Category: ಸಿನಿ ಸುದ್ದಿ

ತಿಮ್ಮಪ್ಪನ ದರ್ಶನ ಪಡೆದ ದರ್ಶನ್‌

ಇತ್ತೀಚೆಗೆ ಸ್ಟಾರ್ ನಟರು ಸಿನಿಮಾದಲ್ಲಿ ಬಿಝಿಯಾಗುತ್ತಿದ್ದಾರೆ. ಅದರ ಜೊತೆ ಜೊತೆಯಲ್ಲೇ ಅವರು ಬೇರೆ ಚಟುವಟಿಕೆಗಳತ್ತವೂ ಗಮನ ಹರಿಸುತ್ತಿದ್ದಾರೆ. ಅವರಿಗೆ ಸಮಯ ಸಿಗೋದೇ ಅಪರೂಪ. ಅದರಲ್ಲೂ ತಮ್ಮ ವೈಯಕ್ತಿಕ ಬದುಕಲ್ಲಂತೂ ಸಮಯ ನಿಗದಿಪಡಿಸೋಕೆ ಹೆಣಗಾಡುತ್ತಲೇ ಇರುತ್ತಾರೆ. ಅದಕ್ಕೆ ಕಾರಣ, ಸಿನಿಮಾಗಳ ಚಿತ್ರೀಕರಣ. ಹೌದು, ಬಹುತೇಕ ಸ್ಟಾರ್‌ ನಟರು ದೇವರ ಮೊರೆ ಹೋಗುತ್ತಿರುವುದು ಹೊಸದೇನಲ್ಲ. ಈಗ ದರ್ಶನ್‌ ಕೂಡ ಸ್ವಲ್ಪ ಸಮಯ ಬಿಡುವು ಮಾಡಿಕೊಂಡು ದೇವಾಲಯಕ್ಕೆ ಭೇಟಿ ನೀಡಿದ್ದಾರೆ.

ಬುಧವಾರ ತಿರುಪತಿ ವೆಂಕಟೇಶ್ವರ ಸ್ವಾಮಿ ದರ್ಶನ ಪಡೆದು, ಪಾವನರಾಗಿದ್ದಾರೆ. ಇವರಷ್ಟೇ ಅಲ್ಲ, ನಿರ್ಮಾಪಕ ಉಮಾಪತಿ, ಹಾಗೂ ತೆಲುಗು ಸಿನಿಮಾ ವಿತರಕರು ಕೂಡ ದಚ್ಚು ಅವರಿಗೆ ಸಾಥ್‌ ನೀಡಿದ್ದಾರೆ. ಅಂದಹಾಗೆ, ದರ್ಶನ್‌ ಅವರು ವರ್ಷಗಳ ನಂತರ ಪವಿತ್ರ ಸ್ಥಳಕ್ಕೆ ಭೇಟಿಯಾಗಿದ್ದಾರೆ. ದರ್ಶನ ಪಡೆದ ಬಳಿಕ ಸ್ವತಃ ದರ್ಶನ್‌ ಅವರು ಖುಷಿಗೊಂಡಿದ್ದಾರೆ. ಇನ್ನು, ದರ್ಶನ್‌ ಅವರು ದೇವಾಲಯಕ್ಕೆ ತೆರಳಲು ಬಲವಾದ ಕಾರಣವೂ ಇದೆ. ಮಾರ್ಚ್‌ ೧೧ರಂದು “ರಾಬರ್ಟ್”‌ ರಿಲೀಸ್‌ ಆಗುತ್ತಿದೆ. ಕನ್ನಡದ ಜೊತೆಯಲ್ಲಿ ತೆಲುಗು ಭಾಷೆಯಲ್ಲೂ ಚಿತ್ರ ರಿಲೀಸ್‌ ಆಗುತ್ತಿದೆ. “ರಾಬರ್ಟ್” ಸಿನಿಮಾ ಪ್ರಚಾರಕ್ಕಾಗಿ ಹೈದರಾಬಾದಿಗೂ ತೆರಳುವ ಯೋಚೆಯಲ್ಲಿರುವ ದರ್ಶನ್ ಹಾಗೆಯೇ ದರ್ಶನ ಪಡೆದಿದ್ದಾರೆ.

ಶಿವಣ್ಣ ರೈತ ಪರ -ಸೋಷಲ್‌ ಮೀಡಿಯಾದಲ್ಲಿ ಭಾರೀ ಮೆಚ್ಚುಗೆ

ನಟ ಶಿವರಾಜ್‌ ಕುಮಾರ್‌ ಅಂದ್ರೆನೆ ಹಾಗೆ. ದೊಡ್ಡ ಸ್ಟಾರ್‌ ಆಗಿದ್ದರೂ ಸರಳ-ಸಜ್ಜನಿಕೆಗೆ ಮಾದರಿಯಂತಿರುವ ಅಪರೂಪದ ನಟ. ಹಾಗೆಯೇ ನಟನೆಯ ಆಚೆಯೂ ಸದಾ ನಾಡು-ನುಡಿ, ನೆಲ-ಜಲ ಪರವಾಗಿ ನಿಂತ ಅಪರೂಪದ ಕಲಾವಿದ. ಜನ ಪರವಾದ ಹೋರಾಟಗಳಲ್ಲಿ ನೇರವಾಗಿ ಭಾಗಿಯಾಗಿದ್ದು ಮಾತ್ರವಲ್ಲ, ತೆರೆ ಮೇಲೂ ರೈತ ಪರವಾಗಿ ಧ್ವನಿ ಮೊಳಗಿಸಿದ ಹೀರೋ. ಅದಕ್ಕೆ ಸಾಕ್ಷಿ “ಬಂಗಾರ ಸನ್‌ ಆಫ್‌ ಬಂಗಾರದ ಮನುಷ್ಯʼ ಚಿತ್ರ. ಅಂತೆಯೇ ಈಗ ಅತ್ಯಂತ ʼದುರಿತʼ ಕಾಲದಲ್ಲೂ ರೈತ ಪರವಾಗಿ ಧ್ವನಿ ಎತ್ತಿ ತಾವು ವಿಭಿನ್ನ ಮತ್ತು ವಿಶಿಷ್ಟ ನಟ ಎನ್ನುವುದನ್ನು ಸಾಬೀತು ಮಾಡಿದ್ದಾರೆ. ಕೃಷಿ ಕಾಯ್ದೆಗಳನ್ನು ವಿರೋಧಿಸಿ ದೆಹಲಿಯಲ್ಲಿ ನಡೆಯುತ್ತಿರುವ ರೈತರ ಪ್ರತಿಭಟನೆಗೆ ಸ್ಯಾಂಡಲ್‌ ವುಡ್‌ ಕಡೆಯಿಂದ ಮೊದಲಿಗರಾಗಿ ನಟ ಶಿವರಾಜ್‌ ಕುಮಾರ್‌ ಬೆಂಬಲ ಸೂಚಿಸಿ ಮಾತನಾಡಿರುವುದು ವಿಶೇಷವಾಗಿದೆ.

