Author: ವಿಜಯ್‌ ಭರಮಸಾಗರ

ಕನ್ನಡ ಚಿತ್ರರಂಗದ ಹಿರಿಯ ನಟ ಸತ್ಯಜಿತ್‌ ವಿರುದ್ಧ ಅವರ ಪುತ್ರಿ ಅಖ್ತರ್ ಸ್ವಲೇಹಾ ಬಾಣಸವಾಡಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಹಣ ಕೊಡುವಂತೆ ತಂದೆ ಕಿರುಕುಳ ಕೊಡುತ್ತಿದ್ದಾರೆ, ರೌಡಿಗಳನ್ನು ಬಿಟ್ಟು ಹೆದರಿಸುತ್ತಿದ್ದಾರೆ ಎನ್ನುವುದು ಅವರ ದೂರು.  ಸ್ವಲೇಹಾ ಪ್ರತಿಷ್ಠಿತ ಏರ್‌ಲೈನ್ಸ್‌ನಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ. “ಪ್ರತೀ ತಿಂಗಳು ತಂದೆಗೆ ನಾನು ಒಂದು ಲಕ್ಷ ರೂಪಾಯಿ ಕೊಡುತ್ತಿದ್ದೆ. ನಾನೀಗ ತುಂಬು ಗರ್ಭಿಣಿಯಾದ್ದರಿಂದ ಕೆಲಸ ತೊರೆದಿದ್ದೇನೆ. ಅಲ್ಲದೆ ನನಗೆ ಕೌಟುಂಬಿಕ ಜವಾಬ್ದಾರಿಗಳು ಇರುವುದರಿಂದ ಹಣ ಕೊಡಲು ಸಾಧ್ಯವಾಗುತ್ತಿಲ್ಲ. ನನ್ನ ಪರಿಸ್ಥಿತಿಯನ್ನು ಅರ್ಥ ಮಾಡಿಕೊಳ್ಳದ ಅವರು ನನಗೆ ಹಣಕ್ಕಾಗಿ ಬೇಡಿಕೆ ಇಡುತ್ತಿದ್ದಾರೆ. ಈ ವಿಚಾರವಾಗಿ ಮಾನಸಿಕ ಕಿರುಕುಳ ಕೊಡುತ್ತಿದ್ದು, ರೌಡಿಗಳಿಂದಲೂ ಬೆದರಿಕೆ ಒಡ್ಡುತ್ತಿದ್ದಾರೆ ಎಂದು ಸ್ವಲೇಹಾ ದೂರು ದಾಖಲಿಸಿದ್ದಾರೆ.

ಸತ್ಯಜಿತ್‌ ಕಳೆದ ಮೂರು ವರ್ಷಗಳ ಹಿಂದೆ ಗ್ಯಾಂಗ್ರಿನ್‌ನಿಂದಾಗಿ ಕಾಲು ಕಳೆದುಕೊಂಡಿದ್ದು ಸಂಕಷ್ಟಕ್ಕೀಡಾಗಿದ್ದರು. ಈ ಸಂದರ್ಭದಲ್ಲಿ ಚಿತ್ರರಂಗದ ಕೆಲ ಹಿರಿಯರು ಅವರಿಗೆ ನೆರವಾಗಿದ್ದಿದೆ. ಇದೀಗ ಕೌಟುಂಬಿಕ ಕಾರಣಕ್ಕಾಗಿ ಸತ್ಯಜಿತ್ ಸುದ್ದಿಯಲ್ಲಿದ್ದಾರೆ. ಪುತ್ರಿಯ ದೂರಿನ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿರುವ ಸತ್ಯಜಿತ್‌, ಇದು ಸಂಪೂರ್ಣ ಸತ್ಯವಲ್ಲ ಎಂದಿದ್ದಾರೆ. ಹುಬ್ಬಳ್ಳಿ ಮೂಲದ ಸತ್ಯಜಿತ್‌ ಅವರ ಜನ್ಮನಾಮ ನಿಜಾಮುದ್ದೀನ್ ಸೈಯದ್. ಕೆಎಸ್‍ಆರ್‍ಟಿಸಿ ಡ್ರೈವರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದ ಅವರಿಗೆ ಆಗ ನಟನೆ ಪ್ರವೃತ್ತಿಯಾಗಿತ್ತು. ಹುಬ್ಬಳ್ಳಿಯ ಹವ್ಯಾಸಿ ರಂಗತಂಡವೊಂದರ ಸಕ್ರಿಯ ಸದಸ್ಯರಾಗಿ ಅವರು ನಾಟಕಗಳಲ್ಲಿ ಅಭಿನಯಿಸುತ್ತಿದ್ದರು. ಒಮ್ಮೆ ನಾಟಕ ಪ್ರದರ್ಶನಕ್ಕೆಂದು ತಂಡದೊಂದಿಗೆ ಮುಂಬೈಗೆ ಹೋಗಿದ್ದರು ಸೈಯದ್. ಅಲ್ಲಿ ಸಿನಿಮಾ ತಂತ್ರಜ್ಞರೊಬ್ಬರ ಕಣ್ಣಿಗೆ ಬಿದ್ದದ್ದೇ ಅವರ ಬದುಕಿಗೆ ತಿರುವು ಸಿಕ್ಕಿತು. ನಾನಾ ಪಾಟೇಕರ್ ಹೀರೋ ಆಗಿದ್ದ `ಅಂಕುಶ್’ ಹಿಂದಿ ಚಿತ್ರದಲ್ಲಿ ನಟಿಸುವ ಅವಕಾಶ ಅವರದಾಯಿತು. ಈ ಚಿತ್ರದ ಟೈಟಲ್ ಕಾರ್ಡ್‍ನಲ್ಲೇ ಅವರ ಹೆಸರು `ಸತ್ಯಜಿತ್’ ಎಂದು ಬದಲಾದದ್ದು. ಹಿಂದಿ ಚಿತ್ರದ ನಂತರ ಸತ್ಯಜಿತ್‍ಗೆ ಕನ್ನಡ ಸಿನಿಮಾಗಳಲ್ಲೂ ಅವಕಾಶಗಳು ಹುಡುಕಿಕೊಂಡು ಬಂದವು. ಕನ್ನಡ ಚಿತ್ರರಂಗದ ಪ್ರಮುಖ ಖಳನಾಯಕ, ಪೋಷಕ ನಟನಾಗಿ ಅವರು 500ಕ್ಕೂ ಹೆಚ್ಚು ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ.

