Author: ದೇಶಾದ್ರಿ ಹೊಸ್ಮನೆ

ಜಗತ್ತಿನ ಹಲವು ದೇಶಗಳಲ್ಲಿ ವಿಕ್ರಾಂತ್ ರೋಣ ರಿಲೀಸ್

ದುಬೈ ನ ಬುರ್ಜಾ ಖಲೀಫಾ ಅಂದ್ರೆ ಜಗತ್ತಿನ ಅಚ್ಚರಿಗಳಲ್ಲಿ ಒಂದು. ಅದಕ್ಕೆ‌ಕಾರಣವೇ ಅದರ ಎತ್ತರ. ಅದೊಂದು‌ ಜಗತ್ತಿನಲ್ಲೇ ಬಹು ಎತ್ತರದ ಬಹು ಮಹಡಿ ಕಟ್ಟಡ ಎನ್ನುವ ಹೆಮ್ಮೆ. ಅದರ ಮೇಲೆ ಈಗ ಕನ್ನಡದ ಪತಾಕೆ ಹಾರಿಸಿದ್ದಾರೆ ನಟ ಕಿಚ್ಚಸುದೀಪ್.
ಚಿತ್ರ ತಂಡ ಅಂದುಕೊಡಂತೆ ಜ.31 ರ ರಾತ್ರಿ 9 ಗಂಟೆಗೆ ಪ್ರಪಂಚದ ಅತಿ ಎತ್ತರದ ಕಟ್ಟಡ ಬುರ್ಜ್ ಖಲೀಫಾ ಮೇಲೆ ಕಿಚ್ಚ ಸುದೀಪ್ ನಟನೆಯ ವಿಕ್ರಾಂತ್ ರೋಣ ಸಿನಿಮಾದ ಟೈಟಲ್ ಲೋಗೋ ಬಿಡುಗಡೆಯಾಯಿತು. ಅದರ ಜೊತೆ ಕಿಚ್ಚ ಸುದೀಪ್ ಅವರ ಕಟೌಟ್ ಸಹ ಪ್ರದರ್ಶನವಾಯಿತು.

ಇದೊಂದು ವಿಶ್ವ ದರ್ಶನ. ಎತ್ತರಕ್ಕೇರುವುದು ಅಂದರೆ ಇದೇ ಇರಬೇಕು. ಅಲ್ಲಿ ಕನ್ನಡ ಮತ್ತು ಕನ್ನಡ ಸಿನಿಮಾಗಳೆರಡ ಬೃಹತ್ ದರ್ಶನವೇ ಆಯಿತು. ಕನ್ನಡ ಧ್ವಜ ರಾರಾಜಿಸಿತು. ಅದರ ಜತೆಗೆ ಸುದೀಪ್ ಅವರ ಭಾವ ಚಿತ್ರವೂ ಪ್ರಜ್ವಲಿಸಿತು‌.
ಸುದೀಪ್ ಅವರ ಬೆಳ್ಳಿ ಮಹೋತ್ಸವದ ಹಿನ್ನೆಲೆ 2000 ಅಡಿಗೂ ಎತ್ತರದ ವಿಶ್ವವಿಖ್ಯಾತ ಕಟ್ಟಡದ ಮೇಲೆ ಕಿಚ್ಚನ ಕಟೌಟ್ ಪ್ರದರ್ಶನಗೊಂಡಿದ್ದು ಒಂದೆಡೆಯಾದರೆ,
ಮತ್ತೊಂದೆಡೆ, ಸುದೀಪ್ ನಟಿಸಿದ ಚಿತ್ರಗಳ ಝಲಕ್, ಕ್ರಿಕೆಟ್, ಗಾಯನ ಸೇರಿದಂತೆ ಕಿಚ್ಚ ನಡೆದು ಬಂದ ಹಾದಿಯನ್ನು ಟೀಸರ್ ಮೂಲಕ ಬಿತ್ತರಿಸಲಾಯಿತು.

‘ವಿಕ್ರಾಂತ್ ರೋಣ’ ಟೀಸರ್ ಲಾಂಚ್ ನಂತರ, ಈ ಚಿತ್ರವು ಭಾರತದ ಹಲವು ಭಾಷೆಗಳಲ್ಲಿ ಹಾಗೂ ಜಗತ್ತಿನ ಹಲವು ದೇಶಗಳಲ್ಲಿ ಸಿನಿಮಾ ರಿಲೀಸ್ ಆಗುತ್ತಿದೆ ಎಂಬುದಾಗಿ ಚಿತ್ರ ತಂಡ ಹೇಳಿತು. ನಿರ್ಮಾಪಕ ಜಾಕ್ ಮಂಜು, ಪ್ರಿಯಾ ಸುದೀಪ್, ನಿರ್ದೆಶಕ ಅನೂಪ್ ಭಂಡಾರಿ, ನಟ ನಿರೂಪ್ ಭಂಡಾರಿ ಸೇರಿ ಹಲವರು ಈ ಅಪರೂಪದ ಕ್ಷ ಣಗಳಿಗೆ ಸಾಕ್ಷಿ ಯಾದರು.

ಹೆಚ್ ಪಿ  ನಿರ್ದೇಶನದ ಸಿನಿಮಾ, ಹೆಚ್ ಪಿ ಅಂದ್ರೇನು? ನಿರ್ದೇಶಕರು ಅದು ನಿಗೂಢ ಎನ್ನುವುದೇಕೆ?

ಎಂಬಿಎ ಅನ್ನೋದೊಂದು ಸಿನಿಮಾ ಹೆಸರು. ಎಂಬಿಎ ಅಂದ್ರೆ ನಿಮಗೆಲ್ಲ ಇದುವರೆಗೂ ಗೊತ್ತಿರೋದು ಇದೊಂದು ಸ್ಟಡಿ ಕೋರ್ಸ್‌ ಅಂತ. ಅದ್ರೆ ಹೊಸಬರ ಒಂದು ತಂಡ , ಈಗ ಅದೇ ಹೆಸರಲ್ಲಿ ಒಂದು ಸಿನಿಮಾ ಮಾಡಿ ರಿಲೀಸ್‌ ರೆಡಿ ಆಗಿದೆ. ಎಂಬಿಎ ಹೆಸರಿನ ಚಿತ್ರದ ಶೀರ್ಷಿಕೆಗೆ ” ಭಾಗ್ಯ ಅನ್ ಲಿಮಿಟೆಡ್‌..ʼ ಅನ್ನೋದು ಟ್ಯಾಗ್‌ ಲೈನ್ ಇದೆ. ಹೆಚ್‌ ಪಿ ಎನ್ನುವವರು ಇದರ ನಿರ್ದೇಶಕ.
ಎಸ್.‌ ನಾರಾಯಣ್‌ ಅವರ ಬಳಿ ಸಹಾಯಕ ನಿರ್ದೇಶಕರಾಗಿ ಕೆಲಸ ಮಾಡಿದ್ದರಂತೆ. ಈಗ ಅವರೇ ಸ್ವತಂತ್ರ ನಿರ್ದೇಶಕರಾಗಿ “ಎಂಬಿಎʼ ಹೆಸರಿನ ಚಿತ್ರದ ಮೂಲಕ ಆಕ್ಷನ್‌ ಕಟ್‌ ಹೇಳಿದ್ದಾರೆ. ನಿಮಗೆ ಗೊತ್ತಿರುವ ಹಾಗೆ ಎಂಬಿಎ ಅಂದ್ರೆ ಮಾಸ್ಟರ್‌ ಆಫ್‌ ಬಿಸಿನೆಸ್‌ ಆಡ್ಮಿನಿಸ್ಟ್ರೇಷನ್‌ ಅಂತ. ಆದ್ರೆ ಇಲ್ಲಿ ಎಂಬಿಎ ಎನ್ನುವ ಶೀರ್ಷಿಕೆಯ ಫುಲ್‌ ಫಾರ್ಮ್‌ ಬೇರೇನೆ ಇದೆಯಂತೆ. ಅದೇನು ಅಂತ ಗೊತ್ತಾಗಬೇಕಾದ್ರೆ, ಸಿನಿಮಾ ನೋಡ್ಬೇಕು ಅಂತಾರೆ ನಿರ್ದೇಶಕರು.

