ಶ್ರೀ ಜೈ ಮಾತ ಕಂಬೈನ್ಸ್ ಲಾಂಛನದಲ್ಲಿ ಅದ್ದೂರಿಯಾಗಿ ನಿರ್ಮಾಣವಾಗುತ್ತಿರುವ, ಪ್ರಕಾಶ್ ವೀರ್ ಕಥೆ, ಚಿತ್ರಕಥೆ ಬರೆದು ನಿರ್ದೇಶಿಸುತ್ತಿರುವ ಹಾಗೂ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ನಾಯಕರಾಗಿ ನಟಿಸುತ್ತಿರುವ ಬಹು ನಿರೀಕ್ಷಿತ “ದಿ ಡೆವಿಲ್” ಚಿತ್ರದ ಎರಡನೇ ಹಂತದ ಚಿತ್ರೀಕರಣ ಬೆಂಗಳೂರಿನಲ್ಲಿ ಆರಂಭವಾಗಿದೆ.
“ದಿ ಡೆವಿಲ್” ಚಿತ್ರದ ಎರಡನೇ ಹಂತದ ಚಿತ್ರೀಕರಣ ಬೆಂಗಳೂರಿನಲ್ಲಿ ಬಿರುಸಿನಿಂದ ಸಾಗಿದೆ. ಮುಂದಿನವಾರದಿಂದ ಚಿತ್ರೀಕರಣದಲ್ಲಿ ದರ್ಶನ್ ಅವರು ಭಾಗಿಯಾಗಲಿದ್ದಾರೆ. ದರ್ಶನ್ ಅವರಿಗೆ ಬೆನ್ನು ನೋವಿನ ಸಮಸ್ಯೆ ಇರುವುದರಿಂದ ಈ ಹಂತದಲ್ಲಿ ಬರೀ ಮಾತಿನ ಭಾಗದ ಚಿತ್ರೀಕರಣ ಮಾತ್ರ ಮಾಡಲಾಗುವುದು. ಸಾಹಸ ಸನ್ನಿವೇಶಗಳ ಚಿತ್ರೀಕರಣವಾಗಲಿ ಅಥವಾ ಬೇರೆ ಯಾವುದೇ ರಿಸ್ಕ್ ಇರುವ ಸನ್ನಿವೇಶಗಳ ಚಿತ್ರೀಕರಣ ಮಾಡುವುದಿಲ್ಲ ಎಂದು ತಿಳಿಸಿರುವ ನಿರ್ದೇಶಕ ಪ್ರಕಾಶ್ ವೀರ್, ಬೆಂಗಳೂರು, ಮೈಸೂರು, ಹೈದರಾಬಾದ್ ಹಾಗೂ ರಾಜಸ್ಥಾನದಲ್ಲಿ ಎರಡನೇ ಹಂತದ ಚಿತ್ರೀಕರಣ ಮಾಡುವ ಯೋಜನೆ ಹಾಕಿಕೊಂಡಿದ್ದೇವೆ ಎಂದಿದ್ದಾರೆ.
ನಾಯಕ ಚಾಲೆಂಜಿಂಗ್ ಸ್ಟಾರ್ ದರ್ಶನ್, ನಾಯಕಿ ರಚನ ರೈ, ತುಳಸಿ,ಅಚ್ಯುತಕುಮಾರ್, ಮಹೇಶ್ ಮಂಜ್ರೇಕರ್, ಶ್ರೀನಿವಾಸಪ್ರಭು, ಶೋಭ್ ರಾಜ್ ಮುಂತಾದ ಕಲಾವಿದರು ಎರಡನೇ ಹಂತದ ಚಿತ್ರೀಕರಣದಲ್ಲಿ ಭಾಗವಹಿಸಲಿದ್ದಾರೆ.
ಸುಧಾಕರ್.ಎಸ್.ರಾಜ್ ಅವರ ಛಾಯಾಗ್ರಹಣವಿರುವ “ದಿ ಡೆವಿಲ್” ಚಿತ್ರಕ್ಕೆ ಬಿ.ಅಜನೀಶ್ ಲೋಕನಾಥ್ ಸಂಗೀತ ನಿರ್ದೇಶನ, ಮೋಹನ್ ಬಿ ಕೆರೆ ಕಲಾ ನಿರ್ದೇಶನ ಹಾಗೂ ರಾಮ್ ಲಕ್ಷ್ಮಣ್ ಅವರ ಸಾಹಸ ನಿರ್ದೇಶನವಿದೆ.
ಮಲೆನಾಡು ತಪ್ಪಲಿನ ಒಂದು ಊರು. ಆ ಊರಿನ ಮೂರು ಮುತ್ತುಗಳು. ಓದೋ ವಯಸ್ಸಲ್ಲಿ ಸರಿಯಾಗಿ ಓದದೆ ಹರಟೆ, ತರಲೆ ಮಾಡ್ತಾನೇ ಬದುಕಿನ ಅರ್ಥ ಅರಿಯದೆ ಜಾಲಿ ಮಾಡುವ ಪೋಲಿಗಳು. ಲೈಫು ಅಂದುಕೊಂಡಷ್ಟು ಸುಲಭ ಅಲ್ಲ ಅಂತ ಗೊತ್ತಾಗುವಷ್ಟರಲ್ಲಿ ಆ ಮೂವರು ಗೆಳೆಯರ ಬದುಕಲ್ಲಿ ಅಲ್ಲೋಲ ಕಲ್ಲೋಲ. ಮುಂದೆ ಅವರು ಬದುಕು ಕಟ್ಟಿಕೊಳ್ತಾರ ಇಲ್ವಾ ಅನ್ನೋದೇ ಒನ್ ಲೈನ್ ಸ್ಟೋರಿ. ‘ಇಂಟರ್ರ್ವೆಲ್’ ಪ್ರತಿಯೊಬ್ಬರ ಬದುಕಲ್ಲಿ ಬಂದೇ ಬರುತ್ತೆ. ಈ ಮೂವರ ಬಾಳಲ್ಲೂ ಬರುವ ಬದುಕಿನ ತಿರುವು ಹೇಗಿರುತ್ತೆ ಎಂಬ ಕುತೂಹಲವಿದ್ದರೆ ಒಮ್ಮೆ ಸಿನಿಮಾ ನೋಡಬಹುದು.