– ಇಲ್ಲಿರುವ ಫೋಟೋ ನೋಡಿದವರಿಗೆ ಒಂದು ರೀತಿ ಅಚ್ಚರಿಯಾಗಬಹುದು, ಹೊಸ ಸಿನಿಮಾದಲ್ಲೇನಾದರೂ ಪಾತ್ರ ಮಾಡುತ್ತಿದ್ದಾರಾ ಅಂತಾನೂ ಅನಿಸಬಹುದು. ಆದರೆ, ಸಿನಿಮಾ ವಿಷಯವಲ್ಲ. ಅವರು ಯಾವುದೋ ಸಿನಿಮಾದಲ್ಲಿ ಸ್ವಾಮೀಜಿ ಪಾತ್ರ ಮಾಡುತ್ತಿಲ್ಲ. ಬದಲಾಗಿ ಅವರು “ಬಿಗ್‌ಬಾಸ್‌” ಪ್ರೋಮೋಗಾಗಿ ಮಾಡಿರುವ ಪಾತ್ರದ ಒಂದು ಫೋಟೋವಷ್ಟೇ. ಸದ್ಯಕ್ಕೆ ಕಲರ್ಸ್‌ ಕನ್ನಡ ವಾಹಿನಿ ಸೋಶಿಯಲ್‌ ಮೀಡಿಯಾದಲ್ಲಿ ಈ ಫೋಟೋ ಹಂಚಿಕೊಂಡಿದೆ. “ಬಿಗ್‌ಬಾಸ್”‌ ೮ ನೇ ಆವೃತ್ತಿಗೆಂದೇ ಒಂದು ಫೋಟೋ ಹರಿಬಿಟ್ಟಿದೆ. ಆ ಫೋಟೋ ನೋಡಿದವರಿಗೆ ಜ್ಯೋತಿಷಿಗಳಂತೆಯೇ ಕಾಣುತ್ತಾರೆ.

ಅಭಿನಯ ಚಕ್ರವರ್ತಿಯ ಸ್ವಾಮೀಜಿ ಗೆಟಪ್‌ನ ಫೋಟೋ ಶೇರ್ ಮಾಡಿರುವ ಕಲರ್ಸ್ ಕನ್ನಡ ವಾಹಿನಿ, “ಲಾಕ್ ಡೌನ್ 8.0ಗೆ ಕಿಚ್ಚ ಜೋಯಿಸರು ಇಟ್ಟಿರೋ ಮುಹೂರ್ತ ಯಾವುದು? ಗೆಸ್ ಮಾಡಿ” ಎಂದು ಪೋಸ್ಟ್ ಮಾಡಿದೆ. “ಬಿಗ್‌ಬಾಸ್” ಹೊಸ ಆವೃತ್ತಿ ಯಾವಾಗ ಆರಂಭವಾಗುತ್ತದೆ ಎಂಬುದರ ಬಗ್ಗೆ ಅಧಿಕೃತವಾಗಿ ಘೋಷಿಸದ ವಾಹಿನಿ, ಪ್ರೇಕ್ಷಕರಲ್ಲಿ ಒಂದಷ್ಟು ಕುತೂಹಲ ಮೂಡಿಸಿರುವುದಂತೂ ನಿಜ. ಸದ್ಯದ ಮಾಹಿತಿ ಪ್ರಕಾರ, ಬಿಗ್‌ಬಾಸ್ ಕನ್ನಡ 8ನೇ ಆವೃತ್ತಿ ಫೆಬ್ರವರಿ 28 ರಂದು ಆರಂಭವಾಗಲಿದೆ. ಯಾರೆಲ್ಲಾ ಸ್ಪರ್ಧಿಗಳು ಇದ್ದಾರೆ ಅನ್ನೋದು ಗೌಪ್ಯ.

ಇತ್ತೀಚೆಗೆ ಸ್ಟಾರ್ ನಟರ ಮಕ್ಕಳು ಸಿನಿಮಾರಂಗದಲ್ಲಿ ಮಿಂಚುತ್ತಿರೋದು ಗೊತ್ತೇ ಇದೆ. ಇದು ಹೊಸದಲ್ಲ. ಸ್ಯಾಂಡಲ್‌ವುಡ್, ಬಾಲಿವುಡ್, ಟಾಲಿವುಡ್ ಹೀಗೆ ಯಾವುದೇ ಭಾಷೆಯ ಚಿತ್ರರಂಗವನ್ನು ಗಮನಿಸಿದರೂ ಅಲ್ಲಿ ಒಂದಷ್ಟು ಸ್ಟಾರ್ ನಟ,ನಟಿಯರ ಮಕ್ಕಳೂ ಕೂಡ ಆಗಾಗ ಸುದ್ದಿಯಾಗುತ್ತಲೇ ಇರುತ್ತಾರೆ. ಈಗ ಬಾಲಿವುಡ್ ನಟ ಅಮೀರ್‌ಖಾನ್ ಪುತ್ರಿ ಇರಾಖಾನ್‌ ಕೂಡ ಜೋರು ಸುದ್ದಿಯಲ್ಲಿದ್ದಾರೆ. ಅಂದಂತೆ, ಅವರೇನೂ ಹೊಸ ಸಿನಿಮಾ ಮಾಡುತ್ತಿಲ್ಲ.

