Author: ದೇಶಾದ್ರಿ ಹೊಸ್ಮನೆ

ದಕ್ಷಿಣ ಭಾರತದ ನಟಿ ಸಂಗೀತಾ ‘ಕಲೈಮಮಣಿ’ ಪ್ರಶಸ್ತಿಗೆ ಪಾತ್ರರಾಗಿದ್ದಾರೆ.  ತಮಿಳುನಾಡು ಸರ್ಕಾರ ಕೊಡಮಾಡುವ ಪ್ರತಿಷ್ಠಿತ ಗೌರವವಿದು. ತಮಗೆ ಸಿಕ್ಕ ಪದಕವನ್ನು ಮಗಳ ಕೊರಳಿಗೆ ಹಾಕಿ ಪತಿ – ಪುತ್ರಿಯೊಂದಿಗೆ ಸಂಭ್ರಮಿಸಿದ್ದಾರೆ. ಕಾಲಿವುಡ್‌ನ ಪ್ರಮುಖ ಚಿತ್ರನಿರ್ಮಾಪಕ ಕೆ.ಆರ್.ಬಾಲನ್‌ ಅವರ ಪುತ್ರಿ ಸಂಗೀತಾ. ‘ಪೂಂಜಲೈ’ ತಮಿಳು ಚಿತ್ರದೊಂದಿಗೆ ಬೆಳ್ಳಿತೆರೆಗೆ ಪದಾರ್ಪಣೆ ಮಾಡಿದ ನಟಿ ತಮಿಳು ಮತ್ತು ಮಲಯಾಳಂ ಚಿತ್ರರಂಗಗಳಲ್ಲಿ ಬಹುಬೇಗ ಹೆಸರು ಮಾಡಿದರು.

ಸುದೀಪ್‌ ಹೀರೋ ಆಗಿದ್ದ ‘ನಲ್ಲ’ ಚಿತ್ರದೊಂದಿಗೆ ಕನ್ನಡಕ್ಕೂ ಬಂದರೂ ಅವರು ಹೆಚ್ಚಾಗಿ ತಮಿಳು, ಮಲಯಾಳಂನಲ್ಲೇ ಸಕ್ರಿಯರಾಗಿದ್ದುದು. 2010ರಲ್ಲಿ ತೆರೆಕಂಡ ‘ಬೊಂಬಾಟ್ ಕಾರ್‌’ ಚಿತ್ರಕ್ಕೆಂದು ಮತ್ತೆ ಕನ್ನಡಕ್ಕೆ ಬಂದ ಅವರು ತೆಲುಗು ಸಿನಿಪ್ರೇಮಿಗಳಿಗೂ ಚಿರಪರಿಚಿರತರು. ಖಡ್ಗಂ, ಪಿತಾಮಗನ್‌, ಉಯಿರ್‌, ಧನಂ.. ಚಿತ್ರಗಳಲ್ಲಿ ಅಪರೂಪದ ಪಾತ್ರಗಳಲ್ಲಿ ಕಾಣಿಸಿಕೊಂಡ ನಟಿ ಗಾಯಕಿಯೂ ಹೌದು. ಗಾಯಕ ಕ್ರಿಷ್‌ ಅವರನ್ನು ಪ್ರೀತಿಸಿ ಮದುವೆಯಾಗಿದ್ದ (2009) ಅವರಿಗೆ ಒಂಬತ್ತು ವರ್ಷದ ಪುತ್ರಿ ಇದ್ದಾಳೆ. ಮದುವೆ ನಂತರವೂ ವಯಸ್ಸಿಗೆ ಒಪ್ಪುವ ಪಾತ್ರಗಳ ಮೂಲಕ ಸಂಗೀತಾ ನಟನೆಯಲ್ಲಿ ಸಕ್ರಿಯರಾಗಿದ್ದಾರೆ. ಎರಡು ದಶಕಗಳ ಸಿನಿಮಾ ಪಯಣ ಅವರಿಗೆ ‘ಕಲೈಮಮಣಿ’ ಗೌರವ ತಂದುಕೊಟ್ಟಿದೆ.

ಕನ್ನಡಕ್ಕೆ ʼಭೂಮಿ ಗೀತʼ ದಂತಹ ಸದಭಿರುಚಿಯ ಚಿತ್ರ ಕೊಟ್ಟ ಸೃಜನಾಶೀಲ ನಿರ್ದೇಶಕ ಕೇಸರಿ ಹರವೂ ಮತ್ತೆ ನಿರ್ದೇಶನದತ್ತ ಮನಸು ಮಾಡಿದ್ದಾರೆ. ಒಂದು ಸುದೀರ್ಘ ಗ್ಯಾಪ್‌ ಬಳಿಕ ಈಗವರು ದೇಶದ ರೈತರು ಎದುರಿಸುತ್ತಿರುವ ಪ್ರಸ್ತುತ ಸಮಸ್ಯೆಗಳು ಹಾಗೂ ಕೃಷಿ ಕಾಯ್ದೆಗಳ ಪರಿಣಾಮಗಳನ್ನು ತೆರೆ ಮೇಲೆ ತರಲು ಹೊರಟಿದ್ದಾರೆ. ಅದಕ್ಕಂತಲೇ ಈಗವರು ಸುಮಾರು ಹತ್ತಿಪ್ಪತ್ತು ದಿನಗಳ ಕಾಲ ದೆಹಲಿಗೆ ತೆರಳಿ ಅಲ್ಲಿ ನಡೆಯುತ್ತಿರುವ ರೈತರ ಹೋರಾಟದಲ್ಲಿ ಪಾಲ್ಗೊಂಡು ಬಂದಿದ್ದಾರೆ.

ಸದ್ಯಕ್ಕೀಗ ರೈತರ ಪ್ರತಿಭಟನೆಯ ಕೇಂದ್ರಗಳಾಗಿರುವ ತಿಕ್ರಿ, ಸಿಂಘು, ಗಾಜಿಪುರ ಗಳಲ್ಲಿನ ರೈತ ಪ್ರತಿಭಟನೆಗಳಲ್ಲಿ ನೇರವಾಗಿ ಪಾಲ್ಗೊಂಡು, ಅಲ್ಲಿನ ದೃಶ್ಯಗಳನ್ನು ತಮ್ಮ ಕ್ಯಾಮೆರಾದಲ್ಲಿ ಸೆರೆಹಿಡಿದುಕೊಂಡು ಬಂದಿದ್ದಾರೆ. ದಿನ ದಿನಗಳಲ್ಲಿ ಪಂಜಾಬ್‌, ಹರಿಯಾಣ ಹಾಗೂ ಬಿಹಾರ ಪ್ರವಾಸ ಕೈಗೊಳ್ಳಲು ನಿರ್ಧರಿಸಿದ್ದಾರೆ. ಹಾಗಂತ ಅವರೇನು ರೈತರ ಸಮಸ್ಯೆಗಳ ಕುರಿತು “ಭೂಮಿ ಗೀತʼ ದಂತಹ ಮತ್ತೊಂದು ಸಿನಿಮಾ ಮಾಡಲು ಹೊರಟ್ರಾ ? ಇಲ್ಲಿ ಹೀಗೊಂದು ಕುತೂಹಲ ಶುರುವಾಗುವುದು ಅಷ್ಟೇ ಸಹಜ.

