್ತಿ, ರಾಜ್ಯ ಪ್ರಶಸ್ತಿಗಳು ಸೇರಿದಂತೆ ಅವಕ್ಕೇನು ಲೆಕ್ಕವೇ ಇಲ್ಲ. ಅಷ್ಟೊಂದು ಅನುಭವಿ ಮತ್ತು ಜನಪ್ರಿಯ ನಟಿ ತಾರಾ. ಇಷ್ಟಾಗಿಯೂ ಅವರಿಗೆ ಇದೊಂದು ತುಂಬಾ ತುಂಬಾ ಸ್ಪೆಷಲ್‌ ಅವಾರ್ಡ್.‌ ಅದುವೇ ಚಂದನವನ ಫಿಲ್ಮ್‌ ಕ್ರಿಟಿಕ್ಸ್‌ ಅವಾರ್ಡ್.‌ ಯಾಕಂದ್ರೆ, ಚಿತ್ರರಂಗ ಮತ್ತು ಸಿನಿಮಾ ಪತ್ರಿಕೋದ್ಯಮ ಅನ್ನೋದೇ ಒಂದು ಮನೆಯಿದ್ದಂತೆ. ಆ ಮನೆಯವರೇ ಕೊಟ್ಟ ಈ ಪ್ರಶಸ್ತಿ ಮಿಕ್ಕೆಲ್ಲ ಪ್ರಶಸ್ತಿಗಿಂತ ತುಂಬಾ ಸ್ಪೆಷಲ್‌ ಅನ್ನೋದು ತಾರಾ ಅಭಿಪ್ರಾಯ.

ʼಶಿವಾರ್ಜುನʼ ಚಿತ್ರದಲ್ಲಿನ ತಮ್ಮ ಅಭಿನಯಕ್ಕೆ ಅವರು ಅತ್ಯುತ್ತಮ ಪೋಷಕ ನಟಿ ಪ್ರಶಸ್ತಿಗೆ ಪಾತ್ರವಾದರು. ಉಳಿದಂತೆ ಪ್ರಶಸ್ತಿ ಸಮಾರಂಭ, ಪ್ರಶಸ್ತಿ ಸ್ವೀಕಾರ ಅನ್ನೋದು ತಾರಾ ಅವರಿಗೇನು ಹೊಸದಲ್ಲ. ಅಂತಹ ಅದೆಷ್ಟು ಸಮಾರಂಭಕ್ಕೆ ಹೋಗಿ ಬಂದಿದ್ದಾರೋ ಅವರಿಗೇ ಗೊತ್ತು. ಅದಾಗ್ಯೂ, ಚಂದನವನ ಫಿಲ್ಮ್‌ ಕ್ರಿಟಿಕ್ಸ್‌ ಅವಾರ್ಡ್‌ ಸ್ವೀಕಾರಕ್ಕೆ ಅವರು ಬಂದಿದ್ದೇ ತುಂಬಾ ಸ್ಪೆಷಲ್.‌ ಸಭೆ-ಸಮಾರಂಭಗಳೇ ಇರಲಿ, ಸಿನಿಮಾ ಕಾರ್ಯಕ್ರಮಗಳೇ ಇರಲಿ, ಅಲ್ಲೆಲ್ಲ ನಟಿ ತಾರಾ ಅವರು ಪಕ್ಕಾ ಸಂಪ್ರಾದಾಯಸ್ಥ ನಾರಿಯಂತೆ ಮೈ ತುಂಬಾ ಸೀರೆ ಉಟ್ಟುಕೊಂಡೇ ಕಾಣಿಸಿಕೊಳ್ಳುವುದು ನಿಮಗೂ ಗೊತ್ತು. ಫಾರ್‌ ಎ ಚೇಂಜ್‌, ಚಂದನವನ ಫಿಲ್ಮ್‌ ಕ್ರಿಟಿಕ್ಸ್‌ ಅವಾರ್ಡ್‌ ಸ್ವೀಕಾರಕ್ಕೆ ತಾರಾ ಬಂದಿದ್ದೇ ಡಿಫೆರೆಂಟ್.

ಕನಕಾಂಬರ ಬಣ್ಣದ ಲೆಹಂಗಾ ಧರಿಸಿ ವೇದಿಕೆಯಲ್ಲಿ ಕಾಣಸಿಕೊಂಡರು ನಟಿ ತಾರಾ. ಅದೇನೋ ಗೊತ್ತಿಲ್ಲ, ಎಲ್ಲರೂ ಅವರ ಡ್ರಸ್‌ ಬಗ್ಗೆಯೇ ಗುಸು ಗುಸು ಶುರು ಮಾಡಿದರು. ಅದೇಗೋ ಅವರಿಗೆ ಗೊತ್ತಾಯಿತು. ಮೈಕ್‌ ಹಿಡಿದು ಮಾತಿಗೆ ನಿಂತರು ತಾರಾ. ” ಈ ತರಹದ ಬಟ್ಟೆ ಹಾಕಿಕೊಂಡ್‌ ಬಾಳಾ ದಿನ ಆಯ್ತು. ನಂಗೆ ಪರಿಚಯ ಇರೋ ಒಬ್ರು ಡ್ರೆಸ್‌ ಡಿಸೈನರ್‌ ಇದ್ದಾರೆ. ನಾನೊಂದ್‌ ಅವಾರ್ಡ್‌ ಪಂಕ್ಷನ್‌ ಹೋಗ್ತಿದ್ದೀನಿ ಅಂದಾಗ ಅವ್ರು ಹೇಳಿದ್ದು ಈ ಡ್ರೆಸ್‌ ಬಗ್ಗೆ. ಮೇಡಂ, ತುಂಬಾ ದಿನಗಳಿಂದ ಈ ಬಟ್ಟೆ ಹೊಲಿಸಿಕೊಂಡ್‌ ಹಾಗೆ ಇಟ್ಟಿದ್ದೀರಿ, ಇದ್ನೆ ಹಾಕ್ಕೊಂಡ್‌ ಹೋಗಿ. ಚೆನ್ನಾಗಿರುತ್ತೆ ಅಂತಂದ್ರು. ಅವ್ರಿಗೆ ಬೇಡ ಅನ್ನಲಾಗ್ದೆ ಇದ್ನೆ ಹಾಕ್ಕೊಂಡ್‌ ಬಂದೆ ʼʼ ಅಂತ ಲೆಹಂಗಾ ತೊಟ್ಟು ಬಂದಿದ್ದರ ಸ್ಪೆಷಲ್‌ ವಿವರಿಸಿದ್ರು ನಟಿ ತಾರಾ.