ಆದರೆ, ತಾವು ಪ್ರೀತಿ ಮಾಡುತ್ತಿರುವ ಪ್ರಿಯಕರನ ಬಗ್ಗೆ ಹೇಳಿಕೊಂಡಿದ್ದಾರೆ. ಸ್ವತಃ ತಮ್ಮ ಟ್ವೀಟ್‌ ಮೂಲಕ ಈ ವಿಷಯವನ್ನು ಅಧಿಕೃತವಾಗಿ ಬಹಿರಂಗಪಡಿಸಿದ್ದಾರೆ. ಅದು ಫೋಟೋ ಸಮೇತ. ಇಷ್ಟಕ್ಕೂ ಅಮೀರ್‌ಖಾನ್‌ ಪುತ್ರಿ ಇರಾಖಾನ್‌ ಪ್ರೀತಿಯ ಬಲೆಗೆ ಬಿದ್ದಿರೋದು, ಆಕೆಗೆ ಫಿಟ್ನೆಸ್ ತರಬೇತಿ ಕೊಡುತ್ತಿರುವ ನೂಪುರ್ ಶಿಖರೆ ಅವರನ್ನು. ಇದನ್ನು ಇರಾಖಾನ್‌ ಅವರೇ ಸ್ಪಷ್ಟಪಡಿಸಿದ್ದಾರೆ. ನೂಪುರ್ ಶಿಖರೆ ಈಗಾಗಲೇ ಸಾಕಷ್ಟು ಹಿಂದಿ ನಟ, ನಟಿಯರಿಗೆ ಫಿಟ್ನೆಸ್ ತರಬೇತಿ ನೀಡಿದ್ದಾರೆ. ಇನ್ನೇನು ಪ್ರೇಮಿಗಳ ದಿನ ಕೂಡ ಬರುತ್ತಿರುವುದರಿಂದ ಇರಾಖಾನ್‌ ಈ ಪ್ರೀತಿಯ ವಿಷಯವನ್ನು ಹಂಚಿಕೊಂಡಿದ್ದಾರೆ.

ತೆಲುಗು ಸ್ಟಾರ್ ಚಿರಂಜೀವಿ ಹಿರಿಯ ಪುತ್ರಿ ಶ್ರೀಜಾ ಪತಿ ಕಲ್ಯಾಣ್ ದೇವ್‌ ಹೊಸ ಸಿನಿಮಾ ಘೋಷಣೆಯಾಗಿದೆ. 2018ರಲ್ಲಿ ಕಲ್ಯಾಣ್ ದೇವ್‌ ‘ವಿಜೇತಾ’ ಚಿತ್ರದೊಂದಿಗೆ ಬೆಳ್ಳಿತೆರೆಗೆ ಪರಿಚಯವಾಗಿದ್ದರು. 1985ರಲ್ಲಿ ತೆರೆಕಂಡ ಚಿರಂಜೀವಿ ಸೂಪರ್‌ಹಿಟ್‌ ಸಿನಿಮಾದ ಶೀರ್ಷಿಕೆ ಇದು. ಆದರೆ ಚಿರಂಜೀವಿ ಅಳಿಯನಿಗೆ ಮೊದಲ ಚಿತ್ರದಲ್ಲಿ ಯಶಸ್ಸು ಸಿಗಲಿಲ್ಲ. ಇದಾದ ನಂತರ ಅವರು ಎರಡು ಚಿತ್ರಗಳಲ್ಲಿ ನಟಿಸುತ್ತಿದ್ದಾರೆ. ಕೋವಿಡ್‌ ಕಾರಣದಿಂದಾಗಿ ಎರಡೂ ಚಿತ್ರಗಳು ಚಿತ್ರೀಕರಣದ ವಿವಿಧ ಹಂತಗಳಲ್ಲಿವೆ. ಈ ಮಧ್ಯೆ ಅವರ ಮತ್ತೊಂದು ಸಿನಿಮಾ ಘೋಷಣೆಯಾಗಿದೆ. ಈ ರೊಮ್ಯಾಂಟಿಕ್ – ಕಾಮಿಡಿ ಚಿತ್ರದ ಆರಂಭಕ್ಕೆ ಕಲ್ಯಾಣ್‌ ದೇವ್‌ರ ಒಂದು ವೀಡಿಯೋ ಕೂಡ ಬಂದಿದೆ.

‘ವಿಜೇತಾ’ ಚಿತ್ರದ ನಂತರ ಕಲ್ಯಾಣ್ ರಾಮ್‌ ಸಹಿ ಹಾಕಿದ್ದ ಸಿನಿಮಾ ‘ಸೂಪರ್ ಮಚ್ಚಿ’. ಈ ಚಿತ್ರದಲ್ಲಿ ಕನ್ನಡತಿ ಡಿಂಪಲ್‌ ಹುಡುಗಿ ರಚಿತಾ ರಾಮ್ ನಾಯಕಿ. ಇದು ರೊಮ್ಯಾಂಟಿಕ್ ಕಾಮಿಡಿ ಕಥಾನಕ. ಅವರ ಮೊತ್ತೊಂದು ಥ್ರಿಲ್ಲರ್‌ ಸಿನಿಮಾ ‘ಕಿನ್ನೆರಸಾನಿ’ ಚಿತ್ರೀಕರಣ ಅರ್ಧದಷ್ಟು ಪೂರ್ಣಗೊಂಡಿದೆ. ಶ್ರೀಧರ್ ಸೀಪಾನ ನಿರ್ದೇಶಿಸಲಿರುವ ಚಿತ್ರಕ್ಕೆ ಅನೂಪ್ ರುಬೆನ್ಸ್‌ ಸಂಗೀತ ಸಂಯೋಜಿಸುತ್ತಿದ್ದಾರೆ.