ಸ್ಯಾಂಡಲ್‌ ವುಡ್‌ ಮಂದಿ ಕೂಡ ರೈತರ ಪ್ರತಿಭಟನೆಗೆ ಬೆಂಬಲ ನೀಡಬೇಕೆನ್ನುವ ಕೂಗು ಕೇಳಿಬಂದ ಬೆನ್ನಲೇ ಶಿವರಾಜ್‌ ಕುಮಾರ್‌, ದೆಹಲಿ ರೈತರ ಪ್ರತಿಭಟನೆಗೆ ಬೆಂಬಲ ಸೂಚಿಸಿರುವುದು ಭಾರೀ ಮೆಚ್ಚುಗೆಗೆ ವ್ಯಕ್ತವಾಗಿದೆ. ಸೋಷಲ್‌ ಮೀಡಿಯಾದಲ್ಲಿ ಅವರ ಆಭಿಮಾನಿಗಳು ಮಾತ್ರವಲ್ಲ, ಜನಪರ ಚಿಂತಕರು, ಹೋರಾಟಗಾರರು ಕೂಡ ಶಿವಣ್ಣ ಅವರ ಹೇಳಿಕೆಯನ್ನು ಶೇರ್‌ ಮಾಡಿ, ಈ ನಿಲುವು ಶಿವಣ್ಣ ಅಲ್ಲದೆ ಇನ್ನಾರು ತೆಗೆದುಕೊಳ್ಳಲು ಸಾಧ್ಯ ಎಂದು ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ. ಹಾಗಾದ್ರೆ , ಇಷ್ಟಕ್ಕೂ ಶಿವಣ್ಣ ಹೇಳಿದ್ದೇನು…? ಅಧಿಕಾರ ನನ್‌ ಕೈಲ್ಲಿದಿದ್ದರೆ ಎಲ್ಲವನ್ನೂ ಬರೆದು ಕೊಡುತ್ತಿದ್ದೆ ಅಂತ ಶಿವಣ್ಣ ಯಾಕೆ ಹೇಳಿದ್ರು?

ಬೆಂಗಳೂರಿನಲ್ಲಿ ಬುಧವಾರ ಮಾಧ್ಯಮದವರ ಜತೆಗೆ ಮಾತನಾಡಿದ ಶಿವಣ್ಣ, ಯಾರೂ ಹೋರಾಟದ ಬಗ್ಗೆ ಕಾಮೆಂಟ್ ಮಾಡ್ತಿಲ್ಲ ಅಂತಾರೆ. ಆದ್ರೆ ಅದು ನಮ್ಮಿಂದ, ಇಂಡಸ್ಟ್ರಿಯಿಂದ ಅಥವಾ ಇಡೀ ಭಾರತೀಯ ಸಿನಿಮಾರಂಗ ಬೀದಿ ಇಳಿಯೋದ್ರಿಂದ ಏನೂ ಸಾಧ್ಯವಾಗಲ್ಲ. ಹಾಗೇ ಆಗೋದಾದ್ರೆ ನಾವು ಬೀದಿಗಿಳಿಯಲು ಸಾಧ್ಯ. ಅದು ಸರ್ಕಾರದಿಂದ ಮಾಡೋಕಷ್ಟೇ ಸಾಧ್ಯ. ರೈತರು ಬೀದಿಯಲ್ಲಿ ಕೂತು ಊಟ ಮಾಡ್ತಿರೋದು ನೋಡಿದ್ರೆ ಹೊಟ್ಟೆ ಉರಿಯುತ್ತೆ. ನಮ್ಮ ಸಮಸ್ಯೆಗಳನ್ನೇ ನಾವು ಪರಿಹಾರ ಪಡಿಸಿಕೊಳ್ಳೋಕೆ ಆಗ್ತಿಲ್ಲ. ನಮ್ಮ ಕೈಯಲ್ಲಿ ಏನೂ ಇಲ್ಲ. ನಮ್ಮ ಸಪೋರ್ಟ್ ಖಂಡಿತಾ ಇದ್ದೇ ಇರುತ್ತೆ. ಆದ್ರೆ ಈ ವಿಚಾರವನ್ನು ಸರ್ಕಾರ ಗಂಭೀರವಾಗಿ ಪರಿಗಣಿಸಬೇಕಿದೆ. ನನ್ ಕೈಯಲ್ಲಿ ಅಧಿಕಾರ ಇದ್ದಿದ್ರೆ ಎಲ್ಲವನ್ನೂ ಬರೆದುಕೊಡ್ತಿದ್ದೆ. ಆದ್ರೆ ಅಧಿಕಾರಿ ನನ್ನ ಕೈಯಲ್ಲಿ ಇಲ್ವಲ್ಲಾ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.

ಮಾಧ್ಯಮದವರ ಪ್ರಶ್ನೆಗೆ ಶಿವರಾಜ್‌ ಕುಮಾರ್‌ ಉತ್ತರವಷ್ಟೇ ಇದಾಗಿರುಬಹುದು, ಆದರೆ ದೆಹಲಿ ರೈತರ ಪ್ರತಿಭಟನೆಯ ಬಿಸಿ ಇವತ್ತು ಇಡೀ ಭಾರತೀಯ ಚಿತ್ರ ರಂಗಕ್ಕೂ ತಟ್ಟಿದೆ. ಬಾಲಿವುಡ್‌ ನಲ್ಲೂ ಇದು ಮೊನ್ನೆಯಷ್ಟೇ ಭಾರೀ ಸದ್ದು ಮಾಡಿದ್ದು ಕೂಡ ನಿಮಗೆಲ್ಲ ಗೊತ್ತೇ ಇದೆ. ಅಲ್ಲಿ ಅಭಿಮಾನಿಗಳಿಂದಲೇ ಕಲಾವಿದರಿಗೆ ಒತ್ತಡ ಹೆಚ್ಚಾಗುತ್ತಿದೆ. ಕಲಾವಿದರು ತಮ್ಮ ನಿಲುವು ಸ್ಪಷ್ಟ ಪಡಿಸಬೇಕೆಂದು ಜನರೇ ಒತ್ತಾಯಿಸುತ್ತಿದ್ದಾರೆ. ಸದ್ಯಕ್ಕೆ ಸ್ಯಾಂಡಲ್‌ ವುಡ್‌ ನಲ್ಲಿ ಅಂತಹ ತೀವ್ರ ತರಹದ ಒತ್ತಡ ಬಂದಿಲ್ಲವಾದರೂ, ಈಗ ಸೋಷಲ್‌ ಮೀಡಿಯಾದಲ್ಲಿ ಜನ ಮಾತನಾಡಿಕೊಳ್ಳುತ್ತಿರುವುದು ಹೌದು. ಇಂತಹ ಸಂದರ್ಭದಲ್ಲಿ ಶಿವರಾಜ್‌ ಕುಮಾರ್‌ ರೈತರ ಪ್ರತಿಭಟನೆಗೆ ಬೆಂಬಲಿಸಿ ಮಾತನಾಡಿರುವುದು ಇತರೆ ಕಲಾವಿದರ ಪಾಲಿಗೂ ಒತ್ತಡವೇ ಸೃಷ್ಟಿಸಿದೆ. ಯಾರು ರೈತ ಪರ ಎನ್ನುವುದು ಈಗ ಗೊತ್ತಾಗಬೇಕಿದೆ.

ಪಟ್ಟಿಯಲ್ಲಿ ಹರಿದಾಡುತ್ತಿದೆ ಮಾತಿನಮಲ್ಲಿ ಹೆಸರು

“ಕಾಮಿಡಿ ಕಿಲಾಡಿಗಳು” ಖ್ಯಾತಿಯ ನಯನಾ ಬಿಗ್‌ಬಾಸ್‌ ಮನೆಗೆ ಕಾಲಿಡಲಿದ್ದಾರಾ?
ಹೀಗೊಂದು ಸುದ್ದಿ ಜೋರಾಗಿಯೇ ಹರಿದಾಡುತ್ತಿದೆ. ಹೌದು, ಸದ್ಯಕ್ಕೆ ಬಿಗ್‌ಬಾಸ್‌ ಸೀಸನ್‌-೮ ತಯಾರಿ ಜೋರಾಗಿಯೇ ಇದೆ. ಈಗಾಗಲೇ ಯಾರೆಲ್ಲಾ ಬಿಗ್‌ಬಾಸ್‌ ಮನೆಗೆ ಎಂಟ್ರಿಕೊಡುತ್ತಾರೆ ಎಂಬ ಕೆಲವರ ಲಿಸ್ಟ್‌ ಕೂಡ ಹರಿದಾಡುತ್ತಿದೆ. ಆ ಲಿಸ್ಟ್‌ನಲ್ಲಿ “ಕಾಮಿಡಿ ಕಿಲಾಡಿ” ಖ್ಯಾತಿಯ ನಯನಾ ಅವರ ಹೆಸರು ಕೂಡ ಕೇಳಿಬರುತ್ತಿದೆ. ನಿಜವಾಗಿಯೂ ನಯನಾ ಹೆಸರು ಇದೆಯಾ? ಅವಕಾಶ ಸಿಕ್ಕರೆ ನಯನಾ ಬಿಗ್‌ಬಾಸ್‌ ಮನೆಗೆ ಹೋಗ್ತಾರಾ? ಇದು ಸದ್ಯಕ್ಕೆ ಗಿರಕಿ ಹೊಡೆಯುತ್ತಿರುವ ಪ್ರಶ್ನೆ.

