Author: ದೇಶಾದ್ರಿ ಹೊಸ್ಮನೆ

ಅಲಂಕೃತ ಶ್ರೀವಾತ್ಸವ್ ನಿರ್ಮಾಣ, ನಿರ್ದೇಶನದ ‘ಬಾಂಬೆ ಬೇಗಮ್ಸ್‌’ ನೆಟ್‌ಫ್ಲಿಕ್ಸ್‌ ಸರಣಿಯಲ್ಲಿ ಕಾರವಾರ ಮೂಲದ ಕನ್ನಡತಿ ಆದ್ಯಾ ಆನಂದ್ ನಟಿಸಿದ್ದಾರೆ. ಮೊನ್ನೆ ಸರಣಿಯ ಟ್ರೈಲರ್ ಬಿಡುಗಡೆಯಾಗಿದ್ದು, ಮಾರ್ಚ್‌ 8ರ ಮಹಿಳಾ ದಿನದಂದು ಸರಣಿ ಪ್ರೀಮಿಯರ್ ಆಗಲಿದೆ. ಆಧುನಿಕ ಮುಂಬಯಿಯ ವಿವಿಧ ಕ್ಷೇತ್ರಗಳಲ್ಲಿ ತೊಡಗಿಸಿಕೊಂಡಿರುವ ಐವರು ಮಹಿಳೆಯರ ಸುತ್ತ ಹೆಣೆದ ಕತೆ ‘ಬಾಂಬೆ ಬೇಗಮ್ಸ್‌’. ಪೂಜಾ ಭಟ್‌, ಶಹಾನಾ ಗೋಸ್ವಾಮಿ, ಅಮೃತಾ ಸುಭಾ‍ಷ್‌, ಪ್ಲಬಿತಾ ಠಾಕೂರ್‌ ಮತ್ತು ಆದ್ಯಾ ಆನಂದ್‌ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.

ಸಿಂಗಾಪೂರದಲ್ಲಿ ನೆಲೆಸಿರುವ ಉತ್ತರ ಕನ್ನಡ ಮೂಲದ ಆನಂದ್ ನಾಯಕ್‌ ಮತ್ತು ಪ್ರಿಯಾ ದಂಪತಿ ಪುತ್ರಿ ಆದ್ಯಾ ಆನಂದ್‌. ಮಡಿಕೇರಿಯಲ್ಲಿ ಜನಿಸಿದ ಆದ್ಯಾ ಬೆಳೆದದ್ದು ಸಿಂಗಾಪೂರದಲ್ಲಿ. ಏಳನೇ ವಯಸ್ಸಿಗೆ ಆಕ್ಟಿಂಗ್, ಮಾಡೆಲಿಂಗ್‌ನಲ್ಲಿ ತೊಡಗಿಸಿಕೊಂಡಿದ್ದ ಆದ್ಯಾ ಸಿಂಗಾಪೂರದಲ್ಲಿ ರಂಗಭೂಮಿ ತರಬೇತಿ ಪಡೆದರು. ಬಾಲಿವುಡ್‌ನ ಅನುಪಮ್ ಖೇರ್‌ ಮತ್ತು ಅತುಲ್ ಮೊಂಗಿಯಾ ಇನ್‌ಸ್ಟಿಟ್ಯೂಟ್‌ಗಳಲ್ಲಿಯೂ ತರಬೇತಿ ಪಡೆದಿದ್ದಾರೆ. ‘ಎ ಯಲ್ಲೋ ಬರ್ಡ್’ ಸಿನಿಮಾ, ‘ಒನ್ ಹವರ್ ಟು ಡೇಲೈಟ್‌’ ಮತ್ತು ‘ಸ್ಕೈ ಸಿಟಿ’ ಕಿರುಚಿತ್ರಗಳಲ್ಲಿ ನಟಿಸಿದ್ದಾರೆ. ಅವರು ನಟಿಸಿದ್ದ ‘ಎ ಯಲ್ಲೋ ಬರ್ಡ್‌’ ಸಿನಿಮಾ ಪ್ರತಿಷ್ಠಿತ ಕಾನ್ ಚಿತ್ರೋತ್ಸವದಲ್ಲಿ ಪ್ರದರ್ಶನಗೊಂಡಿತ್ತು.

ಸೋನಿ ಟೀವಿಯ ಸೂಪರ್ ಡ್ಯಾನ್ಸ್‌ ಸಿಂಗಾಪೂರ್‌ನ ವಿಜೇತೆ ಆದ್ಯಾ. ಸಿಂಗಾಪೂರ್‌ನ ಜನಪ್ರಿಯ ‘ವ್ಹೂಪೀಸ್‌ ವರ್ಲ್ಡ್‌’ ಸರಣಿಯ ನಾಲ್ಕು ಸೀಸನ್‌ಗಳು, ‘ಲಯನ್ ಮಮ್ಸ್‌’ನ 2 ಮತ್ತು 3ನೇ ಸರಣಿ, ‘ವರ್ಲ್ಡ್‌ ವಿಜ್‌ ಸ್ಲೈಮ್‌ ಪಿಟ್‌’, ‘ಮೆನಂತು ಇಂಟರ್‌ನ್ಯಾಷನಲ್‌’ ಸೇರಿದಂತೆ ಹಲವು ಕಿರುತೆರೆ ಧಾರಾವಾಹಿಗಳಲ್ಲಿ ನಟಿಸಿದ್ದಾರೆ.

ಝೀ ಟೀವಿಯಲ್ಲಿ ಆದ್ಯಾ ನಿರೂಪಿಸಿದ್ದ ‘ಬ್ರೈನ್ ಬೂಸ್ಟರ್ಸ್‌’ ಕಾರ್ಯಕ್ರಮ ಹದಿನೆಂಟು ದೇಶಗಳಲ್ಲಿ ಎರಡು ಸೀಸನ್‌ಗಳಲ್ಲಿ ಪ್ರಸಾರ ಕಂಡಿದೆ.‘ಬಾಂಬೆ ಬೇಗಮ್ಸ್‌’ ವೆಬ್‌ ಸರಣಿ ಆಡಿಷನ್‌ನಲ್ಲಿ 500ಕ್ಕೂ ಹೆಚ್ಚು ಯುವತಿಯರು ಭಾಗವಹಿಸಿದ್ದರು. ಕೊನೆಗೆ ‘ಶಾಯ್ ಇರಾನಿ’ ಪಾತ್ರಕ್ಕೆ ಆದ್ಯಾ ಆಯ್ಕೆಯಾಗಿದ್ದಾರೆ. ಮಾತೃಭಾಷೆ ಕನ್ನಡದ ಜೊತೆ ಹಿಂದಿ ಮತ್ತು ಇಂಗ್ಲಿಷನ್ನು ಸೊಗಸಾಗಿ ಮಾತನಾಡುವ ಆದ್ಯಾ ಮುಂದಿನ ದಿನಗಳಲ್ಲಿ ಕನ್ನಡ, ಹಿಂದಿ ಸಿನಿಮಾಗಳಲ್ಲಿ ನಟಿಸುವ ಇರಾದೆ ಹೊಂದಿದ್ದಾರೆ.