ಇಲ್ಲಿ ಮೂವರ ತುಂಟಾಟ, ಪೋಲಿತನ, ತಮಾಷೆ, ಅಸಹಾಯಕತೆ, ಉತ್ಸಾಹ, ನಿರಾಸೆ ಎಲ್ಲವೂ ಮೇಳೈಸಿದೆ.
ಜಾಲಿಯಾಗಿಯೇ ಇರುವ ಮೂವರ ಬದುಕು ಜವಾಬ್ದಾರಿ ಇಲ್ಲದೆ ಒದ್ದಾಡುವಂತ ಸ್ಥಿತಿಗೆ ಬರುತ್ತೆ. ನಗಿಸುವ ಹಾಗು ಭಾವುಕತೆ ಹೆಚ್ಚಿಸುವ ಪಾತ್ರಗಳ ಮೂಲಕ ಒಂದೊಳ್ಳೆಯ ಆಪ್ತ ಕಥೆ ಹೇಳುವಲ್ಲಿ ನಿರ್ದೇಶಕರು ಗೆದ್ದಿದ್ದಾರೆ.
ಮೊದಲರ್ಧ ತಮಾಷೆಯಾಗಿ ಸಾಗುವ ಚಿತ್ರದ ದ್ವಿತಿಯಾರ್ಧ ಗಂಭೀರತೆ ಪಡೆಯುತ್ತೆ. ವಿನಾಕಾರಣ ಇಲ್ಲಿ ದೃಶ್ಯಗಳ ವೈಭವೀಕರಣವಿಲ್ಲ. ಅನಗತ್ಯ ಸೀನ್ ಗಳಿಲ್ಲ. ಬೇಸರಿಸುವ ಅಂಶಗಳೂ ಇಲ್ಲ. ಹೊಸ ತಂಡವಾದರೂ ಬೆನ್ನು ತಟ್ಟುವಂತಹ ಕೆಲಸ ಮಾಡಿದೆ ಎಂಬುದೇ ಸಮಾಧಾನ.
ಇಲ್ಲಿ ಶಿಕ್ಷಣ ಎಷ್ಟು ಮುಖ್ಯ ಅನ್ನೋದನ್ನು ನಿರ್ದೇಶಕರು ಒತ್ತಿ ಹೇಳಿದ್ದಾರೆ. ಈಗಿನ ಯುವಕರ ಮನಸ್ಥಿತಿ ಹೇಗಿರುತ್ತೆ ಎನ್ನುವುದನ್ನಿಲ್ಲಿ ಕಾಣಬಹುದು.
ಸಿನಿಮಾದ ವೇಗಕ್ಕೆ ಸಂಕಲನ ಸಾಥ್ ಕೊಟ್ಟಿದೆ. ಒಂದು ಹಾಡು ಗುನುಗಬಹುದು. ಹಿನ್ನೆಲೆ ಸಂಗೀತ ಕಥೆಗೆ ಪೂರಕ.
ಇನ್ನು, ಶಶಿ ರಾಜ್, ಪ್ರಜ್ವಲ್ಕುಮಾರ್ ಗೌಡ, ಸುಕಿ ಅಭಿನಯದಲ್ಕಿ ಸಹಜತೆ ಇದೆ. ಸಹನಾ ಆರಾಧ್ಯ ಸಿಕ್ಕ ಪಾತ್ರಕ್ಕೆ ಮೋಸ ಮಾಡಿಲ್ಲ. ತೆರೆ ಮೇಲೆ ಬರುವ ಪಾತ್ರಗಳೂ ಗಮನ ಸೆಳೆಯುತ್ತವೆ.
ಚಿತ್ರ: ಕಪಟಿ ನಿರ್ದೇಶನ: ರವಿಕಿರಣ್, ಚೇತನ್ ನಿರ್ಮಾಣ: ದಯಾಳ್ ಪದ್ಮನಾಭನ್ ತಾರಾಗಣ: ಸುಕೃತ ವಾಗ್ಲೆ, ದೇವ್ ದೇವಯ್ಯ, ಸಾತ್ವಿಕ್ ಕೃಷ್ಣನ್, ಶಂಕರ್ ನಾರಾಯಣ ಇತರರು.