ಆನಂತರ ಚಂದನವನ ಪ್ರಶಸ್ತಿಗೆ ಪ್ರತಿಕ್ರಿಯಿಸಿದರು. ” ಪ್ರಶಸ್ತಿ ಉತ್ಸಾಹ, ಖುಷಿ ಎಲ್ಲವೂ ನಿಜ. ಪ್ರತಿಸಲ ಬಂದಾಗಲೂ ನನಗೆ ಭಯವಾಗುತ್ತದೆ, ವಿನಃ ಸಂತೋಷಕ್ಕಿಂತ ಹೆಚ್ಚು ಭಯವೇ ಆಗುತ್ತದೆ. ಶ್ಯಾಮ್‌ ಪ್ರಸಾದ್‌ ಹಾಗೂ ಶರಣು ಹುಲ್ಲೂರು ನನ್ನ ಕರೆದಾಗ ಯಾರಿಗಾದರೂ ಪ್ರಶಸ್ತಿ ಕೊಡಲು ಕರೆದಿರುತ್ತಾರೆ ಅಂತ ಅಂದುಕೊಂಡಿದ್ದೆ. ಅವಾರ್ಡ್‌ ಕೊಟ್ಟೇ ರೂಢಿಯಾದ ನನಗೆ ಅವಾರ್ಡ್‌ ಸ್ವೀಕರಿಸೋ ಸಮಯ ಬಂದಿರಲೇ ಇಲ್ಲ. ನನ್ನ ಜೊತೆ ಕಾಂಪೀಟ್‌ ಮಾಡಿದ ಎಲ್ಲರಿಗೂ ಈ ಅವಾರ್ಡ್‌ ಸಲ್ಲುತ್ತದೆ. ಶಿವಾರ್ಜುನ ಸಿನಿಮಾದಲ್ಲಿ ಅವಕಾಶ ನೀಡಿದ ನಿರ್ಮಾಪಕ, ನಿರ್ದೇಶಕರಿಗೆ ಕೂಡ ಅವಾರ್ಡ್‌ ಸಲ್ಲುತ್ತದೆ. ಮಾತೃಸಂಸ್ಥೆ ಅಂತ ಕರೆಯಲ್ಪಡುವ ಫಿಲಂ ಚೇಂಬರ್‌ ಅಧ್ಯಕ್ಷರಿಂದ ಪ್ರಶಸ್ತಿ ಪಡೆದುಕೊಳ್ಳುವುದು ಖುಷಿ ತಂದಿದೆ ಎಂದರು ನಟಿ ತಾರಾ.

ತುಪ್ಪದ ಬೆಡಗಿ ರಾಗಿಣಿ ಈಗ ಒಂದಷ್ಟು ನಿರಾಳತೆಯಲ್ಲಿದ್ದಾರೆ. ಜಾಮೀನು ಮೇಲೆ ಜೈಲಿನಿಂದ ಹೊರ ನಂತರ ಫ್ಯಾಮಿಲಿ ಜತೆಗೆ ಟೆಂಪಲ್‌ ರನ್‌ ನಡೆಸಿದ್ರು. ಅದರ ಜತೆಗೀಗ ಸಿನಿಮಾ ಚಟುವಟಿಕೆಗಳಲ್ಲಿ ಬ್ಯುಸಿ ಅಗಿದ್ದಾರೆ. ಸದ್ಯಕ್ಕೆ ಅವರ ಹೊಸ ಸಿನಿಮಾ ಯಾವುದು ಎನ್ನುವುದು ಇನ್ನು ಖಚಿತ ಆಗಿಲ್ಲ. ಈ ನಡುವೆಯೇ ಆನ್‌ ಸ್ಕ್ರೀನ್‌ ಮೇಲೆ ರಾಗಿಣಿ ಬಯೋಪಿಕ್‌ ಬರಲಿದೆ ಎನ್ನುವ ಸುದ್ದಿ ಇದೆ.

ಇದು ಎಷ್ಟರ ಮಟ್ಟಿಗೆ ಗ್ಯಾರಂಟಿಯೋ ಗೊತ್ತಿಲ್ಲ. ಹಾಗೊಂದು ಸುದ್ದಿ ಮಾತ್ರ ಅವರ ಆಪ್ತ ವಲಯದಿಂದ ಕೇಳಿ ಬಂದಿದ್ದು ಹೌದು. ಹಾಗಾದ್ರೆ , ಸಿನಿಮಾ ಮಾಡುವಷ್ಟು ರಾಗಿಣಿ ಸಾಧನೆ ಮಾಡಿದ್ದೇನು ? ಗೊತ್ತಿಲ್ಲ. ಆದರೆ ಇತ್ತೀಚೆಗೆ ಅವರು ಡ್ರಗ್ಸ್‌ ಪ್ರಕರಣದಲ್ಲಿ ಭಾರೀ ಸುದ್ದಿ ಆಗಿದ್ದು ನಿಮಗೆಲ್ಲ ಗೊತ್ತೇ ಇದೆ. ಇದರಲ್ಲಿ ರಾಗಿಣಿ ಅವರ ಪಾತ್ರ ಏನು? ಅವರ ಸುತ್ತ ಏನೆಲ್ಲ ಆಯಿತು? ಇತ್ಯಾದಿ ಕುರಿತೇ ಸಿನಿಮಾ ಮಾಡಲು ಹೊರಟಿದೆಯಂತೆ ಒಂದು ಚಿತ್ರ ತಂಡ.

ʼರಾಮಾ ರಾಮಾ ರೇʼ ಚಿತ್ರದ ಖ್ಯಾತಿಯ ನಟ ನಟರಾಜ್‌ ಇಂದು (ಫೆ.21) ಹುಟ್ಟು ಹಬ್ಬದ ಸಂಭ್ರಮದಲ್ಲಿದ್ದಾರೆ. ʼಕಳ್ಳಬೆಟ್ಟದ ದರೋಡೆಕೋರರುʼ ಚಿತ್ರ ಬಂದು ನಂತರದ ಒಂದಷ್ಟು ಗ್ಯಾಪ್‌ ಬಳಿಕ ಈಗವರು ಸುದೀರ್‌ ಶಾನ್‌ ಬೋಗ್‌ ನಿರ್ದೇಶನದʼ ಮಾರೀಚʼ ಚಿತ್ರದಲ್ಲಿ ಸಿಸಿಬಿ ಪೊಲೀಸ್‌ ಆಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಒಂದರೆಡು ಚಿತ್ರಗಳ ಮಾತುಕತೆಯಲ್ಲಿ ಬ್ಯುಸಿಯಾಗಿರುವ ನಟರಾಜ್‌, ಈ ನಡುವೆಯೇ ಮಂಗಳವಾರ ತುಂಬಾ ಸರಳವಾಗಿಯೇ ಹುಟ್ಟು ಆಚರಿಸಿಕೊಂಡರು.

ಮತ್ತೊಂದೆಡೆ ನಟನೆಯ ಆಚೆ ʼರಾಮಾ ರಾಮಾ ರೇʼ ಚಿತ್ರದ ಖ್ಯಾತಿಯ ನಿರ್ದೇಶಕ ಸತ್ಯ ಪ್ರಕಾಶ್‌ ಜತೆಗೂಡಿ “ಸತ್ಯ ಪಿಕ್ಚರ್ಸ್‌ʼ ಸಂಸ್ಥೆ ಹುಟ್ಟು ಹಾಕಿರುವ ನಟರಾಜ್‌, ಮುಂದಿನ ದಿನಗಳಲ್ಲಿ ಸಿನಿಮಾ ನಿರ್ಮಾಣಕ್ಕೂ ಮುಂದಾಗಲು ರೆಡಿಯಾಗಿದ್ದಾರೆ. ಬೆಂಗಳೂರಿನ ಜಯನಗರದಲ್ಲಿರುವ ʼಸತ್ಯ ಪಿಕ್ಚರ್ಸ್‌ʼ ಕಚೇರಿಯಲ್ಲಿ ಮೊನ್ನೆಯಷ್ಟೇ ವಿಶೇಷ ಪೂಜೆ ಹಮ್ಮಿಕೊಂಡಿದ್ದರು. ಚಿತ್ರರಂಗ ಸಾಕಷ್ಟು ಗಣ್ಯರು ಆದಿನ ಅಲ್ಲಿಗೆ ಬಂದು ಸತ್ಯ ಪ್ರಕಾಶ್‌ ಅಂಡ್‌ ಟೀಮ್‌ ಗೆ ಶುಭಾಶಯ ಕೋರಿದರು. ಕಚೇರಿ ನವೀಕರಣದ ಹಿನ್ನೆಲೆಯಲ್ಲಿ ಸತ್ಯ ಪ್ರಕಾಶ್‌ ತಮ್ಮ ಕಚೇರಿಯಲ್ಲಿ ವಿಶೇಷ ಪೂಜೆ ಹಮ್ಮಿಕೊಂಡಿದ್ದರೂ, ಮುಂದಿನ ದಿನಗಳಲ್ಲಿ ಸಿನಿಮಾ ನಿರ್ಮಾಣ ಹಾಗೂ ನಿರ್ದೇಶನಕ್ಕಿಳಿಯುವುದರ ಭಾಗವಾಗಿಯೇ ಈ ಪೂಜೆ ನೆರವೇರಿದ್ದು ಸುಳ್ಳಲ್ಲ.