ರಚಿತಾ ರಾಮ್ ನಾಯಕಿಯಾಗಿರುವ ಕಲ್ಯಾಣ್‌ರ ‘ಸೂಪರ್‌ ಮಚ್ಚಿ’ ಕಳೆದ ವರ್ಷವೇ ತೆರೆಕಾಣಬೇಕಿತ್ತು. ಕೋವಿಡ್‌ನಿಂದಾಗಿ ಎಲ್ಲಾ ಲೆಕ್ಕಾಚಾರ ತಲೆಕೆಳಗಾಯ್ತು. ಇದೀಗ ಚಿತ್ರೀಕರಣ ಪೂರ್ಣಗೊಂಡಿದ್ದು ಪೋಸ್ಟ್‌ ಪ್ರೊಡಕ್ಷನ್ ಕೆಲಸಗಳು ನಡೆಯುತ್ತಿವೆ. ಸದ್ಯದಲ್ಲೇ ಬಿಡುಗಡೆ ದಿನಾಂಕ ಘೋಷಿಸುವುದಾಗಿ ಚಿತ್ರತಂಡ ಹೇಳಿಕೊಂಡಿದೆ.

https://youtu.be/3ih4jr8ErHs

ಕಬೀರ್ ಖಾನ್‌ ನಿರ್ದೇಶನದಲ್ಲಿ 2012ರಲ್ಲಿ ತೆರೆಕಂಡ ‘ಏಕ್ ಥಾ ಟೈಗರ್‌’ ಚಿತ್ರದಲ್ಲಿ ಸಲ್ಮಾನ್ ಮತ್ತು ಕತ್ರಿನಾ ಕೈಫ್ ನಟಿಸಿದ್ದರು. ಚಿತ್ರದಲ್ಲಿನ ಅವರ RAW ಮತ್ತು ISI ಏಜೆಂಟ್ ಪಾತ್ರಗಳು ಕ್ಲಿಕ್ಕಾಗಿದ್ದವು. ಇದಾಗಿ ಐದು ವರ್ಷಕ್ಕೆ ಅಬ್ಬಾಶ್ ಜಾಫರ್‌ ನಿರ್ದೇಶನದಲ್ಲಿ ‘ಟೈಗರ್ ಜಿಂದಾ ಹೈ’ ಬಂತು. ಸಲ್ಲೂ ಮತ್ತು ಕತ್ರಿನಾ ಜೋಡಿಯ ಸಿನಿಮಾ ಬಾಕ್ಸ್ ಆಫೀಸ್ ದಾಖಲೆಗಳನ್ನು ಧೂಳಿಪಟ ಮಾಡಿತು.

ಇದೀಗ ಟೈಗರ್ ಮತ್ತು ಜೋಯಾ ‘ಟೈಗರ್ 3’ಯಲ್ಲಿ ಜೋಡಿಯಾಗುತ್ತಿದ್ದಾರೆ. ಮನೀಶ್ ಶರ್ಮಾ ನಿರ್ದೇಶನದ ಚಿತ್ರದ ಖಳಪಾತ್ರದಲ್ಲಿ ‘ಕಿಸ್ಸಿಂಗ್ ಸ್ಟಾರ್‌’ ಇಮ್ರಾನ್ ಹಶ್ಮಿ ನಟಿಸಲಿದ್ದಾರೆ ಎನ್ನುವುದು ವಿಶೇ‍ಷ! ಚಿತ್ರ ನಿರ್ಮಿಸುತ್ತಿರುವ ಯಶ್ ರಾಜ್ ಫಿಲ್ಮ್ಸ್‌ ಸಂಸ್ಥೆ ಚಿತ್ರದ ಖಳನಾಗಿ ಹೊಸ ನಟನನ್ನು ಪರಿಚಯಿಸುವ ಇರಾದೆ ಹೊಂದಿತ್ತು. ಹಾಗೆ ಹಿಂದೆ ‘ಟೈಗರ್ ಜಿಂದಾ ಹೈ’ ಚಿತ್ರದಲ್ಲಿ ಅವರು ಸಾಜದ್ ಡೆಲಾಫ್ರೂಜ್‌ ಅವರನ್ನು ಪರಿಚಯಿಸಿದ್ದರು. ಇದೀಗ ‘ಟೈಗರ್‌ 3’ನಲ್ಲಿ ಇಮ್ರಾನ್ ಹಶ್ಮಿ ಅವರನ್ನು ಕರೆತಂದಿರುವುದು ಚರ್ಚೆಗೆ ಗ್ರಾಸವಾಗಿದೆ.