ಆ ಮನೆಯಲ್ಲಿ ಅವಳಿಗೆ ಯಾರೋ ಕರೆಯುತ್ತಿರುವ ಭಾಸ. ಇನ್ಯಾರೋ ಓಡಾಡಿದ ಫೀಲ್. ಮನೆ ಸುತ್ತ ಮುತ್ತ ಏನೇನೋ ನಡೆಯುತ್ತಿರೋ ಭೀತಿ…
ಇಷ್ಟಕ್ಕೂ ಅದು ದೆವ್ವದ ಓಡಾಟವೋ? ಯಾರಾದರೂ ಭಯಗೊಳಿಸಲು ಮಾಡುತ್ತಿರೋ ಪಿತೂರಿಯೋ ? ಆರಂಭದಿಂದ ಅಂತ್ಯದವರೆಗೂ ನೋಡುಗರಿಗೆ ಕುತೂಹಲ ಕೆರಳಿಸುವ ಈ ಕಥೆ ನೋಡಿಸಿಕೊಂಡು ಹೋಗುತ್ತೆ. ಹಾಗೆ ನೋಡೋಕೆ ಕಾರಣ ನಿರ್ದೇಶಕರ ನಿರೂಪಣೆಯ ಜಾಣತನ. ಇಲ್ಲಿ ಭೀತಿ ಇದೆ, ಗಂಭೀರತೆ ಇದೆ, ಆತಂಕ ಇದೆ, ಆಸೆ, ದುರಾಸೆ , ಬಾಂಧವ್ಯ, ಎಮೋಷನಲ್ ಇತ್ಯಾದಿ ಎಲ್ಲವೂ ಮೇಳೈಸಿದೆ. ಆ ಕಾರಣಕ್ಕೆ ಚಿತ್ರ ಆಪ್ತತೆಯ ಸಾರವಾಗುತ್ತೆ.
ಕಥೆ ಸಿಂಪಲ್ ಎನಿಸಿದರೂ, ಹೊಸ ವಿಷಯ ಇಲ್ಲಿದೆ. ಹೊಸತನ್ನು ಹೇಳಿರುವ ಮತ್ತು ತೋರಿಸಿರುವ ರೀತಿ ಇಷ್ಟವಾಗುತ್ತೆ. ನೋಡುಗರಿಗೆ ಎಷ್ಟು ತೋರಿಸಬೇಕು, ಏನನ್ನು ಹೇಳಬೇಕೆಂಬ ಅರಿವು ನಿರ್ದೇಶಕರಿಗೆ ಇದೆ. ಹಾಗಾಗಿ ಸಿನಿಮಾ ಎಲ್ಲಾ ವರ್ಗಕ್ಕೂ ರುಚಿಸುವುದರಲ್ಲಿ ಸಂದೇಹವಿಲ್ಲ.
ಮೊದಲರ್ಧ ಸರಾಗವಾಗಿ ಸಾಗುವ ಸಿನಿಮಾದಲ್ಲಿ ಸಾಕಷ್ಟು ಸಂಗತಿಗಳಿವೆ. ದ್ವಿತಿಯಾರ್ಧ ಕಥೆಯ ಓಗ ನೋಡುಗರಲ್ಲಿ ಕುತೂಹಲ ಮೂಡಿಸುತ್ತೆ. ಸಾಮಾನ್ಯವಾಗಿ ಹಾರರ್, ಸಸ್ಪೆನ್ಸ್ ಥ್ರಿಲ್ಲರ್ ಸಿನಿಮಾ ಪ್ರಿಯರಿಗೆ ಇದು ಇಷ್ಟವಾಗದೇ ಇರದು.
ಸಿನಿಮಾದ ಅವಧಿ ಹೆಚ್ಚನಿಸಲ್ಲ. ಎಲ್ಲೂ ಗೊಂದಲ ಇರದ ಕಥೆಯಲ್ಲಿ ಚಿತ್ರಕಥೆ ಬಿಗಿಯಾಗಿದೆ. ಸಿನಿಮಾದ ವೇಗಕ್ಕೆ ಸಂಕಲನ ಮುಖ್ಯವಾಗಿ ಹೆಗಲು ಕೊಟ್ಟಿದೆ. ಇಂತಹ ಸಿನಿಮಾಗಳಿಗೆ ಹಿನ್ನೆಲೆ ಸಂಗೀತ ಮಾತಾಡಬೇಕು. ಅದಿಲ್ಲಿ ವರ್ಕ್ ಆಗಿದೆ.
ಇಲ್ಲಿ ಗಮನಿಸಬೇಕಾದ ಮತ್ತೊಂದು ಅಂಶವೆಂದರೆ ಅದು ಪಾತ್ರಗಳು. ಬೆರಳೆಣಿಕೆಯ ಪಾತ್ರಗಳಿವೆ. ಬಹುತೇಕ ಒಂದೇ ಮನೆ ಸಿನಿಮಾದ ಕೇಂದ್ರಬಿಂದು. ನೋಡೋಕೆ ಒಂದು ಹಾಡು, ಒಂದು ಫೈಟು ಇದ್ದರೂ ಅದು ಕಥೆಗೆ ಪೂರಕ. ಗಲಿಬಿಲಿ ಇರದ ನೀಟ್ ನರೇಷನ್ ಚಿತ್ರ.
ಕಥೆ ಏನು?
ಇದೊಂದು ಡಾರ್ಕ್ ನೈಟ್ ಕಥೆ. ಅಂದರೆ ಇಬ್ಬರು ಹ್ಯಾಕರ್ಸ್ ಕಥೆ ವ್ಯಥೆ ಇಲ್ಲಿದೆ. ಯಾರೂ ಇಲ್ಲದ ವೇಳೆ ಆ ದೊಡ್ಡ ಬಂಗಲೆಯಲ್ಲಿ ಸಿಸಿ ಕ್ಯಾಮೆರಾ ಅಳವಡಿಸಿ, ಅಪ್ಪ, ಮಗ ಮತ್ತು ಮಗಳ ಚಟುವಟಿಕೆಯನ್ನು ಡಾರ್ಕ್ ವೆಬ್ ಮೂಲಕ ಹಣ ಮಾಡುವ ಸಂಚು ಹೇಗಿರುತ್ತೆ ಅನ್ನೋದು ಒನ್ ಲೈನ್. ಅದು ಹೇಗೆ ಎಂಬ ಕುತೂಹಲ ಇದ್ದರೆ ಒಮ್ಮೆ ನೋಡಲ್ಲಡ್ಡಿಯಿಲ್ಲ.