ಕಚೇರಿ ಪೂಜೆ ವೇಳೆ ಔಪಾಚಾರಿಕವಾಗಿ ಮಾತಿಗಿಳಿದ ನಿರ್ದೇಶಕ ಸತ್ಯ ಪ್ರಕಾಶ್‌, ಎಲ್ಲವೂ ಅಂದುಕೊಂಡಂತಾಗಿದ್ದರೆ ಈಗ ಹೊಸ ಪ್ರಾಜೆಕ್ಟ್‌ ಶುರುವಾಗಬೇಕಿತ್ತು. ಕೊರೋನಾ ಹಿನ್ನೆಲೆಯಲ್ಲಿ ಎಲ್ಲವೂ ಏರುಪೇರಾಯಿತು. ಈಗ ಒಂದಷ್ಟು ಸಿದ್ಧತೆ ನಡೆದಿದೆ. ಅವಕ್ಕೀಗ ಚಾಲನೆ ನೀಡಬೇಕಿದೆ. ಈ ನಿಟ್ಟಿನಲ್ಲಿಯೇ ಕಚೇರಿ ನವೀಕರಣ ಕೆಲಸ ನಡೆದಿದೆ. ಅದರ ಭಾಗವಾಗಿಯೇ ಪೂಜೆ ನಡೆದಿದೆ. ಇನ್ನೇನು ಹದಿನೈದಿಪ್ಪತ್ತು ದಿನಗಳಲ್ಲಿ ಹೊಸ ಪ್ರಾಜೆಕ್ಟ್‌ ಅನೌನ್ಸ್‌ ಆಗಲಿದೆ. ಸದ್ಯಕ್ಕೆ ನಾವೆಲ್ಲ ಅದೇ ಕೆಲಸದಲ್ಲೇ ಬ್ಯುಸಿ ಆಗಿದ್ದೇವೆ ಎಂದರು.

ರಾಮಾ ರಾಮಾ ರೇ ಚಿತ್ರದ ಮೂಲಕವೇ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿದ ಹಾಸ್ಯ ನಟ ಧರ್ಮಣ್ಣ ಕೂಡ ಸತ್ಯ ಟೀಮ್‌ ನಲ್ಲಿದ್ದಾರೆ. ಇದೀಗ ಯುವ ನಿರ್ದೇಶಕ ದೀಪಕ್‌ ಮಧುವನಹಳ್ಳಿ ಕೂಡ ಸಾಥ್‌ ನೀಡಿದ್ದಾರೆ. ಒಟ್ಟಾರೆ ಸಿನಿಮಾಸಕ್ತ ಯುವ ಉತ್ಸಾಹಿಗಳ ಒಂದು ತಂಡವೇ ಈಗ ನಿರ್ಮಾಣ ಮತ್ತು ನಿರ್ದೇಶನದತ್ತ ಸಕಲ ಸಿದ್ಧತೆಯೊಂದಿಗೆ ರೆಡಿಯಾಗುತ್ತಿರುವುದು ಒಳ್ಳೆಯ ವಿಚಾರವೆ ಹೌದು. ಆಲ್‌ ದಿ ಬೆಸ್ಟ್‌ ಸತ್ಯ ಅಂಡ್‌ ಟೀಮ್.

2018ರಲ್ಲಿ ‘ಜೀರೋ’ ಚಿತ್ರದ ನಂತರ ಶಾರುಖ್‌ ಖಾನ್‌ ಅವರ ಸಿನಿಮಾ ಬಿಡುಗಡೆಯಾಗಿಲ್ಲ. ಈ ಚಿತ್ರ ಬಾಕ್ಸ್ ಆಫೀಸ್‌ನಲ್ಲಿ ವಿಫಲವಾಯ್ತು. ಖಾನ್ ಅಭಿಮಾನಿಗಳು ತಮ್ಮ ನೆಚ್ಚಿನ ನಟನ ಹೊಸ ಚಿತ್ರಕ್ಕಾಗಿ ಎದುರು ನೋಡುತ್ತಿದ್ದಾರೆ. ಸದ್ಯ ಶಾರುಖ್‌ರ ‘ಪಠಾಣ್‌’ ಸಿನಿಮಾ ಚಿತ್ರೀಕರಣದಲ್ಲಿದೆ. ಈ ಮಧ್ಯೆ ‘ಮುನ್ನಾಭಾಯ್ ಎಂಬಿಬಿಎಸ್‌’ ಸಿನಿಮಾ ಖ್ಯಾತಿಯ ರಾಜಕುಮಾರ್ ಹಿರಾನಿ ಅವರು ಶಾರುಖ್‌ಗೆ ಚಿತ್ರಕಥೆ ಹೆಣೆಯುತ್ತಿದ್ದಾರೆ. ಈ ಚಿತ್ರದಲ್ಲಿ ಖಾನ್‌ಗೆ ನಾಯಕಿಯಾಗಿ ತಾಪ್ಸಿ ನಟಿಸುವುದು ಖಾತ್ರಿಯಾಗಿದೆ.

ಹಿರಾನಿ ನಿರ್ದೇಶನದ ಈ ಚಿತ್ರ ಶಾರುಖ್‌ ಖಾನ್‌ ಜೊತೆ ತಾಪ್ಸಿಗೆ ಮೊದಲ ಪ್ರಯೋಗ. ಆದರೆ ಈ ಹಿಂದೆ ಖಾನ್ ನಿರ್ಮಾಣದ ‘ಬದ್ಲಾ’ ಚಿತ್ರದಲ್ಲಿ ತಾಪ್ಸಿ ನಟಿಸಿದ್ದರು. ಅಮಿತಾಭ್ ಬಚ್ಚನ್‌ ಮುಖ್ಯಭೂಮಿಕೆಯಲ್ಲಿದ್ದ ಈ ಕ್ರೈಂ-ಥ್ರಿಲ್ಲರ್ ಪ್ರೇಕ್ಷಕರ ಮೆಚ್ಚುಗೆಗೆ ಪಾತ್ರವಾಗಿತ್ತು. ಈಗ ತಾಪ್ಸಿ ಅವರು ಶಾರುಖ್‌ಗೆ ಜೋಡಿಯಾಗುವ ಅವಕಾಶ ಪಡೆದಿದ್ದಾರೆ. ಹಿರಾನಿ ಹೊಸ ಸಿನಿಮಾ ಒಂದು ಸೋಷಿಯಲ್‌ – ಡ್ರಾಮಾ ಎನ್ನಲಾಗಿದೆ. ಪಂಜಾಬ್‌ನಿಂದ ಕೆನಡಾಗೆ ವಲಸೆ ಹೋಗುವ ವ್ಯಕ್ತಿಯಾಗಿ ಶಾರುಖ್‌ ಇಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.