ನಯನಾ ಹೆಸರು ಯಾಕೆ ಹರಿದಾಡುತ್ತಿದೆ ಎಂಬುದಕ್ಕೆ ಹಲವು ಕಾರಣಗಳಿವೆ. ನಯನಾ ಒಳ್ಳೆಯ ಮಾತುಗಾತಿ, ರಂಗಭೂಮಿ ಪ್ರತಿಭೆ, ಆಗಾಗ ಸೋಶಿಯಲ್‌ ಮೀಡಿಯಾದಲ್ಲಿ ಏನಾದರೊಂದು ಸ್ಟೇಟಸ್‌ ಹಾಕುವ ಮೂಲಕ ಸುದ್ದಿಯಾಗುತ್ತಲೇ ಇರುತ್ತಾರೆ. ಈ ಹಿಂದೆ ನಯನಾ ಸೋಶಿಯಲ್‌ ಮೀಡಿಯಾದಲ್ಲಿ ಇಂಗ್ಲೀಷ್‌ನಲ್ಲಿ ಒಂದು ಸ್ಟೇಟಸ್‌ ಹಾಕಿಕೊಂಡಿದ್ದರು. ಕನ್ನಡಿಗರ ಕಣ್ಣಿಗೆ ಅದು ಬಿದ್ದ ಕೂಡಲೇ ಸಾಕಷ್ಟು ಚರ್ಚೆ ಆಯ್ತು. ಕನ್ನಡಿಗರು ಬಾಯಿಗೆ ಬಂದಂತೆ ಮಾತಾಡಿದ್ದರು. ನಂತರ ನಯನಾ ಕೂಡ ಅವರಿಗೆ ತಮ್ಮ ಮಾತಲ್ಲೇ ಉತ್ತರ ಕೊಟ್ಟಿದ್ದರು. ಆ ನಯನಾ ಈಗ ಬಿಗ್‌ಬಾಸ್‌ ಮನೆಗೆ ಹೋಗ್ತಾರೆ ಎಂಬ ಸುದ್ದಿಯಂತೂ ಇದೆ. ಅದು ಎಷ್ಟರ ಮಟ್ಟಿಗೆ ನಿಜ ಅನನೋದಕ್ಕೆ ಬಿಗ್‌ಬಾಸ್‌ ಸೀಸನ್‌ -೮ ಶುರುವಾಗುವವರೆಗೆ ಕಾಯಲೇಬೇಕು. ಅಂದಹಾಗೆ, ಸುದೀ[ಪ್‌ ಅವರು ಈ ಕಾರ್ಯಕ್ರಮ ನಡೆಸಿಕೊಡಲು ಸಜ್ಜಾಗಿದ್ದಾರೆ.

ಮನೆ ಮುಂದೆ ಆಡುವಾಗ ನಡೆದ ಘಟನೆ

ಸಾಮಾನ್ಯವಾಗಿ ಸಿನಿಮಾಗಳಲ್ಲಿ ಹೀರೋಗಳು, ಕೈಗೆ, ಕಾಲಿಗೆ ಬ್ಯಾಂಡೇಜ್‌ ಕಟ್ಟಿಕೊಂಡಾಗ, ಅದೊಂದು ಸೀನ್‌ಗೆ ಅಗತ್ಯ ಅನಿಸುವುದು ಸಹಜ. ಆದರೆ, ಚಿತ್ರೀಕರಣ ಹೊರತಾಗಿಯೂ ಬ್ಯಾಂಡೇಜ್‌ ಇದ್ದರೆ? ಅದು ಎಲ್ಲರಿಗೂ ಒಂದೊಂದು ಪ್ರಶ್ನೆ ಮತ್ತು ಗಾಬರಿ. ಅಂಥದ್ದೊಂದು ಪ್ರಶ್ನೆ, ಗಾಬರಿ ಶಿವರಾಜಕುಮಾರ್‌ ಅವರ ತೋರು ಬೆರಳಿಗೆ ಆಗಿರುವ ಗಾಯ ಕಾರಣವಾಗಿದೆ. ಹೌದು, ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್ ಅವರ ಕೈ ಗಾಯವಾಗಿದೆ. ಅದಕ್ಕೆ ಕಾರಣ, ಕಳೆದ ಎರಡು ದಿನಗಳ ಹಿಂದೆ ಅವರು ತಮ್ಮ ಮನೆಯಲ್ಲಿ ಕ್ರಿಕೆಟ್ ಆಡುತ್ತಿರಬೇಕಾದರೆ, ಆಕಸ್ಮಿಕವಾಗಿ ತಮ್ಮ ತೋರು ಬೆರಳಿಗೆ ಗಾಯ ಮಾಡಿಕೊಂಡಿದ್ದಾರೆ. ಸದ್ಯಕ್ಕೆ ಅವರು ಬ್ಯಾಂಡೇಜ್‌ ಮಾಡಿಸಿದ್ದಾರೆ.

ಶಿವರಾಜ್‌ಕುಮಾರ್‌ ಅವರಿಗೆ ಕ್ರಿಕೆಟ್‌ ಅಂದರೆ ಎಲ್ಲಿಲ್ಲದ ಪ್ರೀತಿ. ಸಮಯ ಸಿಕ್ಕರೆ,  ಹುಡುಗರಂತೆ ಅವರು ಬ್ಯಾಟ್‌ ಹಿಡಿದು ಫೀಲ್ಡ್‌ಗೆ ನಿಂತು ಬಿಡುತ್ತಾರೆ. ಒಂದಷ್ಟು ಹುಡುಗರನ್ನು ಕಟ್ಟಿಕೊಂಡು ಬ್ಯಾಟಿಂಗ್‌ ಮಾಡಲು ಹೊರಡುವ ಶಿವಣ್ಣ, ಮೊನ್ನೆ ಹಾಗೆ ಮಾಡಲು ಹೋಗಿ ಸದ್ಯ ತೋರು ಬೆರಳಿಗೆ ಪೆಟ್ಟು ಮಾಡಿಕೊಂಡಿದ್ದಾರೆ. ಸದ್ಯಕ್ಕೆ ಈ ಫೋಟೋ ಎಲ್ಲೆಡೆ ವೈರಲ್‌ ಆಗುತ್ತಿರುವುದಂತೂ ನಿಜ.

ಟ್ವಿಟರ್ ನಿಲುವಿಗೆ ನಟಿ ನಿಖಿತಾ ಗೋಖಲೆ ಕಿಡಿಕಿಡಿ

• ಶಶಿಧರ ಚಿತ್ರದುರ್ಗ

ಖ್ಯಾತ ಮರಾಠಿ ನಟಿ ನಿಖಿತಾ ಗೋಖಲೆ ಟ್ವಿಟರ್‌ ಮೇಲೆ ಮುನಿಸಿಕೊಂಡು ಕಿಡಿಕಾರುತ್ತಿದ್ದಾರೆ. ಮೊನ್ನೆ ಅವರು ತಮ್ಮ ಫೋಟೋಗಳನ್ನು ಅವರು ಟ್ವಿಟರ್‌ ಅಕೌಂಟ್‌ನಲ್ಲಿ ಅಪ್‌ಲೋಡ್ ಮಾಡಿದ್ದರು. ಇವು ‘ಕಲಾತ್ಮಕ ಫೋಟೋಗಳು’ ಎನ್ನುವುದು ಅವರ ವಿವರಣೆ. ಆದರೆ ಇವು ಆಕ್ಷೇಪಾರ್ಹ ಫೊಟೋಗಳು ಎಂದು ನಟಿಯ ಸೋಷಿಯಲ್ ಮೀಡಿಯಾ ಅಕೌಂಟ್ ಡಿಲೀಟ್ ಮಾಡಿದೆ ಟ್ವಿಟರ್‌.