ಆದರೆ, ಅದು ಖಂಡಿತಾ ಹಾಗಲ್ಲ. ಅವರು ಸಿನಿಮಾ ಮಾಡುತ್ತಿಲ್ಲ. ಸದ್ಯಕ್ಕೆ ಅವರು ಅಂತಹ ಆಲೋಚನೆಯಲ್ಲೂ ಇಲ್ಲ. ಹಾಗಾದ್ರೆ ಏನು ಇದು ? ” ಇದೊಂದು ಡಾಕ್ಯುಮೆಂಟರಿ. ಎರಡು ಗಂಟೆಯಲ್ಲಿ ತರಲು ಹೊರಟಿರುವ ಈ ಡಾಕ್ಯುಮೆಂಟರಿಯನ್ನು ಈ ಮೊದಲು ಹಿಂದಿ ಮತ್ತು ಇಂಗ್ಲಿಷ್‌ ಭಾಷೆಯಲ್ಲಿ ತರೋಣ ಅಂದುಕೊಂಡಿದ್ದೆ. ಈಗ ಕನ್ನಡದಲ್ಲೂ ತರುವ ಆಲೋಚನೆ ಇದೆ. ಉಳಿದ ಯಾವುದೇ ಭಾಷೆಯಲ್ಲೂ ತಂದರೂ ಇದು ಅನುಕೂಲವೇ. ಯಾಕಂದ್ರೆ ನಾನಿಲ್ಲಿ ಹೇಳಹೊರಟಿದ್ದು ದೇಶದ ರೈತರು ಪ್ರಸ್ತುತ ಎದುರಿಸುತ್ತಿರುವ ಸಮಸ್ಯೆಗಳ ಕುರಿತು.

ದೇಶದ ರೈತರ ಮುಂದೆ ಈಗ ಅನೇಕ ಸಮಸ್ಯೆಗಳಿವೆ. ಬೆಳೆ ಬೆಳೆಯುವುದಕ್ಕೆ ಇವತ್ತು ದೊಡ್ಡ ಸವಾಲು ಇದೆ. ಇನ್ನು ಬೆಳೆದ ಬೆಳೆಗೆ ಬೆಂಬಲ ಬೆಲೆ ಕೂಡ ಬೇಕು. ಅದು ಕೂಡ ಈಗ ಗೊಂದಲದಲ್ಲಿದೆ. ಭಾರತದ ಕೃಷಿ ವ್ಯವಸ್ಥೆ ಈಗ ಇಂತಹ ಅನೇಕ ಬಿಕ್ಕಟ್ಟುಗಳಲ್ಲಿದೆ. ಅವೆಲ್ಲವನ್ನು ತೆರೆ ಮೇಲೆ ತರುವ ಆಲೋಚನೆ ಇದೆʼ ಎನ್ನುತ್ತಾರೆ ನಿರ್ದೇಶಕ ಕೇಸರಿ ಹರವೂ.ಕನ್ನಡ ಚಿತ್ರರಂಗದ ಮಟ್ಟಿಗೆ ಕೇಸರಿ ಹರವೂ ಅಂದ್ರೆ ತಕ್ಷಣ ನೆನಪಾಗೋದು ʼಭೂಮಿ ಗೀತʼ ಚಿತ್ರ. ಅದು ಅವರ ಚೊಚ್ಚಲ ಚಿತ್ರ.

ʼಭೂಮಿಗೀತʼ ಎನ್ನುವ ಹೆಸರಿಗೆ ತಕ್ಕಂತೆ ಈ ಚಿತ್ರ ಈ ನಾಡಿನ ರೈತರ ಬದುಕನ್ನ ತೆರೆ ಮೇಲೆ ಅನಾವರಣಗೊಳಿಸಿತ್ತು. 1998  ರಲ್ಲಿ ಈ ಚಿತ್ರವು ರಾಷ್ಟ್ರ ಪ್ರಶಸ್ತಿ, ರಾಜ್ಯ ಪ್ರಶಸ್ತಿ ಸೇರಿದಂತೆ ಫಿಲ್ಮ್‌ ಫೇರ್‌ ಪ್ರಶಸ್ತಿಗೂ ಪಾತ್ರವಾಗಿ, ದೊಡ್ಡ ಸುದ್ದಿ ಆಗಿದ್ದು ಇತಿಹಾಸ. ಕೇಸರಿ ಹರವೂ ತಮ್ಮ ಚೊಚ್ಚಲ ಚಿತ್ರದಲ್ಲೇ ಒಬ್ಬ ಯಶಸ್ವಿ ನಿರ್ದೇಶಕರಾಗಿ ಹೊರಹೊಮ್ಮಿದ್ದು ಹಳೇ ಸುದ್ದಿ. ಮುಂದೆ ಅದೇನಾಯಿತೋ ಗೊತ್ತಿಲ್ಲ. ನಿರ್ದೇಶಕ ಕೇಸರಿ ಹರವೂ ನಿರ್ದೇಶನದಿಂದಲೇ ದೂರ ಉಳಿದಿದ್ದರು. ಸಿನಿಮಾ ಬದಲಿಗೆ ರೈತ ಹೋರಾಟ, ಪರಿಸರ ಹೋರಾಟ ಅಂತ ತಮ್ಮನ್ನು ತಾವು ತೊಡಗಿಸಿಕೊಂಡರು.ಇಷ್ಟಾಗಿಯೂ ಸಿನಿಮಾ ನಿರ್ದೇಶನಕ್ಕೆ ಮನಸು ಮಾಡಿದರು. 2016ರಲ್ಲಿ ಪರಿಸರ ಜಾಗೃತಿ ಮೇಲೆಯೇ ʼಒಳ್ಳೆಯವನುʼ ಎನ್ನುವ ಸಿನಿಮಾವೊಂದನ್ನು ನಿರ್ದೇಶಿಸಿದ್ದರು. ಅಲ್ಲಿಂದೀಗ ರೈತರ ಸಮಸ್ಯೆ ಕುರಿತು ಡಾಕ್ಯುಮೆಂಟರಿ ಮಾಡುತ್ತಿರುವುದು ವಿಶೇಷ.

ಕನ್ನಡದ ಬಹುತೇಕ ನಿರ್ದೇಶಕರೀಗ ವ್ಯಾಪಾರ ವಹಿವಾಟಿನ ಕಡೆಗೆ ಗಮನ ಕೊಟ್ಟಿದ್ದಾರೆ. ರಿಮೇಕೋ, ಸ್ವಮೇಕೋ ಹಣ ಮಾಡುವುದಕ್ಕೆ ಸರಕು ಬೇಕು ಎನ್ನುವುದೇ ಅವರ ಸೂತ್ರ. ಆದರೆ, ಕೇಸರಿ ಹರವೂ ಅವರ ಚಿಂತನೆಯೇ ಬೇರೆ. ರೈತ ಹೋರಾಟ, ಪರಿಸರ ಹೋರಾಟದ ಪ್ರಭಾವದಲ್ಲಿರುವ ಅವರಿಗೆ ಸಿನಿಮಾ ಅನ್ನೋದು ಹಣಕ್ಕಿಂತ ಜನರ ಜಾಗೃತಿಯ ಪ್ರಬಲ ಮಾಧ್ಯಮ ಅನ್ನೋದು ಅವರ ನಂಬಿಕೆ. ಈಗವರು ಕೃಷಿ ಸಮಸ್ಯೆ, ರೈತ ಹೋರಾಟ ಕುರಿತು ಡಾಕ್ಯುಮೆಂಟರಿ ಮಾಡುತ್ತಿರುವುದು ಕೂಡ ಅದೇ ಹಿನ್ನೆಲೆಯಲ್ಲಿ ಅನ್ನೋದು ಅಷ್ಟೇ ಸತ್ಯ. ಅಂದ ಹಾಗೆ, ಈ ಡಾಕ್ಯುಮೆಂಟರಿಯನ್ನು ನಿರ್ದೇಶಕ ಕೇಸರಿ ಹರವೂ ಕ್ರೌಂಡ್‌ ಫಂಡಿಂಗ್‌ ಮೂಲಕ ನಿರ್ಮಾಣ ಮಾಡುತ್ತಿದ್ದು,  ಇದರಲ್ಲಿ ಪಾಲ್ಗೊಳ್ಳಲು ಇಚ್ಚಿಸುವರು [email protected] ಮೂಲಕ ಸಂಪರ್ಕಿಸಬಹುದು. ಇಲ್ಲವೇ UPI id, kesari.haravoo@oksbi ಗೆ ನೇರವಾಗಿ ಕಾಂಟ್ರಿಬ್ಯೂಟ್‌ ಮಾಡಬಹುದು.