ಆ ಮನೆಯಲ್ಲಿ ವಿಚಿತ್ರ ಘಟನೆ ನಡೆಯುತ್ತೆ. ಏನೇನು ಎಂಬ ಪ್ರಶ್ನೆಗೆ ಇಡೀ ಸಿನಿಮಾ ಉತ್ತರವಾಗಲಿದೆ.
ನೋಡ ನೋಡುತ್ತಿದ್ದಂತೆ ಚಿತ್ರ ಎಂಡ್ ಆಗುತ್ತೆ. ಒಂದಷ್ಟು ಪ್ರಶ್ನೆಗಳು ಕಾಡುತ್ತವೆ. ಅಲ್ಲೇ ಉತ್ತರವೂ ಸಿಗುತ್ತೆ. ಹೊಸ ವಿಷಯವನ್ನು ಹೀಗೂ ಹೇಳಬಹುದು ಅಂತ ಕಪಟಿ ನೋಡಿದವರಿಗೆ ಗೊತ್ತಾಗುತ್ತೆ.
ಕತ್ತಲು ರಾತ್ರಿಯೊಳು ಜರುಗುವ ಸೂಕ್ಷ್ಮ ಸನ್ನಿವೇಶಗಳೇ ಚಿತ್ರದ ಹೈಲೆಟ್. ಕನ್ನಡದಲ್ಲಿ ಬಂದ ಅದೆಷ್ಟೋ ಕ್ರೈಮ್ ಥ್ರಿಲ್ಲರ್ ನಡುವೆ ಇದು ಭಿನ್ನವಾಗುತ್ತೆ. ಒಟ್ಟಾರೆ ಕನ್ನಡಕ್ಕೊಂದು ಹೊಸ ಪ್ರಯತ್ನವಂತೂ ಹೌದು.ತಾಂತ್ರಿಕವಾಗಿಯೂ ಸಿನಿಮಾ ಸೈ ಎನಿಸಿಕೊಂಡಿದೆ.
ಯಾರು ಹೇಗೆ?
ಇಲ್ಲಿ ಸುಕೃತ ವಾಗ್ಲೆ ಎಂದಿಗಿಂತ ನಟನೆಯಲ್ಲಿ ಇಷ್ಟವಾಗುತ್ತಾರೆ. ಎಮೋಷನ್ ದೃಶ್ಯದಲ್ಲಿ ಭಾವುಕತೆಗೆ ದೂಡುತ್ತಾರೆ. ಕೊಟ್ಟ ಪಾತ್ರಕ್ಕೆ ಮೋಸ ಮಾಡಿಲ್ಲ. ದೇವ್ ದೇವಯ್ಯ ಮತ್ತು ಸಾತ್ವಿಕ್ ಕೃಷ್ಣನ್ ಸಿನಿಮಾದ ಕೇಂದ್ರ ಬಿಂದು. ಜಿದ್ದಿಗೆ ಬಿದ್ದವರಂತೆ ಕಾಣಿಸಿಕೊಂಡಿದ್ದಾರೆ. ಪಕ್ಕಾ ಹ್ಯಾಕರ್ಸ್ ಆಗಿ ಇಷ್ಟವಾಗುತ್ತಾರೆ. ತೆರೆ ಮೇಲೆ ಬರುವ ಕೆಲ ಪಾತ್ರಗಳೂ ಇರುವಷ್ಟು ಕಾಲ ಗಮನ ಸೆಳೆಯುತ್ತವೆ.
ಚಿತ್ರದ ಛಾಯಾಗ್ರಹಣದಲ್ಲಿ ಕತ್ತಲು ಬಿಳುಪಿನ ಆಟ ಸೊಗಸಾಗಿದೆ. ಸಂಗೀತ ಸಿನಿಮಾಗೆ ಸಾಥ್ ನೀಡಿದೆ.
ಚಿತ್ರ: ಅಪಾಯವಿದೆ ಎಚ್ಚರಿಕೆ ನಿರ್ದೇಶಕ: ಅಭಿಜಿತ್ ತೀರ್ಥಹಳ್ಳಿ ನಿರ್ಮಾಣ: ವಿ.ಜಿ.ಮಂಜುನಾಥ್, ಪೂರ್ಣಿಮಾ ಎಂ.ಗೌಡ ತಾರಾಗಣ: ವಿಕಾಸ್ ಉತ್ತಯ್ಯ, ಅಶ್ವಿನ್ ಹಾಸನ್, ರಾಧಾ ಭಗವತಿ, ರಾಘವ್ ಕೊಡಚಾದ್ರಿ, ಮಿಥುನ್ ತೀರ್ಥಹಳ್ಳಿ, ಹರಿಣಿ, ಲಂಕೇಶ್ ರಾವಣ, ಕುಮಾರ್ ಶಿವಮೊಗ್ಗ ಇತರರು.