ಹಾಗಂತ ಇದೇನು ಕಾಲೇಜಿಗೆ ಸಂಬಂಧಿಸಿದ ಕಥಾ ಹಂದರ ಚಿತ್ರವಲ್ಲವೇ ಅಂತ ಭಾವಿಸಬೇಕಿಲ್ಲ. ಕಾಲೇಜಿನಲ್ಲಿ ನಡೆಯುವ ಸಸ್ಪೆನ್ಸ್‌, ಥ್ರಿಲ್ಲರ್‌ ಹಾಗೂ ಮರ್ಡರ್‌ ಮಿಸ್ಟರಿಯ ಕಥಾ ಹಂದರದ ಚಿತ್ರ ಇದು. ಅಲ್ಲಿ ಪ್ರೀತಿ ಇದೆ, ರೋಮಾನ್ಸ್‌ ಇದೆ, ಸೆಟಿಮೆಂಟ್‌ ಇದೆ, ಆಕ್ಷನ್‌ ಇದೆ ಎನ್ನುತ್ತಾರೆ ನಿರ್ದೇಶಕ ಹೆಚ್.ಪಿ.
ಚಿತ್ರದ ಶೀರ್ಷಿಕೆಯ ಹಾಗೆಯೇ ಇಲ್ಲಿ ಇನ್ನೊಂದು ಕುತೂಹಲ ನಿರ್ದೇಶಕರ ಹೆಸರಿಗೆ ಸಂಬಂಧಿಸಿದ್ದು. ಹೆಚ್‌ ಪಿ ಅನ್ನೋದು ಅವರ ಹೆಸರು. ಅದರ ಫುಲ್‌ ಫಾರ್ಮ್‌ ಏನು ಅಂತ ಪ್ರಶ್ನಿಸಿದರೆ, ಅದೆಲ್ಲ ಬೇಡ ಸರ್‌, ಆ ಕತೆ ಬೇರೆಯಿದೆ ಅಂತಾರೆ ನಿರ್ದೇಶಕ. ಹೊಸ ಪ್ರತಿಭೆಗಳಾದ ಪುನೀತ್‌ ಗೌಡ, ಗೂಳಿಸೋಮ, ಕಾವ್ಯ ಗೌಡ, ಸೌಮ್ಯ ಶಾನ್‌ಬೋಗ್‌ ಈ ಚಿತ್ರದ ಪ್ರಮುಖ ಕಲಾವಿದರು. ಸದ್ಯಕ್ಕೆ ಚಿತ್ರ ತಂಡ ಟ್ರೀಲರ್‌ ಲಾಂಚ್‌ ಮಾಡುವ ಮೂಲಕ ಸದ್ದು ಮಾಡಿದೆ. ಎರಡು ವರ್ಷಗಳ ಹಿಂದೆಯೇ ಶುರುವಾಗಿದ್ದ ಈ ಚಿತ್ರಕ್ಕೆ ಈಗ ಬಿಡುಗಡೆಯ ಕಾಲ ಕೂಡಿ ಬಂದಿದೆ. ಟ್ರೇಲರ್‌ ಲಾಂಚ್‌ ಗೆ ಹೆಸರಾಂತ ಸಂಭಾಷಣಾಕಾರ ಮಳ್ಳವಳ್ಳಿ ಸಾಯಿ ಕೃಷ್ಣ ಆಗಮಿಸಿದ್ದರು. ಟ್ರೇಲರ್‌ ಲಾಂಚ್‌ ಮಾಡಿ, ಚಿತ್ರ ತಂಡಕ್ಕೆ ಶುಭ ಹಾರೈಸಿದರು.

ಸರಿ ಸುಮಾರು ಎರಡು ನಿಮಿಷಗಳಷ್ಟು ಅವಧಿಯ ಟ್ರೇಲರ್‌ನಲ್ಲಿ ಬರೀ ಪೋಲಿ ಮಾತುಗಳೇ ತುಂಬಿಕೊಂಡಿವೆ.

ಸೆನ್ಸಾರ್‌ ನಿಂದ ಈ ಚಿತ್ರಕ್ಕೆ ಎ ಸರ್ಟಿಫಿಕೇಟ್‌ ಸಿಕ್ಕಿದೆ.  ಸಿನಿಮಾ ಮುಖ್ಯವಾಗಿ ಕಾಲೇಜು ಹುಡುಗರ ಪ್ರೀತಿ, ಪ್ರೇಮ, ಹೊರಳಾಟ, ತೊಳಲಾಟ, ಒದ್ದಾಟಗಳ ಕತೆ ಹೇಳುತ್ತದೆ. ಹಾಗೆಯೇ ಈಗಿನ ಯುವ ಜನತೆಗೆ ಒಂದು ಸಂದೇಶ ನೀಡುತ್ತದೆ. ಹಾಗಾಗಿಯೇ ಸೆನ್ಸಾರ್‌ ಕಡೆಯಿಂದ ಚಿತ್ರಕ್ಕೆ ಎ ಸರ್ಟಿಫಿಕೇಟ್‌ ಸಿಕ್ಕಿದೆ ಎನ್ನುವುದು ನಿರ್ದೇಶಕ ಹೆಚ್.ಪಿ. ನೀಡುವ ಸ್ಪಷ್ಟನೆ. ನಿರ್ದೇಶಕ ಹೆಚ್.ಪಿ ಅವರೇ ಕತೆ, ಚಿತ್ರಕತೆ ಹಾಗೂ ಸಂಭಾಷಣೆ ಬರೆದು ನಿರ್ದೇಶನ ಮಾಡಿದ್ದಾರೆ. ಹರ್ಷ ಕಾಗೋಡು ಸಂಗೀತ ನೀಡಿದ್ದು, ದರ್ಶನ್‌ ದೇವ್‌ ಛಾಯಾಗ್ರಹಣ ಮಾಡಿದ್ದಾರೆ. ಮರಿ ಸ್ವಾಮಿ ಸಂಕಲನ ಚಿತ್ರಕ್ಕಿದೆ.

ಕುಟುಂಬ ಸಮೇತ ದೇವರ ದರ್ಶನ ಪಡೆದ ನಟಿ ರಾಗಿಣಿ ತಮ್ಮ ಮೇಲಿನ ಆರೋಪಕ್ಕೆ ರಿಯಾಕ್ಷನ್‌ ಕೊಟ್ಟಿದ್ದೇನು….?

ಗ್ಲಾಮರಸ್‌ ನಟಿ ರಾಗಿಣಿ ಮತ್ತೆ ಬಂದಿದ್ದಾರೆ. ಆಗಿದ್ದಾಯ್ತು, ಮುಂದೇ ಹೋಗೋಣ ಎನ್ನುವಂತೆ ಅವರೀಗ ಹೊಸ ಉತ್ಸಾಹ ತುಂಬಿಕೊಂಡು ಮತ್ತೆ ನಟಿಯಾಗಿ ಸಿನಿಮಾ ಚಟುವಟಿಕೆಗಳಲ್ಲಿ ತೊಡಗಿಸಿಕೊಳ್ಳಲು ಮುಂದಾಗಿದ್ದಾರೆ.

ಸದ್ಯಕ್ಕೆ ಅವರ ಮೊದಲು ಯಾವ ಸಿನಿಮಾ ಟೀಮ್‌ ಮೂಲಕ ಕ್ಯಾಮೆರಾ ಎದುರಿಸಲಿದ್ದಾರೆನ್ನುವುದು ಸಿನಿಮಾ ಪ್ರೇಕ್ಷಕರಲ್ಲಿರುವ ಕುತೂಹಲ. ಅವರು ನಾಯಕಿ ಆಗಿರುವ “ಗಾಂಧಿಗಿರಿʼ ಈಗ ತೆರೆ ಬರಬೇಕಿದೆ. ಇನ್ನೇರೆಡು ಪ್ರಾಜೆಕ್ಟ್‌ ಒಪ್ಪಿಕೊಂಡಿದ್ದಾಗಿಯೂ ಈ ಮುಂಚೆ ಹೇಳಿಕೊಂಡಿದ್ದರು. ಅವೆಲ್ಲವುಗಳ ಕತೆ ಏನೋ ಗೊತ್ತಿಲ್ಲ. ಆದರೆ ಈಗ ಅವರನ್ನೇ ಹಾಕಿಕೊಂಡು ಒಂದು ತಂಡ ಸಿನಿಮಾ ಮಾಡಲು ಹೊರಟಿದೆ.

ಆ ವಿಚಾರ ಇಷ್ಟರಲ್ಲಿಯೇ ಬಹಿರಂಗವಾಗುವುದು ಕೂಡ ಗ್ಯಾರಂಟಿ ಇದೆ. ಈ ನಡುವೆಯೇ ಈಗ ರಾಗಿಣಿ, ಶನಿವಾರ ಕುಟುಂಬದೊಂದಿಗೆ ದೇವಾಲಯಕ್ಕೆ ಭೇಟಿ ನೀಡಿದ್ದಾರೆ. ಸದ್ಯ ಕುಟುಂಬದವರ ಜತೆಗೆ ಒಂದಷ್ಟು ದಿನ ಕಾಲ ಕಳೆಯಬೇಕಿದೆ ಅಂತಲೂ ಹೇಳಿಕೊಂಡಿದ್ದಾರೆ. ಉಳಿದಂತೆ ಸೋಷಲ್‌ ಮೀಡಿಯಾದಲ್ಲಿ ಅವರು ಒಂದಷ್ಟು ವಿಚಾರವನ್ನು ಮನ ಬಿಚ್ಚಿ ಹೇಳಿಕೊಂಡಿರುವುದು ವಿಶೇಷ . ಸರ್ವ ಶಕ್ತನಾದ ದೇವರ ಆಶೀರ್ವಾದಿಂದ ನಾನು ಕೆಟ್ಟದ್ದನ್ನು ಒಳ್ಳೆಯವರಿಂದ ಜಯಸುವೆ. ಅದರ ಮೇಲೆ ನನಗೆ ನಂಬಿಕೆಯಿದೆ ಎಂದು ರಾಗಿಣಿ ಹೇಳಿಕೊಂಡಿದ್ದಾರೆ.