ಟ್ವಿಟರ್ ನಿಲುವಿನಿಂದ ನಟಿ ನಿಖಿತಾ ಮುನಿಸಿಕೊಂಡಿದ್ದಾರೆ. ಇದರಿಂದ ತಮ್ಮ ಅಭಿಮಾನಿಗಳಿಗೆ ನಿರಾಸೆಯಾಗಿದೆ ಎನ್ನುವುದು ಇದಕ್ಕೆ ಕಾರಣ. “ಶಾಕಿಂಗ್ ನ್ಯೂಸ್‌! ನಾನು ಎಂಟು ವರ್ಷದಿಂದ ನಿಭಾಯಿಸುತ್ತಿದ್ದ ಸೋಷಿಯಲ್ ಮೀಡಿಯಾ ಅಕೌಂಟ್ ಡಿಲೀಟ್ ಆಗಿದೆ. ನಾನು ಬೆತ್ತಲೆ ಫೋಟೋ ಹಾಕಿದ್ದೇನೆ ಎನ್ನುವ ವಿವರಣೆಯನ್ನು ಅವರು ಕೊಡುತ್ತಿದ್ದಾರೆ.  ಊಟ-ತಿಂಡಿಯ ಫೋಟೋ, ಕೆಲಸಕ್ಕೆ ಬಾರದ ಫೋಟೋಗಳೆಲ್ಲವನ್ನೂ ಹಾಕಬಹುದು. ಆದರೆ ಕಲಾತ್ಮಕತೆಯ ನನ್ನ ಫೋಟೋಗಳನ್ನು ಮಾತ್ರ ಹಾಕಬಾರದಂತೆ! ಇದೆಂಥ ನಿಯಮ” ಎಂದು ತಮ್ಮ ಕೋಪ ಹೊರ ಹಾಕಿದ್ದಾರೆ ಅವರು.

ಟ್ವಿಟರ್‌ ಖಾತೆ ಡಿಲೀಟ್‌ ಮಾಡಿದ್ದರಿಂದ ನಿರಾಸೆ ಹೊಂದಬೇಕಿಲ್ಲ ಎಂದು ನಿಖಿತಾ ಅಭಿಮಾನಿಗಳಿಗೆ ಅಭಯ ನೀಡಿದ್ದಾರೆ. “ನಾನು ಕೂಡ ಇನ್ನು ಮುಂದೆ ಸೋಷಿಯಲ್ ಮೀಡಿಯಾದಲ್ಲಿ ಊಟ-ತಿಂಡಿಯ ಫೊಟೋಗಳನ್ನು ಹಾಕುತ್ತೇನೆ. ನನ್ನ ಕಲಾತ್ಮಕ ಫೋಟೋಗಳನ್ನು ನನ್ನ ವೆಬ್‌ಸೈಟ್‌ನಲ್ಲಿ ಹಾಕಿಕೊಳ್ಳುತ್ತೇನೆ” ಎಂದಿದ್ದಾರೆ.

ಚಿಂತಕ, ಪತ್ರಕರ್ತ ದಿನೇಶ್ ಅಮೀನ್ ಮಟ್ಟು ಪ್ರಶ್ನೆ

ದೆಹಲಿ ಹೋರಾಟದ ಬಿಸಿ ಈಗ ಕನ್ನಡ ಚಿತ್ರರಂಗಕ್ಕೂ ತಟ್ಟಿದೆ. ಬಾಲಿವುಡ್‌ ನಲ್ಲಿ ಹೊತ್ತಿಕೊಂಡ ಬೆಂಕಿ, ಸಣ್ಣಗೆ ಈಗ ಸ್ಯಾಂಡಲ್‌ ವುಡ್‌ನಲ್ಲೂ ಕಾಣಿಸಿಕೊಂಡಿದೆ. ರೈತರ ಪರವಾಗಿ ಕಲಾವಿದರು ಯಾಕೆ ಮಾತನಾಡುತ್ತಿಲ್ಲ ಎನ್ನುವ
ಜನ ಸಾಮಾನ್ಯರಲ್ಲಿ ಕಾಡುತ್ತಿರುವ ಬೆನ್ನಲೇ ಪತ್ರಕರ್ತ ಹಾಗೂ ಚಿಂತಕ ದಿನೇಶ್‌ ಅಮೀನ್‌ ಮಟ್ಟು ನೇರವಾಗಿಯೇ ಸ್ಟಾರ್‌ ಗಳ ಮೌನವನ್ನು ಕೆಣಕಿದ್ದಾರೆ. ಹಾಗಂತ ಅವರ ದೂರು ಸ್ಟಾರ್‌ ಗಳ ಮೇಲೆ ಅಲ್ಲ. ಸ್ಟಾರ್‌ ಗಳನ್ನು ಮೆರೆಸುವ ಜನರ ಪರವಾಗಿ ಕನ್ನಡ ಸಂಘಟನೆಗಳು ಏನು ಮಾಡಬಹುದು ಎನ್ನುವುದಕ್ಕೆ ಒಂದಷ್ಟು ಸಲಹೆ ಕೊಟ್ಟಿದ್ದಾರೆ. ಆ ಮೂಲಕ ಮೌನಿಗಳಾದ ಸ್ಟಾರ್‌ ಗಳಿಗೆ ಬಿಸಿ ಮುಟ್ಟಿಸಿದ್ದಾರೆ.

“ ನಿಮ್ಮ ಚಿತ್ರಗಳನ್ನು ನೋಡಬೇಕಾದರೆ ಮೊದಲು ನೀವು ರೈತರ ಹೋರಾಟದ ಪರವಾಗಿ ಮಾತನಾಡಿ” ಎಂದು ಕನ್ನಡ ಚಿತ್ರನಟ-ನಟಿಯರ ಮೇಲೆ ಜನ ಒತ್ತಡ ಹಾಕಬಾರದೇಕೆ? ರೈತರ ಪರವಾಗಿ ಮಾತನಾಡದ ನಟ-ನಟಿಯರ ಚಿತ್ರಗಳನ್ನು ವೀಕ್ಷಿಸುವುದಿಲ್ಲ ಎಂದು ರೈತರು ಮತ್ತು ಅವರ ಪರವಾಗಿರುವವರು ಗಟ್ಟಿದನಿಯಲ್ಲಿ ಹೇಳುವ ಅಭಿಯಾನ ಯಾಕೆ ನಡೆಸಬಾರದು? ಕೇವಲ ಕಂಗನಾ, ಅಕ್ಷಯಕುಮಾರ್ ಗಳನ್ನು ಗೇಲಿಮಾಡುತ್ತಾ ಕೂತರೆ ಸಾಕೇ? ನಮ್ಮ ಕನ್ನಡ ಸಂಘಟನೆಗಳು ಇದರ ಬಗ್ಗೆಯೂ ಒಂದು ಟ್ವಿಟರ್ ಅಭಿಯಾನ ನಡೆಸಲಿ ಎಂದು ತಮ್ಮ ಪೇಸ್‌ ಬುಕ್‌ ಖಾತೆಯಲ್ಲಿ ಬರೆದುಕೊಂಡಿದ್ದಾರೆ.