ಬಹುನಿರೀಕ್ಷಿತ ಬಹುಭಾಷಾ ಸಿನಿಮಾ ‘ತಲೈವಿ’ ಏಪ್ರಿಲ್‌ 23ಕ್ಕೆ ತೆರೆಕಾಣಲಿದೆ. ತಮಿಳುನಾಡಿನ ಜನಪ್ರಿಯ ನಟಿ, ರಾಜಕಾರಣಿ ಜಯಲಲಿತಾ ಬಯೋಪಿಕ್‌ ಇದು. ಕಂಗನಾ ಶೀರ್ಷಿಕೆ ಪಾತ್ರದಲ್ಲಿ ನಟಿಸುತ್ತಿದ್ದು, ಅರವಿಂದ ಸ್ವಾಮಿ, ಪ್ರಕಾಶ್ ರೈ, ಜಿಶ್ಶು ಸೇನ್‌ಗುಪ್ತಾ, ಭಾಗ್ಯಶ್ರೀ ಪ್ರಮುಖ ಪಾತ್ರಗಳಲ್ಲಿ ನಟಿಸುತ್ತಿದ್ದಾರೆ. ಅರವಿಂದ ಸ್ವಾಮಿ ಅವರು ನಟ-ರಾಜಕಾರಣಿ ಎಂ.ಜಿ.ರಾಮಚಂದ್ರನ್ ಪಾತ್ರದಲ್ಲಿದ್ದರೆ ಪ್ರಕಾಶ್ ರೈ, ತಮಿಳುನಾಡಿನ ಜನಪ್ರಿಯ ರಾಜಕಾರಣಿ ಕರುಣಾನಿಧಿಯಾಗಿ ಕಾಣಿಸಿಕೊಳ್ಳಲಿದ್ದಾರೆ.

ಕಂಗನಾ ತಮ್ಮ ಟ್ವಿಟರ್ ಖಾತೆಯಲ್ಲಿ ‘ತಲೈವಿ’ ಮೋಷನ್ ಪೋಸ್ಟರ್ ಶೇರ್ ಮಾಡಿ, ಏಪ್ರಿಲ್‌ 23ರಂದು ಸಿನಿಮಾ ಬಿಡುಗಡೆಯಾಗಲಿದೆ ಎಂದು ಘೋಷಿಸಿದ್ದಾರೆ. ಮೋಷನ್ ಪೋಸ್ಟರ್‌ನಲ್ಲಿ ಜಯಲಲಿತಾ ಅವರ ಸಿನಿಮಾ ಮತ್ತು ರಾಜಕೀಯ ಬದುಕಿನ ಹೆಜ್ಜೆ ಗುರುತುಗಳ ಬಗ್ಗೆ ಪ್ರಸ್ತಾಪವಿದೆ. ಹಿನ್ನೆಲೆಯಲ್ಲಿ, “ಆಕೆ ಭಾರತೀಯ ಸಿನಿಮಾದಲ್ಲಿ ಹೆಜ್ಜೆ ಗುರುತು ಮೂಡಿಸಿದರು. ರಾಜಕೀಯ ಪ್ರವೇಶಿಸಿ ತಮಿಳುನಾಡಿನ ರಾಜಕೀಯದ ಹಾದಿಯನ್ನೇ ಬದಲಿಸಿದರು. ತಮ್ಮದೇ ಒಂದು ಅಸ್ತಿತ್ವ ಸೃಷ್ಟಿಸಿದ ಅವರು ಲಕ್ಷಾಂತರ ಜನರ ಬದುಕು ಹಸನುಮಾಡಿ ಇತಿಹಾಸ ಸೃಷ್ಟಿಸಿದರು” ಎನ್ನುವ ವಾಯ್ಸ್‌ಓವರ್ ಇದೆ.

ವಿಷ್ಣುವರ್ಧನ್‌ ಮತ್ತು ಶೈಲೇಶ್ ಸಿಂಗ್ ನಿರ್ಮಿಸಿರುವ ಚಿತ್ರವನ್ನು ಎ.ಎಲ್‌.ವಿಜಯ್ ನಿರ್ದೇಶಿಸಿದ್ದಾರೆ. ‘ಬಾಹುಬಲಿ’, ‘ಮಣಿಕರ್ಣಿಕಾ’ ಸಿನಿಮಾಗಳ ಖ್ಯಾತಿಯ ವಿಜಯೇಂದ್ರ ಪ್ರಸಾದ್ ಅವರು ಚಿತ್ರಕಥೆ ರಚಿಸಿದ್ದಾರೆ ಎನ್ನುವುದು ಹೈಲೈಟ್‌. “ಜಯಲಲಿತಾ ಅವರ ಸಿನಿಮಾ, ರಾಜಕೀಯ, ಸಾಧನೆಯ ಬಗ್ಗೆ ಬೆಳಕು ಚೆಲ್ಲುವುದು ನಮ್ಮ ಉದ್ದೇಶ. ದಿಟ್ಟ, ಸ್ವಾಭಿಮಾನಿ ಸ್ತ್ರೀ ಆದ ಅವರ ಬದುಕು ಇತರರಿಗೂ ಪ್ರೇರಣೆದಾಯಕ. ಅವರ ವ್ಯಕ್ತಿತ್ವಕ್ಕೆ ಚ್ಯುತಿ ಬಾರದಂತೆ ಸಿನಿಮೀಯ ಘಟನೆಗಳೊಂದಿಗೆ ಸಿನಿಮಾ ಮಾಡಿದ್ದೇವೆ” ಎನ್ನುತ್ತಾರೆ ನಿರ್ದೇಶಕ ವಿಜಯ್‌.

ಸೂಪರ್‌ಹಿಟ್‌ ‘ಕಿರಿಕ್ ಪಾರ್ಟಿ’ ಬೆಡಗಿ ರಶ್ಮಿಕಾ ಮಂದಣ್ಣ ಈಗ ಟಾಲಿವುಡ್‌ನ ಬೇಡಿಕೆಯ ನಟಿ. ದಕ್ಷಿಣದ ಚಿತ್ರಗಳಲ್ಲದೆ ಅವರೀಗ ಬಾಲಿವುಡ್‌ಗೂ ಹಾರಿದ್ದಾರೆ. ಇದೀಗ ಮಂಗಳೂರು ಮೂಲದ ಕೃತಿ ಶೆಟ್ಟಿ ತೆಲುಗು ಚಿತ್ರರಂಗದಲ್ಲಿ ಸದ್ದು ಮಾಡುತ್ತಿದ್ದಾರೆ. ಅವರು ನಾಯಕಿಯಾಗಿ ನಟಿಸಿದ ಚೊಚ್ಚಲ ತೆಲುಗು ಸಿನಿಮಾ ‘ಉಪ್ಪೆನ’ ದೊಡ್ಡ ಯಶಸ್ಸು ಕಂಡಿದೆ. ಕೃತಿ ಅವರು ‘ಪಕ್ಕದ್ಮನೆ ಹುಡ್ಗಿ’ ಇಮೇಜ್‌ನ ಪಾತ್ರದಲ್ಲಿ ತೆಲುಗು ಜನರ ಮನಸೂರೆಗೊಂಡಿದ್ದಾರೆ. ಈ ಚಿತ್ರದ ಗೆಲುವಿನೊಂದಿಗೆ ಮತ್ತೆರೆಡು ತೆಲುಗು ಚಿತ್ರಗಳಿಗೆ ಸಹಿ ಹಾಕಿರುವ ಆಕೆಯ ಸಂಭಾವನೆಯೂ ಈಗ ದುಬಾರಿಯಾಗಿದೆ.