ಅವರಿಲ್ಲಿ ಹೇಳಿಕೊಂಡಿರುವುದಿಷ್ಟು…” ಹೊಸ ವರ್ಷ ಜಗತ್ತಿಗೆ ಅದ್ಭುತವಾದ ಮೈಲುಗಲ್ಲು ಸ್ಥಾಪಿಸಲಿ. ಕಾನೂನು ಮತ್ತು ಕಾನೂನು ವ್ಯವಸ್ಥೆಯ ಮೇಲೆ ನನಗೆ ಬಲವಾದ ನಂಬಿಕೆ ಇದೆ. ಪ್ರತಿಯೊಬ್ಬ ನಾಗರಿಕರಂತೆ ನಾನು ಕೂಡ ನನ್ನ ಹಕ್ಕುಗಳನ್ನು ಯಾವಾಗಲೂ ಗೌರವಿಸುತ್ತೇನೆ. ಭಾರತದ ಸಂವಿಧಾನದ ಅಡಿಯಲ್ಲಿಯೇ ನಮ್ಮ ಹಕ್ಕುಗಳ ರಕ್ಷಣೆ ಇದೆ. ಅದು ನನಗೆ ಖಚಿತವಿದೆ. ಸರ್ವಶಕ್ತನಾದ ದೇವರ ಆಶೀರ್ವಾದಿಂದ ನಾನು ಕೆಟ್ಟದ್ದನ್ನು ಒಳ್ಳೆಯದರಿಂದ ಜಯಸುತ್ತೇನೆ. ನನ್ನ ಶಕ್ತಿ ನನ್ನ ಕುಟುಂಬ. ಹಾಗೆಯೇ ನನ್ನ ಅಭಿಮಾನಿಗಳು ಮತ್ತು ಬೆಂಬಲಿಗರು. ಇದು ನನ್ನ ಎಲ್ಲ ಪ್ರಯತ್ನಗಳಲ್ಲಿ ವಿಜಯಶಾಲಿಯಾಗಿ ಹೊರಬರಲು ಸಹಾಯ ನೀಡುತ್ತದೆʼ ಎಂದಿದ್ದಾರೆ.ಹಾಗೆಯೇ ಎಲ್ಲರಿಗೂ ಹೊಸ ವರ್ಷದ ಶುಭಾಶಯ ತಿಳಿಸಿರುವ ರಾಗಿಣಿ, ಹೊಸ ವರ್ಷ ಎಲ್ಲರಿಗೂ ಸಂತೋಷ ಮತ್ತು ಸಮೃದ್ಧಿ ತರಲಿ ಎಂದಿದ್ದಾರೆ.

ಆ ದಿನವನ್ನು ನಟ ಸುದೀಪ್‌ ಇವತ್ತು ನೆನಪಿಸಿಕೊಂಡ ಪರಿಯೇ ವಿಚಿತ್ರ…

ನಟ ಕಿಚ್ಚ ಸುದೀಪ್‌ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿ, ಇಲ್ಲಿಗೆ  25 ವರ್ಷ. ಈಗ ಒಬ್ಬ ನಟನಿಗೆ 25  ವರ್ಷದ ಸಿನಿಮಾ ಜರ್ನಿ ಅನ್ನೋದು ದೊಡ್ಡ ಸಾಧನೆ. ಅದರಲ್ಲೂ ಬಹುಬೇಡಿಕೆಯ ನಟನಾಗಿ ಬಹುಕಾಲ ವರ್ಚಸ್ಸು ಉಳಿಸಿಕೊಂಡು ಇರುವುದೇ ಇಲ್ಲಿ ದೊಡ್ಡ ಸವಾಲು. ಅದರೆ ಅದು ಸುದೀಪ್‌ ಅವರಿಗೆ ಸಾಧ್ಯವಾಗಿದೆ. ಅಷ್ಟೇ ಅಲ್ಲ, ಕನ್ನಡದಾಚೆಯೂ ಕಿಚ್ಚ ಸುದೀಪ್‌ ಬಹುಬೇಡಿಕೆಯ ನಟರಾಗಿರುವುದು ಅವರ ಬಹುಮುಖ ಪ್ರತಿಭೆಗೆ ಹಿಡಿದ ಕನ್ನಡಿ. ಈ ತಾರಾ ವರ್ಚಸ್ಸಿನ ನಡುವೆಯೇ ಅವರೀಗ ತಮ್ಮ ಸಿನಿಮಾ ಜರ್ನಿಯ 25 ನೇ ವರ್ಷದ ಸಂಭ್ರಮವನ್ನು ದೂರದ ದುಬೈನಲ್ಲಿ ತುಂಬಾನೆ ವಿಶೇಷವಾಗಿ ಆಚರಿಸಿಕೊಳ್ಳುತ್ತಿದ್ದಾರೆ.

ಅಂದ್ರೆ, ಅವರೀಗ ಬಹುನಿರೀಕ್ಷಿತ ʼ ವಿಕ್ರಾಂತ್‌ ರೋಣʼ ಚಿತ್ರದ ಪ್ರಮೋಷನ್‌ನಲ್ಲಿ ಬ್ಯುಸಿಯಾಗಿದ್ದಾರೆ. ಅದಕ್ಕಾಗಿಯೇ ದುಬೈಗೆ ಹಾರಿದ್ದಾರೆ. ನಾಳೆ( ಜ.31 ) ಅಲ್ಲಿ “ವಿಕ್ರಾಂತ್‌ ರೋಣʼ ಚಿತ್ರದ ಟೀಸರ್‌ ಲಾಂಚ್‌ ಆಗುತ್ತಿದೆ. ಚಿತ್ರದ ಟೀಸರ್ ಅನ್ನು ಬುರ್ಜ್ ಖಲೀಫಾ ಮೇಲೆ ಅನಾವರಣ ಮಾಡಲಾಗುತ್ತಿದೆ. ಅದಕ್ಕೂ ಮೊದಲು ಅಂದ್ರೆ, ಜ. 30 ರಂದು ಶನಿವಾರ ದುಬೈನಿಂದಲೇ ವರ್ಚುವಲ್‌ ನೆಟ್‌ವರ್ಕ್‌ ಮೂಲಕ ನಟ ಕಿಚ್ಚ ಸುದೀಪ್‌ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದರು. 25 ವರ್ಷದ ಹಾದಿಯಲ್ಲಿ ಸಿಕ್ಕ ಕೆಲವು ಮರೆಯಲಾಗದ ಘಟನೆಗಳನ್ನು ಹೇಳಿಕೊಂಡರು. ಹಾಗೆಯೇ ಇಷ್ಟು ವರ್ಷದ ಸಿನಿಮಾ ಜರ್ನಿಯ ಏಳು-ಬೀಳಿನ ಬಗ್ಗೆ ಮಾತನಾಡಿದರು.

ಸಿನಿಮಾ ರಿಲೀಸ್ ಆದ ದಿನ ಚಿತ್ರಮಂದಿರಕ್ಕೆ ತೆರಳಿದ್ದಾಗ ಆದ ಅನುಭವದ ಬಗ್ಗೆ ಮಾತನಾಡಿದ ಸುದೀಪ್, ‘ಚಿತ್ರಮಂದಿರಕ್ಕೆ ಹೋದಾಗ ಏಳೆಂಟು ಜನ ಇದ್ರು. ಒಬ್ಬ ಹಾರ ಕೈಯಲ್ಲಿ ಹಿಡಿದು ನಿಂತಿದ್ದ. ನಾನು ಹೋಗುತ್ತಿದ್ದ ಹಾಗೆ ಬಂದು ಹಾರ ಹಾಕಿದ್ರು. ಇರೋದು 8 ಜನ ಅದ್ರಲ್ಲಿ ಒಬ್ಬ ಬಂದು ಹಾರ ಹಾಕಿದ್ದು ನೋಡಿ, ಅವ್ನೇನೋ ತಿಥಿ ಮಾಡೋಕೆ ಬಂದಿದ್ದಾನಾ ಅಂತೆನಿಸಿತು. ಅಷ್ಟೇ ಅಲ್ಲ, ಅಲ್ಲಿದ್ದ ಕಟೌಟ್‌ ನೋಡಿದೆ. ಅದರ ಮೇಲೆ ಕಾಗೆ ಬಿಟ್ರೆ ಒಂದು ಹಾರನು ಇರಲಿಲ್ಲ. ನಾನು ನನ್ನ ಸ್ನೇಹಿತ ಚಿತ್ರಮಂದಿರದ ಒಳಗೆ ಹೋದೆವು. ಮ್ಯಾನೇಜರ್ ಬಂದು ಕಾಫಿ ಬೇಕಾ ಅಂತ ಕೇಳಿದ್ರು, ಬೇಡ ಎಂದೆ, ಕಾಫಿ ತಗೊಳ್ಳಿ ಎಂದು ಒತ್ತಾಯ ಮಾಡಿದ್ರು. ಅವರು ನನ್ನ ಸ್ನೇಹಿತನ ಬಳಿ ಕೇಳಿದ್ರು ಏನಾಯಿತು ಎಂದು ಆಗ ಜನ ಇಲ್ಲ ಅದಕ್ಕೆ ಹೀಗೆ ಕುಳಿದ್ದಾರೆ ಎಂದ. ಆಗ ಅವರು ಇದಕ್ಕಿಂತ ಜನ ಬೇಕಾ ಎಂದು ಹೇಳಿದ್ರು. 8 ಜನಕ್ಕೆ ಇವರು ಇಷ್ಟು ದೊಡ್ಡ ಕ್ರೌಡ್ ಅಂತ ಅಂದುಕೊಂಡಿದ್ದಾರಾ ಅಂತ ಅಂದು ಕೊಂಡೆ. ಆದ್ರೆ ಟಾಕೀಸ್‌ ಹೌಸ್‌ ಫುಲ್‌ ಆಗಿತ್ತು. ಆ ಮೇಲಿನ ಕ್ಷಣಗಳೇ ರೋಚಕ‌ʼ ಎಂದರು ನಟ ಸುದೀಪ್.