ಜೀವನದಲ್ಲಿ ಹಣವೇ ಮುಖ್ಯ. ಹಣ ಇಲ್ಲದಿದ್ದರೆ ಬದುಕೇ ಬರಡು. ಉದ್ಯೋಗ ಇರದ ಮೂವರು ಹುಡುಗರು ಹಣ ಮಾಡಬೇಕು ಅಂತ ನಿರ್ಧರಿಸಿ ಕಗತ್ತಲ ಕಾನನದಲ್ಲಿರೋ ಗಂಧದ ಮರ ಕಡಿಯೋಕೆ ಹೊರಡುವ ಕಥೆಯೇ ಒಂದು ರೋಚಕ. ಲೈಫಲ್ಲಿ ಹಣ ಮಾಡಬೇಕು ಅಂತ ಡಿಸೈಡ್ ಮಾಡುವ ಮೂವರು ಯುವಕರು ಕತ್ತಲ ಕಾಡೊಳಗೆ ಹೋಗಿ ಗಂಧದ ಮರ ಕಡಿದು ತರುತ್ತಾರಾ ಅಥವಾ ಇಲ್ಲವಾ ಅನ್ನುವ ಕುತೂಹಲವಿದ್ದರೆ ಮಿಸ್ ಮಾಡದೆ ಒಂದೊಮ್ಮೆ ಈ ಸಿನಿಮಾ ನೋಡಬಹುದು.
ಇತ್ತೀಚೆಗೆ ಬರುವ ಕಥೆಗಳಲ್ಲಿ ಅದಿಲ್ಲ, ಇದು ಮಿಸ್ ಆಗಿದೆ, ಅದೊಂದಷ್ಟು ಬೇಕಿತ್ತು, ಇದು ಬೇಡವಾಗಿತ್ತು ಅನ್ನುವ ಮಾತುಗಳೇ ಹೆಚ್ಚಾಗಿ ಕೇಳಿಬರುತ್ತಿದ್ದವು. ಆದರೆ, ಈ ಸಿನಿಮಾದೊಳಗಿನ ಕಥೆಯಲ್ಲಾಗಲಿ, ನಿರೂಪಣೆಯಲ್ಲಾಗಲಿ ಅಥವಾ ಚಿತ್ರಕಥೆಯಲ್ಲಾಗಲಿ ಯಾವುದೂ ಹೆಚ್ಚೆನಿಸಿಲ್ಲ. ಯಾವುದೂ ಕಮ್ಮಿ ಅನಿಸಿಲ್ಲ. ಎಷ್ಟು ಬೇಕೋ, ಏನು ಬೇಕೋ ಅದನ್ನು ಹೇಳುವ ಮೂಲಕ ನೋಡುಗರನ್ನು ಹಿಡಿದಿಟ್ಟುಕೊಂಡು ಸುಮ್ಮನೆ ಸಿನಿಮಾ ನೋಡುವಂತೆ ಮಾಡುವ ಗುಣ ಈ ಚಿತ್ರದಲ್ಲಿದೆ. ಸ್ವಲ್ಪ ಗಂಭೀರತೆಗೆ ದೂಡುವ ಈ ಕಥೆಯಲ್ಲಿ ಮಜವೆನಿಸುವ ಹಲವು ರೂಪಕಗಳಿವೆ. ಒಂದಷ್ಟು ರೋಚಕ ಎನಿಸುವ ಸಂಗತಿಗಳಿವೆ. ಬೆಚ್ಚಿಬೀಳಿಸುವ ದೃಶ್ಯಗಳೂ ಇವೆ. ಅವೆಲ್ಲವನ್ನು ಅನುಭವಿಸುವ ಆಸೆ ಇದ್ದರೆ, ಚಿತ್ರ ನೋಡಿ ಹೊರಬರಬಹುದು.
ತೀರಾ ಸರಳ ಕಥೆ ಇದು. ಹಾಗಂತ ಒಂದೇ ಸಮನೆ ನೋಡಿಸಿಕೊಂಡು ಹೋಗುತ್ತೆ ಅಂತ ಹೇಳುವುದಿಲ್ಲ. ಮೊದಲರ್ಧ ಅತ್ತಿತ್ತ ಓಡಾಡಿಸಿಕೊಂಡೇ ಸಾಗುವ ಈ ಸಿನಿಮಾ, ದ್ವಿತಿಯಾರ್ಧದಲ್ಲಿ ಸಾಕಷ್ಟು ಗಂಭೀರತೆ ಪಡೆದುಕೊಳ್ಳುತ್ತೆ. ಎಷ್ಟರಮಟ್ಟಿಗೆ ಅಂದರೆ, ನೋಡುಗರ ಕಣ್ಣು ತದೇಕಚಿತ್ತದಿಂದ ಇರುವಷ್ಟು, ಮನಸ್ಸು ಮೌನವಾಗಿರುವಷ್ಟು, ಕಿವಿ ಅದೇನನ್ನೋ ಆಲಿಸುವಷ್ಟು. ನೋಡುವ ಮನಸ್ಸುಗಳಿಗೆ ಅಲ್ಲಲ್ಲಿ ಕಚಗುಳಿಯ ದೃಶ್ಯಗಳಿವೆ, ಮಾತುಗಳಿವೆ. ಹಾಗೆಯೇ, ಒಮ್ಮೊಮ್ಮೆ ಬೆಚ್ಚಿಬೀಳಿಸುವಂತಹ ದೃಶ್ಯಗಳು ಎರಗುತ್ತವೆ. ಅದೆಲ್ಲೋ ಕೇಳಿದ ದೃಶ್ಯಗಳು ಎದುರಾಗುತ್ತವೆ. ಏನೇನೋ ಅಂದುಕೊಂಡು ನೋಡುವ ಮನಸ್ಸುಗಳನ್ನು ಆಗಾಗ ಭಯ ಹುಟ್ಟಿಸುವ ಸನ್ನಿವೇಶಗಳು ರಾಚುತ್ತವೆ. ಹಾಗಾಗಿ ಈ ಚಿತ್ರ ಒಂದಷ್ಟು ಖುಷಿ ಕೊಡುತ್ತೆ, ಮತ್ತಷ್ಟು ಭಯ ಹುಟ್ಟಿಸುತ್ತೆ. ಎಚ್ಚರಿಕೆಯಿಂದ ನೋಡಿದವರಿಗೂ ಒಮ್ಮೊಮ್ಮೆ ಢವ ಢವ ಎನಿಸದಿರದು.