ಇನ್ನು ಶಾರುಖ್‌ ನಟನೆಯ ‘ಪಠಾಣ್‌’ ಚಿತ್ರದ ಬಗ್ಗೆ ಅವರ ಅಭಿಮಾನಿಗಳು ಸಾಕಷ್ಟು ನಿರೀಕ್ಷೆ ಹೊಂದಿದ್ದಾರೆ. ಚಿತ್ರದಲ್ಲಿನ ಶಾರುಖ್ ಗೆಟ್‌ಅಪ್ ಹೊರಬಿದ್ದಿದ್ದು, ಅಭಿಮಾನಿಗಳು ಅವರ ಹೇರ್‌ಸ್ಟೈಲ್ ಕಾಪಿ ಮಾಡತೊಡಗಿದ್ದಾರೆ. ಮತ್ತೊಂದೆಡೆ ನಟಿ ತಾಪ್ಸಿ ಮೊನ್ನೆ ‘ಲೂಪ್‌ ಲಪೇಟಾ’ ಸಿನಿಮಾ ಪೂರ್ಣಗೊಳಿಸಿದ್ದು, ಸದ್ಯ ‘ದೊ ಬಾರಾ’ ಚಿತ್ರೀಕರಣದಲ್ಲಿದ್ದಾರೆ. ಇದಾದ ನಂತರ ‘ರಶ್ಮಿ ರಾಕೆಟ್‌’ನಲ್ಲಿ ನಟಿಸಲಿದ್ದು, ಅದು ಪೂರ್ಣಗೊಂಡ ನಂತರ ಶಾರುಖ್‌ ಸಿನಿಮಾಗೆ ಬರುತ್ತಾರೆ. ವಿಶಿಷ್ಠ ಸಿನಿಮಾಗಳ ಮೂಲಕ ಪ್ರೇಕ್ಷಕರ ಮೆಚ್ಚುಗೆಗೆ ಪಾತ್ರರಾಗಿರುವ ತಾಪ್ಸಿ, ಶಾರುಖ್ ಜೋಡಿಯಾಗಿ ಹೇಗೆ ಕಾಣಿಸಿಕೊಳ್ಳಬಹುದು ಎಂದು ಅಭಿಮಾನಿಗಳು ಕುತೂಹಲದಿಂದ ಎದುರು ನೋಡುತ್ತಿದ್ದಾರೆ.

ಬಾಲಿವುಡ್ ನಟಿ ಕತ್ರಿನಾ ಕೈಫ್‌ ಕಿರಿಯ ಸಹೋದರಿ ಇಸಬೆಲ್ಲಾ ಕೈಫ್‌ ಬೆಳ್ಳಿತೆರೆಗೆ ಪದಾರ್ಪಣೆಗೆ ವೇದಿಕೆ ಸಜ್ಜಾಗಿದೆ. ರೂಪದರ್ಶಿಯಾಗಿದ್ದ ಅವರು ಸೂಕ್ತ ತರಬೇತಿಯೊಂದಿಗೆ ನಟಿಯಾಗುತ್ತಿದ್ದಾರೆ. ಅವರ ಚೊಚ್ಚಲ ಹಿಂದಿ ಸಿನಿಮಾ ‘ಟೈಂ ಟು ಡ್ಯಾನ್ಸ್‌’ ಫಸ್ಟ್ ಲುಕ್‌ ಬಿಡುಗಡೆಯಾಗಿದೆ. ಸೂರಜ್ ಪಾಂಚೋಲಿ ಚಿತ್ರದ ಹೀರೋ. ಸಿನಿಮಾ ಮಾರ್ಚ್‌ 12ರಂದು ತೆರೆಕಾಣಲಿದೆ ಎಂದು ಚಿತ್ರತಂಡ ಬಿಡುಗಡೆ ದಿನಾಂಕವನ್ನೂ ಘೋಷಿಸಿದೆ. ರಿಲೀಸ್ ಡೇಟ್ ಜೊತೆ ಪೋಸ್ಟರ್‌ಗಳೂ ಹೊರಬಿದ್ದಿದ್ದು, ಇದೊಂದು ಡ್ಯಾನ್ಸ್ ಸಿನಿಮಾ ಎನ್ನುವುದು ತಿಳಿದುಬರುತ್ತದೆ.

ಪೋಸ್ಟರ್‌ಗಳು ಹೇಳುವಂತೆ ಇಲ್ಲಿ ಇಸಬೆಲ್ಲಾ ಮತ್ತು ಸೂರಜ್‌ ಇಬ್ಬರೂ ಡ್ಯಾನ್ಸ್ ಸ್ಪರ್ಧಿಗಳಂತೆ ತೋರುತ್ತಾರೆ. ಹಿನ್ನೆಲೆಯಲ್ಲಿ ಪ್ರಶಸ್ತಿ ಫಲಕಗಳಿದ್ದು, ನಟ-ನಟಿ ನೃತ್ಯದ ಪೋಸು ಕೊಟ್ಟಿದ್ದಾರೆ. “ಬದುಕು ಪರೀಕ್ಷೆಗೊಳಪಟ್ಟಾಗ ನೃತ್ಯವೇ ಉತ್ತರ’ ಎನ್ನುವ ಒಕ್ಕಣಿಯೂ ಇದೆ.

ನಟಿ ಕತ್ರಿಕಾ ಕೈಫ್ ಕಳೆದ ವರ್ಷ ತಮ್ಮ ಸಹೋದರಿ ಇಸಬೆಲ್ಲಾರ ಸಿನಿಮಾ ‘ಕ್ವಾಥಾ’ ಕುರಿತು ಸೋಷಿಯಲ್ ಮಿಡಿಯಾದಲ್ಲಿ ಬರೆದಿದ್ದರು. ಆದರೆ ಈ ಸಿನಿಮಾ ಸ್ಥಗಿತಗೊಂಡಿತು. ಇದೀಗ ಅವರು ‘ಟೈಂ ಟು ಡ್ಯಾನ್ಸ್‌’ ಚಿತ್ರದೊಂದಿಗೆ ಬಾಲಿವುಡ್‌ ಪ್ರವೇಶಿಸುತ್ತಿದ್ದಾರೆ.

 ರಮ್ಯಕೃಷ್ಣ ದಕ್ಷಿಣ ಭಾರತದ ಜನಪ್ರಿಯ ನಟಿ. ತೊಂಬತ್ತರ ದಶಕದಲ್ಲಿ ನಾಯಕಿಯಾಗಿ ಮಿಂಚಿದ ಅವರು ಇದೀಗ ಪೋಷಕ ಪಾತ್ರಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ‘ಬಾಹುಬಲಿ’ ಚಿತ್ರದ ಶಿವಗಾಮಿ ಪಾತ್ರ ಅವರಿಗೆ ದೊಡ್ಡ ಮನ್ನಣೆ ತಂದುಕೊಟ್ಟಿತ್ತು. ಸಿನಿಮಾ ಜೊತೆಜೊತೆಗೆ ಕಿರುತೆರೆಯಲ್ಲೂ ಸಕ್ರಿಯರಾಗಿರುವ ನಟಿ ಇದೀಗ ಕನ್ನಡ ಕಿರುತೆರೆ ಪ್ರವೇಶಿಸುತ್ತಿದ್ದಾರೆ. ‘ನಾಗಭೈರವಿ’ ತೆಲುಗು ಸರಣಿಯ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದು, ಈ ಧಾರಾವಾಹಿಯ ಕನ್ನಡ ಅವತರಣಿಕೆ ಜೀ ಕನ್ನಡ ವಾಹಿನಿಯಲ್ಲಿ ಮೂಡಿಬರಲಿದೆ.