ಪತ್ರಕರ್ತ ದಿನೇಶ್‌ ಅಮೀನ್‌ ಮಟ್ಟು ತಮ್ಮ ಪೇಸ್‌ ಬುಕ್‌ ಖಾತೆಯಲ್ಲಿ ಬರೆದುಕೊಂಡಿದ್ದಿಷ್ಟು…

ಕೊರೊನಾ ಪರಿಣಾಮದ ಪ್ರೇಕ್ಷಕರ ಬರಗಾಲದ ನಂತರ ಇದ್ದಕ್ಕಿದ್ದಂತೆ ಸಾಲುಸಾಲು ಕನ್ನಡ ಚಿತ್ರಗಳು ಬಿಡುಗಡೆಯಾಗುತ್ತಿವೆ, ಚಿತ್ರಮಂದಿರಗಳನ್ನು ತುಂಬುವ ಅಭಿಯಾನ ಬಿರುಸು ಪಡೆದಿದೆ. ಟಿವಿ ಚಾನೆಲ್ ಗಳಂತೂ ಚಿತ್ರಮಂದಿರಗಳು ತುಂಬಿ ತುಳುಕಾಡುತ್ತಿವೆ ಎಂಬಂತೆ ಪೇಯ್ಡ್ ಕ್ಯಾಂಪೇನ್ ನಡೆಸುತ್ತಿವೆ. ಚಿತ್ರನಟ-ನಟಿಯರು, ನಿರ್ದೇಶಕರು, ನಿರ್ಮಾಪಕರು ಚಾನೆಲ್ ಗಳ ತೆರೆಯ ಮೇಲೆ ಕಾಣಿಸಿಕೊಂಡು ಪ್ರೇಕ್ಷಕಪ್ರಭುವಿಗೆ ಕೈಮುಗಿದು,ಕಾಲಿಗೆರಗಿ ಕರೆಯುತ್ತಿದ್ದಾರೆ.

ನಿಜ, ಕೊರೊನಾದಿಂದಾಗಿ ಚಿತ್ರರಂಗ ಕಷ್ಟದಲ್ಲಿದೆ ಪ್ರೇಕ್ಷಕರೂ ಚಿತ್ರನೋಡಿ ಸಹಕರಿಸಬೇಕು. ಆದರೆ ನಮ್ಮ ಅನ್ನದಾತರೂ ಕಷ್ಟದಲ್ಲಿದ್ದಾರಲ್ಲಾ, ಅನ್ನತಿನ್ನುವ ಈ ನಟ-ನಟಿಯರೂ ಅವರಿಗೂ ನೆರವಾಗಬೇಕಲ್ಲ? ಇಲ್ಲಿಯ ವರೆಗೆ ಎಷ್ಟು ಮಂದಿ ನಟ-ನಟಿಯರು,ನಿರ್ದೇಶಕ ನಿರ್ಮಾಪಕರು ರೈತರ ಪರವಾಗಿ ದನಿ ಎತ್ತಿದ್ದಾರೆ? ಹ್ಯಾಟ್ರಿಕ್, ಕಿಚ್ಚು, ಡಿಚ್ಚು,ಪವರ್, ಗೋಲ್ಡ್,ಸಿಲ್ವರ್ ಗಳಲ್ಲಿ ಯಾರಾದರೂ ಬಾಯಿ ಬಿಟ್ಟಿದ್ದಾರಾ? ಕನ್ನಡ ಸಿನೆಮಾಗಳ ಬಹುಪಾಲು ಪ್ರೇಕ್ಷಕರು ಹಳ್ಳಿಗಳಲ್ಲಿದ್ದಾರೆ, ನಗರ-ಪಟ್ಟಣಗಳಲ್ಲಿಯೂ ಕನ್ನಡ ಚಿತ್ರಗಳನ್ನು ಹೆಚ್ಚು ನೋಡುವವರು ಗ್ರಾಮೀಣ ಪ್ರದೇಶದಿಂದ ಬಂದವರು. ನೆಟ್ ಫ್ಲಿಕ್ಸ್, ಅಮೆಜಾನ್ ಪ್ರೇಕ್ಷಕರಾಗಿ ಪರಿವರ್ತನೆಗೊಂಡಿರುವ ನಗರ-ಪಟ್ಟಣಗಳಲ್ಲಿ ಹುಟ್ಟಿಬೆಳೆದವರು, ಯುವಜನರು ಚಿತ್ರಮಂದಿರದ ಕಡೆ ತಲೆಹಾಕುವುದಿಲ್ಲ.

ಇತ್ತೀಚೆಗೆ ‘ಆ್ಯಕ್ಟ್ 1978’ ಚಿತ್ರದ ನಿರ್ದೇಶಕ ಮನಸೋರೆ ಮತ್ತು ಕತೆಗಾರ ಟಿ.ಕೆ.ದಯಾನಂದ್ ಹಾಗೂ ಬೆಲ್ ಬಾಟಮ್ ಚಿತ್ರದ ನಿರ್ದೇಶಕ ಜಯತೀರ್ಥ ಅವರು ರೈತರ ಹೋರಾಟವನ್ನು ಬೆಂಬಲಿಸಿದರು ಎನ್ನುವ ಕಾರಣಕ್ಕೆ ‘ಅರ್ಬನ್ ನಕ್ಸಲ್ ಸಿನೆಮಾ ಬಹಿಷ್ಕರಿಸಿ’ ಎಂದು ಭಕ್ತರು ಕ್ಯಾಂಪೇನ್ ಶುರುಮಾಡಿದ್ದರು. ಈ ಎರಡುರೂಪಾಯಿ ಗಿರಾಕಿಗಳ ಪೋಸ್ಟ್ ಗಳಿಗೆ ಯಾರೂ ಕವಡೆಕಾಸಿನ ಕಿಮ್ಮತ್ತು ಕೊಟ್ಟಿಲ್ಲ ಎನ್ನುವುದು ಬೇರೆ ಮಾತು. ಅದನ್ನೇ ತಿರುಗಿಸಿ ಕೊಡಲು ಅವಕಾಶ ಕೂಡಿ ಬಂದಿದೆ. “ ನಿಮ್ಮ ಚಿತ್ರಗಳನ್ನು ನೋಡಬೇಕಾದರೆ ಮೊದಲು ನೀವು ರೈತರ ಹೋರಾಟದ ಪರವಾಗಿ ಮಾತನಾಡಿ” ಎಂದು ಕನ್ನಡ ಚಿತ್ರನಟ-ನಟಿಯರ ಮೇಲೆ ಒತ್ತಡ ಹಾಕಬಾರದೇಕೆ? ರೈತರ ಪರವಾಗಿ ಮಾತನಾಡದ ನಟ-ನಟಿಯರ ಚಿತ್ರಗಳನ್ನು ವೀಕ್ಷಿಸುವುದಿಲ್ಲ ಎಂದು ರೈತರು ಮತ್ತು ಅವರ ಪರವಾಗಿರುವವರು ಗಟ್ಟಿದನಿಯಲ್ಲಿ ಹೇಳುವ ಅಭಿಯಾನ ಯಾಕೆ ನಡೆಸಬಾರದು? ಕೇವಲ ಕಂಗನಾ, ಅಕ್ಷಯಕುಮಾರ್ ಗಳನ್ನು ಗೇಲಿಮಾಡುತ್ತಾ ಕೂತರೆ ಸಾಕೇ? ಇದರ ಬಗ್ಗೆಯೂ ಒಂದು ಟ್ವಿಟರ್ ಅಭಿಯಾನ ನಡೆಸಲಿ.