ನಿರ್ದೇಶಕರ ಕಥೆ ವಿಶೇಷವಾಗಿದೆ. ನಿರೂಪಣೆ ಶೈಲಿ ಇಷ್ಟವಾಗುತ್ತೆ. ಚಿತ್ರಕಥೆಯಲ್ಲಿ ಒಂದಷ್ಟು ಬಿಗಿ ಹಿಡಿತ ಇದ್ದಿದ್ದರೆ, ಇನ್ನಷ್ಟು ಭಯಾನಕವಾಗಿ ಸಿನಿಮಾವನ್ನು ಕಟ್ಟಿಕೊಡಬಹುದಿತ್ತು. ಇದನ್ನು ಥ್ರಿಲ್ಲರ್ ಎನ್ನಬೇಕೋ, ಹಾರರ್ ಎನ್ನಬೇಕೋ, ಕಾಮಿಡಿ ಎನ್ನಬೇಕೋ ಎಂಬ ಕನ್ ಫ್ಯೂಸ್ ನೋಡುಗರಿಗಿದ್ದರೂ, ಒಂದೊಳ್ಳೆಯ ಮನರಂಜನೆ ಸಿನಿಮಾ ಅಂತ ಸಾಬೀತುಪಡಿಸುತ್ತದೆ. ಮೊದಲರ್ಧ ಇನ್ನಷ್ಟು ಬಿಗಿ ಬೇಕಿತ್ತು. ಸಿನಿಮಾದಲ್ಲಿ ಮಜ ಇರೋದೇ ದ್ವಿತಿಯಾರ್ಧದಲ್ಲಿ. ಅದನ್ನು ಹೇಳುವುದಕ್ಕಿಂತ ನೋಡುವುದೇ ಒಳಿತು.
ನಿರ್ದೇಶಕರಿಗೆ ನೋಡುಗರ ನಾಡಿಮಿಡಿತದ ಅರಿವಿದೆ. ಆ ಕಾರಣಕ್ಕೆ ಅವರಿಲ್ಲಿ ಸರಳ ಕಥೆಗೆ ಹಾರರ್ ಟಚ್ ಮಾಡಿದ್ದಾರೆ. ಅದು ಸುಮ್ಮನೆ ನೋಡಿಸಿಕೊಂಡು ಹೋಗುತ್ತೆ. ಅವರ ಜಾಣತನದ ಕೆಲಸಕ್ಕೆ ಆ ದೊಡ್ಡ ಕಾಡು, ಕತ್ತಲು, ಪಾತ್ರಗಳು, ಸಂಗೀತ, ಕ್ಯಾಮೆರಾ ಎಲ್ಲವೂ ಸಾಥ್ ಕೊಟ್ಟಿವೆ. ಹಾಗಾಗಿ ಸಿನಿಮಾ ರುಚಿಸುತ್ತಾ ಹೋಗುತ್ತೆ. ಇಂತಹ ಸಿನಿಮಾಗಳಿಗೆ ಕಥೆಗಿಂತ ದೃಶ್ಯಗಳು ಪ್ರಮುಖವಾಗಿ ಆಕರ್ಷಿಸಬೇಕು. ಜೊತೆಗೆ ಸಂಗೀತವೂ ಕೂಡ. ಅವೆರೆಡು ಇಲ್ಲಿ ಮೇಳೈಸಿವೆ. ಒಂದು ಹಾರರ್ ಫೀಲ್ ಕಟ್ಟಿಕೊಡುವ ಕೆಸಲ ಸುಲಭವಲ್ಲ. ಅದನ್ನು ನಿರ್ದೇಶಕರು ಪರಿಪೂರ್ಣವಾಗಿ ಕಟ್ಟಿಕೊಡುವ ಮೂಲಕ ನೋಡುಗರಲ್ಲಿ ಒಂದಷ್ಟು ಥ್ರಿಲ್ ಕೊಡುತ್ತಾ ಹೋಗುತ್ತಾರೆ. ಹಾಗಾಗಿ ಸಿನಿಮಾ ನೋಡುವ ಮನಸ್ಸುಗಳಿಗೆ ಎಲ್ಲೂ ಬೋರ್ ಎನಿಸೋದಿಲ್ಲ.