ಸಿನಿಮಾ ಮತ್ತು ಕಿರುತೆರೆ ನಟಿ ಎರಿಕಾ ಫರ್ನಾಂಡಿಸ್‌ ಕನ್ನಡ ಕಿರುತೆರೆಗೆ ಬರುತ್ತಿದ್ದಾರೆ. ಕನ್ನಡದ ಜನಪ್ರಿಯ ‘ಜೊತೆಜೊತೆಯಲಿ’ ಸರಣಿಯ ‘ರಾಜನಂದಿನಿ’ ಪಾತ್ರದಲ್ಲಿ ಅವರು ಕಾಣಿಸಿಕೊಳ್ಳುವುದು ಬಹುತೇಕ ಖಚಿತವಾಗಿದೆ. ಈ ಹಿಂದೆ ಕನ್ನಡ ಚಿತ್ರಗಳಲ್ಲಿ ನಟಿಸಿದ್ದ ಎರಿಕಾ ಇದೀಗ ಅನಿರುದ್ಧ ಜೋಡಿಯಾಗಿ ಕನ್ನಡ ಧಾರಾವಾಹಿಗೆ ಪದಾರ್ಪಣೆ ಮಾಡುತ್ತಿದ್ದಾರೆ. ಅವರ ಪಾತ್ರ ಧಾರಾವಾಹಿಗೆ ಒಂದು ವಿಶಿಷ್ಟ ತಿರುವು ನೀಡಲಿದ್ದು, ಇದು ನಟಿಗೆ ಮಹತ್ವದ ಪಾತ್ರವಾಗಲಿದೆ. ‘ಕಸೌತಿ ಜಿಂದಗೀ ಕೆ’ ಹಿಂದಿ ಸರಣಿಯಲ್ಲಿ ಜನಪ್ರಿಯತೆ ಗಳಿಸಿರುವ ಎರಿಕಾ ಕನ್ನಡ ಕಿರುತೆರೆಯಲ್ಲೂ ಸದ್ದು ಮಾಡಲು ಸಜ್ಜಾಗಿದ್ದಾರೆ.

ಮುಂಬಯಿ ಮೂಲದ ಎರಿಕಾ 2013ರಲ್ಲಿ ಪುನೀತ್‌ ರಾಜಕುಮಾರ್ ಅಭಿನಯದ ‘ನಿನ್ನಿಂದಲೇ’ ಚಿತ್ರದೊಂದಿಗೆ ಸ್ಯಾಂಡಲ್‌ವುಡ್‌ಗೆ ಬಂದಿದ್ದರು. ಅದಾಗಿ ಎರಡು ವರ್ಷಗಳ ನಂತರ ಅವರು ನಟಿಸಿದ್ದ ಕನ್ನಡ ಸಿನಿಮಾ ‘ಬುಗುರಿ’. ಅಲ್ಲಿ ಅವರಿಗೆ ಗಣೇಶ್ ಹೀರೋ. ಒಂದೊಂದು ತಮಿಳು, ತೆಲುಗು, ಹಿಂದಿ ಚಿತ್ರದಲ್ಲಿ ನಟಿಸಿದ ಅವರು ಹಿಂದಿ ಕಿರುತೆರೆಯಲ್ಲಿ ಬ್ಯುಸಿಯಾಗಿದ್ದರು. ಇದೀಗ ‘ಜೊತೆಜೊತೆಯಲಿ’ ಧಾರಾವಾಹಿಯಲ್ಲಿ ನಾಯಕನಟ ಆರ್ಯವರ್ಧನ್‌ ಅವರ ಮೊದಲ ಪತ್ನಿ ‘ರಾಜನಂದಿನಿ’ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

ಈಗಾಗಲೇ ಅನಿರುದ್ಧ ಮತ್ತು ಎರಿಕಾ ಅವರ ಫೋಟೋಶೂಟ್ ನಡೆದ ಬಗ್ಗೆ ಸುಳಿವು ಸಿಕ್ಕಿದೆ. ಮುಂದಿನ ಕೆಲವು ದಿನಗಳಲ್ಲಿ ನಟಿಯ ಸೀರಿಯಲ್ ಪ್ರವೇಶದ ಬಗ್ಗೆ ಅಧಿಕೃತಿ ಮಾಹಿತಿ ಹೊರಬೀಳಬಹುದು.

ಪ್ರಶಾಂತ್ ನೀಲ್‌ ಮತ್ತು ಯಶ್ ಜೋಡಿಯ ‘ಕೆಜಿಎಫ್‌’ ಸಿನಿಮಾ ಜಗತ್ತಿನ ಗಮನ ಸೆಳೆದದ್ದು ಸರಿಯಷ್ಟೆ. ಸ್ಟೈಲಿಶ್ ಮೇಕಿಂಗ್‌ನಿಂದಾಗಿ ಸಿನಿಮಾ ಸಾಗರದಾಚೆಗೂ ಅಭಿಮಾನಿಗಳನ್ನು ಸೃಷ್ಟಿಸಿಕೊಂಡಿತು. ಇದೀಗ ‘ಕೆಜಿಎಫ್‌-2’ ನಿರೀಕ್ಷೆ ಹೆಚ್ಚಿಸಿದೆ. ಅಮೇರಿಕಾದ ವ್ರೆಸ್ಲರ್‌ ವಿಲ್ಲಿ ಮ್ಯಾಕ್‌ ಮೊನ್ನೆ ತಮ್ಮ ಟ್ವಿಟರ್ ಅಕೌಂಟ್‌ನಲ್ಲಿ ಕೆಜಿಎಫ್‌ – 2 ಟ್ರೈಲರ್ ಹಂಚಿಕೊಂಡು, “ಇದೊಂದು ಅದ್ಭುತ ಟ್ರೈಲರ್‌. ನಾನು ಚಿತ್ರಕ್ಕಾಗಿ ದೊಡ್ಡ ನಿರೀಕ್ಷೆಯೊಂದಿಗೆ ಕಾಯುತ್ತಿದ್ದೇನೆ” ಎಂದು ಬರೆದಿದ್ದಾರೆ. ಕೆಜಿಎಫ್ ಸರಣಿಯ ಮೊದಲ ಸಿನಿಮಾವನ್ನು ಅವರು ತುಂಬಾ ಇಷ್ಟಪಟ್ಟಿದ್ದರಂತೆ. ಇದೀಗ ಸರಣಿ ಸಿನಿಮಾವನ್ನು ಎದುರು ನೋಡುತ್ತಿದ್ದಾರೆ. ಅವರ ಈ ಟ್ವೀಟ್‌ ಕನ್ನಡ ಸಿನಿಮಾ ತಂತ್ರಜ್ಞರು ಸೃಷ್ಟಿಸಿದ ಸಂಚಲನಕ್ಕೆ ಸಾಕ್ಷ್ಯ ನುಡಿಯುತ್ತಿದೆ.

ಕನ್ನಡದ ನಟನೊಬ್ಬ ದೂರದ ಅಮೇರಿಕಾದ ಸೆಲೆಬ್ರಿಟಿ ಅಭಿಮಾನಿಯಿಂದ ಪ್ರಶಂಸೆಗೆ ಒಳಗಾಗಿರುವುದು ಯಶ್ ಅಭಿಮಾನಿಗಳಿಗೆ ಖುಷಿ ತಂದಿದೆ. ಅಭಿಮಾನಿಗಳು ತಮ್ಮ ಸೋಷಿಯಲ್ ಮೀಡಿಯಾ ಅಕೌಂಟ್‌ಗಳಲ್ಲಿ ವಿಲ್ಲಿ ಮ್ಯಾಕ್ ಟ್ವೀಟನ್ನು ಹಂಚಿಕೊಂಡಿದ್ದಾರೆ. ಇದೀಗ ಕೆಜಿಎಫ್‌  2 ಚಿತ್ರದ ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳ ಬಿರುಸಿನಿಂದ ಸಾಗಿದ್ದು, ಜುಲೈ 16ರಂದು ಹಲವು ಭಾಷೆಗಳಲ್ಲಿ ಚಿತ್ರ ತೆರೆಕಾಣಲಿದೆ. ಸರಣಿ ಚಿತ್ರದಲ್ಲಿ ಬಾಲಿವುಡ್ ನಟ ಸಂಜಯ್ ದತ್‌ ಅವರು ‘ಅಧೀರ’ ಖಳ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ನಟಿ ರವೀನಾ ಟಂಡನ್‌ ಅವರಿಗೆ ಪ್ರಧಾನಿ ‘ರಮಿಕಾ ಸೇನ್‌’ ಪಾತ್ರವಿದೆ.