ಕಳೆದ ವರ್ಷಾಂತ್ಯದಲ್ಲಿ ತೆಲುಗಿನಲ್ಲಿ ಪ್ರಸಾರವಾದ ‘ನಾಗಭೈರವಿ’ ಇದೀಗ ಕನ್ನಡಕ್ಕೆ ಬರುತ್ತಿದೆ. ವರನಾಂಜನೇಯುಲು ನಿರ್ದೇಶನದ ಈ ಸರಣಿ ತೆಲುಗು ನಾಡಿನಲ್ಲಿ ಜನಪ್ರಿಯವಾಗಿದೆ. ಇದೀಗ ಮಾರ್ಚ್‌ 1ರಿಂದ ಕನ್ನಡದಲ್ಲಿ ಪ್ರಸಾರವಾಗುತ್ತಿರುವ ಇದು ಫ್ಯಾಂಟಸಿ, ಸಸ್ಪೆನ್ಸ್‌ ಸರಣಿ. ಅದ್ಧೂರಿ ಮೇಕಿಂಗ್‌, ಆಕರ್ಷಕ ವಿಶ್ಯುಯಲ್‌ ಎಫೆಕ್ಟ್‌ ಇಲ್ಲಿನ ಹೈಲೈಟ್‌. ದೇಶದಲ್ಲಿ ನಾಗದೇವತೆ ಕುರಿತ ನಂಬಿಕೆ ಸುತ್ತಮುತ್ತ ಕತೆ ಹೆಣೆಯಲಾಗಿದೆ. ಪ್ರಾಚೀನ ಆರೋಗ್ಯ ಗ್ರಂಥ ಚರಕ ಸಂಹಿತಾ ಕುರಿತೂ ಇಲ್ಲಿ ಪ್ರಸ್ತಾಪವಾಗಲಿದೆ.

ನಟಿ ರಮ್ಯಾ ಕೃಷ್ಣ ಅವರು ಕನ್ನಡಿಗರಿಗೆ ಚಿರಪರಿಚಿತ ನಟಿ. ಎಂಬತ್ತರ ದಶಕದ ಕೊನೆಯಲ್ಲಿ ತೆರೆಕಂಡ ‘ಕೃಷ್ಣರುಕ್ಮಿಣಿ’ ಚಿತ್ರದೊಂದಿಗೆ ಕನ್ನಡ ಬೆಳ್ಳಿತೆರೆ ಪ್ರವೇಶಿಸಿದ ಅವರು ಗಡಿಬಿಡಿ ಗಂಡ, ಮಾಂಗಲ್ಯಂ ತಂತು ನಾನೇನಾ, ಸ್ನೇಹ, ಏಕಾಂಗಿ, ಬಾ ಬಾರೋ ರಸಿಕ, ರಕ್ತಕಣ್ಣೀರು, ರಾಜಾ ನರಸಿಂಹ, ಮಾಣಿಕ್ಯ, ಅಂಜನೀಪುತ್ರ ಸೇರಿದಂತೆ ಹಲವಾರು ಕನ್ನಡ ಚಿತ್ರಗಳಲ್ಲಿ ನಟಿಸಿದ್ದಾರೆ. ಅವರು ಪ್ರಮುಖ ಪಾತ್ರದಲ್ಲಿ ನಟಿಸಿರುವ ‘ಶಿವಗಾಮಿ’ ಸಿನಿಮಾ ತೆರೆಗೆ ಸಿದ್ಧವಾಗುತ್ತಿದೆ.

ದಿನಕರ್ ತೂಗುದೀಪ ನಿರ್ದೇಶನದಲ್ಲಿ ಪುನೀತ್‌ ರಾಜಕುಮಾರ್ ನಟಿಸುತ್ತಾರೆ ಎನ್ನುವುದು ಹಳೆಯ ವದಂತಿಗೆ ರೆಕ್ಕೆ-ಪುಕ್ಕ ಮೂಡಿದೆ. ಗಾಂಧಿನಗರದ ಮೂಲಗಳ ಪ್ರಕಾರ ಪುನೀತ್‌ಗೆ ದಿನಕರ್ ಚಿತ್ರಕಥೆ ಹೆಣೆಯುತ್ತಿರುವುದು ಹೌದು! ‘ಲೈಫ್ ಜೊತೆ ಒಂದ್ ಸೆಲ್ಫಿ’ ಸಿನಿಮಾ ನಂತರ ದಿನಕರ್ ಅವರು ಪುನೀತ್‌ಗಾಗಿ ಸ್ಕ್ರಿಪ್ಟ್ ಮಾಡುತ್ತಿದ್ದರು ಎನ್ನಲಾಗಿದೆ. ‘ಜೊತೆ ಜೊತೆಯಲಿ’ ಹಿಟ್ ಚಿತ್ರದೊಂದಿಗೆ ನಿರ್ದೇಶಕನಾಗಿ ಗುರುತಿಸಿಕೊಂಡ ದಿನಕರ್‌ ತಮ್ಮ ಸಹೋದರ ದರ್ಶನ್‌ಗೆ ಮಾಡಿದ ‘ಸಾರಥಿ’ ಸೂಪರ್‌ಹಿಟ್ ಆಗಿತ್ತು. ‘ನವಗ್ರಹ’ ಅವರ ಮತ್ತೊಂದು ಯಶಸ್ವೀ ಸಿನಿಮಾ.

ಮುಂದೆ ದಿನಕರ್‌ ಸಾಕಷ್ಟು ಸಮಯದ ನಂತರ ‘ಲೈಫ್ ಜೊತೆ ಒಂದ್ ಸೆಲ್ಫಿ’ ನಿರ್ದೇಶಿಸಿದ್ದರು. ಪ್ರಜ್ವಲ್‌, ಪ್ರೇಮ್‌ ನಟಿಸಿದ್ದ ಈ ಸಿನಿಮಾ ಬಾಕ್ಸ್‌ ಆಫೀಸ್‌ನಲ್ಲಿ ವಿಫಲವಾಯ್ತು. ಇದೀಗ ದಿನಕರ್‌ ಗೆಲುವಿನ ನಿರೀಕ್ಷೆಯಲ್ಲಿದ್ದು, ಪುನೀತ್‌ ಜೊತೆಗಿನ ಪ್ರಾಜೆಕ್ಟ್‌ ಬಗ್ಗೆ ಕೆಲಸ ಮಾಡುತ್ತಿದ್ದಾರೆ.

ಸದ್ಯ ಪುನೀತ್‌ ‘ಜೇಮ್ಸ್‌’ ಚಿತ್ರೀಕರಣದಲ್ಲಿದ್ದಾರೆ. ಸಂತೋಷ್ ಆನಂದ್‌ರಾಮ್‌ ನಿರ್ದೇಶನದಲ್ಲಿ ಅವರು ನಟಿಸಿರುವ ‘ಯುವರತ್ನ’ ತೆರೆಕಾಣಬೇಕಿದೆ. ಇದಾದ ನಂತರವೂ ಹೊಂಬಾಳೆ ಬ್ಯಾನರ್‌ಗೆ ಅವರು ಮತ್ತೊಂದು ಸಿನಿಮಾ ಮಾಡಲಿದ್ದಾರೆ ಎನ್ನಲಾಗಿದ್ದು, ಆನಂತರ ದಿನಕರ್ ಸಿನಿಮಾ ಸೆಟ್ಟೇರಬಹುದು.

ಕನ್ನಡಕ್ಕೆ ದಿನ ಕಳೆದಂತೆ ಹೊಸಬರು ಎಂಟ್ರಿಯಾಗುತ್ತಿದ್ದಾರೆ. ಆ ಸಾಲಿಗೆ “ರಕ್ತ ಗುಲಾಬಿ” ಸಿನಿಮಾವೂ ಸೇರಿದೆ. ಹೊಸಬರ ಸಿನಿಮಾ ಇದಾಗಿದ್ದರೂ, ಈ ಚಿತ್ರದಲ್ಲಿ ಅನೇಕ ವಿಶೇಷತೆಗಳಿವೆ. ಹೌದು, ಇದು ಒನ್‌ ಟೇಕ್‌ ಸಿನಿಮಾ. ಅಷ್ಟೇ ಅಲ್ಲ, ಇಂಡಿಯಾ ಬುಕ್‌ ಆಫ್‌ ರೆಕಾರ್ಡ್‌ಗೂ ಸೇರಿದೆ. ಅಷ್ಟೇ ಅಲ್ಲ, ಗಿನ್ನಿಸ್‌ ದಾಖಲೆಗೂ ತಯಾರಾಗಿದೆ. ಅಂದಹಾಗೆ, ಈಗಾಗಲೇ ಬಿಡುಗಡೆಗೆ ಸಜ್ಜಾಗಿದ್ದು, ಮಾರ್ಚ್‌ ೩ರಂದು ಸಿನಿಮಾ ಬಿಡುಗಡೆಯಾಗುತ್ತಿದೆ.