‘ಟೈಗರ್ 3’ ಮುಂದಿನ ತಿಂಗಳು ಚಿತ್ರೀಕರಣ ಆರಂಭಿಸಲಿದೆ. ಮುಂಬಯಿಯ ಯಶ್ ರಾಜ್‌ ಸ್ಟುಡಿಯೋದಲ್ಲಿ ಮೊದಲ ಹಂತದ ಶೂಟಿಂಗ್‌ಗೆ ಚಾಲನೆ ಸಿಗಲಿದೆ. ಅಲ್ಲಿ ಸಲ್ಮಾನ್‌, ಕತ್ರಿನಾ ಮತ್ತು ಇಮ್ರಾನ್ ನಟನೆಯ ಕೆಲವು ಸನ್ನಿವೇಶಗಳು ಚಿತ್ರಣಗೊಳ್ಳಲಿವೆಯಂತೆ. ಎರಡನೇ ಹಂತದ ಚಿತ್ರೀಕರಣಕ್ಕೆ ಚಿತ್ರತಂಡ ಯೂರೋಪ್‌ಗೆ ತೆರಳಲಿದೆ. ಮತ್ತೆ ಮೂರನೇ ಹಂತ ಮುಂಬಯಿಯ ಸ್ಟುಡಿಯೋದಲ್ಲಿ ಚಿತ್ರಿತವಾಗಲಿದೆ. ಶಾರುಖ್ ನಟನೆಯ ‘ಪಠಾಣ್‌’ ಚಿತ್ರದ ಒಂದು ಪಾತ್ರದಲ್ಲಿ ಸಲ್ಮಾನ್ ನಟಿಸುತ್ತಿದ್ದಾರೆ. ಆ ಸಿನಿಮಾದ ಕೆಲಸ ಪೂರ್ಣಗೊಳ್ಳುತ್ತಲೇ ಸಲ್ಮಾನ್‌ ‘ಟೈಗರ್ 3’ ತಂಡಕ್ಕೆ ಹಾಜರಾಗಲಿದ್ದಾರೆ. ಖಳಪಾತ್ರದಲ್ಲಿ ಇಮ್ರಾನ್‌ ಹೇಗೆ ಕಾಣಿಸಿಕೊಳ್ಳಬಹುದು ಎನ್ನುವ ಕುತೂಹಲ ಎಲ್ಲರದು.

ಸಿನಿಮಾ ಮತ್ತು ಕಿರುತೆರೆ ನಟಿ ಅನಿತಾ ಹಸ್ಸನಂದನಿ ತಾಯಿಯಾದ ಸಂಭ್ರಮದಲ್ಲಿದ್ದಾರೆ. ಅನಿತಾ ಮತ್ತು ರೋಹಿತ್ ರೆಡ್ಡಿ ದಂಪತಿ ಗಂಡು ಮಗುವಿಗೆ ಜನ್ಮ ನೀಡಿದ್ದು,  ಅವರಿಗೆ ಸಿನಿಮಾರಂಗದ ಹಲವರು ಶುಭ ಹಾರೈಸುತ್ತಿದ್ದಾರೆ. ದಂಪತಿ ಈ ಸಂತಸದ ಸಂದರ್ಭದ ಫೋಟೋ, ವೀಡಿಯೋಗಳನ್ನು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ಅನಿತಾ ಅವರ ಆತ್ಮೀಯ ಗೆಳತಿ, ನಿರ್ಮಾಪಕಿ ಏಕ್ತಾ ಕಪೂರ್‌ ಆಸ್ಪತ್ರೆಯಲ್ಲಿ ನಟಿಯನ್ನು ಭೇಟಿ ಮಾಡಿ ಶುಭ ಹಾರೈಸಿ ಅಲ್ಲಿನ ಫೋಟೋ ಶೇರ್ ಮಾಡಿದ್ದರು.

ಮುಂಬಯಿಯ ಸಿಂಧಿ ಕುಟುಂಬದ ಅನಿತಾ ದಕ್ಷಿಣದ ತೆಲುಗು, ತಮಿಳು ಚಿತ್ರೋದ್ಯಮಗಳಲ್ಲಿ ದೊಡ್ಡ ಗೆಲುವು ಕಂಡ ನಟಿ. ಉದಯ ಕಿರಣ್ ಜೊತೆ ಅವರು ನಟಿಸಿದ ‘ನುವ್ವು ನೇನು’ ತೆಲುಗು ಸಿನಿಮಾ ಸೂಪರ್‌ ಹಿಟ್ ಆಗಿತ್ತು. ಪುನೀತ್ ರಾಜಕುಮಾರ್ ಜೋಡಿಯಾಗಿ ‘ವೀರಕನ್ನಡಿಗ’ ಚಿತ್ರದೊಂದಿಗೆ ಕನ್ನಡಕ್ಕೆ ಬಂದ ಅವರು ‘ಗಂಡುಗಲಿ ಕುಮಾರರಾಮ’ ಚಿತ್ರದ ವಿಶಿಷ್ಠ ಪಾತ್ರದಲ್ಲಿ ನಟಿಸಿದ್ದರು.

ಇಂದ್ರಜಿತ್ ಲಂಕೇಶ್ ನಿರ್ದೇಶನದ ‘ಹುಡುಗ ಹುಡುಗಿ’ ನಂತರ ಮತ್ತೆ ಅವರು ಕನ್ನಡದಲ್ಲಿ ಕಾಣಿಸಿಕೊಂಡಿಲ್ಲ. ಕಳೆದ ಐದಾರು ವರ್ಷಗಳಿಂದ ಕಿರುತೆರೆಯಲ್ಲಿ ಬ್ಯುಜಿಯಾಗಿರುವ ಅವರು ಹಿಂದಿ ಸರಣಿಗಳಲ್ಲಿ ಜನಪ್ರಿಯತೆ ಗಳಿಸಿದ್ದಾರೆ. ಕಾವ್ಯಾಂಜಲಿ, ಯೆಹ್ ಹೈ ಮೊಹಬತೇನ್‌, ನಾಗಿನ್‌ 3 ಹಿಂದಿ ಸರಣಿಗಳು ಅವರಿಗೆ ಹೆಸರು ತಂದುಕೊಟ್ಟಿವೆ. ಕೃಷ್ಣಾ ಕಾಟೇಜ್‌, ಕುಚ್ ತೋ ಹೈ, ರಾಗಿಣಿ ಎಂಎಂಎಸ್‌ ಅವರ ನಟನೆಯ ಹಿಂದಿ ಸಿನಿಮಾಗಳು. 2013ರಲ್ಲಿ ಉದ್ಯಮಿ ರೋಹಿತ್‌ ರೆಡ್ಡಿ ಅವರನ್ನು ವರಿಸಿದ್ದ ಅವರ ದಾಂಪತ್ಯಕ್ಕೀಗ ಪುತ್ರ ಜನಿಸಿದ್ದಾನೆ.