ವರನಟ ಡಾ. ರಾಜ್‌ ಕುಮಾರ್‌ ಪ್ರತಿಮೆ ಸ್ಥಾಪನೆ ವಿವಾದದಲ್ಲಿ ಬೆಂಗಳೂರಿನ ಶಾಂತಿನಗರ ವಿಧಾನ ಸಭಾ ಕ್ಷೇತ್ರದ ಶಾಸಕ ಎನ್.‌ ಎ. ಹ್ಯಾರಿಸ್‌ ಕೊನೆಗೂ ಕ್ಷಮೆ ಕೋರಿದ್ದಾರೆ.

” ನಾನು ಅಣ್ಣಾವ್ರ ಪಕ್ಕಾ ಅಭಿಮಾನಿ. ಅವರ ಬಗ್ಗೆ ಅಪಾರ ಗೌರವವಿದೆ. ಅನೇಕ ಸಲ ಅವರನ್ನು ನೇರವಾಗಿ ಭೇಟಿ ಮಾಡಿ ಮಾತನಾಡಿದ್ದೇನೆ. ಅವರ ಬಗ್ಗೆ ನಾನೆಂದಿಗೂ ಅಗೌರವ ತೋರಿಲ್ಲ. ಯಾರು ಹೇಗೆ ಅರ್ಥೈಸಿದ್ದಾರೋ ನಂಗೆ ಗೊತ್ತಿಲ್ಲ. ವಾಸ್ತವದಲ್ಲಿ ಶಾಂತಿನಗರದಲ್ಲಿ ರಾಜ್‌ ಕುಮಾರ್‌ ಪ್ರತಿಮೆ ಬರೋದಿಕ್ಕೆ ನಾನು ಕೂಡ ಕಾರಣ. ಆದರೆ ಯಾರು ಈ ರೀತಿ ಅಪ ಪ್ರಚಾರ ಮಾಡಿದ್ದರೋ ಅರ್ಥ ಆಗುತ್ತಿಲ್ಲ. ಈ ರೀತಿ ಯಾವುದೇ ಮಾತು ನಾನು ಆಡಿಲ್ಲʼ ಎಂದು ಸ್ಪಷ್ಟನೆ ನೀಡಿದ್ದಾರೆ.

ಆದರೆ ಶಾಸಕ ಹ್ಯಾರಿಸ್‌ ವಿರುದ್ಧ ಸೋಷಲ್‌ ಮೀಡಿಯಾದಲ್ಲಿ ಭಾರೀ ವಿರೋಧ ವ್ಯಕ್ತವಾಗಿದೆ. ಯಾವುದೋ ಭಾಷಿಗನನ್ನು ಇಲ್ಲಿ ಬಿಟ್ಟುಕೊಂಡಿದ್ದರಿಂದಲೇ ಇವತ್ತು ಕನ್ನಡ ಮತ್ತು ಕನ್ನಡದ ಸಾಧಕರಿಗೆ ಅವಮಾನ ಆಗುತ್ತಿದೆ ಎಂದು ಕನ್ನಡ ಸಂಘಟನೆಗಳ ಕಾರ್ಯಕರ್ತರು ಹ್ಯಾರಿಸ್‌ ಅವರನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ. ಇದಾಗುತ್ತಿದ್ದರೆ ಎಚ್ಚೆತ್ತುಕೊಂಡ ಶಾಸಕ ಎನ್.ಎ. ಹ್ಯಾರಿಸ್‌  ತಾವು ಹಾಗೆ ಹೇಳಿಲ್ಲ ಎಂದು ವಿಡಿಯೋ ಮಾಡಿ ಸೋಷಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ಹಾಗಾದ್ರೆ ವಾಸ್ತವ ಏನು? ಹ್ಯಾರಿಸ್‌ ಹಾಗೆ ಹೇಳಿಲ್ಲವೇ?

ವಿವಾದ ಅಗಿದ್ದು ಹೀಗೆ..

ಶಾಂತಿನಗರ ವಿಧಾನ ಸಭಾ ಕ್ಷೇತ್ರದಲ್ಲಿನ ಶಾಂತಿ ಸಾಗರ್‌ ಹೊಟೇಲ್‌ ಬಳಿ   ಡಾ. ರಾಜ್‌ ಕುಮಾರ್‌ ಪ್ರತಿಮೆ ಸ್ಥಾಪನೆ ಮಾಡುವುದಾಗಿ ಕನ್ನಡ ಸಂಘಟನೆಗಳು ಕೋರಿದ್ದವು ಎನ್ನಲಾಗಿದೆ.  ಜತೆಗೆ ಡಾ. ರಾಜ್‌ ಕುಮಾರ್‌ ಹೆಸರಲ್ಲಿ ಒಂದು ಬೋರ್ಡ್‌ ಹಾಕಿಸಲು ಕೂಡ ಅನುಮತಿ ಕೇಳಿದ್ದರು.  ಇತ್ತೀಚೆಗೆ ಅದರ ಪರಿಶೀಲನೆಗೆ ಹೋಗಿದ್ದ ಶಾಸಕ ಹ್ಯಾರಿಸ್‌, ಪ್ರತಿಮೆಗಳೆಲ್ಲ ರಸ್ತೆಗಳಿಗೆ ಬೇಕಾ? ಬೇಕಾದ್ರೆ ಮನೆಯಲ್ಲೇ ಹಾಕಿಸಿಕೊಳ್ಳಿ. ಇವರಿಗೆ ಬುದ್ದಿ ಇಲ್ಲ. ಹೇಳಿದ್ರೆ ಇನ್ನೇನೋ ಮಾಡ್ತಾರೆ ಎಂದಿದ್ದಾರೆ. ಅವರು ಮಾತನಾಡಿರುವ  ಆಡಿಯೋ , ವಿಡಿಯೋ ಸೋಷಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿದೆ.

ಕನ್ನಡ ಸಂಘಟನೆಗಳ ಕಾರ್ಯಕರ್ತರೇ ಅದನ್ನು ಸೋಷಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ.ಈ ವಿಚಾರ ಸೋಷಲ್‌ ಮೀಡಿಯಾದಲ್ಲಿ ಹರಿದಾಡುತ್ತಿದ್ದಂತೆ ಭಾರೀ ವಿವಾದವೇ ಸೃಷ್ಟಿಯಾಯಿತು. ಕನ್ನಡ ಸಂಘಟನೆಗಳು ವಿರೋಧ ವ್ಯಕ್ತಪಡಿಸಿ, ಹ್ಯಾರಿಸ್‌ ಅವರನ್ನು ತರಾಟೆಗೆ ತೆಗೆದುಕೊಂಡಿದ್ದರು.ಇದು ವಿವಾದ ಸೃಷ್ಟಿಸುತ್ತಿದ್ದಂತೆ ಎಚ್ಚೆತ್ತುಕೊಂಡ ಎನ್.‌ ಎ. ಹ್ಯಾರಿಸ್‌ ತಾವು ಹಾಗೆ ಮಾತನಾಡಿಲ್ಲ. ರಾಜ್‌ ಕುಮಾರ್‌ ಅವರ ಬಗ್ಗೆ ಗೌರವವಿದೆ ಅಂತ ವಿವಾದದಿಂದ ತಪ್ಪಿಸಿಕೊಳ್ಳುವ ಯತ್ನ ನಡೆಸಿದ್ದಾರೆ.