ಈ ಚಿತ್ರದ ಸ್ಪೆಷಲ್‌ ಅಂದರೆ, ಎಲ್ಲರೂ ಇಲ್ಲಿ ಹೊಸಬರೇ. ನಿರ್ದೇಶಕ, ನಿರ್ಮಾಪಕ, ಕಲಾವಿದರು, ತಾಂತ್ರಿಕ ವರ್ಗ ಹೀಗೆ ಪ್ರತಿಯೊಬ್ಬರಿಗೂ ಇದು ಹೊಸತು. ಈ ಚಿತ್ರದ ಮೂಲಕ ರಾಬಿ ನಿರ್ದೇಶಕರಾಗಿದ್ದಾರೆ. ಕಥೆ, ಚಿತ್ರಕಥೆ, ಸಂಭಾಷಣೆ ಜವಾಬ್ದಾರಿಯೂ ಇವರದೇ. ಮಿಷನ್‌ ಕಾಡ್‌ ಫಿಲಂಸ್‌ ಮೂಲಕ ಈ ಚಿತ್ರ ತಯಾರಾಗಿದ್ದು, ಸದ್ಯ ಬಿಡುಗಡೆಯನ್ನು ಎದುರು ನೋಡುತ್ತಿದೆ.

ತಮ್ಮ ಸಿನಿಮಾ ಕುರಿತು ಹೇಳಿಕೊಂಡು ನಿರ್ದೇಶಕ ರಾಬಿ, “ಈ ಸಿನಿಮಾ ಶುರುವಾಗಿದ್ದೇ ಒಂದು ರೋಚಕ. ಒನ್‌ ಟೇಕ್‌ ಸಿನಿಮಾ ಅಂದರೆ ಸುಲಭವಲ್ಲ. ಇದಕ್ಕೆ ಸಾಕಷ್ಟು ತಯಾರಿ ಮಾಡಿಕೊಂಡೇ ಕೆಲಸಕ್ಕಿಳಿದೆವು. ಸಿನಿಮಾಗೂ ಮುನ್ನ, ಮೂರ್ನಾಲ್ಕು ದಿನಗಳ ಕಾಲ ಅಭ್ಯಾಸ ನಡೆಸಿದ ನಂತರವೇ ಅಂತಿಮವಾಗಿ ಚಿತ್ರೀಕರಣ ಮಾಡಿದ್ದೇವೆ. ಇಲ್ಲಿ ಕಮರ್ಷಿಯಲ್‌ ಅಂಶಗಳೂ ಇವೆ. ಸಿನಿಮಾ ಕಥೆ ಬಗ್ಗೆ ಹೇಳುವುದಾದರೆ, “ಸಾಮಾಜಿಕ ವ್ಯವಸ್ಥೆಯಿಂದ ಮನ ನೊಂದ ಯುವಕನೊಬ್ಬ ತನಗಾದ ಅನ್ಯಾಯದ ವಿರುದ್ಧ ಸೇಡು ತೀರಿಸಿಕೊಳ್ಳಲು ಮತ್ತೊಂದು ವ್ಯವಸ್ಥೆಯತ್ತ ಮುಖ ಮಾಡುತ್ತಾನೆ. ಇದರ ನಡುವೆ ಸಣ್ಣ ಪ್ರೀತಿಯೊಂದು ಅರಳುತ್ತದೆ. ತನ್ನ ಪ್ರiತಿ ಉಳಿಸಿಕೊಳ್ಳೋಕೆ, ಅವನು ಬೇರೆ ಕಡೆ ಪಯಣ ಬೆಳೆಸಲು ಹೊಡುತ್ತಾನೆ. ಈ ವೇಳೆ ಅವನಿಗೆ ಎದುರಾಗುವ ಸಮಸ್ಯೆಗಳು ಏನು? ಎಂಬುದು ಒನ್‌ಲೈನ್.‌ ಇದು ಸಂಪೂರ್ಣ ಸಕಲೇಶಪುರ ಸಮೀಪದ ಕಾಡಿನ ಸುತ್ತಮುತ್ತ ನಡೆದಿದೆ.

ಸುಮಾರು ಹತ್ತು ಕಿಲೋ ಮೀಟರ್‌ ಸುತ್ತಮುತ್ತ ಒನ್‌ ಟೇಕ್‌ನಲ್ಲೇ ಸಿನಿಮಾ ಮಾಡಲಾಗಿದೆ. ಇಲ್ಲಿ ಕಮರ್ಷಿಯಲ್ ಅಂಶಗಳೂ ಇವೆ. ಇನ್ನು, ಚಿತ್ರಕ್ಕೆ ವಿಕ್ರಮಾದಿತ್ಯ ಹೀರೋ ಆಗಿ ಕಾಣಿಸಿಕೊಂಡಿದ್ದಾರೆ. ಇದೊಂದು ಕ್ರೈಂ ಥ್ರಿಲ್ಲರ್ ಜಾನರ್‌ ಸಿನಿಮಾ. ಚಿತ್ರದ ಅಂತ್ಯದಲ್ಲಿ ನಾಯಕಿಯ ಪಾತ್ರದಲ್ಲಿ ಸಾಕಷ್ಟು ಬದಲಾವಣೆಗಳಿವೆ. ಅದನ್ನು ಸಿನಿಮಾದಲ್ಲೇ ನೋಡಬೇಕುʼ ಎಂಬುದು ನಿರ್ದೇಶಕರ ಮಾತು.

ಒನ್‌ ಟೇಕ್‌ ಸಿನಿಮಾ ಆಗಿದ್ದರಿಂದ ಇಲ್ಲಿ ಮೊದಲೇ ಪ್ಲಾನ್‌ ಮಾಡಿಕೊಂಡಿದ್ದೆವು. ಇಲ್ಲಿ ಸುಮಾರು ೪೫ ಜನರ ತಂಡ ಕೆಲಸ ಮಾಡಿದೆ. ತೆರೆಯ ಮೇಲೆ ಹದಿನೈದು ಕಲಾವಿದರು ನಟಿಸಿದ್ದಾರೆ. ಅವರೆಲ್ಲರೂ ಬಲು ತೂಕದ ಗನ್, ಬ್ಯಾಗ್‌ಗಳನ್ನು ಹೊತ್ತುಕೊಂಡು ಓಡೋಡಿ ಹೋಗೋವುದು ಕಷ್ಟಕರವಾಗಿತ್ತು. ಎಲ್ಲರಿಗೂ ಕೂಡ ಈ ಚಿತ್ರ ಚಾಲೆಂಜಿಂಗ್‌ ಆಗಿತ್ತು ಎನ್ನುತ್ತಾರೆ ರಾಬಿ.