ಮುಂಬಯಿಯಲ್ಲಿ ಜನಿಸಿದ ಕೃತಿ ಮಾಡೆಲಿಂಗ್‌ ಮೂಲಕ ಗ್ಲಾಮರ್ ಜಗತ್ತಿಗೆ ಪರಿಚಯವಾದರು. ಆಕಸ್ಮಿಕ ಎನ್ನುವಂತೆ ‘ಉಪ್ಪೆನ’ ತೆಲುಗು ಸಿನಿಮಾ ಅವಕಾಶ ಒದಗಿ ಬಂದಿತು. ಮೆಗಾಸ್ಟಾರ್ ಚಿರಂಜೀವಿ ಕುಟುಂಬದ ವೈಷ್ಣವ್‌ ತೇಜ್‌ ಈ ಚಿತ್ರದ ಹೀರೋ ಎನ್ನುವುದು ಅವರಿಗೆ ದೊಡ್ಡ ವರವಾಯ್ತು. ಮತ್ತೊಂದೆಡೆ ಈ ಚಿತ್ರದಲ್ಲಿ ಅವರ ತಂದೆ ಪಾತ್ರದಲ್ಲಿ ಖ್ಯಾತ ನಟ ವಿಜಯ್ ಸೇತುಪತಿ ನಟಿಸಿದ್ದಾರೆ. ಮೆಗಾ ಕುಟುಂಬದ ಉತ್ತಮ ಪ್ರೊಮೋಷನ್‌ ಕೂಡ ಚಿತ್ರದ ಯಶಸ್ಸಿಗೆ ನೆರವಾಯ್ತು.

ಕೋವಿಡ್ ಸಂಕಷ್ಟದ ನಂತರ ಬಿಡುಗಡೆಯಾಗಿ ಭರ್ಜರಿ ಯಶಸ್ಸು ಕಂಡ ಮೊದಲ ಟಾಲಿವುಡ್‌ ಚಿತ್ರವಾಗಿ ‘ಉಪ್ಪೆನ’ ಗುರುತಿಸಿಕೊಂಡಿದೆ. ಮುಗ್ಧ, ಮುದ್ದುಮೊಗದ ಕೃತಿ ತೆಲುಗು ನಾಡಿನ ಸಿನಿಪ್ರೇಮಿಗಳ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ. ಕೃತಿಗೆ ಈಗಿನ್ನೂ ಹದಿನೇಳರ ಹರೆಯ. ‘ಉಪ್ಪೆನ’ ನಂತರ ಅವರು ಎರಡು ತೆಲುಗು ಚಿತ್ರಗಳಿಗೆ ಸಹಿ ಹಾಕಿದ್ದಾರೆ. ನಾನಿ ನಟನೆಯ ‘ಶ್ಯಾಂ ಸಿಂಘ ರಾಯ್‌’ ಮತ್ತು ಸುಧೀರ್ ಬಾಬು ಹೀರೋ ಆಗಿ ನಟಿಸುತ್ತಿರುವ ಮತ್ತೊಂದು ಚಿತ್ರಕ್ಕೆ ಅವರು ನಾಯಕಿ. ಥಿಯೇಟರ್‌ಗಳಲ್ಲಿ ಯಶಸ್ಸು ಕಂಡ ‘ಉಪ್ಪೆನ’ ಸದ್ಯದಲ್ಲೇ ಓಟಿಟಿಯಲ್ಲೂ ಪ್ರೀಮಿಯರ್ ಆಗಲಿದೆ.

ಅಲಿಯಾ ಭಟ್‌ ವಿಶಿಷ್ಠ ಪಾತ್ರದಲ್ಲಿ ನಟಿಸಿರುವ ‘ಗಂಗೂಬಾಯಿ ಕಾಥಿಯಾವಾಡಿ’ ಟೀಸರ್ ಬಿಡುಗಡೆಯಾಗಿದೆ. ಬಾಲಿವುಡ್‌ನ ಖ್ಯಾತ ನಿರ್ದೇಶಕ ಸಂಜಯ್ ಲೀಲಾ ಬನ್ಸಾಲಿ ನಿರ್ದೇಶನದ ಚಿತ್ರವಿದು. ಇಂದು ಅವರ ಹುಟ್ಟುಹಬ್ಬದ ಅಂಗವಾಗಿ ಬಿಡುಗಡೆಯಾಗಿರುವ ಟೀಸರ್‌ಗೆ ಭರಪೂರ ಮೆಚ್ಚುಗೆ ವ್ಯಕ್ತವಾಗಿದೆ. ಲೇಖಕ ಹುಸೇನ್ ಝೈದಿ ಅವರ ‘ಮಾಫಿಯಾ ಕ್ವೀನ್ಸ್‌ ಆಫ್ ಮುಂಬೈ’ ಕೃತಿಯಲ್ಲಿನ ಒಂದು ಭಾಗ ಈ ಚಿತ್ರಕ್ಕೆ ಸ್ಫೂರ್ತಿ.

ಟೀಸರ್‌ನಲ್ಲಿ ಅಲಿಯಾ ಭಟ್‌ ಇಲ್ಲಿಯವರೆಗೆ ಅವರ ಎಲ್ಲಾ ಪಾತ್ರಗಳಿಗಿಂತ ಸಂಪೂರ್ಣ ಭಿನ್ನವಾಗಿ ಕಾಣಿಸುತ್ತಾರೆ. ಶೀರ್ಷಿಕೆ ಪಾತ್ರದಲ್ಲಿನ ಅವರು ದಿಟ್ಟೆ, ಗಟ್ಟಿಗಿತ್ತಿಯಂತೆ ತೋರುತ್ತಾರೆ. ಗುಜರಾತ್‌ನ ಕಾಥಿಯಾವಾಡಿಯಿಂದ ಮುಂಬಯಿಗೆ ವಲಸೆ ಬಂದವರು ಗಂಗೂಬಾಯಿ. ಕಾಮಾಟಿಪುರದಲ್ಲಿ ವೇಶ್ಯಾವಾಟಿಕೆ ದಂಧೆಯ ಮುಖ್ಯಸ್ಥೆಯಾಗಿ ಗುರುತಿಸಿಕೊಳ್ಳುವ ಗಂಗೂಬಾಯಿಗೆ ಭೂಗತ ಜಗತ್ತಿನ ನಂಟೂ ಇರುತ್ತದೆ. ಅನಾಥ ಮಕ್ಕಳು, ನಿರ್ಗತಿಕರಿಗೆ ವಸತಿ, ಊಟ ಕಲ್ಪಿಸುವ ಮತ್ತೊಂದು ಮುಖವೂ ಆಕೆಯ ಪಾತ್ರಕ್ಕಿದೆ.

ಈ ಅಪರೂಪದ ಪಾತ್ರಕ್ಕಾಗಿ ಅಲಿಯಾ ತಮ್ಮ ಬಾಡಿಲಾಂಗ್ವೇಜ್‌, ಡೈಲಾಗ್ ಡೆಲಿವರಿಯಲ್ಲಿ ಸಾಕಷ್ಟು ಮಾರ್ಪಾಟು ಮಾಡಿಕೊಂಡಿವುದು ಟೀಸರ್‌ನಿಂದ ಕಂಡುಬರುತ್ತದೆ. ಸಂಜಯ್ ಲೀಲಾ ಬನ್ಸಾಲಿ ನಿರ್ದೇಶನದ ಹತ್ತನೇ ಚಿತ್ರವಿದು. ಬನ್ಸಾಲಿಗೆ ಹುಟ್ಟುಹಬ್ಬ ಕೋರಿರುವ ಬಾಲಿವುಡ್‌ ತಾರೆಯರು ಅಲಿಯಾ ಪಾತ್ರವನ್ನು ಮನದುಂಬಿ ಹೊಗಳಿದ್ದಾರೆ. ‘ಗಂಗೂಬಾಯಿ ಕಾಥಿಯಾವಾಡಿ’ 2021ರ ಜುಲೈ 30ರಂದು ತೆರೆಕಾಣಲಿದೆ.