ಭಾರತೀಯ ಸಿನಿಮಾಗಳಿಗೇಕೆ ಇಲ್ಲ ಮನ್ನಣೆ?  ಗಿರೀಶ್‌ ಕಾಸರವಳ್ಳಿ ವಿಶ್ಲೇಷಣೆ ಇಲ್ಲಿದೆ

• ಲೇಖನ- ಶಶಿಧರ ಚಿತ್ರದುರ್ಗ

ಲಿಜೋ ಜೋಸ್ ಪೆಲ್ಲಿಸ್ಸರಿ ನಿರ್ದೇಶನದ ‘ಜಲ್ಲಿಕಟ್ಟು’ ಮಲಯಾಳಂ ಸಿನಿಮಾ 93ನೇ ಆಸ್ಕರ್‌ ಪ್ರಶಸ್ತಿಗೆ ಭಾರತದಿಂದ ನಾಮ ನಿರ್ದೇಶನಗೊಂಡಿತ್ತು. ಅತ್ಯುತ್ತಮ ಅಂತಾರಾಷ್ಟ್ರೀಯ ಫ್ಯೂಚರ್ ಸಿನಿಮಾ ವಿಭಾಗಕ್ಕೆ ನಾಮ ನಿರ್ದೇಶನಗೊಂಡಿದ್ದ ಸಿನಿಮಾ ಅಂತಿಮ ಐದು ಸಿನಿಮಾಗಳ ಪಟ್ಟಿಗೆ ಸೇರ್ಪಡೆಯಾಗುವಲ್ಲಿ ವಿಫಲವಾಗಿದೆ. ಈ ಮೂಲಕ ಆಸ್ಕರ್ ಪ್ರಶಸ್ತಿ ಪಡೆಯುವ ಭಾರತೀಯರ ಕನಸು ಮತ್ತೊಮ್ಮೆ ಕಮರಿ ಹೋಗಿದೆ. ಹಾಗೆ ನೋಡಿದರೆ ‘ಜೆಲ್ಲಿಕಟ್ಟು’ ಚಿತ್ರದ ಬಗ್ಗೆ ಹಿರಿಯ ಸಿನಿಮಾ ತಂತ್ರಜ್ಞರು ಭಾರಿ ಭರವಸೆಯಿಟ್ಟಿದ್ದರು. ಈ ಚಿತ್ರದೊಂದಿಗೆ ಭಾರತಕ್ಕೆ ಆಸ್ಕರ್‌ ಗೌರವ ಸಿಗಲಿದೆ ಎಂದೇ ಹೇಳಲಾಗಿತ್ತು.

ಆದರೆ ನಿರೀಕ್ಷೆ ಹುಸಿಯಾಗಿದೆ. ಇಲ್ಲಿಯವರೆಗೆ ಆಸ್ಕರ್‌ ಅಂತಾರಾಷ್ಟ್ರೀಯ ಸಿನಿಮಾ ವಿಭಾಗದಲ್ಲಿ ಅಂತಿಮ ಐದರ ಪಟ್ಟಿಗೆ ಹೋಗಿರುವುದು ಮೂರು ಸಿನಿಮಾಗಳಷ್ಟೆ. “ಮದರ್ ಇಂಡಿಯಾ” (1958), “ಸಲಾಂ ಬಾಂಬೆ” (1989) ಮತ್ತು “ಲಗಾನ್‌” (2001) ಅಂತಿಮ ಐದು ಚಿತ್ರಗಳ ಪಟ್ಟಿಗೆ ಹೋದರೂ ಆಸ್ಕರ್ ಪ್ರಶಸ್ತಿ ಗಳಿಸುವಲ್ಲಿ ವಿಫಲವಾಗಿದ್ದವು. ಭಾರತೀಯ ಸಿನಿಮಾಗಳು ವಿವಿಧ ಅಂತಾರಾಷ್ಟ್ರೀಯ ಚಿತ್ರೋತ್ಸವಗಳಲ್ಲಿ ಮನ್ನಣೆ ಗಳಿಸುವುದಿದೆ. ಆದರೆ ಆಸ್ಕರ್ ಸಂದರ್ಭದಲ್ಲಿ ಇದಾಗದು. ಕನ್ನಡದ ಹೆಮ್ಮೆಯ ಹಿರಿಯ ಚಿತ್ರನಿರ್ದೇಶಕ ಗಿರೀಶ್‌ ಕಾಸರವಳ್ಳಿ ಅವರು ವಿಶ್ಲೇಷಿಸುವುದು ಹೀಗೆ –

“ಈ ವಿಚಾರವನ್ನು ನಾವು ವಿವಿಧ ಆಯಾಮಗಳಲ್ಲಿ ಗಮನಿಸಬೇಕಾಗುತ್ತದೆ. ಅಲ್ಲಿನ ಮಾನ ದಂಡಗಳೇ ಬೇರೆ ಇರುತ್ತವೆ. ಅಲ್ಲಿ ಕತೆ ಹೇಳುವ ಕ್ರಮವೇ ಬೇರೆ ಇರುತ್ತದೆ. ನಾವು ನಮ್ಮನೆಯಲ್ಲಿ ಮಾಡಿದ ಅಡುಗೆಯೇ ಶ್ರೇಷ್ಠ ಎಂದುಕೊಳ್ಳಲಾಗದು. ಜೊತೆಗೆ ನಾವು ಅಲ್ಲಿಗೆ ರೆಕಮೆಂಡ್ ಮಾಡುವ ಸಿನಿಮಾಗಳು ಕೂಡ ಸರಿ ಇಲ್ಲದಿರಬಹುದು. ಆದರೆ ಈ ಬಾರಿಯ “ಜೆಲ್ಲಿಕಟ್ಟು” ಸಿನಿಮಾ ಉತ್ತಮ ಆಯ್ಕೆಯೇ ಆಗಿತ್ತು. ಆದಾಗ್ಯೂ ಅಲ್ಲಿನ ಜ್ಯೂರಿಗಳು ಚಿತ್ರದಲ್ಲಿ ಹುಡುಕುವ ವಸ್ತು ಬೇರೆಯದ್ದೇ ಆಗಿರುತ್ತದೆ. ಚಿತ್ರದಲ್ಲಿ ಪೊಲಿಟಿಕಲ್ ಟೋನ್‌, ಏಸ್ತಟಿಕ್ ಸೆನ್ಸ್ ನೋಡುತ್ತಾರೆ. ಹೀಗೆ ಹಲವು ಕಾರಣಗಳಿರುತ್ತವೆ. ಮುಖ್ಯವಾಗಿ ಅಲ್ಲಿ ವೋಟಿಂಗ್ ಇರುತ್ತದೆ. ಸಾಕಷ್ಟು ಹಣ ಖರ್ಚು ಮಾಡಿ ಜ್ಯೂರಿಗಳಿಗೆ ಸಿನಿಮಾ ತೋರಿಸಿ, ಅವರನ್ನು ಮೆಚ್ಚಿಸಬೇಕಾಗುತ್ತದೆ.

ಮಿತ ವೆಚ್ಚದಲ್ಲಿ ಸಿನಿಮಾ ಮಾಡುವ ನಮಗೆ ಅದೆಲ್ಲವೂ ಕೈಗೆಟುಕದು. ಬಹುಶಃ ಆ ಪ್ರಕ್ರಿಯೆಯಲ್ಲೂ ಭಾರತೀಯ ಸಿನಿಮಾಗಳು ಹಿಂದೆ ಉಳಿಯುವಂತಾಗುತ್ತದೆ. ಮೊದಲೆಲ್ಲಾ ಆಸ್ಕರ್‌ಗೆ ಹಾಡು, ಕುಣಿತದ ಸಾಕಷ್ಟು ಭಾರತೀಯ ಸಿನಿಮಾಗಳನ್ನು ಆಸ್ಕರ್‌ಗೆ ನಾಮನಿರ್ದೇಶನ ಮಾಡಲಾಗಿದೆ. ಇಂತಹ ಚಿತ್ರಗಳನ್ನು ನೋಡಿರುವ ಜ್ಯೂರಿಗಳು ಭಾರತೀಯ ಸಿನಿಮಾಗಳ ಬಗ್ಗೆಯೇ ಒಂದು ಪೂರ್ವಾಗ್ರಹ ನಿರ್ಧಾರಕ್ಕೆ ಬರುವ ಸಾಧ್ಯತೆಗಳಿರುತ್ತವೆ.
ಬೆಂಗಾಲಿ ನಿರ್ದೇಶಕ ಸತ್ಯಜಿತ್ ರೇ ಸಿನಿಮಾಗಳು ಆಸ್ಕರ್ ಗೌರವ ಪಡೆಯುವ ಯೂನಿವರ್ಸಲ್ ವಸ್ತು ಇದ್ದಂಥವು. ರೇ ಅವರ ‘ಚಾರುಲತ’ ಸೇರಿದಂತೆ ಮತ್ತೊಂದೆರೆಡು ಚಿತ್ರಗಳು ಅಂತಹ ಗುಣ ಹೊಂದಿದ್ದವು. ಆದರೆ ಅವರ ಚಿತ್ರಗಳನ್ನು ನಾಮನಿರ್ದೇಶನ ಮಾಡುವಲ್ಲಿ ಹಿಂದೆ ಉಳಿದರು. ಕೊನೆಗೆ ಆಸ್ಕರ್ ಕಮಿಟಿಯವರೇ ಬಂದು ಸತ್ಯಜಿತ್ ರೇ ಅವರ ಕೊನೆಗಾಲದಲ್ಲಿ ಅವರಿಗೆ ಗೌರವ ಸಲ್ಲಸಿದರು. ಬರ್ಲಿನ್‌, ಫ್ರಾನ್ಸ್ ಸೇರಿದಂತೆ ಪ್ರತಿಷ್ಠಿತ ಚಿತ್ರೋತ್ಸವಗಳಲ್ಲಿ ಸಿನಿಮಾ ಆಯ್ಕೆಯ ಮಾನದಂಡಗಳೇ ಬೇರೆಯಾಗಿರುತ್ತವೆ. ಆಸ್ಕರ್ ಕೂಡ ಇದಕ್ಕೆ ಹೊರತಲ್ಲ” ಎಂಬುದು ಅವರ ಮಾತು.