ಕಥೆ ತುಂಬಾನೇ ಸಿಂಪಲ್. ಉದ್ಯೋಗ ಇರದ ಮೂವರು ಗೆಳೆಯರು, ಸದಾ ಕುಡಿಬೇಕು, ಲೈಫ್ ಎಂಜಾಯ್ ಮಾಡಬೇಕು ಅದಷ್ಟೇ ಬದುಕು ಅಂದುಕೊಂಡವರು. ಆದರೆ, ಬದುಕಲು ಹಣ ಬೇಕು ಅದಕ್ಕೆ ಕಂಡುಕೊಳ್ಳುವ ದಾರಿ ಹಲವು. ಒಂದು ವಿಚಿತ್ರ ಸನ್ನಿವೇಶದಲ್ಲಿ ಅವರು ಕಾಡಿಗೆ ಹೋಗುವ ಮನಸ್ಸು ಮಾಡ್ತಾರೆ. ಅಲ್ಲಿ ಅಚ್ಚರಿಯ ಬೆಳವಣಿಗೆ ಕಾಣುತ್ತಾರೆ. ಕಂಡರಿಯದ ದೃಶ್ಯಗಳು ಎದುರಾಗುತ್ತವೆ. ಅವರು ಕಾಡಿಗೆ ಹೋಗಿದ್ದು ಯಾಕೆ, ಅಲ್ಲಿ ಅವರನ್ನು ಆವರಿಸಿದ್ದು ಏನು? ಮುಂದೆ ಅವರು ಅಂದುಕೊಂಡಿದ್ದನ್ನು ಸಾಧಿಸುತ್ತಾರಾ? ಇದು ಕಥೆ. ಈ ಕಥೆಯ ಜಾಡು ಹಿಡಿದು ಹೋಗುವ ಮನಸ್ಸಿದ್ದರೆ ಮುಲಾಜಿಲ್ಲದೆ ಬಂದು ಸಿನಿಮಾ ನೋಡಬಹುದು. ನೋಡುವ ಅಷ್ಟೂ ಗಂಟೆಗಳು ಕೂಡ ಮೋಸ ಆಗುವುದಿಲ್ಲ ಎಂಬ ಗ್ಯಾರಂಟಿಯನ್ನು ಸಿನಿಮಾ ಕೊಡುತ್ತದೆ.
ಸಿನಿಮಾದಲ್ಲಿ ಒಬ್ಬೊಬ್ಬರದ್ದು ಒಂದೊಂದು ರೀತಿಯ ಪಾತ್ರ. ಎಲ್ಲಾ ಪಾತ್ರಗಳೂ ಇಲ್ಲಿ ಗಮನಸೆಳೆಯುತ್ತವೆ. ಮುಖ್ಯವಾಗಿ ವಿಕಾಸ್ ಉತ್ತಯ್ಯ ತಮ್ಮ ಪಾತ್ರದ ಮೂಲಕ ಮೆಚ್ಚುಗೆಯಾಗುತ್ತಾರೆ. ಮಿಥುನ್ ತೀರ್ಥಹಳ್ಳಿ ನೋಡುಗರನ್ನೂ ಗಾಬರಿಪಡಿಸುತ್ತಾರೆ. ರಾಘವ್ ಕೊಡಚಾದ್ರಿ ಪಾತ್ರಕ್ಕೆ ಮೋಸ ಮಾಡಿಲ್ಲ. ಇಲ್ಲಿ ಮೂವರಿಗೂ ಒಂದೊಂದು ವಿಭಿನ್ನ ಪಾತ್ರಗಳಿವೆ. ಅದನ್ನು ಅವರು ಸರಿಯಾಗಿಯೇ ನಿರ್ವಹಿಸಿದ್ದಾರೆ. ಇನ್ನು, ಪ್ರಮುಖವಾಗಿ ಸಿನಿಮಾದ ಆಕರ್ಷಣೆ ಅಂದರೆ ಅದು ಅಶ್ವಿನ್ ಹಾಸನ್. ಅವರಿಲ್ಲಿ ವಿಭಿನ್ನವಾಗಿ ಕಾಣಿಸಿಕೊಂಡಿದ್ದಾರೆ. ಅವರೇ ಸಿನಿಮಾದ ತಿರುವು ಅನ್ನಬಹುದು. ಅವರ ಪಾತ್ರದಲ್ಲಿ ಧಮ್ ಇದೆ. ಖಡಕ್ ಅಭಿನಯವೂ ತುಂಬಿದೆ. ಇನ್ನು, ರಾಧಾ ಪಾತ್ರ ಕೂಡ ಇರುವಷ್ಟು ಕಾಲ ಇಷ್ಟವಾಗುತ್ತದೆ. ಹರಿಣಿ ಪಾತ್ರ ಕೂಡ ಗಮನಸೆಳೆಯುತ್ತೆ. ಇನ್ನು, ಆಗಾಗ ಕಾಣಿಸಿಕೊಳ್ಳುವ ಕೆಲ ಪಾತ್ರಗಳು ಕಥೆಗೆ ಪೂರಕವಾಗಿವೆ.
ಇಂತಹ ಸಿನಿಮಾಗಳಿಗೆ ತಾಂತ್ರಿಕತೆ ಮುಖ್ಯವಾಗಿ ಬೇಕು. ಅದಿಲ್ಲಿ ಮಾತಾಡುವಂತಿದೆ. ಸುನಾದ್ ಗೌತಮ್ ಅವರ ಸಂಗೀತ ಇಲ್ಲಿ ಚೆನ್ನಾಗಿಯೇ ಮಾತಾಡಿದೆ. ಅದು ನೋಡುಗರನ್ನು ಬೆಚ್ಚಿಬೀಳುವಷ್ಟರ ಮಟ್ಟಿಗೆ. ಸುನಾದ್ ಅವರ ಕ್ಯಾಮೆರಾ ಕೈಚಳಕ ಕೂಡ ಸೊಗಸಾಗಿದೆ. ಒಟ್ಟಾರೆ, ಈ ಸಿನಿಮಾವನ್ನು ಜಾಲಿಯಾಗಿ ನೋಡೋಕೆ ಯಾವುದೇ ಅಪಾಯವಂತೂ ಇಲ್ಲ.