ಚಿತ್ರರಂಗ ಒಂದು ಮನೆ ಇದ್ದಂತೆ. ನಾವೆಲ್ಲ ಒಂದೇ ಕುಟುಂಬದ ಸದ್ಯಸರು ಅಂತ ಉದ್ಯಮದ ಸಭೆ- ಸಮಾರಂಭಗಳಲ್ಲಿ ನಟ-ನಟಿಯರು ಹೇಳಿಕೊಳ್ಳುವುದು ಸರ್ವೇ ಸಾಮಾನ್ಯ. ಅದು ನಿಜವೂ ಹೌದು. ವರನಟ ರಾಜ್ ಕುಮಾರ್ ಕಾಲದಿಂದಲೂ ಉದ್ಯಮ ಹಾಗೆ ಇದ್ದಿದ್ದೂ ನಿಮಗೂ ಗೊತ್ತು. ಆದರೆ ಈಗ ಕೆಟ್ಟ ಮನಸುಗಳ ಮೂಲಕ ಅದಕ್ಕೆ ಬೆಂಕಿ ಬಿದ್ದಿದೆ. ತರವಲ್ಲದ ಮಾತುಗಳು ಮನಸ್ಸು ಕೆಡಿಸಿವೆ. ಹಾಗೆಯೇ ಕೆಟ್ಟ ಮನಸುಗಳು ಸೇರಿಕೊಂಡು ಮನೆಯನ್ನೇ ಕೆಡಿಸಿವೆ. ದರ್ಶನ್ ಹಾಗೂ ಜಗ್ಗೇಶ್ ನಡುವಿನ ಈ ಜಗಳ ಎಲ್ಲಿಗೆ ಹೋಗಿ ನಿಲ್ಲುತ್ತೋ ಗೊತ್ತಿಲ್ಲ. ಸದ್ಯಕ್ಕಂತೂ ಒಂದು ವಿರಾಮ ಸಿಕ್ಕಿದೆ. ಅದೇ ಈಗ ಖುಷಿ ವಿಚಾರ.

ಅದೇನೆ ಇರಲಿ, ಮಾತು ಮನೆ ಕೆಡಿಸಿತು,ತೂತು ಒಲೆ ಕೆಡಿಸಿತು ಅನ್ನೊದೊಂದು ಗಾದೆ ಮಾತು.‌ಹಾಗೆಯೇ ಮಾತು ಆಡಿದರೆ ಹೊಯ್ತು, ಮುತ್ತು ಒಡೆದರೆ ಹೊಯ್ತು ಅನ್ನೊದು ಇನ್ನೊಂದು ಗಾದೆ‌ ಮಾತು. ಸದ್ಯಕ್ಕೆ ಚಿತ್ರರಂಗದಲ್ಲಿ ಇವರೆಡು ಗಾದೆ ಮಾತುಗಳು ನಿಜವಾಗಿ ಹೋದವು. ಗಾದೆ ಹೇಳಿದ ಹಿರಿಯರು, ಮಾತನಾಡುವಾಗ ಎಚ್ಚರ ಇರಲಿ ಅಂತ ಹೇಳಿದ್ದಕ್ಕೂ ಕ್ಯಾರೆ ಎನ್ನದೆ ಜಗ್ಗೇಶ್ ಮಾತನಾಡಿದ್ದರ ಪರಿಣಾಮ ಇವತ್ತು ಏನಾಗಿ ಹೋಯಿತು ಅಂತ ನಿಮಗೆಲ್ಲ ಗೊತ್ತೇ ಇದೆ. ಆ ಜಗಳದ ಬಗ್ಗೆ, ಹೆಚ್ಚೇನು ಹೇಳಬೇಕಿಲ್ಲ. ಆದರೆ ಹೇಳಲು ಹೊರಟಿದ್ದು ಆ ಇಬ್ಬರು ನಟರ ನಡುವೆ ಬೆಂಕಿ ಹಚ್ಚಿ ಚಳಿ ಕಾಯಿಸಿಕೊಂಡ ಮನಸು ಮತ್ತು ಮನಸ್ಥಿತಿ ಕುರಿತು.

ಆಫ್ ದಿ ರೆಕಾರ್ಡ್ ಮಾತುಕತೆ ಎಲ್ಲರಲ್ಲೂ ಸರ್ವೇ ಸಾಮಾನ್ಯ. ಅದೆಷ್ಟು ಸಲ ನಾವು ಕೆಲಸ ಮಾಡುವ ಆಫೀಸ್ ಗಳಲ್ಲಿಯೇ ಯಾರೋ ಆಗದವರ ಬಗ್ಗೆ ಫ್ರೆಂಡ್ಸ್ ಬಳಿ ಹಂಚಿಕೊಳ್ಳುತ್ತೇವೆ. ಅದು ಸಾತ್ವಿಕ ಸಿಟ್ಟು ಮಾತ್ರ. ಧ್ವೇಷ ಅಲ್ಲ. ನಿಜಕ್ಕೂ ಅದು ದ್ವೇಷವೇ ಆಗೋದಾದ್ರೆ ಇಷ್ಟೊತ್ತಿಗೆ ಯಾರ ಮನೆಯಲ್ಲೂ ನೆಮ್ಮದಿ ಉಳಿಯು ತ್ತಿರಲಿಲ್ಲ‌ . ಅತ್ತೆ ಬಗ್ಗೆ ಸೊಸೆ ಅಕ್ಕಪಕ್ಕದ ಮನೆಯವರ ಜತೆಗೆ ಹಂಚಿಕೊಳ್ಳುವ ಮಾತುಗಳನ್ನೇ ಚಾಡಿ ಹೇಳಿ ಬೆಂಕಿ ಹಚ್ಚುವುದಾದರೆ, ಪ್ರತಿ ಮನೆಗಳಲ್ಲೂ ಬೆಂಕಿ ಗ್ಯಾರಂಟಿ. ಮನೆಗಳಲ್ಲಿ ಮಾತ್ರವಲ್ಲ, ಅದು ಊರು, ರಾಜ್ಯ, ದೇಶಕ್ಕೂ ಅಷ್ಟೇ. ಹಾಗಾಗಿಯೇ ಕೆಲವನ್ನು ಕೇಳಿಯೂ ಕೇಳದ ಹಾಗೆ ಇದ್ದು ಬಿಡಬೇಕು ಅನ್ನೋದು.

ಕೆಲವರಿಗೆ ಒಂದು ತೆವಲು ಇರುತ್ತದೆ. ಒಬ್ಬರನ್ನು ಇನ್ನೊಬ್ಬರ ಮೇಲೆ ತಂದಿಕ್ಕುವುದು, ಆ ಮೂಲಕ ತಮ್ನ ಸ್ವಾರ್ಥದ ಬೆಳೆ ಕಾಳು ಬೇಯಿಸಿಕೊಳ್ಳುವುದು. ಅದೇ ಸಾಲಿನಲ್ಲಿ ಇವನು ಕೂಡ. ಜತೆಗೆ ಆತನಿಗೆ ಸಾಥ್ ಕೊಟ್ಟವನು ಕೂಡ. ಇವರೆಲ್ಲ ಮೀರ್ ಸಾಧಿಕ್ ಸಂಸ್ಕೃತಿಗೆ ಸೇರಿದವರು.

ಚಿತ್ರೋದ್ಯಮ ದಲ್ಲಂತೂ ಇದು ಮಾಮೂಲು. ಆಫ್ ದಿ ರೆಕಾರ್ಡ್ ಅಂತಲೇ ಒಂದಷ್ಟು ಮಾತುಕತೆ ನಡೆದು ಹೋಗುತ್ತವೆ. ತೀರಾ ತೀರಾ ನಂಬಿಕೆ ಮೇಲೆಯೇ ಇವೆಲ್ಲ ನಡೆದು ಹೋಗುತ್ತವೆ. ಸಮಾಜ ಕೂಡ ಇಷ್ಟು ದೂರ ಬಂದಿದ್ದೇ ಹಾಗೆ. ಅದೆಷ್ಟೋ ಸತ್ಯಗಳು ಕೂಡ ಹಾಗೆಯೇ ಹುದುಗಿ ಹೋಗಿವೆ‌. ಅಷ್ಟಾಗಿಯೂ ಸಮಾಜ ನಂಬಿಕೆ ಮೇಲೆ ಸಾಗುತ್ತಾ ಬಂದಿದೆ. ಅಂತಹ ನಂಬಿಕೆಯ ಸಮಾಜಕ್ಕೀಗ ನಂಬಿಕೆ ಇಟ್ಟವರ ಪೈಕಿ ದರ್ಶನ್ ಕುರಿತು ಜಗ್ಗೇಶ್ ಆಡಿದ್ದೆರೆನ್ನಲಾದ ಮಾತಿನ ಆಡಿಯೋ ಸೋರಿಕೆ ಮಾಡಿದವನು ಒಬ್ಬ.