ಬಾಡಿಬಿಲ್ಡರ್‌  ಪುರುಷೋತ್ತಮ

ಹಲವು ಸಿನಿಮಾಗಳಲ್ಲಿ ಸಣ್ಣಪುಟ್ಟ ಪಾತ್ರಗಳ ಮೂಲಕ ಗಮನಸೆಳೆದಿದ್ದ ಜಿಮ್‌ ರವಿ ಈಗ ಹೀರೋ. ಹೌದು, ಜಿಮ್‌ ರವಿ ಅವರಿಗೆ ಸಿನಿಮಾ ಹೊಸದಲ್ಲ. ಕನ್ನಡ ಚಿತ್ರರಂಗದಲ್ಲಿ ಸುಮಾರು ೧೩೦ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿರುವ ಜಿಮ್ ರವಿ, ಪೋಷಕ ಪಾತ್ರಗಳಲ್ಲೇ ಜನಮನ ಗೆದ್ದವರು.

ಇವರಿಗೆ ಜಿಮ್‌ ರವಿ ಅನ್ನೋ ಹೆಸರಿನ ಬಗ್ಗೆ ಹೇಳುವುದಾದರೆ, ಇವರು ಅಂತರಾಷ್ಟ್ರೀಯ ಬಾಡಿ ಬಿಲ್ಡರ್. ಹಲವು ದೇಶಗಳಲ್ಲಿ ಸ್ಪರ್ಧಿಸಿ, ಗೆಲುವು ಕಂಡವರು. ಸಾಕಷ್ಟು ಪ್ರಶಸ್ತಿಗಳಿಗೂ ಕಾರಣರಾದವರು. ಸಣ್ಣಪುಟ್ಟ ಪಾತ್ರಗಳ ಮೂಲಕವೇ ಗಮನ ಸೆಳೆದಿದ್ದ ಜಿಮ್‌ ರವಿ ಅವರಿಗೆ ಸಿನಿಮಾ ಮೇಲೆ ಅಪಾರ ಪ್ರೀತಿ ಇದೆ. ಈಗ ನಾಯಕನಾಗಿ ವೀಕ್ಷಕರ ಮುಂದೆ ಬರುತ್ತಿದ್ದಾರೆ ಅನ್ನೋದೇ ಈ ಹೊತ್ತಿನ ಸುದ್ದಿ.

ಹೌದು ಸ್ಯಾಂಡಲ್ವುಡ್ ನಲ್ಲಿ ಜಿಮ್ ರವಿ ಅವರೀಗ ಹೀರೋ ಅಷ್ಟೇ ಅಲ್ಲ, ನಿರ್ಮಾಪಕರಾಗಿಯೂ ಗುರುತಿಸಿಕೊಳ್ಳುತ್ತಿದ್ದಾರೆ. ಅಂದಹಾಗೆ, ಆ ಚಿತ್ರಕ್ಕೆ “ಪುರುಷೋತ್ತಮ” ಎಂದು ನಾಮಕರಣ ಮಾಡಲಾಗಿದೆ. ರವೀಸ್ ಜಿಮ್ ಪ್ರೊಡಕ್ಷನ್ಸ್‌ ಬ್ಯಾನರ್‌ನಲ್ಲಿ ಈ ಚಿತ್ರ ನಿರ್ಮಾಣವಾಗಿದೆ. ಚಿತ್ರಕ್ಕೆ ಜಿಮ್ ರವಿ ಅವರೇ ನಾಯಕ ಅನ್ನೋದು ಸುದ್ದಿ. ಅಂದಹಾಗೆ, ಫೆ.೧೪ ರಂದು ಮುಹೂರ್ತ ನಡೆಯಲಿದೆ. ಈ ಚಿತ್ರವನ್ನು ಅಮರ್ನಾಥ್ ಎಸ್.ವಿ ನಿರ್ದೇಶಿಸುತ್ತಿದ್ದಾರೆ.

ಕನಸು ನನಸಾದ ಖುಷಿಯಲ್ಲಿ ಕೃತಿ 

ಬಹುಕೋಟಿ ವೆಚ್ಚದ ಬಾಲಿವುಡ್‌ ಸಿನಿಮಾ ‘ಗಣಪತ್‌’ ಇಂದು ತಮ್ಮ ಸಿನಿಮಾದ ನಾಯಕಿ ಕೃತಿ ಸನೂನ್‌ ಎಂದು ಘೋಷಿಸಿದೆ. ನಟ ಜಾಕಿ ಶ್ರಾಫ್ ಪುತ್ರ ಟೈಗರ್ ಶ್ರಾಫ್‌ ಚೊಚ್ಚಲ ನಿರ್ದೇಶನದ ‘ಹೀರೋಪಂಥ್‌’ನಲ್ಲಿ ಕೃತಿ ನಾಯಕಿಯಾಗಿದ್ದರು. ಇದೀಗ ಮತೊಮ್ಮೆ ‘ಗಣಪತ್‌’ನಲ್ಲಿ ಜೋಡಿಯಾಗಿ ನಟಿಸಲಿದ್ದು, ಭರ್ಜರಿ ಫೋಟೋಶೂಟ್ ಫೋಟೋದೊಂದಿಗೆ ಚಿತ್ರತಂಡ ಅವರನ್ನು ಪರಿಚಯಿಸಿದೆ.

ದೊಡ್ಡ ಸಿನಿಮಾದ ಅವಕಾಶಕ್ಕೆ ಸಂಭ್ರಮಿಸುತ್ತಿರುವ ಕೃತಿ, “ಏಳು ವರ್ಷಗಳ ನಂತರ ಮತ್ತೆ ಟೈಗರ್ ಶ್ರಾಫ್‌ಗೆ ಜೋಡಿಯಾಗುತ್ತಿದ್ದೇನೆ. ಔಟ್‌ ಅಂಡ್ ಔಟ್‌ ಆಕ್ಷನ್ ಚಿತ್ರದಲ್ಲಿ ನಟಿಸಬೇಕೆನ್ನುವ ನನ್ನ ಕನಸು ‘ಗಣಪತ್‌’ ಪ್ರಾಜೆಕ್ಟ್‌ನೊಂದಿಗೆ ಕೈಗೂಡುತ್ತಿದೆ. ನಿಸ್ಸಂಶಯವಾಗಿ ಈ ಯೋಜನೆ ನನ್ನ ವೃತ್ತಿಬದುಕಿನ ದೊಡ್ಡ ಸಿನಿಮಾ ಆಗಲಿದೆ” ಎಂದಿದ್ದಾರೆ.