ಮಕ್ಕಳಿಗಾಗಿಯೇ ಮಾರುಕಟ್ಟೆಗೆ ಬಂತು ಫುಡ್‌ಸ್ಟೆಪ್ಸ್‌, ಶುಭವಾಗಲಿ ಅಂದ್ರು ಪವರ್‌ ಸ್ಟಾರ್‌

ಕನ್ನಡದಲ್ಲಿ ಪೊಲೀಸ್‌ ಸ್ಟೋರಿ ಚಿತ್ರದೊಂದಿಗೆ ಡೈಲಾಗ್‌ ಕಿಂಗ್‌ ಅಂತಲೇ ಹೆಸರಾದ ನಟ ಸಾಯಿಕುಮಾರ್‌ ಪುತ್ರಿ ಡಾಕ್ಟರ್.‌ ಅಷ್ಟೇ ಅಲ್ಲ ಉದ್ಯಮಿಯೂ ಹೌದು. ಸ್ಟಾರ್ಸ್‌ ಮಕ್ಕಳು ತಮ್ಮ ಪೋಷಕರ ಹಾಗೆಯೇ ಬಣ್ಣದ ಜಗತ್ತಿನಲ್ಲೇ ಗುರುತಿಸಿಕೊಳ್ಳಬೇಕೆಂದು ಬಯಸುವಾಗ ನಟ ಸಾಯಿಕುಮಾರ್‌ ಪುತ್ರಿ ಜ್ಯೋತಿರ್ಮಯಿ ಅವರದ್ದು ಕೊಂಚ ಡಿಫೆರೆಂಟ್‌ ವ್ಯಕ್ತಿತ್ವ. ಅವರು ಎಂಬಿಬಿಎಸ್‌ ಓದಿ ಡಾಕ್ಟರ್ ಆಗಿದ್ದು ಮಾತ್ರವಲ್ಲ, ಈಗ ಮಕ್ಕಳತಜ್ಞೆ. ಹಾಗೆಯೇ ಮಕ್ಕಳಿಗಾಗಿಯೇ ಪೌಷ್ಟಿಕ ಆಹಾರ ತಯಾರಿಸುವ ಒಂದು ಕಂಪನಿಯ ಒಡತಿ.

ವೈದ್ಯೆ ಜ್ಯೋತಿರ್ಮಯಿ ಅವರ ಈ ಪ್ರಯತ್ನಕ್ಕೆ ಸಾಥ್‌ ಕೊಟ್ಟಿದ್ದು ಅವರ ಪತಿ ಕೃಷ್ಣ ಫಲ್ಗುಣ. ಮೂಲತಃ ಇವರು ಬೆಳಗಾವಿ. ಅಲ್ಲಿಯೇ ಕ್ಸೋಬು ಫುಡ್ಸ್‌ ಮತ್ತು ಬೆವರೇಜಸ್‌ ಸಂಸ್ಥೆಯ ಮೂಲಕ ಈ ದಂಪತಿ ಈಗ ಅಹಾರ ತಯಾರಿಕಾ ಉದ್ಯಮ ಶುರು ಮಾಡಿದ್ದಾರೆ. ಅದರ ಫಲವಾಗಿ ಈಗ ಮಕ್ಕಳಿಗಾಗಿಯೇ ಧ್ರವಿಕೃತ ಸಿದ್ಧ ಆಹಾರದ ಪಾಕೆಟ್‌ಗಳ “ಫುಡ್‌ಸ್ಟೆಪ್ಸ್‌ʼ ಪ್ರಾಡೆಕ್ಟ್‌ ಮಾರುಕಟ್ಟೆಗೆ ಬಿಡುಗಡೆ ಆಗಿದೆ.

ಜ. ೨೮ ರಂದು ಗುರುವಾರ ಬೆಂಗಳೂರಿನ ಖಾಸಗಿ ಹೊಟೇಲ್‌ನಲ್ಲಿ ಈ ಪ್ರಾಡೆಕ್ಟ್‌ ಲಾಂಚ್‌ ಕಾರ್ಯಕ್ರಮ ತುಂಬಾ ಗ್ರಾಂಡ್‌ ಆಗಿಯೇ ನಡೆಯಿತು. ಪವರ್‌ ಸ್ಟಾರ್‌ ಪುನೀತ್‌ ರಾಜ್‌ ಕುಮಾರ್‌ ಈ ಪ್ರಾಡೆಕ್ಟ್‌ ಲಾಂಚ್‌ ಮಾಡಿ, ಶುಭ ಹಾರೈಸಿದರು.
ಫುಡ್‌ ಪ್ರಾಡೆಕ್ಟ್‌ ಮೊದಲ ಗ್ರಾಹಕರಾಗಿ ಸಿಂಪಲ್ಲಾಂಗ್‌ ಒಂದ್‌ ಸ್ಟೋರಿಯ ಜನಪ್ರಿಯ ನಟಿ ಶ್ವೇತಾ ಶ್ರೀವಾತ್ಸವ್‌ , ದ್ರವೀಕೃತ ಸಿದ್ದ ಆಹಾರದ ಪಾಕೆಟ್ ಖರೀದಿಸಿದ್ದು ವಿಶೇಷ. ಪ್ರಾಡೆಕ್ಟ್‌ ಲಾಂಚ್‌ ಮಾಡಿ ಮಾತನಾಡಿದ ನಟ ಪುನೀತ್‌ ರಾಜ್‌ ಕುಮಾರ್‌, ಫುಡ್‌ ಸ್ಟೆಪ್ಸ್‌ ನಂತಹ ಪ್ರಾಡೆಕ್ಟ್ ಗಳನ್ನು ಫಾರಿನ್ ಕಂಟ್ರಿಗಳಲ್ಲಿ ನೋಡುತ್ತಿದ್ದೆವು. ಈಗ ನಮ್ಮಲ್ಲಿಯೂ ಸಹ ಬಂದಿದೆ. ನಟ ಸಾಯಿಕುಮಾರ್ ಅವರ ಮಗಳು ಮಕ್ಕಳ ವೈದ್ಯರಾಗಿ, ಇಂಥ ಒಂದು ಪ್ರಾಡೆಕ್ಟ್ ರೆಡಿ ಮಾಡಿದ್ದಾರೆ. ಅವರ ಕಂಪನಿ ಉತ್ತಮವಾಗಿ ಬೆಳೆಯಲಿ ʼಎಂದರು.

ಹಾಗೆಯೇ ಈ ಪ್ರಾಡೆಕ್ಟ್‌ ಅನ್ನು ತಾವೇ ತಯಾರಿಸಿದ್ದಕ್ಕೆ ಕಾರಣವೇನು ಅನ್ನೋದನ್ನು ಸಾಯಿ ಕುಮಾರ್‌ ಪುತ್ರಿ ಜ್ಯೋತಿರ್ಮಯಿ ಹೇಳಿಕೊಂಡರು. ” ನಾನು ಮಕ್ಕಳತಜ್ಞೆ ಯಾಗಿ ಕಂಡ ಒಂದು ಸಂಗತಿ ಮಕ್ಕಳ ಪೌಷ್ಟಿಕ ಆಹಾರದ ಕೊರತೆಗೆ ಸಂಬಂಧಿಸಿದ್ದು. ಬಹಳಷ್ಟು ಪೋಷಕರು ನಿರಾಸಕ್ತಿ ವಹಿಸಿದ್ದರಿಂದಲೇ ಇದೆಲ್ಲ ಕಾರಣ ಅನ್ನೋದು ತಿಳಿಯಿತು. ಒಂದು ಧ್ರವೀಕೃತ ಸಿದ್ಧ ಆಹಾರವೇ ಸಿಕ್ಕರೆ ಪೋಷಕರಿಗೂ ಅನುಕೂಲ ಆಗುತ್ತೆ ಅಂತ ನಾವು ಇದನ್ನು ತಯಾರಿಸಲು ಮುಂದಾದೆವು. ಅದರ ಫಲವೇ ಫುಡ್ ಸ್ಟೆಪ್ಸ್‌ʼ ಎಂದರು. ಜ್ಯೋತಿರ್ಮಯಿ ಪತಿ ಕೃಷ್ಣಫಲ್ಗುಣ ಹಾಜರಿದ್ದರು.