ಹಾಗಂತ, ಜಗ್ಗೇಶ್ ಅದ್ಯಾವುದೋ ನಿರ್ಮಾಪಕನ ಜತೆ ಮಾತನಾಡುತ್ತಾ ದರ್ಶನ್ ಫ್ಯಾನ್ಸ್ ಬಗ್ಗೆ ಮಾತನಾಡಿದ್ದು ಸರಿ ಅಂತಲೂ ಅಲ್ಲ. ಅದು ಆಪ್ ದಿ ರೆಕಾರ್ಡ್ ಆದರೂ ಅದು ತಪ್ಪೇ. ಹಾಗೆಯೇ ಆ ಮಾತಿಗೆ ದರ್ಶನ್ ಅಭಿಮಾನಿಗಳನ್ನೆಲಾದವರು ಶೂಟಿಂಗ್ ಸ್ಥಳದಲ್ಲೇ ಜಗ್ಗೇಶ್ ಅವರಿಗೆ ಮುತ್ತಿಗೆ ಹಾಕಿ ಧಿಕ್ಕಾರ ಕೂಗುವ ಮೂಲಕ ಅಸಭ್ಯವಾಗಿ ನಡೆದುಕೊಂಡಿದ್ದು ಕೂಡ ಸರಿನಾ? ಎಲ್ಲದಕ್ಕೂ ಒಂದು ರೀತಿ ರಿವಾಜು ಅಂತೆಲ್ಲ ಇವೆ. ಅದೆಲ್ಲವನ್ನು ಮರೆತು ಹಾದಿ ರಂಪ, ಬೀದಿ ರಂಪ ಆಗಿ ಹೋಯಿತು ಆಡಿಯೋ ಸೋರಿಕೆ ಪ್ರಕರಣ. ಅದು ಇನ್ನೆಲ್ಲಿಗೆ ಹೋಗುತ್ತೋ, ಸದ್ಯಕ್ಕೆ ನಟ ದರ್ಶನ್ ಒಂದಷ್ಟು ವಿರಾಮ ಕೊಟ್ಟಿದ್ದಾರೆ. ಆದರೆ ಆಪ್ ದಿ ರೆಕಾರ್ಡ್ ಅಂತ ಒಂಥರದ ನಂಬಿಕೆಯಲ್ಲಿಜಗ್ಗೇಶ್ ಹಗುರವಾಗಿ ಆಡಿದ ಮಾತುಗಳನ್ನು ಬೀದಿಗೆ ತಂದ ಆ ಮಹಾಶಯರು ಮಾಡಿದ ಘನ ಕಾರ್ಯ ಸಮಾಜದ ಸ್ವಾಸ್ಥ್ಯ ಕ್ಕೆ ಪೂರಕವಾಗಿದೆಯೇ ಅಂತ ಒಮ್ಮೆ ಎಲ್ಲರೂ ಯೋಚಿಸಬೇಕಿದೆ.

ಕೆಲವರಿಗೆ ಒಂದು ತೆವಲು ಇರುತ್ತದೆ. ಒಬ್ಬರನ್ನು ಇನ್ನೊಬ್ಬರ ಮೇಲೆ ತಂದಿಕ್ಕುವುದು, ಆ ಮೂಲಕ ತಮ್ನ ಸ್ವಾರ್ಥದ ಬೆಳೆ ಕಾಳು ಬೇಯಿಸಿಕೊಳ್ಳುವುದು. ಅದೇ ಸಾಲಿನಲ್ಲಿ ಇವನು ಕೂಡ. ಜತೆಗೆ ಆತನಿಗೆ ಸಾಥ್ ಕೊಟ್ಟವನು ಕೂಡ. ಇವರೆಲ್ಲ ಮೀರ್ ಸಾಧಿಕ್ ಸಂಸ್ಕೃತಿಗೆ ಸೇರಿದವರು. ನೀವೇ ಹೇಳಿ, ಇನ್ನು ಮೇಲೆ ನೀವು ಆತನ ಜತೆಗೆ ನೇರವಾಗಿಯೋ ಇಲ್ಲವೇ ಫೋನ್ ಮೂಲಕವೋ ಕಾನ್ಪಿಡೆನ್ಸಿಯಲ್ ಮ್ಯಾಟರ್ ಹಂಚಿಕೊಳ್ಳಲು ಸಾಧ್ಯವೇ? ಆತನದ್ದು ಸರಿ ಅಂತ ಒಪ್ಪಿಕೊಳ್ಳುವುದಾದರೆ ಸಮಾಜದಲ್ಲಿ ಯಾರ ಮೇಲೆ ನಂಬಿಕೆ ಇಡುವುದು? ಕಷ್ಟ- ಸುಖ ಅಂತ ಹೇಗೆಹಂಚಿಕೊಂಡು‌ ಮನಸು ಹಗುರ ಮಾಡಿಕೊಳ್ಳುವುದು? ಚಿತ್ರೊಧ್ಯಮ ಕೂಡ ಇಂತಹ ಚಾಡಿಕೋರಬಕೆಟ್ ಗಿರಾಕಿಗಳ ಬಗ್ಗೆ ಎಚ್ಚರದಿಂದರಲಿ.

ನಿರೂಪಕ ಕಿರಿಕ್ ಕೀರ್ತಿ ಚೊಚ್ಚಲ ನಿರ್ದೇಶನದ ‘ಪ್ರೀತಿ, ಮದುವೆ ಇತ್ಯಾದಿ’ ಚಿತ್ರದ ನಾಯಕಿಯಾಗಿ ಶ್ವೇತಾ ಪ್ರಸಾದ್ ಆಯ್ಕೆಯಾಗಿದ್ದಾರೆ. ಈ ಹಿಂದಿನ ‘ಸಂಕಷ್ಟಕರ ಗಣಪತಿ’ ಚಿತ್ರದ ನಟ ಲಿಖಿತ್ ಶೆಟ್ಟಿ ಚಿತ್ರದ ಹೀರೋ ಎನ್ನುವುದು ವಾರದ ಹಿಂದೆಯೇ ಖಾತ್ರಿಯಾಗಿತ್ತು. ಇದೀಗ ‘ರಾಧಾ ರಮಣ’ ಧಾರಾವಾಹಿ ಖ್ಯಾತಿಯ ಶ್ವೇತಾ ಪ್ರಸಾದ್ ಚಿತ್ರದ ನಾಯಕಿಯಾಗಿ ನಟಿಸಲಿದ್ದಾರೆ. ಮಾರ್ಚ್‌ ಮಧ್ಯದಲ್ಲಿ ಸಿನಿಮಾ ಶೂಟಿಂಗ್ ಆರಂಭಿಸಲಿದೆ ಎನ್ನಲಾಗಿದೆ.