ನಟ ಟೈಗರ್ ಶ್ರಾಫ್‌ ಕೂಡ ನಾಯಕಿಯ ಇಂಟ್ರಡಕ್ಷನ್ ವೀಡಿಯೋ ಹಾಕಿ ಕೃತಿಯನ್ನು ಆಹ್ವಾನಿಸಿದ್ದಾರೆ. ನಿರ್ದೇಶಕ ವಿಕಾಸ್ ಬೆಹ್ಲ್‌, “ಕೃತಿ ಒಳ್ಳೆಯ ಸ್ಕ್ರೀನ್ ಪ್ರಸೆನ್ಸ್‌ ಹೊಂದಿದ್ದು, ಅವರು ಅತ್ಯುತ್ತಮ ಆಕ್ಷನ್ ಹೀರೋಯಿನ್ ಆಗುವ ಎಲ್ಲಾ ಲಕ್ಷಣ ಹೊಂದಿದ್ದಾರೆ. ಈ ಜೋಡಿ ತೆರೆ ಮೇಲೆ ಮೋಡಿ ಮಾಡಲಿದೆ” ಎಂದಿದ್ದಾರೆ. ವಸು ಬಗ್ನಾನಿ, ಜಾಕಿ ಬಗ್ನಾನಿ, ದೀಪ್ಶಿಕಾ ದೇಶ್‌ಮುಖ್‌, ವಿಕಾಸ್ ಬೆಹ್ಲ್ ನಿರ್ಮಾಣದ ಸಿನಿಮಾ ಸದ್ಯದಲ್ಲೇ ಸೆಟ್ಟೇರಲಿದ್ದು, 2022ಕ್ಕೆ ಸಿನಿಮಾ ತೆರೆಗೆ ಬರಲಿದೆ.

ಹಾಲಿವುಡ್‌ ತಾರೆಯರಿಗೆ ತಮ್ಮನ್ನು ಹೋಲಿಸಿ ಟ್ವೀಟ್ ಮಾಡಿದ  ಕ್ವೀನ್‌!

ವಿವಾದಿತ ಹೇಳಿಕೆ, ಟ್ವೀಟ್‌ಗಳ ಮೂಲಕ ಸುದ್ದಿಯಾಗುವ ಕಂಗನಾ ಮತ್ತೊಂದು ಇಂಥದ್ದೇ ಟ್ವೀಟ್‌ನೊಂದಿಗೆ ಹಾಜರಾಗಿದ್ದಾರೆ. “ಸದ್ಯ ನನ್ನಂತೆ ವಿಭಿನ್ನ ಪಾತ್ರಗಳಿಗೆ ನ್ಯಾಯ ಸಲ್ಲಿಸುವಂಥ ಮತ್ತೊಬ್ಬ ನಟಿ ಈ ಭೂಮಿ ಮೇಲಿಲ್ಲ. ಹಾಲಿವುಡ್‌ ನಟಿ ಮೆರಿಲ್ ಸ್ಟ್ರೀಪ್‌ ಅವರಂತೆ ನಾನು ‘ಕಚ್ಛಾ ಪ್ರತಿಭೆ’. ಅಲ್ಲದೆ ನಟಿ ಗಾಲ್‌ ಗ್ಯಾಡೋಟ್‌ ಅವರಂತೆ ಆಕ್ಷನ್‌ ಮತ್ತು ಗ್ಲಾಮರ್ ಪಾತ್ರಗಳಿಗೂ ನಾನು ಸೈ” ಎಂದು ಕಂಗನಾ ಟ್ವೀಟ್ ಮಾಡಿದ್ದಾರೆ.

ಕಂಗನಾ ಪ್ರಸ್ತುತ ವಿಭಿನ್ನ ಪಾತ್ರಗಳ ಸಿನಿಮಾಗಳಲ್ಲಿ ತೊಡಗಿಸಿಕೊಂಡಿದ್ದಾರೆ. ಆಕ್ಷನ್‌-ಥ್ರಿಲ್ಲರ್‌ ‘ಧಾಕಡ್‌’, ಬಯೋಪಿಕ್‌ ‘ತಲೈವಿ’ ಸಿನಿಮಾಗಳ ಆಶ್‌ಟ್ಯಾಗ್‌ಗಳೊಂದಿಗೆ ಅವರು ಈ ಟ್ವೀಟ್ ಮಾಡಿದ್ದಾರೆ. ಕಂಗನಾ ಟ್ವೀಟ್‌ಗೆ ನೆಟ್ಟಿಗರು ಹತ್ತಾರು ರೀತಿ ತಮಾಷೆಯ ಟ್ವೀಟ್‌ಗಳೊಂದಿಗೆ ಪ್ರತಿಕ್ರಿಯಿಸಿದ್ದಾರೆ. ‘ಸುದ್ದಿಯಲ್ಲಿರಲು, ತಮ್ಮ ಸಿನಿಮಾ ಪ್ರಚಾರಕ್ಕಾಗಿ ಕಂಗನಾ ಏನು ಬೇಕಾದರೂ ಮಾಡುತ್ತಾರೆ, ಈ ಟ್ವೀಟ್‌ಗಳಲ್ಲಿ ನಾನು, ನಾನು ಎನ್ನುವುದನ್ನು ಸಾಕಷ್ಟು ಬಾರಿ ಬಳಕೆ ಮಾಡಿರುವ ನಿಮಗೆ ಮಾನಸಿಕ ವೈದ್ಯರ ಅವಶ್ಯಕತೆ ಇದೆ!” ಎನ್ನುವ ಪ್ರತಿಕ್ರಿಯೆಯ ಒಕ್ಕಣಿಯ ಟ್ವೀಟ್‌ಗಳು ಕಾಣಿಸುತ್ತಿವೆ.

ಇದೊಂದು ಟ್ವೀಟ್‌ಗೆ ಸುಮ್ಮನಾಗದ ಕಂಗನಾ ಮತ್ತೊಂದು ಟ್ವೀಟ್ ಮಾಡಿ, “ಈ ವಿಚಾರವಾಗಿ ನಾನು ಚರ್ಚೆಗೆ ಸಿದ್ಧಳಿದ್ದೇನೆ. ಜಗತ್ತಿನ ಯಾವುದೇ ಭಾಗದಲ್ಲಿ ಯಾರಾದರೂ ನನ್ನಂತೆ ವೈವಿಧ್ಯಮಯ ಪಾತ್ರಗಳನ್ನು ನಿಭಾಯಿಸಿ ಯಶಸ್ವಿಯಾಗಿರುವುದನ್ನು ತೋರಿಸಲಿ. ಆಗ ನಾನು ಅವರಿಗೆ ಶರಣಾಗುತ್ತೇನೆ” ಎಂದು ಸವಾಲು ಹಾಕಿದ್ದಾರೆ.

‘ಧಾಕಡ್‌’ ಚಿತ್ರೀಕರಣದಲ್ಲಿರುವ ಕಂಗನಾ ಅವರು ನಟಿ, ಮಾಜಿ ಮುಖ್ಯಮಂತ್ರಿ ಜಯಲಲಿತಾ ಬಯೋಪಿಕ್‌ ‘ತಲೈವಿ’ಯಲ್ಲೂ ನಟಿಸುತ್ತಿದ್ದಾರೆ. ‘ತೇಜಸ್‌’ ಮತ್ತು ‘ಮಣಿಕರ್ಣಿಕಾ2’ ಅವರ ಮುಂದಿನ ಸಿನಿಮಾಗಳು. ಸೆಟ್ಟೇರಲಿರುವ ಮತ್ತೊಂದು ಪೊಲಿಟಿಕಲ್ ಡ್ರಾಮಾ ಹಿಂದಿ ಚಿತ್ರದಲ್ಲಿ ಅವರು ಮಾಜಿ ಪ್ರಧಾನಿ ಇಂದಿರಾ ಗಾಂಧಿ ಪಾತ್ರದಲ್ಲಿ ನಟಿಸಲಿದ್ದಾರೆ. ಇತ್ತೀಚೆಗೆ ಅವರು ಆ ಪಾತ್ರದಲ್ಲಿನ ತಮ್ಮ ಚಿತ್ರವನ್ನು ಟ್ವೀಟ್ ಮಾಡಿದ್ದರು.