ಈ ಪ್ರಯತ್ನಕ್ಕೆ ನಟರಾದ ಸಾಯಿ ಕುಮಾರ್‌, ರವಿಶಂಕರ್‌, ಅಯ್ಯಪ್ಪ ಹಾಜರಿದ್ದರು. ಕಾರ್ಯಕ್ರಮ ಒಂದು ಪ್ರಾಡೆಕ್ಟ್‌ ಲಾಂಚ್‌ ಕಾರ್ಯಕ್ರಮವಾದರೂ, ಅದೊಂದು ಸಾಯಿ ಕುಮಾರ್‌ ಪರಿವಾರದ ಸಮಾರಂಭದಂತೆ ಕಂಡಿತು. ಕೊನೆಯಲ್ಲಿ ಇಡೀ ಕುಟುಂಬ ನಟ ಪುನೀತ್‌ ಅವರೊಂದಿಗೆ ಕ್ಯಾಮೆರಾಕ್ಕೆ ಪೋಸು ನೀಡಿತು.

ʼರಾಬರ್ಟ್ʼ‌  ಚಿತ್ರದ ರಿಲೀಸ್‌ ವಿಚಾರದಲ್ಲಿ ಗರಂ ಆದ ದರ್ಶನ್‌
 

ನಟ ದರ್ಶನ್‌ ಸಿಟ್ಟಾಗಿದ್ದಾರೆ. ಅದರಲ್ಲೂ ಕನ್ನಡಿಗರ ಭಾಷಾಭಿಮಾನದ ಕುರಿತು ಖಾರವಾಗಿ ಮಾತನಾಡಿದ್ದಾರೆ. ” ನಾವು ಭಾಷಾಭಿಮಾನಿಗಳಲ್ಲ, ಯಾವುದೇ ಭಾಷಿಗರು ಸಿಕ್ಕರೂ, ಅವರ ಭಾಷೆಯಲ್ಲಿ ಮಾತನಾಡುವ ಜನ ನಾವುʼ ಅಂತ ಕಿಡಿಕಾರಿದ್ದಾರೆ. ಅವರ ಈ ಸಿಟ್ಟಿಗೆ ಕಾರಣ” ರಾಬರ್ಟ್‌ʼ ಚಿತ್ರದ ಬಿಡುಗಡೆಗೆ ತೆಲುಗು ಚಿತ್ರರಂಗ ಅಡ್ಡಿಯಾಗಿದ್ದು. ಈ ಸಂಬಂಧ ಶುಕ್ರವಾರ ಬೆಳಗ್ಗೆ ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿಯಲ್ಲಿ ದೂರು ಸಲ್ಲಿಸಿದ ನಂತರ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ಕನ್ನಡಿಗರು ನಿಜ ಭಾಷಾಭಿಮಾನ ಹೊಂದಿದ್ದರೆ ಇದೆಲ್ಲ ಆಗುತ್ತಿರಲಿಲ್ಲ. ಅದರಿಂದಲೇ ಇದೆಲ್ಲ ಸಮಸ್ಯೆ ಆಗುತ್ತಿದೆ ಅನ್ನೋದು ಅವರ ವಾದ.
ಹಾಗಂತ ಇದು ಅವರ “ರಾಬರ್ಟ್‌ʼ ಚಿತ್ರಕ್ಕೆ ಮಾತ್ರ ಸಂಬಂಧಿಸಿದ್ದೇ ? ” ಖಂಡಿತಾ ಹಾಗಲ್ಲ, ನಾನು ಕೇವಲ ನನ್ನ ಸಿನಿಮಾದ ವಿಚಾರಕ್ಕೆ ಮಾತ್ರ ಮಾತನಾಡುತ್ತಿಲ್ಲ. ಇಲ್ಲಿ ಸಾಕಷ್ಟು ಮಂದಿ ಹೊಸಬರು ಬಂದು ಸಿನಿಮಾ ಮಾಡುತ್ತಿದ್ದಾರೆ. ಅವರು ಒಂದು ಸಿನಿಮಾ ಮಾಡುವಾಗ ಸಾಕಷ್ಟು ಕಷ್ಟಗಳಿವೆ. ಅದನ್ನೆಲ್ಲ ಕಷ್ಟಪಟ್ಟು ಎದುರಿಸಿ, ಅವರು ಒಂದು ಸಿನಿಮಾ ಮಾಡಿ ಹೊರ ತರುವಾಗ ಇಂತಹ ಸಮಸ್ಯೆಗಳಾದರೆ ಅವರ ಗತಿಯೇನು ಎನ್ನುವುದೇ ನನ್ನ ಪ್ರಶ್ನೆ ಎನ್ನುವ ಉತ್ತರ ದರ್ಶನ್‌ ಅವರದ್ದು.

ಇನ್ನು ದರ್ಶನ್‌ ಅವರೇ ಈ ಸ್ವ ಇಚ್ಚೆಯಿಂದ ಈ ವಿಚಾರ ಪ್ರಸ್ತಾಪಿಸಿದರಾ ಅಥವಾ ಚಿತ್ರತಂಡದ ಪರವಾಗಿ ಮತನಾಡಿದರಾ ಎನ್ನುವ ಮಾಧ್ಯಮದ ಪ್ರಶ್ನೆಗೂ ಅವರು ನೀಡಿದ್ದು ಖಡಕ್‌ ಉತ್ತರವೇ. ರಾಬರ್ಟ್‌ ಕುರಿತು ನಾನಿಲ್ಲಿ ಮಾತನಾಡುತ್ತೇನೆಂದರೆ, ಚಿತ್ರ ತಂಡದಲಿದ್ದೇ ಅಲ್ವಾ? ನಿರ್ಮಾಪಕರು ಅನ್ನದಾತರು. ಅವರ ಪರವಾಗಿ ನಾನು ಕೊನೆವರೆಗೂ ನಿಲ್ಲಬೇಕು. ಅದೇ ಕಾರಣಕ್ಕೆ ನಾನಿಲ್ಲಿ ಮಾತನಾಡುತ್ತಿದ್ದೇನೆ ಅಂತ ಉತ್ತರಿಸಿದರು ದರ್ಶನ್.‌

ಭಾನುವಾರವೇ ಸೌತ್‌ ಸಿನಿಮಾ ಇಂಡಸ್ಟ್ರಿ ವಾಣಿಜ್ಯ ಮಂಡಳಿ ಸಭೆ – ಅಧ್ಯಕ್ಷ ಜೈರಾಜ್‌ ಭರವಸೆ

ಬಹುನಿರೀಕ್ಷಿತ ” ರಾಬರ್ಟ್‌ʼ ಚಿತ್ರದ ಬಿಡುಗಡೆಗೆ ತೆಲಗು ಚಿತ್ರರಂಗ ಅಡ್ಡಿಯಾಗಿರುವ ವಿಚಾರ ಈಗ ದೊಡ್ಡ ಮಟ್ಟಕ್ಕೆ ಸದ್ದು ಮಾಡುತ್ತಿದೆ. ತೆಲುಗು ಚಿತ್ರರಂಗದ ಹೊಸ ನೀತಿ ವಿರುದ್ಧ ದರ್ಶನ್‌ ಗುಟುರು ಹಾಕಿದ್ದು, ಸೌತ್‌ ಸಿನಿಮಾ ಇಂಡಸ್ಟ್ರಿಯಲ್ಲೇ ತಲ್ಲಣ ಹುಟ್ಟಿದೆ. ಇದೀಗ ಕರ್ನಾಟಕ ವಾಣಿಜ್ಯ ಮಂಡಳಿ ಕೂಡ ಎಚ್ಚೆತ್ತುಕೊಂಡಿದೆ. ಭಾನುವಾರ ಈ ಸಂಬಂಧ ದಕ್ಷಿಣ ಭಾರತ ಚಲನಚಿತ್ರ ವಾಣಿಜ್ಯ ಮಂಡಳಿ ಸಭೆ ಸೇರುವುದು ಗ್ಯಾರಂಟಿ ಆಗಿದೆ. ಅಲ್ಲಿಯೇ “ರಾಬರ್ಟ್‌‌ʼ ಚಿತ್ರದ ಬಿಡುಗಡೆ ಬಿಕ್ಕಟ್ಟು ಬಗೆಹರಿಸುವುದಾಗಿ ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ಆಧ್ಯಕ್ಷ ಜೈ ರಾಜ್‌ ಭರವಸೆ ಕೊಟ್ಟಿದ್ದಾರೆ.