ಸದ್ಯಕ್ಕೆ ರಶ್ಮಿಕಾ ಮಂದಣ್ಣ ಜೋರು ಸುದ್ದಿಯಲ್ಲಿದ್ದಾರೆ. ಅದಕ್ಕೆ ಕಾರಣ, ಅವರ ಅಭಿನಯದ “ಪೊಗರು” ಫೆಬ್ರವರಿ ೧೯ರಂದು ರಿಲೀಸ್‌ ಆಗುತ್ತಿದೆ. ಅದಷ್ಟೇ ಅಲ್ಲ, ಅತ್ತ ಬಾಲಿವುಡ್‌ನಲ್ಲೂ ರಶ್ಮಿಕಾ ಮಂದಣ್ಣ ಕೂಡ ಈಗಷ್ಟೇ ಮಿಂಚುತ್ತಿದ್ದಾರೆ. ಅದರೊಂದಿಗೆ ಈಗ ಅವರು ಬಾದ್‌ಷಾ ಅವರ ಟಾಪ್‌ ಟಕ್ಕರ್‌ ಸಾಂಗ್‌ನಲ್ಲಿ ಹೆಜ್ಜೆ ಹಾಕುತ್ತಿದ್ದಾರೆ.

ಇದು ಅವರ ಮೊದಲ ಹಿಂದಿ ಸಾಂಗ್‌ ಆಗಿದ್ದು, ಸದ್ಯಕ್ಕೆ ಹಾಡಿನ ಟೀಸರ್‌ ಬಿಡುಗಡೆಯಾಗಿದ್ದು, ಸಾಕಷ್ಟು ಸದ್ದು ಮಾಡುತ್ತಿದೆ. ಎಲ್ಲೆಡೆಯಿಂದಲೂ ಒಳ್ಳೆಯ ಮೆಚ್ಚುಗೆಯೂ ಸಿಗುತ್ತಿದೆ. ಈ ಹಾಡಲ್ಲಿ ರಶ್ಮಿಕಾ ಸಿಕ್ಕಾಪಟ್ಟೆ ಬೋಲ್ಡ್‌ ಆಗಿ ಕಾಣಿಸಿಕೊಂಡಿದ್ದಾರೆ.

ಬಾಲಿವುಡ್‌ನ ಚೊಚ್ಚಲ ಚಿತ್ರ “ಮಿಷನ್‌ ಮಜ್ನು” ಚಿತ್ರದ ಸುರುವಿಗೆ ಮುನ್ನವೇ, ಅವರು ಹಿಂದಿ ವಿಡಿಯೋ ಸಾಂಗ್‌ನಲ್ಲಿ ಕಾಣಿಸಿಕೊಂಡಿರೋದು ವಿಶೇಷ. ಸದ್ಯಕ್ಕೆ ಈ ಸುದ್ದಿ ಅವರ ಫ್ಯಾನ್ಸ್‌ಗೆ ಸಿಕ್ಕಾಪಟ್ಟೆ ಖುಷಿ ತಂದಿದೆ.

ಅದೇನೆ ಇರಲಿ, ಕೊಡಗಿನ ಬೆಡಗಿ ರಶ್ಮಿಕಾ ಮಂದಣ್ಣ ಕರುನಾಡ ಕ್ರಶ್ ಅಂತೂ ಹೌದು. “ಕಿರಿಕ್ ಪಾರ್ಟಿ” ಮೂಲಕ ಸಿನಿ ಜಗತ್ತಿಗೆ ಎಂಟ್ರಿಯಾದ ಸಾನ್ವಿಯ ಲೈಫ್‌ ನೋಡ ನೋಡುತ್ತಿದ್ದಂತೆಯೇ ಬದಲಾಗಿದ್ದು ನಿಜ. ಸ್ಯಾಂಡಲ್‌ವುಡ್‌ನಲ್ಲಿ ಹೆಸರು ಮಾಡಿದ ರಶ್ಮಿಕಾ, ನಂತರದ ದಿನಗಳಲ್ಲಿ ಕನ್ನಡದ ಸ್ಟಾರ್‌ ನಟರೊಂದಿಗೆ ಕಾಣಿಸಿಕೊಂಡರು.

ಮೆಲ್ಲನೆ ತೆಲುಗು ಚಿತ್ರರಂಗಕ್ಕೂ ಕಾಲಿಟ್ಟೂ, ಅಲ್ಲೂ ಸೈ ಎನಿಸಿಕೊಂಡರು. ಅಲ್ಲಿಂದ ಬಾಲಿವುಡ್‌ನತ್ತ ಈಗ ಪಯಣ ಬೆಳೆಸಿದ್ದಾರೆ. ಅಲ್ಲಿ ಸಿನಿಮಾ ಮಾಡುವ ಮೊದಲು ಟಾಪ್‌ ಟಕ್ಕರ್‌ ಎಂಬ ಹಿಂದಿ ಸಾಂಗ್‌ನಲ್ಲಿ ಕಾಣಿಸಿಕೊಂಡು ಸುದ್ದಿಯಾಗಿದ್ದಾರೆ.