ಇಂಡಿಯಾ ಬುಕ್‌ ಆಫ್ ರೆಕಾರ್ಡ್‌
ಈ ಸಿನಿಮಾ ಹಲವು ದಾಖಲೆಗೆ ಕಾರಣವಾಗುತ್ತಿದೆ. ಈಗಾಗಲೇ ಇಂಡಿಯಾ ಬುಕ್‌ ಆಫ್‌ ರೆಕಾರ್ಡ್‌ಗೆ ದಾಖಲಾಗಿದೆ. ಇನ್ನುಳಿದಂತೆ ಏಷ್ಯಾ ಬುಕ್‌ ಆಫ್‌ ರೆಕಾರ್ಡ್ಸ್‌ ಹಾಗೂ ಗಿನ್ನಿಸ್‌ ದಾಖಲೆಗೂ ನೋಂದಣಿಯಾಗಿದೆ ಎಂಬುದು ವಿಶೇಷ. ಒನ್‌ ಟೇಕ್‌ ಸಿನಿಮಾ ಮಾಡಿದ ಬಳಿಕ ಯಾಕೆ ಈ ಚಿತ್ರವನ್ನು ದಾಖಲು ಮಾಡಬಾರದು ಎಂಬ ಪ್ರಶ್ನೆ ಎದುರಾದ ಬಳಿಕ ನಿರ್ದೇಶಕರು ಇಂಡಿಯಾ ಬುಕ್‌ ಆಫ್‌ ರೆಕಾರ್ಡ್‌ಗೆ ಕಳುಹಿಸಿದ್ದಾರೆ.

ಎಲ್ಲಾ ದಾಖಲೆ ಪರಿಶೀಲಿಸಿದ ಬಳಿಕ ಅಲ್ಲಿಂದ ಗ್ರೀನ್‌ ಸಿಗ್ನಲ್‌ ಸಿಕ್ಕೆ ಎನ್ನುವ ತಂಡ ಇದೊಂದು, ಕ್ರೌರ್ಯದ ಜೊತೆ ಪ್ರೀತಿಯ ಅಂಶಗಳನ್ನು ಹೊಂದಿದೆ. ನಾಯಕ ವಿಕ್ರಮಾದಿತ್ಯ ಅವರಿಗೆ ಇದೊಂದು ಒಳ್ಳೆಯ ಅವಕಾಶ. ನಮ್ಮಂತಹ ಕಿರಿಯರಿಗೆ, ರಂಗಭೂಮಿ ಕಲಾವಿದರನ್ನ ಗುರುತಿಸಿ ಆಯ್ಕೆ ಮಾಡಿರುವುದು ಖುಷಿ ತಂದಿದೆ ಎಂಬುದು ಅವರ ಮಾತು. ಇನ್ನು, ನಾಯಕಿ ಶಿವಾನಿ ಕೂಡ ತಮ್ಮ ಪಾತ್ರದ ಕುರಿತು ಹೇಳಿಕೊಂಡು ಖುಷಿಗೊಳ್ಳುತ್ತಾರೆ. ನಿರ್ಮಾಪಕ ಲೋಹಿತ್ ತಮ್ಮ ಸಿನಿಮಾ ಅನುಭವ ಹಂಚಿಕೊಂಡರು. ಪ್ರಜೋತ್‌ ಡೇಸಾ ಅವರ ಸಂಗೀತವಿದೆ. ಚಿತ್ರದಲ್ಲಿ ನಾಲ್ಕು ಹಾಡುಗಳಿವೆ. ಚಿತ್ರದಲ್ಲಿ ಮಾಣಿಕ್ಯ.ಜಿ.ಎನ್, ವಿನೋಧ್‌ಕುಮಾರ್ ಇತರರು ಇದ್ದಾರೆ.

ಸ್ಯಾಂಡಲವುಡ್‌ನಲ್ಲಿ ಸದ್ಯಕ್ಕೆ ಹೆಚ್ಚು ಸುದ್ದಿಯಲ್ಲಿರುವ ತಾರಾ ಜೋಡಿ ಅಂದ್ರೆ ಕ್ರಿಸ್ಮಿ. ಅಂದ್ರೆ ಮದರಂಗಿ ಕೃಷ್ಣ ಹಾಗೂ ಮಿಲನಾ ನಾಗರಾಜ್. ʼಲವ್‌ ಮಾಕ್ಟೆಲ್‌ʼ ಚಿತ್ರದ ಮೂಲಕ ಆನ್‌ ಸ್ಕ್ರೀನ್‌ ಮೇಲೆ ಪ್ರೇಕ್ಷಕರನ್ನು ಭರ್ಜರಿ ಮೋಡಿ ಮಾಡಿದ್ದ ಈ ಜೋಡಿ ಆಫ್‌ ಸ್ಕ್ರೀನ್‌ ನಲ್ಲೂ ಬೆಸ್ಟ್‌ ಫೇರ್‌ ಅಂತ ಗೊತ್ತಾಗಿದ್ದೇ ಲವ್‌ ಮಾಕ್ಟೆಲ್‌ ನ ಭರ್ಜರಿ ಸಕ್ಸಸ್‌ ಕಂಡ ನಂತರವೇ. ಆ ಗೆಲುವಿನಲ್ಲೇ ಈ ಫೇರ್‌ ತಮ್ಮ ಲವ್‌ ನ್ಯೂಸ್‌ ರಿವೀಲ್‌ ಮಾಡಿತು. ಅಲ್ಲಿಂದ ಫೆ.೧೪ ಲವರ್ಸ್‌ ಡೇ ದಿನವೇ ವಿವಾಹವಾಗಿದ್ದು ನಿಮಗೆಲ್ಲ ಗೊತ್ತಿರುವ ವಿಚಾರ. ಒಂದೆಡೆ ಆನ್‌ಸ್ಕ್ರೀನ್‌ , ಮತ್ತೊಂದೆಡೆ ಆಫ್‌ ಸ್ಕ್ರೀನ್‌ ಎರಡು ಕಡೆಗಳಲ್ಲೂ ಅದ್ಭುತ ಜೋಡಿ ಅಂತಲೇ ಸುದ್ದಿಯಲ್ಲಿದ್ದ ಈ ಜೋಡಿಗೆ ಈಗ ಅಧಿಕೃತವಾಗಿಯೇ ಎರಡು ಕಡೆಗಳಲ್ಲೂ ಬೆಸ್ಟ್‌ ಫೇರ್‌ ಅವಾರ್ಡ್‌ ಸಿಕ್ಕಿದೆ. ಆ ಅವಾರ್ಡ್‌ ಕೊಟ್ಟಿದ್ದು ಚಂದನವನ ಫಿಲ್ಮ್‌ ಕ್ರಿಟಿಕ್ಸ್‌ ಅಕಾಡೆಮಿ.