ʼರಾಬರ್ಟ್‌ʼ ಚಿತ್ರದ ಬಿಡುಗಡೆಗೆ ತೆಲುಗು ಚಿತ್ರರಂಗ ಅಡ್ಡಿಯಾಗಿದ್ದರ ವಿರುದ್ಧ ಶುಕ್ರವಾರ ಬೆಳಗ್ಗೆ ನಟ ದರ್ಶನ್‌ , ಕರ್ನಾಟಕ ವಾಣಿಜ್ಯ ಮಂಡಳಿ ಭೇಟಿ ನೀಡಿ ದೂರು ಸಲ್ಲಿಸಿದರು. ಆ ನಂತರ ವಾಣಿಜ್ಯ ಮಂಡಳಿ ಆಧ್ಯಕ್ಷ ಜೈರಾಜ್‌ ಮಾಧ್ಯಮಕ್ಕೆ ಪ್ರತಿಕ್ರಿಯೆ ನೀಡಿದರು. ರಾಬರ್ಟ್‌ ಚಿತ್ರದ ಬಿಡುಗಡೆ ತೆಲುಗಿನಲ್ಲಿ ವಿರೋಧ ಅಗಿಲ್ಲ. ಆದರೆ ಮಾರ್ಚ್‌ 11 ರಂದೇ ತೆಲುಗಿನಲ್ಲೂ ಒಂದುಅದ್ದೂರಿ ವೆಚ್ಚದ ಚಿತ್ರ ತೆರೆ ಕಾಣುತ್ತಿದೆ. ಹಾಗಾಗಿ ಒಂದಷ್ಟು ಗೊಂದಲ ನಿರ್ಮಾಣವಾಗಿದೆ. ಭಾನುವಾರವೇ ದಕ್ಷಿಣ ಭಾರತ ಚಲನಚಿತ್ರ ವಾಣಿಜ್ಯ ಮಂಡಳಿ ಸಭೆ ಕರೆಯುವಂತೆ ಕೋರಲಾಗುವುದು. ಅಲ್ಲಿಯೇ ಈ ಸಮಸ್ಯೆ ಬಗೆಹರಿಸುವುದಾಗಿ ‘ರಾಬರ್ಟ್’‌ ಚಿತ್ರ ತಂಡಕ್ಕೆ ಭರವಸೆ ಕೊಟ್ಟರು.

ತೆಲುಗು ಚಿತ್ರರಂಗದವರ ಸ್ವಪಕ್ಷಪಾತ ನೀತಿ ಬಗ್ಗೆ ಗರಂ ಆಗಿದ್ದ ನಟ, ಇದೆಲ್ಲ ನಡೆಯೋದಿಲ್ಲ. ಅವರ ಸಿನಿಮಾಗಳಿಗೆ ಮುಂದೆ ಕನ್ನಡದಲ್ಲಿ ಸಮಸ್ಯೆಯಾಲಿದೆ ಅಂತ ಗುಟುರು ಹಾಕಿದ್ದರು. ಅಷ್ಟೇ ಅಲ್ಲ, ಶುಕ್ರವಾರ ಬೆಳಗ್ಗೆ ತೆಲುಗು ಚಿತ್ರರಂಗದ ಈ ಇಬ್ಬಗೆ ನೀತಿ ವಿರುದ್ಧ ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿಗೆ ದೂರು ಸಲ್ಲಿಸಿದರು. ಕರ್ನಾಟಕದಲ್ಲಿ ತೆಲುಗು ಸೇರಿದಂತೆ ಬೇರೆ ಭಾಷೆಯ ಸಿನಿಮಾಗಳು ಬಿಡುಗಡೆ ಆಗಲು ಯಾವುದೇ ನಿಯಮಗಳು, ತಕರಾರುಗಳು ಇಲ್ಲ. ಆದರೆ ಕನ್ನಡ ಸಿನಿಮಾಗಳು ತೆಲುಗು ರಾಜ್ಯಗಳಲ್ಲಿ ಬಿಡುಗಡೆ ಮಾಡಲು ಕೆಲವು ಅಲಿಖಿತ ನಿಯಮಗಳನ್ನು ವಿಧಿಸಿರುವುದು ಎಷ್ಟು ಸರಿ ಎಂಬುದು ದರ್ಶನ್ ಅಸಮಾಧಾನ ಹೊರ ಹಾಕಿದ್ದರು.

ಆರ್ಮುಗಂ ಖ್ಯಾತಿಯ ಖಳ ನಟ ರವಿಶಂಕರ್‌ ಪುತ್ರ ಅದ್ವೈತ್‌ ಇಷ್ಟರಲ್ಲಿಯೇ ಹೀರೋ ಬೆಳ್ಳಿತೆರೆಗೆ ಎಂಟ್ರಿ ಆಗುವುದು ಗ್ಯಾರಂಟಿ ಆಗಿದೆ. ಎಲ್ಲವೂ ಅಂದುಕೊಂಡಂತೆಯೇ ಆಗಿದ್ದರೆ 2020 ರಲ್ಲೆ ಅದ್ವೈತ್ಹೀರೋ ಆಗಿ ಸ್ಯಾಂಡಲ್ ವುಡ್‌ಗೆ ಕಾಲಿಡಬೇಕಿತ್ತು. ಆದರೆ ಕೊರೋನಾ ಎನ್ನುವ ಮಹಾ ಮಾರಿ ಅದ್ವೈತ್‌ ಅವರ ಬೆಳ್ಳಿತೆರೆ ಪ್ರವೇಶಕ್ಕೂ ಅಡ್ಡಿ ಉಂಟು ಮಾಡಿತು. ಕೊರೋನಾ ಆತಂಕ ಒಂದಷ್ಟು ಕಮ್ಮಿ ಆಗಿ ಚಿತ್ರೋದ್ಯಮದ ಚಟುವಟಿಕೆಗಳು ಗರಿಗೆದರಿಕೊಂಡ ಬೆನ್ನಲೇ ಅದ್ವೈತ್‌ ಬೆಳ್ಳಿತೆರೆ ಪ್ರವೇಶದ ಸಿದ್ಧತೆಗೆ ಚಾಲನೆ ಸಿಕ್ಕಿದೆ.

ಮಾತೃ ಭಾಷೆ ತೆಲುಗು ಆಗಿದ್ದರೂ, ಬದುಕು ಕೊಟ್ಟ ಕನ್ನಡದ ಮೂಲಕವೇ ಪುತ್ರ ನಟನಾಗಿ ಪರಿಚಯವಾಗಬೇಕೆನ್ನುವುದು ನಟ ರವಿಶಂಕರ್‌ ಅವರ ಆಸೆ. ಅದಕ್ಕೆ ಪೂರಕ ಎಂಬಂತೆ ಅದ್ವೈತ್‌ ರಂಗ ಪ್ರವೇಶ ಆರಂಭವಾಗಿದೆ. ಅವರ ದೊಡ್ಡಪ್ಪ ಹಾಗೂ ಹೆಸರಾಂತ ನಟ ಸಾಯಿಕುಮಾರ್‌ ಅವರ ಪುತ್ರಿ ಡಾ.ಜ್ಯೋತಿರ್ಮಯಿ ಹಾಗೂ ಕೃಷ್ಣ ಪಲ್ಗುಣ ದಂಪತಿ ಒಡೆತನದ ಕ್ಸೋಬು ಫುಡ್ಸ್‌ ಮತ್ತು ಬೆವರೇಜಸ್‌ ಸಂಸ್ಥೆ ಮಾರುಕಟ್ಟೆಗೆ ಬಿಡುಗಡೆ ಮಾಡಿರುವ ಫುಡ್‌ ಸ್ಟೆಪ್ಸ್‌ ಮಕ್ಕಳ ರುಚಿಕರ ಆಹಾರ ಪದಾರ್ಥದ ಪ್ರಚಾರಕ್ಕೆ ಆಡ್‌ ಶೂಟ್‌ ಮಾಡಿದ್ದೇ ಅದ್ವೈತ್.‌ ಇದು ಅವರ ಮೊದಲ ಕೊಡುಗೆ. ಇದು ತುಂಬಾ ಗುಣಮಟ್ಟ ಹಾಗೂ ಆಕರ್ಷಣೀಯವಾಗಿ ಮೂಡಿ ಬಂದಿದೆ.

ಪುತ್ರನ ಈ ಕೆಲಸದ ಬಗ್ಗೆ ಮಾತನಾಡುವ ನಟ ಆರ್ಮುಗಂ ಖ್ಯಾತಿಯ ರವಿಶಂಕರ್‌, ಇದು ಆತನ ರಂಗ ಪ್ರವೇಶ. ನಮ್ಮ ಫ್ಯಾಮೀಲಿಯೇ ಬಣ್ಣದ ಜಗತ್ತಿನಲ್ಲಿರುವುದರಿಂದ ಆತನಿಗೆ ನಟ ಆಗ್ಬೇಕು ಅನ್ನೋದಿದೆ. ಅದಕ್ಕಂತಲೇ ಅಮೆರಿಕದ ನ್ಯೂಯಾರ್ಕ್‌ ನ ಪ್ರತಿಷ್ಟಿತ ಆಕ್ಟಿಂಗ್‌ ಸ್ಕೂಲ್‌ ನಲ್ಲಿ ಮೂರು ವರ್ಷ ಆಕ್ಟಿಂಗ್‌ ಟ್ರೈನಿಂಗ್‌ ಮುಗಿಸಿಕೊಂಡು ಬಂದಿದ್ದಾನೆ. ಇದು ಆತನ ಆಸಕ್ತಿಯ ಕ್ಷೇತ್ರ. ನಮ್ಮ ಒತ್ತಾಯವೇನಿಲ್ಲ. ಆಸಕ್ತಿ ಇದ್ದ ಕ್ಷೇತ್ರದಲ್ಲೇ ಆತನೂ ಇರಲಿ ಅನ್ನೋದು ನಮ್ಮಾಸೆ. ಸದ್ಯಕ್ಕೆ ಅದಕ್ಕೆ ನಮ್ಮಣ್ಣ , ಮತ್ತು ಮಗಳು ಹಾಗೂ ಅಳಿಯ ಅದಕ್ಕೊಂದು ಅವಕಾಶ ಕೊಟ್ಟಿದ್ದಾರೆ. ಮುಂದಿನದು ಬೆಳ್ಳಿ ತೆರೆ ಪ್ರವೇಶʼ ಎನ್ನುತ್ತಾರೆ.