ದಕ್ಷಿಣ ಭಾರತದ ಪ್ರಸ್ತುತ ಸೆನ್ಸೇಷನ್‌ ಹೀರೋಗಳಲ್ಲೊಬ್ಬರಾದ ವಿಜಯ್ ದೇವರಕೊಂಡ ನಟನೆಯ ‘ಲಿಗರ್‌’ ರಿಲೀಸ್ ಡೇಟ್ ಹೊರಬಿದ್ದಿದೆ. ಪುರಿ ಜಗನ್ನಾಥ್ ನಿರ್ದೇಶನದ ಸಿನಿಮಾ ಇದೇ ವರ್ಷ ಸೆಪ್ಟೆಂಬರ್ 9ಕ್ಕೆ ಥಿಯೇಟರ್‌ಗೆ ಬರಲಿದೆ. ಚಿತ್ರತಂಡ ಇಂದು ಸೋಷಿಯಲ್ ಮೀಡಿಯಾದಲ್ಲಿ ಚಿತ್ರದ ಹೊಸ ಪೋಸ್ಟರ್‌ನೊಂದಿಗೆ ಬಿಡುಗಡೆ ದಿನಾಂಕ ಘೋಷಿಸಿದೆ. ಅನನ್ಯಾ ಪಾಂಡೆ ಚಿತ್ರದ ನಾಯಕಿಯಾಗಿ ನಟಿಸುತ್ತಿದ್ದು ರಮ್ಯಾ ಕೃಷ್ಣನ್‌, ರೋನಿತ್ ರಾಯ್‌, ಅಲಿ, ಮಕರಂದ್ ದೇಶಪಾಂಡೆ ಚಿತ್ರದ ಇತರೆ ಪ್ರಮುಖ ಪಾತ್ರಗಳಲ್ಲಿದ್ದಾರೆ.

ಲವರ್ ಬಾಯ್‌ ವಿಜಯ್‌ ಈ ಚಿತ್ರದಲ್ಲಿ ಇಮೇಜು ಬದಲಿಸಿಕೊಳ್ಳುವ ಉಮೇದಿನಲ್ಲಿದ್ದಾರೆ. ಮಾರ್ಷಿಯಲ್ ಆರ್ಟ್ಸ್‌ ಹಿನ್ನೆಲೆಯ ಕತೆಯ ಇದೊಂದು ಸ್ಪೋರ್ಟ್ಸ್‌ ಡ್ರಾಮಾ ಎನ್ನಲಾಗಿದೆ. ತೆಲುಗು ಮಾತ್ರವಲ್ಲದೆ ಹಿಂದಿ ಭಾ‍ಷೆಯಲ್ಲೂ ಸಿನಿಮಾ ತಯಾರಾಗುತ್ತಿದೆ. ಈ ಮೂಲಕ ಬಾಲಿವುಡ್‌ಗೆ ಪರಿಚಯವಾಗುತ್ತಿದ್ದಾರೆ ದೇವರಕೊಂಡ. ಮತ್ತೊಂದೆಡೆ ಪುರಿ ಜಗನ್ನಾಥ್ ಹತ್ತು ವರ್ಷದ ನಂತರ ಬಾಲಿವುಡ್‌ಗೆ ಮರಳುತ್ತಿದ್ದಾರೆ. ದಶಕದ ಹಿಂದೆ ಅವರ ನಿರ್ದೇಶನದಲ್ಲಿ ಅಮಿತಾಭ್ ಬಚ್ಚನ್ ನಟಿಸಿದ್ದ ‘ಬುಡ್ಡಾ ಹೋಗಾ ತೇರಿ ಬಾಪ್‌’ ಹಿಂದಿ ಚಿತ್ರ ತೆರೆಕಂಡಿತ್ತು. ಪುರಿ ಜಗನ್ನಾಥ್‌, ಕರಣ್ ಜೋಹರ್‌, ನಟಿ ಚಾರ್ಮಿ ಕೌರ್ ಚಿತ್ರದ ನಿರ್ಮಾಪಕರು. ಕನ್ನಡ, ತಮಿಳು ಮತ್ತು ಮಲಯಾಳಂ ಭಾಷೆಗಳ ಡಬ್ಬಿಂಗ್ ಅವತರಣಿಕೆಗಳೂ ಏಕಕಾಲದಲ್ಲಿ ಬಿಡುಗಡೆಯಾಗಲಿದೆ.

ಸ್ಯಾಂಡಲ್ ವುಡ್ ಡ್ರಗ್ಸ್ ಪ್ರಕರಣದಲ್ಲಿ ಸಿಕ್ಕಿಬಿದ್ದು ಜೈಲುವಾಸ ಅನುಭವಿಸಿದ್ದ ನಟಿ   ಸಂಜನಾ ಗಲ್ರಾನಿ,  ಕೆಲವು ತಿಂಗಳ ಕಾಲ ಜೈಲಲ್ಲಿದ್ದರು. ಕೊನೆಗೂ ಅವರು ಹೊರಬಂದಿದ್ದೂ ಆಯ್ತು. ಯಾರ ಮಾತಿಗೂ  ಸಿಗದ ಸಂಜನಾ ಕೆಲ ಕಾಲ  ಮನೆಯಲ್ಲಿದ್ದುಕೊಂಡೇ ರಿಲ್ಯಾಕ್ಸ್ ಆಗಿದ್ದರು. ಪೈಂಟಿಂಗ್ ಮಾಡಿಕೊಳ್ಳುತ್ತಾ, ಖುಷಿ ಖುಷಿಯಾಗಿ ಮನೆಯವರ ಜೊತೆ ಕಾಲ ಕಳೆಯುತ್ತಿದ್ದರು. ಈಗ ಸಂಜನಾ ಇದ್ದಕ್ಕಿದ್ದಂತೆ ಸೋಷಿಯಲ್ ಮೀಡಿಯಾದಲ್ಲಿ ಲೈವ್‌   ಬಂದು, ಬದುಕಿನ ಬಗೆಗೆ ಬೇಸರ ಆಗಿದೆ, ಜೀವನನೇ ಬೇಡ ಎಂಬಂತೆ  ಹೇಳಿಕೊಂಡಿದ್ದರು. ತಮ್ಮ ಇನ್‌ಸ್ಟಾಗ್ರಾಂನಲ್ಲಿ ಲೈವ್ ಬಂದು ನನ್ನ ಆರೋಗ್ಯದಲ್ಲಿ ವಿಪರೀತ ಏರುಪೇರಾಗಿದೆ ಎಂದಿದ್ದರು.