ಭಾರತದ ಜನಪ್ರಿಯ ಸಂಗೀತ ಸಂಯೋಜಕ ಇಳಯರಾಜಾ ಅವರು ದಶಕಗಳ ಕಾಲ ಪ್ರಸಾದ್ ಸ್ಟುಡಿಯೋ ಜೊತೆ ಒಡನಾಟ ಹೊಂದಿದ್ದರು. ಅದು ತಮಗೆ ಅದೃಷ್ಟದ ಸ್ಟುಡಿಯೋ ಎಂದೇ ಅವರು ಭಾವಿಸಿದ್ದರು. ಇತ್ತೀಚೆಗೆ ಪ್ರಸಾದ್ ಸ್ಟುಡಿಯೋದ ಮಾಲೀಕತ್ವ ಬದಲಾಗಿ, ಅಲ್ಲಿ ಇಳಯರಾಜಾ ಅವರಿಗೆ ಕಾನೂನಿನ ತೊಡಕು ಎದುರಾಗಿತ್ತು. ಇದರಿಂದ ಚೆನ್ನೈನ ಕೋಡಂಬಾಕಂನಲ್ಲಿ ಇಳಯರಾಜಾ ತಮ್ಮದೇ ಸ್ವಂತ ಸುಸಜ್ಜಿತ ಸ್ಟುಡಿಯೋ ರೂಪಿಸಿದ್ದಾರೆ.

ಸೂಪರ್‌ಸ್ಟಾರ್ ರಜನೀಕಾಂತ್‌ ಅವರು ಮೊನ್ನೆ ಇಳಯರಾಜಾ ಸ್ಟುಡಿಯೋಗೆ ಭೇಟಿ ಮಾಡಿ ಶುಭ ಹಾರೈಸಿದ್ದಾರೆ. ‘ದಳಪತಿ’, ‘ವೀರಾ’ ಸೇರಿದಂತೆ ರಜನೀಕಾಂತ್‌ರ ಕೆಲವು ಚಿತ್ರಗಳಿಗೆ ಇಳಯರಾಜಾ ಸಂಗೀತ ಸಂಯೋಜನೆಯಿದೆ.

ಹೊಸ ಸ್ಟುಡಿಯೋದಲ್ಲಿ ಕೆಲಸಮಯ ಕಾಲ ಕಳೆದ ರಜನೀಕಾಂತ್‌ ತಮ್ಮ ಹೊಸ ಚಿತ್ರದ ಬಗ್ಗೆ ಚರ್ಚಿಸಿದ್ದಾರೆ. 70ರ ದಶಕದಿಂದಲೂ ಇಳಯರಾಜ ಅವರು ಪ್ರಸಾದ್ ಸ್ಟುಡಿಯೋದಲ್ಲಿ ಸಂಗೀತ ಸಂಯೋಜಿಸುತ್ತಿದ್ದರು. ಆಸ್ತಿ ವಾಜ್ಯದಿಂದಾಗಿ ಅವರು ಹೊರಬರಬೇಕಾಯ್ತು. ಅಲ್ಲಿನ ತಮ್ಮ ಸಂಗೀತ ಪರಿಕರಣಗಳಿಗೆ ಹಾನಿ ಮಾಡಿದ್ದಾರೆ ಎಂದು ಇಳಯರಾಜಾ ದೂರು ದಾಖಲಿಸಿದ್ದಾರೆ.

ಬಹುವರ್ಷಗಳ ನಂತರ ಬಾಲಿವುಡ್‌ಗೆ ಹೋಗಿದ್ದ ನಾಗಾರ್ಜುನ ತಮ್ಮ ‘ಬ್ರಹ್ಮಾಸ್ತ್ರ’ ಹಿಂದಿ ಸಿನಿಮಾದ ಚಿತ್ರೀಕರಣ ಪೂರ್ಣಗೊಳಿಸಿದ್ದಾರೆ. ಚಿತ್ರದ ಪ್ರಮುಖ ತಾರೆಯರಾದ ರಣಬೀರ್ ಕಪೂರ್ ಮತ್ತು ಅಲಿಯಾ ಭಟ್‌ ಜೊತೆಗಿನ ಫೋಟೋ ಹಂಚಿಕೊಂಡಿರುವ ಅವರು ಚಿತ್ರೀಕರಣದ ಅನುಭವಗಳನ್ನು ಹಂಚಿಕೊಂಡಿದ್ದಾರೆ. “ಚಿತ್ರದ ನನ್ನ ಪೋರ್ಷನ್‌ ಮುಗಿಸಿದೆ. ಉತ್ತಮ ನಟ-ನಟಿಯಾದ ರಣಬೀರ್ ಮತ್ತು ಅಲಿಯಾ ಜೊತೆಗೆ ನಟಿಸಿದ್ದು ತುಂಬಾ ಖುಷಿ ಕೊಟ್ಟಿದೆ. ಥಿಯೇಟರ್‌ನಲ್ಲಿ ನಿಮ್ಮ ಪ್ರತಿಕ್ರಿಯೆಗೆ ಎದುರು ನೋಡುತ್ತಿದ್ದೇನೆ” ಎಂದು ಟ್ವೀಟ್ ಮಾಡಿದ್ದಾರವರು.

‘ಬ್ರಹ್ಮಾಸ್ತ್ರ’ ಚಿತ್ರದಲ್ಲಿ ನಾಗಾರ್ಜುನ ಪುರಾತತ್ವಶಾಸ್ತ್ರಜ್ಞನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಶಿವ (ರಣಬೀರ್‌) ಮತ್ತು ಇಶಾ (ಅಲಿಯಾ) ಪುರಾತನ ದೇವಾಲಯವೊಂದನ್ನು ಅಭ್ಯಸಿಸಲು ವಾರಣಾಸಿಗೆ ಬರುತ್ತಾರೆ. ಅಲ್ಲಿ ವಿಚಿತ್ರ ಘಟನೆಗಳಿಗೆ ಸಾಕ್ಷಿಯಾಗುವ ಅವರಿಗೆ ಹಲವು ಅಚ್ಚರಿಗಳು ಕಾಣುತ್ತವೆ. ಮುಂದೆ ಸಿನಿಮಾ ಕತೆ ಹಿಮಾಲಯದೆಡೆ ಸಾಗುತ್ತದೆ. ಆಕ್ಷನ್‌-ಥ್ರಿಲ್ಲರ್ ಮಾದರಿ ಸಿನಿಮಾದಲ್ಲಿ ಅಮಿತಾಭ್ ಬಚ್ಚನ್ ಮತ್ತು ಮೌನಿ ರಾಯ್‌ ಕೂಡ ನಟಿಸಿದ್ದಾರೆ.

ನಾಗಾರ್ಜುನ ನಟಿಸಿದ್ದ ಕೊನೆಯ ಹಿಂದಿ ಸಿನಿಮಾ ‘ಎಲ್‌ಓಸಿ ಕಾರ್ಗಿಲ್‌’ (2003). ಅದಕ್ಕೂ ಮುನ್ನ ಅವರು ಖುದಾ ಗವಾ, ಅಂಗಾರೆ, ಕ್ರಿಮಿನಲ್, ಝಕ್ಮ್‌ ಚಿತ್ರಗಳಲ್ಲಿ ನಟಿಸಿದ್ದರು. ಕೋವಿಡ್‌ ಕಾರಣದಿಂದಾಗಿ ಸ್ಥಗಿತಗೊಂಡಿದ್ದ ಚಿತ್ರೀಕರಣಕ್ಕೆ ಇದೀಗ ಕೊನೆಯ ಹಂತದ ಶೂಟಿಂಗ್ ನಡೆಯುತ್ತಿದೆ. ಸದ್ಯದಲ್ಲೇ ಚಿತ್ರೀಕರಣ ಮುಗಿಯಲಿದ್ದು ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳಿಗೆ ಚಾಲನೆ ಸಿಗಲಿದೆ. ಈ ವರ್ಷದ ಕೊನೆಗೆ ಸಿನಿಮಾ ಬಿಡುಗಡೆ ಮಾಡುವುದು ಚಿತ್ರತಂಡದ ಯೋಜನೆ.