ರವಿಶಂಕರ್‌ ಅವರ ಹಾಗೆಯೇ ಅವರ ಪುತ್ರ ಅದ್ವೈತ್‌ ಕೂಡ ಹ್ಯಾಂಡ್‌ ಸಮ್‌ ಆಗಿದ್ದಾರೆ. ಹೆಚ್ಚು ಕಡಿಮೆ 6 ಅಡಿ ಕಟೌಟ್.‌ ನಟನೆ, ಡಾನ್ಸ್‌ ಸೇರಿದಂತೆ ಸಿನಿಮಾಕ್ಕೆ ಬೇಕಾದ ಎಲ್ಲಾ ಕಲೆಗಳನ್ನು ಕಲಿತುಕೊಂಡೆ ಬಂದಿದ್ದಾರೆ. ಇನ್ನೇನು ಕ್ಯಾಮೆರಾ ಎದುರಿಸುವುದೊಂದೇ ಬಾಕಿಯಿದೆ. ಅಂದುಕೊಂಡಂತಾದರೆ ಇಷ್ಟರಲ್ಲಿಯೇ ಕನ್ನಡಕ್ಕೆ ಮತ್ತೊಬ್ಬ ಆರಡಿ ಹೀರೋ ಬರುವುದು ಖಚಿತ.

ಭಾರತೀಯ ಚಿತ್ರರಂಗದಲ್ಲಿ ಸಂಚಲನ ಮೂಡಿಸಲು ಒಂದಾಯ್ತು ಫೇಮಸ್‌ ಜೋಡಿ

ಸೌತ್‌ ಸಿನಿಮಾ ಇಂಡಸ್ಟ್ರಿಯ ಫೇಮಸ್‌ ನಟಿ ಶ್ರುತಿ ಹಾಸನ್‌ ಅವರಿಗೆ ಇಂದು ಬರ್ತಡೇ ಸಂಭ್ರಮ. ಅವರ ಹುಟ್ಟು ಹಬ್ಬಕ್ಕೆ “ಕೆಜಿಎಫ್‌ʼ ಖ್ಯಾತಿಯ ನಿರ್ಮಾಣ ಸಂಸ್ಥೆ ಹೊಂಬಾಳೆ ಫಿಲಂಸ್‌ ಭರ್ಜರಿ ಗಿಫ್ಟ್‌ ನೀಡಿದೆ. ಪ್ರಭಾಸ್‌ ಅಭಿನಯದ ಅದ್ದೂರಿ ವೆಚ್ಚದ ಸಿನಿಮಾ ” ಸಲಾರ್‌ʼ ಗೆ ಶ್ರುತಿ ಹಾಸನ್‌ ನಾಯಕಿ ಆಗಿದ್ದಾರೆ. ಶ್ರುತಿ ಹಾಸನ್‌ ಬರ್ತ್‌ಡೇ ದಿನದಂದೇ ಹೊಂಬಾಳೆ ಫಿಲಂಸ್‌ ಅಧಿಕೃತವಾಗಿ ಅನೌನ್ಸ್‌ ಮಾಡಿದೆ.

‘ಕೆಜಿಎಫ್‌ 2’ ಚಿತ್ರದ ಜತೆಗೆಯೇ ಹೊಂಬಾಳೆ ಫಿಲಂಸ್‌ ಬಹುಭಾಷೆಯಲ್ಲಿ ನಿರ್ಮಾಣ ಮಾಡುತ್ತಿರುವ ಅದ್ದೂರಿ ವೆಚ್ಚದ ಸಿನಿಮಾ ‘ಸಲಾರ್‌’ . ಇನ್ನು ವಿಶೇಷ ಅಂದ್ರೆ ಇದು ಪ್ರಶಾಂತ್‌ ನೀಲ್‌ ಆಕ್ಷನ್‌ ಕಟ್‌ ಹೇಳುತ್ತಿರುವ ಸಿನಿಮಾ. ಹೈದರಾಬಾದ್‌ನಲ್ಲಿ ಮೊನ್ನೆಯಷ್ಟೇ ಚಿತ್ರದ ಮುಹೂರ್ತ ವಿಶೇಷವಾಗಿ ನಡೆದಿತ್ತು. ಉಪ ಮುಖ್ಯಮಂತ್ರಿ ಅಶ್ವತ್ಥ್‌ ನಾರಾಯಣ್‌, ನಿರ್ಮಾಪಕ ವಿಜಯ್‌ ಕಿರಗಂದೂರು, ನಟ ರಾಕಿಂಗ್‌ ಸ್ಟಾರ್‌ ಯಶ್‌ ಸೇರಿದಂತೆ ತೆಲಗು ಚಿತ್ರರಂಗದ ದೊಡ್ಡ ತಂಡವೇ ಅಲ್ಲಿ ಹಾಜರಿತ್ತು. ಈ ನಡುವೆ ಈಗ ಚಿತ್ರದ ನಾಯಕ ಪ್ರಭಾಸ್‌ ಅವರಿಗೆ ನಾಯಕಿ ಹುಡುಕಿದೆ ಚಿತ್ರ ತಂಡ.

ಹೊಂಬಾಳೆ ಫಿಲ್ಮ್ಸ್‌ ಅಧಿಕೃತ ಫೇಸ್‌ಬುಕ್‌ ಪೇಜ್‌ನಲ್ಲಿ ನಟಿ ಶ್ರುತಿಹಾಸನ್‌ ಅವರಿಗೆ ಬರ್ತ್‌ ಡೇ ಶುಭಾಶಯ ಕೋರುವ ಮೂಲಕ ಚಿತ್ರಕ್ಕೆ ಸ್ವಾಗತ ಕೋರಿದೆ ಚಿತ್ರ ತಂಡ. ಹಾಗೆಯೇ ನಾಯಕ ಪ್ರಭಾಸ್‌ ಕೂಡ ನಟಿ ಶ್ರುತಿ ಹಾಸನ್‌ ಅವರಿಗೆ ಸ್ವಾಗತ ಕೋರಿದ್ದಾರೆ. “ಹುಟ್ಟುಹಬ್ಬದ ಶುಭಾಶಯಗಳು ಶ್ರುತಿ ಹಾಸನ್‌! ಸಲಾರ್ ಚಿತ್ರದಲ್ಲಿ ನಿಮ್ಮೊಂದಿಗೆ ಅಭಿನಯಿಸಲು ಉತ್ಸುಕನಾಗಿದ್ದೇನೆ” ಎಂದು ತಮ್ಮ ಫೇಸ್‌ ಬುಕ್‌ ಪೇಜ್‌ ನಲ್ಲಿ ಬರೆದುಕೊಂಡಿದ್ದಾರೆ.ಹೊಂಬಾಳೆ ಫಿಲ್ಮ್ಸ್‌ ನಿರ್ಮಾಣದಲ್ಲಿ ಪ್ರಶಾಂತ್ ನೀಲ್‌ ನಿರ್ದೇಶಿಸಿದ್ದ ‘ಕೆಜಿಎಫ್‌’ ಭಾರತ ಮಾತ್ರವಲ್ಲದೆ ಸಾಗರದಾಚೆಯೂ ಸದ್ದು ಮಾಡಿತ್ತು. ಇದೀಗ ‘ಕೆಜಿಎಫ್‌’ ಸರಣಿ ಚಿತ್ರದ ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳು ನಡೆಯುತ್ತಿದ್ದು, ನಂತರ ಪ್ರಶಾಂತ್ ನೀಲ್ ನಿರ್ದೇಶನದ ‘ಸಲಾರ್‌’ ಆರಂಭವಾಗಲಿದೆ. ಇದೀಗ ಚಿತ್ರದ ನಾಯಕಿಯ ಆಯ್ಕೆ ನಡೆದಿದ್ದು, ಚಿತ್ರದ ಇತರೆ ಪ್ರಮುಖ ಕಲಾವಿದರ ಬಗ್ಗೆ ಮುಂದಿನ ದಿನಗಳಲ್ಲಿ ಮಾಹಿತಿ ಸಿಗಲಿದೆ. ಇನ್ನು ಪ್ರಭಾಸ್ ಸದ್ಯ ರಾಧಾಕೃಷ್ಣಕುಮಾರ್ ನಿರ್ದೇಶನದ ‘ರಾಧೆ ಶ್ಯಾಮ್‌’ ರೊಮ್ಯಾಂಟಿಕ್ ಡ್ರಾಮಾ ಸಿನಿಮಾದಲ್ಲಿ ಬ್ಯುಸಿಯಾಗಿದ್ದಾರೆ. ಈ ಚಿತ್ರದ ನಂತರ ‘ಸಲಾರ್‌’ ಶುರುವಾಗಲಿದೆ.