ಕೆಲ ಹೊತ್ತಿನ ಬಳಿಕ ಅವರನ್ನು  ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ  ಎಂಬ ಸುದ್ದಿ ಬಂದಿದೆ. ಸದ್ಯಕ್ಕೆ ಸಂಜನಾ ಗಲ್ರಾನಿ  ಆಸ್ಪತ್ರೆಗೆ ಸೇರಿದ್ದು ಯಾಕೆ ಎಂಬ ಮಾಹಿತಿ ತಿಳಿದಿಲ್ಲ. ಆಸ್ಪತ್ರೆಯಿಂದಲೇ ಲೈವ್ ನಲ್ಲಿ ಮಾತನಾಡಿರುವ ಇವರು,  ನನ್ನ ಆರೋಗ್ಯ ಈಗ ಸುಧಾರಿಸಿದೆ ಎಂದು ಹೇಳಿಕೊಂಡಿದ್ದಾರೆ. ಅದೇನೆ ಇರಲಿ, ಸಂಜನಾ ಜೈಲಿನಿಂದ ಹೊರಬಂದ ಬಳಿಕ ಮಾತನಾಡಿದ್ದು, ಆಸ್ಪತ್ರೆಗೆ ಸೇರಿದ್ದು ಹಲವು ಪ್ರಶ್ನೆಗಳಿಗೆ ಕಾರಣವಾಗಿದೆ.

ರಾಜ್‌ಮೌಳಿ ಸದ್ಯ ರಾಮ್‌ ಚರಣ್‌ ತೇಜಾ ಮತ್ತು ಜ್ಯೂನಿಯರ್ ಎನ್‌ಟಿಆರ್‌ ನಟನೆಯ ‘ಆರ್‌ಆರ್‌ಆರ್‌’ ಸಿನಿಮಾದಲ್ಲಿ ಬ್ಯುಜಿಯಾಗಿದ್ದಾರೆ. ಇದಾದ ನಂತರ ಅವರು ಮಹೇಶ್ ಬಾಬು ಸಿನಿಮಾ ಕೈಗೆತ್ತಿಕೊಳ್ಳುವುದು ಬಹುತೇಕ ಖಚಿತವಾಗಿದೆ. ರಾಜ್‌ಮೌಳಿ ತಂದೆ ವಿಜಯೇಂದ್ರ ಪ್ರಸಾದ್ ಚಿತ್ರಕಥೆ ರಚಿಸುತ್ತಿದ್ದು, ಇದಕ್ಕೆ ದಟ್ಟ ಕಾಡಿನ ಹಿನ್ನೆಲೆಯ ಬ್ಯಾಕ್‌ಡ್ರಾಪ್‌ ಅವಶ್ಯಕತೆ ಇದೆ ಎನ್ನಲಾಗುತ್ತಿದೆ. ಹಾಗಾಗಿ ಆಫ್ರಿಕಾದ ಕಾಡುಗಳಲ್ಲಿ ಚಿತ್ರೀಕರಣ ನಡೆಸುವ ಬಗ್ಗೆ ರಾಜ್‌ಮೌಳಿ ಯೋಚಿಸುತ್ತಿದ್ದಾರೆ. ಮುಂದಿನ ವರ್ಷದಲ್ಲಿ ಚಿತ್ರ ಸೆಟ್ಟೇರಲಿದ್ದು, ಈ ಚಿತ್ರದೊಂದಿಗೆ ಪ್ಯಾನ್‌ ಇಂಡಿಯಾ ಸ್ಟಾರ್ ಆಗುವ ಕನಸು ಕಾಣುತ್ತಿದ್ದಾರೆ ಮಹೇಶ್ ಬಾಬು.

ದಟ್ಟ ಕಾನನದಲ್ಲಿ ನಡೆಯುವ ಆಕ್ಷನ್‌-ಥ್ರಿಲ್ಲರ್ ಚಿತ್ರಕ್ಕಾಗಿ ಸೂಕ್ತ ತಯಾರಿ ನಡೆದಿದೆ. ಪೀರಿಯಡ್‌ ಸಿನಿಮಾಗಳ ನಂತರ ರಾಜ್‌ಮೌಳಿ ಮತ್ತು ವಿಜಯೇಂದ್ರ ಪ್ರಸಾದ್ ಅವರು ಹೊಸ ರೀತಿಯ ಕತೆ ಮಾಡಲು ಹವಣಿಸುತ್ತಿದ್ದಾರೆ. ಮಹೇಶ್ ಬಾಬು ಚಿತ್ರದೊಂದಿಗೆ ಇದನ್ನು ಸಾಕಾರಗೊಳಿಸುವುದು ಅವರ ಉದ್ದೇಶ. ಭಾರತೀಯ ಸಿನಿಮಾಗಳಲ್ಲಿ ಹಿಂದೆಂದೂ ಚಿತ್ರಿಸದ ಆಫ್ರಿಕಾ ಕಾಡುಗಳಲ್ಲಿ ಸಿನಿಮಾ ಮಾಡುವುದು ರಾಜ್‌ಮೌಳಿ ಯೋಜನೆ. ಸದ್ಯ ಮಹೇಶ್ ಬಾಬು ‘ಸರ್ಕಾರು ವಾರಿ ಪಾಟ’ ಚಿತ್ರದಲ್ಲಿ ತೊಡಗಿಸಿಕೊಂಡಿದ್ದಾರೆ. ಪರಶುರಾಮ್ ಪೆಟ್ಲಾ ನಿರ್ದೇಶನದ ಚಿತ್ರದಲ್ಲಿ ಮಹೇಶ್ ಬಾಬುಗೆ ಕೀರ್ತಿ ಸುರೇಶ್ ನಾಯಕಿ.