ಕನ್ನಡ ಚಿತ್ರರಂಗದ ಮಟ್ಟಿಗೆ ಇದೊಂದು ಮೊಟ್ಟ ಮೊದಲ ಪ್ರಶಸ್ತಿ. ಕನ್ನಡ ಚಿತ್ರರಂಗದಲ್ಲಿ ಯಶ್-ರಾಧಿಕಾ, ದಿಗಂತ್‌ -ಐಂದ್ರಿತಾ ಅವರದ್ದು ಕೂಡ ಲವ್‌ ಮ್ಯಾರೇಜ್‌ ಆಗಿದ್ದರೂ ಇಂತಹದೊಂದು ಪ್ರಶಸ್ತಿ ಈ ಜೋಡಿಗೆ ಇದುವರೆಗೂ ಸಿಕ್ಕಿಲ್ಲ. ಹಾಗಂತ ಈ ಜೋಡಿಗೆ ಜನಪ್ರಿಯತೆ ಇಲ್ಲ ಅಂತಲ್ಲ. ಅವರಿಗೂ ದೊಡ್ಡ ಜನಪ್ರಿಯತೆ ಇದ್ದರೂ ಒಂದು ಸಿನಿಮಾ ಮೂಲಕ ದೊಡ್ಡ ಸಕ್ಸಸ್‌ ಕಂಡು ಆ ಮೂಲಕವೇ ಆಫ್‌ ಸ್ಕ್ರೀನ್‌ ನಲ್ಲೂ ಜನಪ್ರಿಯತೆಯೊಂದಿಗೆ ಮದುವೆ ಆಗಿದ್ದು ಮದರಂಗಿ ಕೃಷ್ಣ ಹಾಗೂ ಮಿಲನಾ ನಾಗರಾಜ್.‌ ಹಾಗಾಗಿಯೇ ಚಂದನವನ ಫಿಲ್ಮ್‌ ಕ್ರಿಟಿಕ್ಸ್‌ ಅಕಾಡೆಮಿ ಈ ಬಾರಿ ಈ ಜೋಡಿಗೆ ಭಾನುವಾರ ( ಫೆ. 21) ದಂದು ಸಂಜೆ ಬೆಸ್ಟ್‌ ಫೇರ್‌ ಅವಾರ್ಡ್‌ ನೀಡಿತು.ಮದುವೆ ಮುಗಿಸಿಕೊಂಡು ಹನಿಮೂನ್‌ ಗೆ ಅಂತ ಮಾಲ್ಡೀವ್ಸ್‌ ಗೆ ಹಾರಿದ್ದ ಈ ಜೋಡಿ ಅಲ್ಲಿಂದ ವಾಪಸ್‌ ಬಂದು ಅಟೆಂಡ್‌ ಮಾಡಿದ ಮೊದಲ ಕಾರ್ಯಕ್ರಮ ಇದು. ನವದಂಪತಿಗಳಿಬ್ಬರು ಬ್ಯೂಟಿಫುಲ್‌ ಆಗಿ ರೆಡಿಯಾಗಿ ಬಂದಿದ್ದರು. ಪ್ರಶಸ್ತಿ ಪ್ರದಾನ ಸಮಾರಂಭದ ಆರಂಭದಿಂದ ಮುಕ್ತಾಯರದವರೆಗೂ ಮುಂಭಾಗದಲ್ಲೇ ಕುಳಿತು ಲವಲವಿಕೆಯಿಂದ ಭಾಗವಹಿಸಿದ್ದರು.

ದರ್ಶನ್‌ ಕುರಿತು ಜಗ್ಗೇಶ್‌ ಮಾತನಾಡಿದ್ದರೆನ್ನಲಾದ ಆಡಿಯೋ ಸೋರಿಕೆ ಭಾರೀ ವಿವಾದ ಸೃಷ್ಟಿಸಿದೆ. ಸೋಮವಾರ ಮೈಸೂರಿನಲ್ಲಿ “ತೋತಾಪುರಿʼ ಚಿತ್ರೀಕರಣದಲ್ಲಿದ್ದಾಗ ದರ್ಶನ್‌ ಅಭಿಮಾನಿಗಳು ನಟ ಜಗ್ಗೇಶ್‌ ಅವರಿಗೆ ಮುತ್ತಿಗೆ ಹಾಕಿ ತರಾಟೆಗೆ ತೆಗದುಕೊಂಡ ಘಟನೆ ನಡೆದಿದೆ.ಜಗ್ಗೇಶ್‌ ಅವರಿಗೆ ಮುತ್ತಿಗೆ ಹಾಕಿದ್ದ ದರ್ಶನ್‌ ಅಭಿಮಾನಿಗಳು, ದರ್ಶನ್‌ ಅವರ ಬಗ್ಗೆ ಅದ್ಹೆಂಗೆ ಮಾತನಾಡಿದ್ದೀರಿ ನೀವು, ಈಗಲೇ ನೀವು ಕ್ಷಮೆ ಕೇಳಬೇಕು ಅಂತ ಒತ್ತಾಯಿಸಿದ್ದಲ್ಲದೆ, ಜಗ್ಗೇಶ್‌ ಅವರಿಗೆ ಧಿಕ್ಕಾರ ಕೂಗಿದರು. ಜಗ್ಗೇಶ್‌ ಅವರನ್ನು ಸುತ್ತುವರೆದುಕೊಂಡಿದ್ದ ದರ್ಶನ್‌ ಅಭಿಮಾನಿಗಳ ಮಾತುಗಳ ಅಬ್ಬರಕ್ಕೆ ಜಗ್ಗೇಶ್‌ ಕಕ್ಕಬಿಕ್ಕಿಯಾಗಿದ್ದರು. ಅದು ಹಾಗಲ್ಲ, ಹೀಗೆ ಅಂತ ಸ್ಪಷ್ಟನೆ ನೀಡಲು ಯತ್ನಿಸಿದರೂ, ನೀವು ಏನು ಹೇಳೋ ಹಾಗಿಲ್ಲ, ಕ್ಷಮೆ ಕೋರಲೇಬೇಕು ಅಂತ ಪಟ್ಟು ಹಿಡಿದರು.

ಒಂದ್ರೀತಿ ತೀರಾ ಇಕ್ಕಟ್ಟಿಗೆ ಸಿಲುಕಿದ ಜಗ್ಗೇಶ್‌ ಅವರಿಗೆ ಕ್ಞಮೆ ಕೇಳದೆ ಬೇರೆ ದಾರಿಯೇ ಸಿಗಲಿಲ್ಲ. ಅದು ನಂದಲ್ಲಪ್ಪಾ ವಾಯ್ಸು… ಇದಕ್ಕೂ ನಂಗೂ ಸಂಬಂಧ ಇಲ್ಲ. ಯಾರೋ ವಿಡಿಯೋ ಎಡಿಟರ್‌ ಹಾಗೆ ಮಾಡಿದ್ದಾನೆ. ಇಂಡಸ್ಟ್ರಿ ಹಾಳಾಗಿ ಹೋಯ್ತು. ಇಬ್ಬರ ನಡುವೆ ತಂದಿಕ್ಕಿ ಬಿಡುವ ಅಂತ ಇದೆಲ್ಲ ನಡೆದಿದೆ. ಇದರಲ್ಲಿ ರಾಜಕಾರಣ ನಡೆದಿದೆʼ ಅಂತ ಸ್ಪಷ್ಟನೆ ನೀಡಲು ಯತ್ನಿಸಿದಾಗ ದರ್ಶನ್‌ ಅಭಿಮಾನಿಗಳು ಕೂಗುತ್ತಲೇ ಇದ್ದರು.ದರ್ಶನ್‌ ಅಭಿಮಾನಿಗಳನ್ನೆಲಾದ ಆ ವ್ಯಕ್ತಿಗಳು ಮಾತ್ರ ಸಮಾಧಾನ ಆಗಲಿಲ್ಲ. ಇಲ್ಲ, ಅದು ನಿಮ್ದೆ ವಾಯ್ಸು…. ಹೆಂಗೇ ಹೇಳದ್ರಿ ಆ ರೀತಿ… ಅಮ್ಮನ್‌ ಅಂತೀರಾ..ಅಂತ ರೇಗಿದರು. ಆಯ್ತು ಬಿಡಪ್ಪಾ… ಅದು ನಂದೇ ವಾಯ್ಸು… ತಪ್ಪಾಯ್ತು ಅಂತ ಹೇಳಿದರು. ಆಗ ದರ್ಶನ್‌ ಅಭಿಮಾನಿಗಳೆನ್ನೆಲಾದ ಆ ಸುಮ್ಮನಾದರು. ಹೇಗೋ ತಪ್ಪಿಸಿಕೊಂಡ್ರೆ ಸಾಕು ಎನ್ನುವ ಹಾಗೆ ಜಗ್ಗೇಶ್‌ ಅಲ್ಲಿಂದ ಕಾಲ್ಕಿತ್ತರು.