ತೆಲುಗು ಮತ್ತು ತಮಿಳು ಸಿನಿಮಾಗಳ ಯುವನಟಿ ನಿಧಿ ಅಗರ್‌ವಾಲ್‌ ಅವರಿಗೆ ಅಭಿಮಾನಿಗಳು ಚೆನ್ನೈನಲ್ಲಿ ದೇವಸ್ಥಾನ ನಿರ್ಮಿಸಿದ್ದಾರೆ. ನಟಿಯ ಪ್ರತಿಮೆ ರೂಪಿಸಿದ್ದು, ಅದಕ್ಕೆ ಅಭಿಷೇಕ – ಆರತಿ ನಡೆಯುತ್ತಿದೆ. “ಪ್ರೇಮಿಗಳ ದಿನಕ್ಕಾಗಿ ಇದು ನಮ್ಮ ಕಡೆಯಿಂದ ನಟಿಗೆ ಉಡುಗೊರೆ” ಎಂದಿದ್ದಾರೆ ಅಭಿಮಾನಿಗಳು. “ಅಭಿಮಾನಿಗಳು ಈ ನಡೆ ನನಗೆ ಶಾಕ್ ತಂದಿದೆ. ಇದೆಲ್ಲವನ್ನೂ ನಾನು ಖಂಡಿತ ನಿರೀಕ್ಷಿಸಿರಲಿಲ್ಲ. ಅವರ ಪ್ರೀತಿಗೆ ನಾನು ಋಣಿ” ಎನ್ನುತ್ತಾರೆ ನಿಧಿ.

ನಟ-ನಟಿಯರಿಗೆ ದೇವಾಲಯ ನಿರ್ಮಿಸುವುದು ತಮಿಳುನಾಡಿನಲ್ಲಿ ಹೊಸದೇನಲ್ಲ. ಈ ಹಿಂದೆ ಎಂಜಿಆರ್‌, ಖುಷ್ಬೂ, ನಮಿತಾ, ಹನ್ಸಿಕಾ ಅವರಿಗೆ ಅಭಿಮಾನಿಗಳು ದೇವಾಲಯಗಳನ್ನು ನಿರ್ಮಿಸಿದ್ದರು. ಬಹುಭಾಷಾ ತಾರೆ ನಯನತಾರಾ ಅವರಿಗೂ ದೇಗುಲ ನಿರ್ಮಾಣವಾಗುತ್ತಿದೆ ಎನ್ನಲಾಗಿದೆ. ಇದೀಗ ನಿಧಿಯನ್ನು ಆರಾಧಿಸುತ್ತಿರುವುದು ಸ್ವತಃ ಆ ನಟಿಗೇ ಅಚ್ಚರಿ ತಂದಿದೆ.

“ನಾನಿನ್ನೂ ಹೊಸಬಳು. ಮೂರ್ನಾಲ್ಕು ತೆಲುಗು ಮತ್ತು ಎರಡು ತಮಿಳು ಚಿತ್ರಗಳಲ್ಲಿ ನಟಿಸಿದ್ದೇನಷ್ಟೆ. ಅಭಿಮಾನಿಗಳು ನನ್ನ ಬಗ್ಗೆ ಅಪಾರ ಅಭಿಮಾನ ತಳೆದಿದ್ದಾರೆ. ಸಂದರ್ಶನವೊಂದರಲ್ಲಿ ನಾನು ಅನಾಥ ಮಕ್ಕಳಿಗಾಗಿ ಕೆಲಸ ಮಾಡಬೇಕೆನ್ನುವ ಇಚ್ಛೆ ವ್ಯಕ್ತಪಡಿಸಿದ್ದೆ. ನನ್ನ ಮನದಿಂಗಿತ ಅರಿತು ಅಭಿಮಾನಿಗಳು ಅನಾಥರಿಗೆ ಊಟ ನೀಡಿದ್ದಾರೆ” ಎನ್ನುವ ನಿಧಿ ಸದ್ಯ ಪವನ್ ಕಲ್ಯಾಣ್ ಜೋಡಿಯಾಗಿ ತೆಲುಗು ಚಿತ್ರವೊಂದರಲ್ಲಿ ನಟಿಸುತ್ತಿದ್ದಾರೆ. ಇದಾದ ನಂತರ ಉದಯನಿಧಿ ಸ್ಟಾಲಿನ್ ಜೊತೆ ತಮಿಳು ಸಿನಿಮಾ ಮಾಡಲಿದ್ದಾರೆ.

ರೈತರ ಹೋರಾಟ ಬೆಂಬಲಿಸಿ ಟೂಲ್‌ಕಿಟ್‌ ಸೃಷ್ಟಿ ಮಾಡಿದ ಆರೋಪದಡಿ ಬಂಧಿತರಾಗಿರುವ ದಿಶಾ ರವಿ ಬೆಂಬಲಿಸಿ ನಟಿ ರಮ್ಯಾ ಇನ್‌ಸ್ಟಾಗ್ರಾಂ ಪೋಸ್ಟ್ ಹಾಕಿದ್ದಾರೆ. ಈ ಸುದೀರ್ಘ ಪತ್ರದಲ್ಲಿ ರಮ್ಯಾ ಅವರು ಕೇಂದ್ರ ಸರ್ಕಾರದ ನಿಲುವನ್ನು ಪ್ರಶ್ನಿಸುತ್ತಲೇ ನಾಗರಿಕರ ಜವಾಬ್ದಾರಿಯನ್ನೂ ನೆನಪು ಮಾಡಿದ್ದಾರೆ.

21ರ ಹರೆಯದ ಬೆಂಗಳೂರಿನ ಯುವತಿ ದಿಶಾ ರವಿ ಅವರನ್ನು ಮೊನ್ನೆ ದಿಲ್ಲಿ ಪೊಲೀಸರು ಬಂಧಿಸಿದ ಕರೆದೊಯ್ದಿದ್ದಾರೆ. ರೈತರ ಹೋರಾಟಕ್ಕೆ ಸಂಬಂಧಿಸಿದಂತೆ ಜಾಗತಿಕ ಹೋರಾಟಗಾರರಿಗೆ ಟೂಲ್‌ಕಿಟ್‌ನೊಂದಿಗೆ ನೆರವಾಗಿದ್ದಾರೆ ಎನ್ನುವ ಆರೋಪ ಅವರ ಮೇಲಿದೆ. ದಿಶಾರನ್ನು ಬೆಂಬಲಿಸಿರುವ ರಮ್ಯಾ, “ಈಗ ದಿಶಾ ಜೈಲಿನಲ್ಲಿದ್ದರೆ ಅದಕ್ಕೆ ನಾವೆಲ್ಲರೂ ಹೊಣೆಗಾರರು. ಮೂಕಪ್ರೇಕ್ಷಕರಂತೆ ನೋಡುತ್ತಾ ಕುಳಿತಿರುವ ನಾವು ದಿಟ್ಟತನದಿಂದ ಮಾತನಾಡಿ ಎಷ್ಟು ಸಮಯವಾಗಿದೆ?” ಎಂದು ಖಾರವಾಗಿ ಪ್ರಶ್ನಿಸಿದ್ದಾರೆ.