‘ಶ್ರೀರಸ್ತು ಶುಭಮಸ್ತು’ ಸೀರಿಯಲ್‌ ಮೂಲಕ ಕಿರುತೆರೆಗೆ ಪದಾರ್ಪಣೆ ಮಾಡಿದ ಶ್ವೇತಾ ಪ್ರಸಾದ್ ಅವರಿಗೆ ‘ರಾಧಾ ರಮಣ’ ಧಾರಾವಾಹಿ ದೊಡ್ಡ ಹೆಸರು ತಂದುಕೊಟ್ಟಿತು. ನಂತರ ದೀಪಕ್ ಮಧುವನಹಳ್ಳಿ ನಿರ್ದೇಶನದ ‘ಕಳ್ಬೆಟ್ಟದ ದರೋಡೆಕೋರರು’ ಚಿತ್ರದೊಂದಿಗೆ ಬೆಳ್ಳಿತೆರೆಗೆ ಪರಿಚಯವಾದರು. ಇದೀಗ ‘ಪ್ರೀತಿ, ಮದುವೆ ಇತ್ಯಾದಿ’ ತಂಡಕ್ಕೆ ಸೇರ್ಪಡೆಗೊಂಡಿದ್ದಾರೆ. ಚಿತ್ರದ ಹೀರೋ ಲಿಖಿತ್ ತುಳು ಚಿತ್ರರಂಗದಲ್ಲಿ ಪರಿಚಿತ ಹೆಸರು. ‘ಫ್ಯಾಮಿಲಿ ಪ್ಯಾಕ್‌’ ಚಿತ್ರೀಕರಣ ಮುಗಿಸಿರುವ ಅವರು ಕೀರ್ತಿ ನಿರ್ದೇಶನದಲ್ಲಿ ನಟಿಸಲಿದ್ದಾರೆ. ಆರ್‌ಜೆ ಆಗಿ ಪರಿಚಯವಾದ ಕಿರಿಕ್ ಕೀರ್ತಿ ಬಿಗ್‌ಬಾಸ್‌ ಮನೆಗೂ ಹೋಗಿ ಬಂದಿದ್ದರು. ‘ಪ್ರೀತಿ, ಮದುವೆ ಇತ್ಯಾದಿ’ಯೊಂದಿಗೆ ನಿರ್ದೇಶಕರಾಗುತ್ತಿದ್ದಾರೆ.

ಆರ್ಯ ಮತ್ತು ಸಯೇಷಾ ನಟನೆಯ ‘ಟೆಡ್ಡಿ’ ತಮಿಳು ಚಿತ್ರದ ಟ್ರೈಲರ್ ಬಿಡುಗಡೆಯಾಗಿದೆ. ಶಕ್ತಿ ಸೌಂದರ್ ರಾಜನ್ ನಿರ್ದೇಶನದ ಈ ಸಿನಿಮಾದಲ್ಲಿ ಟೆಡ್ಡಿ ಬೇರ್‌ ಕೂಡ ಒಂದು ಮಹತ್ವದ ಪಾತ್ರವಿದೆ! ‌ಟ್ರೇಲರ್ ವೀಕ್ಷಿಸಿದರೆ, ನಿರ್ದೇಶಕರು ಹಾಲಿವುಡ್ ಚಿತ್ರವೊಂದರ ಸ್ಫೂರ್ತಿಯಿಂದ ಚಿತ್ರಕಥೆ ಹೆಣೆದಿರುವಂತಿದೆ. ಹಾಲಿವುಡ್ ಸ್ಫೂರ್ತಿಗೆ ತಮಿಳು ಸಿನಿಮಾ ಮಸಾಲೆ ಬೆರೆಸಿದ್ದಾರೆ. ಆರ್ಯ ಹೀರೋ ಆಗಿ ನಟಿಸಿದ್ದು ಅವರೊಂದಿಗೆ ಟೆಡ್ಡಿ ಇರುವ ಹತ್ತಾರು ಸನ್ನಿವೇಶಗಳು ಕಾಣಿಸುತ್ತವೆ. ಇಲ್ಲಿ ಟೆಡ್ಡಿ, ನಾಯಕನೊಂದಿಗೆ ಮಾತನಾಡುತ್ತಾ ಆತನ ಸ್ನೇಹಿತನಂತೆ ಓಡಾಡುತ್ತದೆ.

ಶಕ್ತಿ ಸೌಂದರ್ ರಾಜನ್‌ ಅವರ ಹಿಂದಿನ ಚಿತ್ರಗಳಿಗೂ ಹಾಲಿವುಡ್ ಪ್ರೇರಣೆಯಿತ್ತು. ನೈಗಾಳ್‌ ಜಾಕಿರಾಥೈ (ಟರ್ನರ್ ಅಂಡ್ ಹೂಚ್‌), ಮಿರುಧನ್‌ (ಝೋಂಬಿ ಥ್ರಿಲ್ಲರ್‌ಗಳು), ಅರ್ಮಗೆಡಾನ್‌ (ಟಿಕ್ ಟಿಕ್ ಟಿಕ್‌) ಕೆಲವು ಪ್ರಮುಖ ಉದಾಹರಣೆ. ಇದೀಗ ಅವರಿಗೆ ‘ಟೆಡ್‌’ ಚಿತ್ರಕ್ಕೆ ಮ್ಯಾಕ್‌ಫರ್ಲೇನ್‌ ಅವರ ಟೆಡ್ ಮೂವಿ ಸರಣಿಗಳೇ ಪ್ರೇರಣೆ ಎನ್ನಲಾಗಿದೆ. ಇಲ್ಲಿ ಟೆಡ್ಡಿ ತಮಾಷೆಯ ಗೊಂಬೆಯಲ್ಲಿ. ಮೆಡಿಕಲ್ ಕ್ರೈಂ ಥ್ರಿಲ್ಲರ್‌ ಕತೆಯ ಹಿನ್ನೆಲೆಯಲ್ಲಿ ಟೆಡ್ಡಿ ಪ್ರಮುಖ ಪಾತ್ರಧಾರಿಯಾಗಿ ಕಾಣಿಸುತ್ತದೆ.

ಮೆಡಿಕಲ್‌ ಕ್ರೈಂಗೆ ಸಂಬಂಧಿಸಿದಂತೆ ದೊಡ್ಡ ವ್ಯೂಹವೊಂದನ್ನು ಬೇಧಿಸುವಲ್ಲಿ ನಾಯಕನಿಗೆ ಹೆಗಲುಕೊಡುತ್ತದೆ ಟೆಡ್ಡಿ. ನಾಯಕಿಯಾಗಿ ಸಾಯೇಷಾ ನಟಿಸಿದ್ದು, ಸತೀಶ್ ಮತ್ತು ಸಾಕ್ಷಿ ಅಗರ್‌ವಾಲ್‌ ಪ್ರಮುಖ ಪಾತ್ರಗಳಲ್ಲಿದ್ದಾರೆ. ಈ ಸಿನಿಮಾ ಥಿಯೇಟರ್‌ನಲ್ಲಿ ಬಿಡುಗಡೆಯಾಗುತ್ತಿಲ್ಲ. ಮಾರ್ಚ್‌ 12ರಿಂದ ಡಿಸ್ನೀ ಪ್ಲಸ್ ಹಾಟ್‌ಸ್ಟಾರ್‌ ಓಟಿಟಿ ಫ್ಲಾಟ್‌ಫಾರ್ಮ್‌ನಲ್ಲಿ ಪ್ರಸಾರವಾಗಲಿದೆ.

ನಟಿ ರಾಖಿ ಸಾವಂತ್‌ ಇಂದು ಇನ್‌ಸ್ಟಾಗ್ರಾಂನಲ್ಲಿ ಕ್ಯಾನ್ಸರ್‌ನಿಂದ ಬಳಲುತ್ತಿರುವ ತಮ್ಮ ತಾಯಿಯ ಫೋಟೋ ಹಂಚಿಕೊಂಡಿದ್ದಾರೆ. ಅವರ ಆರೋಗ್ಯಕ್ಕಾಗಿ ಹಾರೈಸಿ ಎನ್ನುವುದು ಅವರ ಮನವಿ. ಸದಾ ವಿವಾದಗಳಿಂದ ಸುದ್ದಿಯಲ್ಲಿರುತ್ತಿದ್ದ ರಾಖಿ ಸಾವಂತ್‌ ಮೊನ್ನೆಯಷ್ಟೇ ಮುಗಿದ ಬಿಗ್‌ಬಾಸ್‌ 14ನೇ ಸೀಸನ್‌ ಸ್ಪರ್ಧಿಯಾಗಿದ್ದರು. ಬಿಗ್‌ಬಾಸ್ ಮನೆಯಲ್ಲಿದ್ದಷ್ಟೂ ದಿನ ಆಗಿಂದಾಗ್ಗೆ ಅವರು ಅನಾರೋಗ್ಯಕ್ಕೆ ಈಡಾಗಿರುವ ತಮ್ಮ ತಾಯಿಯ ಬಗ್ಗೆ ಪ್ರಸ್ತಾಪಿಸುತ್ತಿದ್ದರು. ಇಂದು ತಾಯಿಯ ಫೋಟೋ ಹಂಚಿಕೊಂಡು, ಅವರ ಆರೋಗ್ಯಕ್ಕಾಗಿ ಪ್ರಾರ್ಥಿಸಿ ಎಂದು ಬರೆದಿದ್ದಾರೆ.