ನಟಿ ಶ್ರುತಿ ಹಾಸನ್ ಇತ್ತೀಚೆಗೆ ಸಂಕ್ರಾಂತಿಗೆ ತೆರೆಕಂಡ ‘ಕ್ರ್ಯಾಕ್‌’ ಚಿತ್ರದಲ್ಲಿ ರವಿತೇಜಾ ಜೋಡಿಯಾಗಿ ನಟಿಸಿದ್ದರು. ಕೋವಿಡ್‌ನ ಆತಂಕದ ಮಧ್ಯೆಯೂ ಈ ಚಿತ್ರ ದೊಡ್ಡ ಯಶಸ್ಸು ಕಂಡು ಟಾಲಿವುಡ್ ಉದ್ಯಮಕ್ಕೆ ಭರವಸೆ ತುಂಬಿತ್ತು. ಈ ಯಶಸ್ಸಿನ ಹಿಂದೆಯೇ ಶ್ರುತಿ ದೊಡ್ಡ ಸಿನಿಮಾ ‘ಸಲಾರ್‌’ ಅವಕಾಶ ಪಡೆದಿದ್ದಾರೆ. ತೆರೆಯ ಮೇಲೆ ಮೊದಲ ಬಾರಿ ಅವರು ಪ್ರಭಾಸ್‌ಗೆ ಜೊತೆಯಾಗುತ್ತಿರುವುದು ವಿಶೇ‍ಷ. ನಿಸ್ಸಂಶಯವಾಗಿ ಇದು ಅವರ ವೃತ್ತಿಬದುಕಿನ ಮಹತ್ವದ ಚಿತ್ರವಾಗಲಿದೆ ಎನ್ನುವುದು ಅವರ ಅಭಿಮಾನಿಗಳ ಅಂಬೋಣ.

“ನೂರರಷ್ಟು ಭರ್ತಿಗೆ ಅವಕಾಶ ಸಿಕ್ಕಿದೆಯಂತೆ ಮಾಸ್ಕ್‌, ಸ್ಯಾನಿಟೈಸ್ಡ್‌ ಮರಿಯಬೇಡಿ” ಅಪ್ಪು ಮನವಿ

ನಟ ಪುನೀತ್‌ ರಾಜ್‌ ಕುಮಾರ್‌  ಒಂದು ನಿರ್ಧಾರಕ್ಕೆ ಬಂದಿದ್ದಾರೆ. ಇಲ್ಲಿವರೆಗಿನ ಕತೆ ಮುಗಿಯಿತು, ಆದರೆ ಇನ್ಮುಂದೆ ವರ್ಷಕ್ಕೆ ಮೂರು ಸಿನಿಮಾದಲ್ಲಾದರೂ ಅಭಿನಯಿಸಬೇಕು, ಅವರು ಆ ವರ್ಷದಲ್ಲೇ ಹಂತ ಹಂತವಾಗಿ ತೆರೆ ಕಾಣಬೇಕು. ಆ ರೀತಿ ಡಿಸೈಡ್‌ ಮಾಡಿಕೊಂಡೇ ಸಿನಿಮಾಗಳಿಗೆ ಕಾಲ್‌ ಶೀಟ್‌ ನೀಡ್ಬೇಕು ಅನ್ನೋದು ಅವರ  ನಿರ್ಧಾ ರ .

ಇದು ಅಂತೆ, ಕಂತೆ ಯಲ್ಲ. ಖುದ್ದು ಅವರೇ ” ಸಿನಿ ಲಹರಿʼ  ಜತೆ ಹಂಚಿಕೊಂಡ ಮಾಹಿತಿ. ಶುಕ್ರವಾರ ಬೆಂಗಳೂರಿನ ಖಾಸಗಿ ಹೋಟೆಲ್‌ ವೊಂದರಲ್ಲಿ ಜರುಗಿದ” ಫುಡ್‌ ಸ್ಟೆಪ್ಸ್ ʼ ಹೆಸರಿನ ಫುಡ್‌ ಪ್ರಾಡೆಕ್ಟ್‌ ಲಾಂಚ್‌ ಗೆ ಅತಿಥಿಯಾಗಿ ಬಂದಿದ್ದ ಅವರು, ಆನಂತರ “ ಸಿನಿ ಲಹರಿ ʼ ಜತೆ ಮಾತನಾಡಿದರು.“ ಚಿತ್ರ ಮಂದಿರಗಳಲ್ಲಿ ಈಗ ನೂರರಷ್ಟು ಆಸನಗಳ ಭರ್ತಿಗೆ ಕೇಂದ್ರ ಸರ್ಕಾರ ಅನುಮತಿ ನೀಡಿರುವುದು ಸಂತಸ ತಂದಿದೆ. ಇದರಿಂದ ಚಿತ್ರೋದ್ಯಮಕ್ಕೆ ಮತ್ತೆ ಚಾಲನೆ ಸಿಗಲಿದೆ. ಎಲ್ಲರಿಗೂ ಕೆಲಸ ಸಿಗಲಿದೆ. ಆದರೂ ಪ್ರೇಕ್ಷಕರು ಎಚ್ಚರಿಕೆಯಿಂದಲೇ ಇರಬೇಕಿದೆ. ಮಾಸ್ಕ್‌ ಹಾಗೂ ಸ್ಯಾನಿಟೈಸ್ಡ್‌ ಬಳಸುವುದನ್ನು ಮರೆಯಬಾರದು. ಮನರಂಜನೆ ಜತೆಗೆ ಅವರ ಆರೋಗ್ಯವೂ ಮುಖ್ಯ ಎಂದು ಮನವಿ ಮಾಡಿಕೊಂಡರು.

ಕೊರೋನಾ ಕಾರಣ ಸಂಕಷ್ಟದಲ್ಲಿರುವ ಚಿತ್ರೋದ್ಯಮಕ್ಕೆ ಇನ್ನಷ್ಟು ವೇಗ ಸಿಗಬೇಕಾದರೆ ಸ್ಟಾರ್‌ ಗಳು ವರ್ಷಕ್ಕೆ ಒಂದಕ್ಕಿಂತ ಹೆಚ್ಚು ಸಿನಿಮಾ ಮಾಡುವುದು ಒಳ್ಳೆಯಲ್ಲವೇ ಎನ್ನುವ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ನಟ ಪುನೀತ್‌, ಇನ್ಮೇಲೆ ವರ್ಷಕ್ಕೆ ಕನಿಷ್ಟ ಮೂರು ಸಿನಿಮಾಗಳಲ್ಲಾದರೂ ಅಭಿನಯಿಸಲು ನಿರ್ಧರಿಸಿದ್ದೇನೆʼ ಅಂತ ತಮ್ಮ ನಿರ್ಧಾರ ರಿವೀಲ್‌ ಮಾಡಿದರು. ಈ ಡಿಸೈಡ್‌ ಈ ವರ್ಷದಲ್ಲೇ ಇಂಪ್ಲಿಮೆಂಟ್‌ ಆಗುತ್ತಾ ಎನ್ನುವ ಕುತೂಹಲದ ಪ್ರಶ್ನೆಗೆ, ನೋಡೋಣ, ಮುಂದೆ ಹೇಳ್ತೀನಿ ಅಂತ ಹಾಗೆಯೇ ಕುತೂಹಲ ಉಳಿಸಿದರು.

“  ಈ ವರ್ಷದ ಮಟ್ಟಿಗೆ ಈಗ ಯುವ ರತ್ನ ಬರಲಿದೆ. ಅದರ ರಿಲೀಸ್‌ ಡೇಟ್‌ ಕೂಡ ಅನೌನ್ಸ್‌ ಆಗಿದೆ. ಅದಾದ ಮೇಲೆ ಜೇಮ್ಸ್‌ ಸರದಿ. ಈಗಾಗಲೇ ಅದಕ್ಕೆ ಬಹುತೇಕ ಶೂಟಿಂಗ್‌ ಮುಗಿದಿದೆ. ಅದು ರಿಲೀಸ್‌ ಯಾವಾಗೋ ಗೊತ್ತಿಲ್ಲ, ಈ ವರ್ಷದಲ್ಲೇ ಬಂದ್ರು ಬರಬಹುದು ಅಂತ ಹೇಳಿದರು. ಹಾಗಾದ್ರೆ ಮುಂದಿನ ಸಿನಿಮಾ? ಎನ್ನುವ ಪ್ರಶ್ನೆಗೆ ಗೊತ್ತಿಲ್ಲ ಅಂತ ನಕ್ಕರು. ಅದೇನೆ ಇರಲಿ, ವರ್ಷಕ್ಕೆ ಒಂದೋ ಎರಡೋ ಸಿನಿಮಾ ಸಾಕು ಅಂದುಕೊಂಡಿದ್ದ  ಪುನೀತ್‌, ಈಗ ವರ್ಷಕ್ಕೆ ಮೂರು ಸಿನಿಮಾ ಗ್ಯಾರಂಟಿ ಅಂತ ಹೇಳಿಕೊಂಡಿರುವುದು ಅವರ ಅಭಿಮಾನಿಗಳಿಗೆ ಭರ್ಜರಿ ಸಿಹಿ ಸುದ್ದಿಯಂತೂ ಹೌದು.