ಜನರು ತಮ್ಮ ಅಧಿಕಾರ, ದನಿಯನ್ನೇ ಮರೆತಿದ್ದಾರೆ ಎನ್ನುವುದು ಅವರ ಅಸಮಾಧಾನ. “ಜನರಿಂದ, ಜನರಿಗಾಗಿ ಸರ್ಕಾರ ಎನ್ನುವುದನ್ನು ಮರೆತಿದ್ದೇವೆ. ಆ ಯುವತಿ ತನ್ನದೇ ಒಂದು ಸ್ವಂತ ವ್ಯಕ್ತಿತ್ವ, ನಿಲುವು ಹೊಂದಿರುವುದಕ್ಕಾಗಿ ಇಂದು ಜೈಲಿನಲ್ಲಿದ್ದಾರೆ. ಪರಿಸರ ಹೋರಾಟಕ್ಕಾಗಿ ತನ್ನ ಬದುಕನ್ನು ಮುಡಿಪಾಗಿಟ್ಟಿರುವ ಆಕೆಯನ್ನು ನಾವು ಬೆಂಬಲಿಸದಿದ್ದರೆ ಹೇಗೆ? ನಾವೆಲ್ಲರೂ ದಿಶಾ ಪರ ನಿಲ್ಲೋಣ” ಎನ್ನುವ ರಮ್ಯಾ ಪೋಸ್ಟ್‌ಗೆ ಪರ-ವಿರೋಧದ ನೂರಾರು ಪ್ರತಿಕ್ರಿಯೆಗಳು ವ್ಯಕ್ತವಾಗಿವೆ.

ಸ್ಟಾರ್ ಸಂಸ್ಕೃತಿ ನನಗೆ ಮೇಲೆ ನಂಬಿಕೆ ಇಲ್ಲ. ಇದೆಲ್ಲ ಅಸಮಾನತೆಯ ಸೂಚಕ. ಇಷ್ಟಕ್ಕೂ ಸ್ಟಾರ್ ಆಗೋದು ಅಂದ್ರೇನು? ಒಂದಷ್ಟು ಅಭಿಮಾನಿಗಳನ್ನು ಸೃಷ್ಟಿಸಿಕೊಂಡು ಕಟೌಟ್ ಗಳ ಮೇಲೆ ಹಾಲಿನ ಅಭಿಷೇಕ ಮಾಡಿಸಿಕೊಳ್ಳುವುದಾ ? ನನ್ನ ಪ್ರಕಾರ ಸ್ಟಾರ್ ಗಿರಿ ಅನ್ನೋದು ಜನರು ನೀಡುವ ಆಶೀರ್ವಾದ. ಅದಕ್ಕೆ ವಾಪಸ್ ನಾವು ಅವರಿಗೇನು ಕೊಡುತ್ತೇವೆ ಅನ್ನೋದೇ ನಂಗೆ ಮುಖ್ಯ. ಅದು ಬಿಟ್ಟು ಶೋಕಿಗೋಸ್ಕರ ಸಿನಿಮಾ ನಟರಾಗೋದಲ್ಲ….

‘ಆ ದಿನಗಳು’ ಚಿತ್ರದ ಖ್ಯಾತಿಯ ನಟ ಚೇತನ್, ಸಿನಿಮಾ ಜಗತ್ತಿನ ಸ್ಟಾರ್ ಸಂಸ್ಕೃತಿಯ ವಿರುದ್ಧ ಹೀಗೆ ಒಂದೇ ಸಮನೆ ಗುಡುಗಿದರು. ಸಿನಿಮಾ ಜಗತ್ತು, ಜತೆಗೆ ಅದರಾಚೆಗೂ ನಮ್ಮ ಸುತ್ತ ಇರುವ ಅಸಮಾನತೆ, ತಾರತಮ್ಯ, ಲಿಂಗಭೇದ, ಶೋಷಣೆ ವಿರುದ್ಧ ಅವರ ಮಾತುಗಳು ಬೆಂಕಿ ಉಂಡೆಗಳಂತೆ ಹಾರಿದವು. ಒಬ್ಬ ನಟ ಹೀಗೆಲ್ಲ ಮಾತನಾಡುವುದಕ್ಕೆ ಸಾಧ್ಯವೇ ಎನ್ನುವಷ್ಟರ ಮಟ್ಟಿಗೆ ಸರ್ಕಾರ ಮತ್ತು ಶೋಷಕ ವ್ಯವಸ್ಥೆ ವಿರುದ್ಧ ಆಕ್ರೋಶ ಹೊರ ಹಾಕಿದರು ಚೇತನ್.

ಅವರು ಹೀಗೆಲ್ಲ ಮಾತನಾಡಿದ್ದು ‘ಸಿನಿ ಲಹರಿ’ ಕಚೇರಿಗೆ ಔಪಚಾರಿಕವಾಗಿ ಭೇಟಿ ನೀಡಿದ್ದ ಸಂದರ್ಭ. ಸೋಮವಾರ ನಟ ಚೇತನ್ ಅವರು ಪತ್ನಿ ಮೇಘಾ ಅವರೊಂದಿಗೆ ‘ಸಿನಿ ಲಹರಿ’ ಕಚೇರಿಗೆ ಬಂದಿದ್ದರು. ಇದೊಂದು ಔಪಚಾರಿಕ ಭೇಟಿ. ಕಚೇರಿ ವ್ಯವಸ್ಥೆ ಕಂಡು ಖುಷಿ ಪಟ್ಟರು. ಆ ನಂತರ ಮಾತಿಗೆ ಕುಳಿತ ಅವರು, ತಮ್ಮ ಸಿನಿ ಜರ್ನಿ ಜತೆಗೆ ಸಾಮಾಜಿಕ ಹೋರಾಟಕ್ಕೆ ಇಳಿದ ಕಾರಣ, ಅದೇ ಕಾರಣಕ್ಕೆ ಎದುರಿಸಿದ  ಜೀವ ಬೆದರಿಕೆ, ನಟ ಎನ್ನುವುದಕ್ಕಿಂತ ಹೋರಾಟಗಾರನಾಗಿ ಕಂಡ ಬದುಕಿನ ಅನುಭವಗಳನ್ನು ಎಳೆ ಎಳೆಯಾಗಿ ಬಿಚ್ಚಿಟ್ಟರು.

ಚೇತನ್ ನಟರಾ ಅಥವಾ ಹೋರಾಟಗಾರನಾ? ಮೊದಲು ಎದುರಾದ ಪ್ರಶ್ನೆಗೆ ಸಮಗ್ರವಾಗಿ ಉತ್ತರಿಸಿದರು.  “ ಎರಡನ್ನು ಯಾಕೆ ವಿಂಗಡಿಸಬೇಕು? ಒಬ್ಬ ನಟನೊಳಗೂ ಹೋರಾಟಗಾರ ಇರಬಾರದೇ? ನಾನು ನಟನಾಗುವುದಕ್ಕೂ ಮೊದಲೇ ಒಬ್ಬ ಸಾಮಾಜಿಕ ಹೋರಾಟಗಾರನಾಗಿದ್ದೆ. ಕೆಲವು ಸಾಮಾಜಿಕ ವಿಷಯಗಳ ಪರವಾಗಿ ಕರ್ನಾಟಕದ ಕೆಲವೆಡೆಗಳಿಗೆ ಭೇಟಿ ಕೊಟ್ಟು ಬಂದಿದ್ದೆ. ಜತೆಗೆ ಮನೆಯಲ್ಲಿ ನನ್ನ ಪೋಷಕರು ಬೆಳೆಸಿದ್ದೇ ಹಾಗೆ. ಹೋರಾಟಗಾರನಾಗಿ ನನ್ನ ಮಾತಿಗೆ ಒಂದಷ್ಟು ಬೆಲೆ ಬರಬೇಕಾದರೆ ನಟನಾಗುವುದು ಸೂಕ್ತಎನಿಸಿತು. ಹಾಗಾಗಿ ನಟನಾದೆ. ಸಿನಿಮಾ ನನ್ನ ವೃತ್ತಿ. ಹೋರಾಟ ನನ್ನ ಬದುಕು’ ಎನ್ನುತ್ತಾರೆ ಚೇತನ್.