ಮೊನ್ನೆ ಬಿಗ್‌ಬಾಸ್‌ನಲ್ಲಿ ಫೈನಲ್ ತಲುಪಿದ ಐವರು ಸ್ಪರ್ಧಿಗಳಲ್ಲಿ ರಾಖಿ ಸಾವಂತ್ ಕೂಡ ಒಬ್ಬರಾಗಿದ್ದರು. ರಾಹುಲ್ ವೈದ್ಯ, ರುಬಿನಾ ದಲೈಕ್‌, ನಿಕ್ಕಿ ತಂಬೋಲಿ, ಅಲಿ ಗೋನಿ ಫೈನಲ್ ಪಟ್ಟಿಯಲ್ಲಿದ್ದ ಇತರೆ ಸ್ಪರ್ಧಿಗಳು. ಈ ಹಂತದಲ್ಲಿ ಹಣದ ಅಗತ್ಯವಿದ್ದ ರಾಖಿ ಸ್ಪರ್ಧೆಯಿಂದ ಹೊರಗುಳಿಯಲು ನಿರ್ಧರಿಸಿದರು. ಅದರಂತೆ ಅವರು ಹದಿನಾಲ್ಕು ಲಕ್ಷ ರೂಪಾಯಿ ತೆಗೆದುಕೊಂಡು ಬಿಗ್‌ಬಾಸ್‌ ಮನೆಯಿಂದ ಹೊರಬಿದ್ದರು.

“ಕಾನ್ಸರ್‌ನಿಂದ ಬಳಲುತ್ತಿರುವ ಅಮ್ಮನಿಗೆ ಕಿಮೋತೆರಪಿ ಮಾಡಿಸಲು ನನಗೆ ಹಣದ ಅವಶ್ಯಕತೆ ಇತ್ತು. ನಾನು ಬಿಗ್‌ಬಾಸ್ ಮನೆಗೆ ಹೋಗಿದ್ದೂ ಕೂಡ ಅದೇ ಕಾರಣಕ್ಕೆ. ತಾಯಿಯ ಅನಾರೋಗ್ಯವಲ್ಲದೆ ನನಗೆ ಹಲವಾರು ವೈಯಕ್ತಿಕ ಸಮಸ್ಯೆಗಳಿದ್ದು, ಮಾನಸಿಕವಾಗಿ ನೊಂದಿದ್ದೇನೆ. ಇದೆಲ್ಲರದ ಹೊರತಾಗಿಯೂ ನಾನು ಬಿಗ್‌ಬಾಸ್ ಮನೆಯಲ್ಲಿ ಖುಷಿಯಾಗಿದ್ದೆ. ಪ್ರೇಕ್ಷಕರನ್ನು ರಂಜಿಸಲು ಶ್ರಮಿಸಿದ್ದೇನೆ. ಬಿಗ್‌ಬಾಸ್‌ ನನ್ನ ಬದುಕಿನಲ್ಲಿ ಮತ್ತೆ ವಿಶ್ವಾಸ ತುಂಬಿದೆ” ಎನ್ನುತ್ತಾರೆ ನಟಿ ರಾಖಿ ಸಾವಂತ್‌.

ಪುನೀತ್ ರಾಜಕುಮಾರ್ ನಟನೆಯ ‘ಜೇಮ್ಸ್‌’ ಸಿನಿಮಾ ಸದ್ಯ ಕಾಶ್ಮೀರದಲ್ಲಿದೆ. ನಿರ್ದೇಶಕ ಚೇತನ್‌ಕುಮಾರ್‌ ಹಿಮದ ನಾಡಿನಲ್ಲಿ ಭರದ ಚಿತ್ರೀಕರಣ ನಡೆಸಿದ್ದಾರೆ. ಬಿಡುವಿನ ವೇಳೆಯಲ್ಲಿ ಅಲ್ಲಿನ ನಿವಾಸಿಗಳೊಂದಿಗೆ ಬೆರೆಯುತ್ತಿದ್ದಾರೆ ಅಪ್ಪು. ಕಾಶ್ಮೀರಿ ಕುಟುಂಬವೊಂದರ ಜೊತೆಗಿನ ಅವರ ಮಾತುಕತೆ, ಮಗು ಜೊತೆಗಿನ ಅವರ ಸೆಲ್ಫಿ ಗಮನಸೆಳೆಯುತ್ತಿವೆ. ಚಿತ್ರದ ತಂತ್ರಜ್ಞರ ಫೋಟೋಗಳೂ ಹೊರಬಿದ್ದಿದ್ದು, ಕೊರೆಯುವ ಚಳಿಯಲ್ಲಿ ನಡೆದಿರುವ ಚಿತ್ರೀಕರಣಕ್ಕೆ ಸಾಕ್ಷ್ಯ ನುಡಿಯುತ್ತಿವೆ.

ಇತ್ತೀಚಿನವರೆಗೂ ‘ಜೇಮ್ಸ್’ ಚಿತ್ರಕ್ಕೆ ಉತ್ತರ ಕರ್ನಾಟಕದಲ್ಲಿ ಚಿತ್ರೀಕರಣ ನಡೆದಿತ್ತು. ಅಲ್ಲಿನ ಶೆಡ್ಯೂಲ್‌ ಮುಗಿದ ನಂತರ ಚಿತ್ರತಂಡ ಕಾಶ್ಮೀರಕ್ಕೆ ಹಾರಿದೆ. ಅಲ್ಲಿ ಹಾಡು, ಆಕ್ಷನ್ ಸೇರಿದಂತೆ ಕೆಲವು ಪ್ರಮುಖ ಸನ್ನಿವೇಶಗಳು ಚಿತ್ರಣಗೊಳ್ಳಲಿವೆ. ಸಾಂಗ್‌ ಶೂಟಿಂಗ್ ಸಂದರ್ಭವೊಂದರಲ್ಲಿ ನೃತ್ಯನಿರ್ದೇಶಕ ಎ.ಹರ್ಷ ಕ್ಯಾಮರಾಗೆ ಪೋಸು ಕೊಟ್ಟಿದ್ದಾರೆ. ಇನ್ನು ವಿಜಯ್ ಅವರ ಸಂಯೋಜನೆಯಲ್ಲಿ ಸಾಹಸ ದೃಶ್ಯಗಳು ಚಿತ್ರೀಕರಣಗೊಳ್ಳಲಿವೆ.

ಈ ಹಿಂದಿನ ಸೂಪರ್‌ಹಿಟ್‌ ‘ರಾಜಕುಮಾರ’ ಚಿತ್ರದಲ್ಲಿ ಪುನೀತ್‌ರಿಗೆ ಜೋಡಿಯಾಗಿದ್ದ ಪ್ರಿಯಾ ಆನಂದ್‌ ‘ಜೇಮ್ಸ್‌’ನಲ್ಲಿ ಮತ್ತೆ ಪವರ್‌ಸ್ಟಾರ್‌ಗೆ ಜೊತೆಯಾಗಿದ್ದಾರೆ. ಅನುಪ್ರಭಾಕರ್‌, ರಂಗಾಯಣ ರಘು, ಸಾಧು ಕೋಕಿಲ, ಮೇಕಾ ಶ್ರೀಕಾಂತ್‌, ಮುಖೇಶ್ ರಿಷಿ, ಆದಿತ್ಯ ಮೆನನ್‌ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸುತ್ತಿದ್ದಾರೆ. ಸಂಗೀತ ಸಂಯೋಜನೆ ಚರಣ್ ರಾಜ್‌ ಅವರದು.