ಚೇತನ್ ಅಂದ್ರೆ ವಿವಾದ, ವಿವಾದ ಅಂದ್ರೆ ಚೇತನ್ ಅಂತಾಗಿದ್ದೇಕೆ? ನೇರವಾದ ಈ ಪ್ರಶ್ನೆಗೆ ಚೇತನ್ ನಗುತ್ತಲೇ ಉತ್ತರಿಸಿದ ರೀತಿಯೇ ಅದ್ಭುತವಾಗಿತ್ತು. “ ನಂದು ಬಿಡಿ, ಬುದ್ಧ ಬಸವಣ್ಣ, ಅಂಬೇಡ್ಕರ್ ಅವರ ಕಾಲದಲ್ಲೂ ಇಂತಹದೇ ವ್ಯವಸ್ಥೆ ಇತ್ತು. ನಾನೇನು ಹೇಳಿದ್ದೇನೆ ಎನ್ನುವುದಕ್ಕಿಂತ ಅವನೇಕೆ ಹೇಳಿದ ಅಂತಲೇ ನೋಡುವ ಜನರಿದ್ದಾರೆ. ಹಾಗಾಗಿ ನಾನೇನೆ ಹೇಳಿದರೂ ವಿವಾದ ಹುಟ್ಟುತ್ತೆ. ಅವರನ್ನಾದರೂ ನಾನು ತಲುಪಿದ್ದೇನೆ ಎನ್ನುವುದು ಮುಖ್ಯವೇ. ಇರಲಿ, ಅವರು ಇರಲೇಬೇಕು. ಹಾಗಂತ ವಿವಾದ ಅಂದ್ರೆ ಚೇತನ್ ಅಲ್ಲ, ಚೇತನ್ ಹೇಳಿದ್ದನ್ನು ವಿವಾದ ಮಾಡುವ ಹುನ್ನಾರ ನಡೆಯುತ್ತಿದೆಯಷ್ಟೇ’ ಎನ್ನುವ ಸ್ಪಷ್ಟನೆ ಚೇತನ್ ಅವರದ್ದು.

ಸಿನಿಮಾ ನಟನಾಗಿಯೇ ಜನರಲ್ಲಿ ಜಾಗೃತಿ ಮೂಡಿಸಬಹುದಲ್ಲವೇ? ಎನ್ನುವ ಮತ್ತೊಂದು ಪ್ರಶ್ನೆಗೆ ಚೇತನ್ ಸ್ವಾರಸ್ಯಕರವಾದ ಉತ್ತರ ನೀಡಿದರು.” ನಾನು ಅಮೇರಿಕಾದಿಂದ ಸ್ಟಾರ್‌ ಆಗೋಕ್ಕೆ ಬಂದಿಲ್ಲ, ಹಾಗಂತ ನಟನೆಯನ್ನು ದ್ವೇಷಿಸೋದಿಲ್ಲ. ಸಿನಿಮಾ ರಂಗ ಒಂದು ಸಿದ್ದಾಂತಕ್ಕೆ ಸೀಮಿತವಾಗಿಲ್ಲ. ಸಿನಿಮಾರಂಗದಲ್ಲಿ ಎಲ್ಲರನ್ನು ಕಾರ್ಮಿಕರ ದೃಷ್ಟಿಕೋನದಿಂದ ನೋಡೋಣ. ನಮ್ಮ ದೃಷ್ಟಿಕೋನ ಬಹಳ ಮುಖ್ಯ. ನಟ, ನಟಿಯರಿಗಷ್ಟೇ ಸಿನಿಮಾಕ್ಷೇತ್ರ ಅಲ್ಲ. ನನ್ನ ಫ್ಯಾಮಿಲಿ ನನ್ನನ್ನು ವೈಚಾರಿಕ ಯೋಚನೆಯಿಂದ ಬೆಳೆಸಿದ್ದಾರೆ. ಸಮಾಜದ ಡೊಂಕನ್ನು ತಿದ್ದುವ ಹಾಗೆ ಬೆಳೆಸಿದ್ದಾರೆ. ಆ ಕೆಲಸವೇ ನನ್ನ ಪ್ರಧಾನ ಆದ್ಯತೆ’ ಎನ್ನುತ್ತಾರೆ ನಟ ಚೇತನ್‌. ( ಚೇತನ್ ಅವರೊಂದಿಗಿನ ರೋಚಕ ಮಾತುಕತೆ ಫುಲ್ ಡಿಟೈಲ್ಸ್ ಸಿನಿ ಲಹರಿ ಯುಟ್ಯೂಬ್ ಚಾನೆಲ್ ವೀಕ್ಷಿಸಿ. ಇಷ್ಟರಲ್ಲಿಯೇ ನಿಮ್ಮ ಮುಂದೆ)

ನಟ ಚೇತನ್‌ ಅಹಿಂಸಾ ಬದಲಾಗಿದ್ದಾರೆ. ಸಾಮಾಜಿಕ ಹೋರಾಟಗಳ ಜತೆಗೆಯೇ ಈಗವರು ನಟನಾಗಿಯೂ ಬ್ಯುಸಿ ಆಗುತ್ತಿದ್ದಾರೆ. ಹಾಗೆಯೇ ವಿಶೇಷ ಕಥಾಹಂದರದ ಚಿತ್ರಗಳಿಗೂ ಬಣ್ಣ ಹಚ್ಚುತ್ತಿದ್ದಾರೆ. ಅಂತಹದೇ ಒಂದು ವಿಭಿನ್ನ ಕಥಾ ಹಂದರದ ” 100 ಕ್ರೋರ್ಸ್‌ ʼ ಹೆಸರಿನ ಚಿತ್ರವೀಗ ಫಸ್ಟ್‌ ಲುಕ್‌ ಲಾಂಚ್‌ ಮೂಲಕ ಸೌಂಡ್‌ ಮಾಡಿದೆ. ಡಿಫೆರೆಂಟ್‌ ಟೈಟಲ್‌ ಹೊಂದಿರುವ ʼ100 ಕ್ರೋರ್ಸ್‌ʼ ಚಿತ್ರ ಜನವರಿಯಲ್ಲೇ ಸುದ್ದಿ ಆಗಿತ್ತು. ಈಗ ಹೈದ್ರಾಬಾದ್‌, ಬೆಂಗಳೂರು ಸುತ್ತಮುತ್ತ ಚಿತ್ರೀಕರಣ ಮುಗಿಸಿಕೊಂಡು ಬಂದಿರುವ ಚಿತ್ರ ತಂಡವು ಚಿತ್ರದ ಫಸ್ಟ್‌ ಲುಕ್‌ ಪೋಸ್ಟರ್‌ ಲಾಂಚ್‌ ಮಾಡಿದೆ.

ಹರೀಶ್‌ ಶಂಕರ್‌ ನಿರ್ದೇಶನದ ಈ ಚಿತ್ರದಲ್ಲಿ ಚೇತನ್‌ ಅವರದ್ದು ಪೊಲೀಸ್‌ ಅಧಿಕಾರಿ ಪಾತ್ರ. ಹಾಗೆಯೇ ರಗಡ್‌ ಲುಕ್.‌ ಅದೇ ಈಗ ಫಸ್ಟ್‌ ಲುಕ್‌ ಪೋಸ್ಟರ್‌ ನಲ್ಲಿ ಅನಾವರಣಗೊಂಡಿದೆ. ʼಆ ದಿನಗಳುʼ, ʼಮೈನಾʼ ಸೇರಿದಂತೆ ಈಗಾಗಲೇ ಹಲವು ಚಿತ್ರಗಳಲ್ಲಿ ಕಾಣಸಿಕೊಂಡಿರುವ ನಟ ಚೇತನ್‌, ಇದುವರೆಗೂ ಪೊಲೀಸ್‌ ಗೆಟಪ್‌ ನಲ್ಲಿ ಕಾಣಿಸಿಕೊಂಡಿರಲಿಲ್ಲ. ಫಸ್ಟ್‌ ಟೈಮ್‌ ಈಗ ಪೊಲೀಸ್‌ ಅಧಿಕಾರಿಯಾಗಿಯೂ ತೆರೆ ಮೇಲೆ ಬರುತ್ತಿದ್ದಾರೆ. ಕನ್ನಡದ ಜತೆಗೆ ಈ ಚಿತ್ರ ತೆಲುಗಿನಲ್ಲೂ ನಿರ್ಮಾಣವಾಗಿದೆ. ಎರಡು ಕಡೆ ಚೇತನ್‌ ಅವರೇ ಹೀರೋ ಎನ್ನುವುದು ಈ ಚಿತ್ರದ ಮತ್ತೊಂದು ವಿಶೇಷ. ಚಿತ್ರದ ಶೀರ್ಷಿಕೆಯೇ ಹೇಳುವ ಹಾಗೆ ಇದೊಂದು ಹಣದ ಹಿಂದಿನ ಕತೆ. ನೂರು ಕೋಟಿಯ ಹಿಂದೆ ಹೋಗುವ ಪೊಲೀಸ್‌ ಆಧಿಕಾರಿಯ ಕಲರ್‌ ಫುಲ್‌ ಕತೆ ಎನ್ನುವುದು ಚಿತ್ರ ತಂಡ ಮಾತು.

ಎಸ್​ಎಸ್​ ಸ್ಟುಡಿಯೋಸ್ ಮತ್ತು ವಿಷನ್​ ಸಿನಿಮಾಸ್​ ಬ್ಯಾನರ್​ನಲ್ಲಿ ನಿರ್ಮಾಣವಾಗಿರುವ ಈ ಚಿತ್ರದ ಫಸ್ಟ್‌ ಲುಕ್‌ ಪೋಸ್ಟರ್‌ ಅನ್ನು ನಿರ್ದೇಶನಕ ಸಿಂಪಲ್‌ ಸುನಿ ಬಿಡುಗಡೆ ಮಾಡಿದರು. ಟಾಲಿವುಡ್‌ ನಲ್ಲಿ ಸಂಗೀತ ನಿರ್ದೇಶಕರಾಗಿ ಗುರುತಿಸಿಕೊಂಡಿರುವ ಸಾಯಿ ಕಾರ್ತಿಕ್ ಈ ಚಿತ್ರಕ್ಕೆ ಸಂಗೀತ ನೀಡುವುದರ ಜತೆಗೆ ನಿರ್ಮಾಪಕರಾಗಿಯೂ ಬಂಡವಾಳ ಹೂಡಿದ್ದಾರೆ. ವಿರಾಟ್‌ ಚಕ್ರವರ್ತಿ ಈ ಚಿತ್ರದ ನಿರ್ದೇಶಕ. ಅವರ ಪ್ರಕಾರ ಇದೊಂದು ಪಕ್ಕಾ ಆಕ್ಷನ್‌ ಕಮ್‌ ಲವ್‌ ಆಧರಿಸಿದ ಸಿನಿಮಾ. ಚೇತನ್‌ ಅವರ ಪಾತ್ರವೇ ತುಂಬಾ ಡಿಫೆರೆಂಟ್‌ ಅಂತೆ.

ಈ ಪಾತ್ರದ ಕುರಿತು ತಮ್ಮ ಅನಿಸಿಕೆ ಹಂಚಿಕೊಂಡ ನಟ ಚೇತನ್‌, ದುಡ್ಡಿಗೋಸ್ಕರ ಏನು ಬೇಕಾದ್ರೂ ಮಾಡುವ ಪಾತ್ರ ನನ್ನದು. ಕನ್ನಡ ಮತ್ತು ತೆಲುಗಿನಲ್ಲಿ ಈ ಸಿನಿಮಾ ಸಿದ್ಧವಾಗಿದೆ. ಏಕಕಾಲದಲ್ಲಿ ಎರಡೂ ಅವತರಣಿಕೆಯ ಶೂಟಿಂಗ್​ ಮಾಡಿದ್ದೇವೆ. ಕನ್ನಡದ ಜತೆಗೆ ತೆಲುಗು ಕಲಾವಿದರೂ ಈ ಸಿನಿಮಾದಲ್ಲಿದ್ದಾರೆ. ಒಂದೊಳ್ಳೆ ಹೊಸ ಅನುಭವ. ಅಷ್ಟೇ ಸಾಹಸ ದೃಶ್ಯಗಳೂ ಸಿನಿಮಾದ ಹೈಲೈಟ್ ಎಂದರು.

ಚಿತ್ರದಲ್ಲಿ ಎರಡೇ ಹಾಡುಗಳಿವೆಯಂತೆ. ಕರ್ನಾಟಕ ಸೇರಿ ಹೈದರಾಬಾದ್​ನಲ್ಲಿ ಚಿತ್ರದ ಶೂಟಿಂಗ್​ ನಡೆದಿದೆ. ಚೇತನ್ ಮತ್ತು ʼಹ್ಯಾಪಿಡೇಸ್ʼ ಸಿನಿಮಾ ಖ್ಯಾತಿಯ ಟೈಸನ್ ರಾಹುಲ್ ಮುಖ್ಯಭೂಮಿಕೆಯಲ್ಲಿದ್ದರೆ, ಸಾಕ್ಷಿ ಚೌಧರಿ, ಎಮಿ ಎಲಿ ಮತ್ತು ಐಶ್ವರ್ಯಾ ರಾಜ್​ ಈ ಚಿತ್ರದ ನಾಯಕಿಯರು. ಉಳಿದಂತೆ ಇಂತುರಿ ವಾಸು, ಶರತ್ ಲೋಹಿತಾಶ್ವ, ಶೇಕಿಂಗ್ ಶೇಷು, ಭದ್ರಂ, ಅನ್ನಪೂರ್ಣಮ್ಮ, ಸಮೀರ್ ಪೋಷಕ ಪಾತ್ರದಲ್ಲಿದ್ದಾರೆ. ನಾಗಂ ತಿರುಪತಿ ರೆಡ್ಡಿ ಈ ಚಿತ್ರಕ್ಕೆ ನಿರ್ಮಾಪಕರಾಗಿ ಕೈ ಜೋಡಿಸಿದ್ದಾರೆ. ಶ್ರೀಕಾಂತ್ ದೀಪಾಲ್ ಸಹ ನಿರ್ಮಾಪಕರಾಗಿದ್ದಾರೆ. ಏಪ್ರಿಲ್‌ ತಿಂಗಳಿನಲ್ಲಿ ಈ ಚಿತ್ರ ತೆರೆಗೆ ಬರುವ ಸಾಧ್ಯತೆ ಇದೆ.