ಚಿತ್ರ: 1990s ನಿರ್ದೇಶಕ : ನಂದಕುಮಾರ್ ನಿರ್ಮಾಣ: ಮನಸ್ಸು ಮಲ್ಲಿಗೆ ಸಂಸ್ಥೆ ತಾರಾಗಣ: ಅರುಣ್, ರಾಣಿ ವರದ್, ಶಿವಾನಂದ, ಸ್ವಪ್ನ ಶೆಟ್ಟಿಗಾರ್, ದೇವ್ ಇತರರು.
ಏ ಜುಟ್ಟು ನಮ್ ತಂಟೆಗೆ ಬಂದ್ರೆ ಅಷ್ಟೇ, ಈ ಸಲ ನಿನ್ ಮಗಳ ಕೈ ಕಚ್ಚಿದ್ದಿನಿ. ಮುಂದೆ ನಿನ್ ಮಗಳ ಕೆನ್ನೆ ಕಚ್ಚೀತೀನಿ… ಬಾಲ್ಯದಲ್ಲೇ ಆ ಹುಡುಗ ಈ ಖಡಕ್ ಡೈಲಾಗ್ ಹೇಳಿದ ಮೇಲೆ ಮುಂದೆಯೂ ಆ ಹುಡುಗ ಪಕ್ಕಾ ಲೋಕಲ್ ಹುಡುಗನಾಗಿ ಮೆರಿತಾನೆ ಅಂತ ಪ್ರತ್ಯೇಕವಾಗಿ ಹೇಳುವಂತಿಲ್ಲ ಬಿಡಿ. ಚಿಕ್ಕಂದಿನಲ್ಲೇ ಅವನೊಬ್ಬ ಪೋಲಿ. ಅಪ್ಪ, ಅಮ್ಮ ಅಷ್ಟೇ ಅಲ್ಲ, ಆ ಊರಿನ ಯಾರೊಬ್ಬರಿಗೂ ಬಗ್ಗದ ಹುಡುಗ. ಅವನೊಬ್ಬ ಮಹಾ ಕೋಪಿಷ್ಠ. ಇವಿಷ್ಟು ಹೇಳಿದ ಮೇಲೆ ಇದೊಂದು ಪಕ್ಕಾ ರಿವೇಂಜ್ ಸ್ಟೋರಿನೇ ಇರಬೇಕು ಅಂತ ಅಂದುಕೊಂಡರೆ ಆ ಊಹೆ ತಪ್ಪು.
ಹೌದು, ಇದೊಂದು ತೊಂಬತ್ತರ ಕಾಲಘಟ್ಟದ ಲವ್ ಸ್ಟೋರಿ. ಹಾಗಂತ ಬರೀ ಲವ್ವು ತುಂಬಿಕೊಂಡಿದೆ ಅಂದರೆ ಆ ಕಲ್ಪನೆಯೇ ಇಲ್ಲಿಲ್ಲ. ಇಲ್ಲಿ ನಿಷ್ಕಲ್ಮಷ ಪ್ರೀತಿ ಇದೆ. ಮುಗ್ಧ ಮನಸ್ಸಿಗೆ. ಗೆಳೆತನವಿದೆ. ಸಂಬಂಧಗಳ ಮೌಲ್ಯವಿದೆ. ಕೋಪ ತಾಪಗಳ ಮುಖವಾಡವಿದೆ. ಭಾವನಾತ್ಮಕ ಅಂಶಗಳೂ ಇವೆ. ಹಾಗಾಗಿ ಇದೊಂದು ಮನ ಮುಟ್ಟುವ ಮತ್ತು ಮಿಡಿಯುವ ಪ್ರೀತಿ ಕಥೆ ಅಂದರೆ ತಪ್ಪಿಲ್ಲ. ಸಿನಿಮಾ ಮೊದಲರ್ಧ ಸುಮ್ಮನೆ ನೋಡಿಸಿಕೊಂಡು ಹೋಗುತ್ತೆ. ದ್ವಿತಿಯಾರ್ಧ ಒಂದಷ್ಟು ಕಾಡುವ ಹಂತಕ್ಕೂ ಕರೆದುಕೊಂಡು ಹೋಗುತ್ತೆ. ಸಿನಿಮಾದ ಕ್ಲೈಮ್ಯಾಕ್ಸ್ ಜೀವಾಳ. ಇಲ್ಲಿ ಪ್ರೀತಿಯ ಉನ್ಮಾದತೆ ಜೊತೆಗೆ ಕಣ್ಣಾಲಿಗಳು ತುಂಬುವಂತಹ ದೃಶ್ಯಗಳು ನೋಡುಗರನ್ನು ಹಿಡಿದಿಟ್ಟುಕೊಳ್ಳುತ್ತವೆ. ಅದೇ ಚಿತ್ರದ ಪ್ಲಸ್ ಎನ್ನಬಹುದು.
ತೊಂಬತ್ತರ ಕಾಲಘಟ್ಟದ ಸಿನಿಮಾಗಳಲ್ಲಿ ಸೂಕ್ಷ್ಮತೆಗೆ ಹೆಚ್ಚು ಒತ್ತು ಕೊಡುವುದು ಕಾಮನ್. ಇಲ್ಲೂ ಅದು ಮುಂದುವರೆದಿದೆ. ಆಗಿನ ಪ್ರೀತಿ, ಕಾಸ್ಟ್ಯೂಮ್, ಮಾತು, ನಡೆ ನುಡಿ ಎಲ್ಲವನ್ನೂ ಅಷ್ಟೇ ಸೂಕ್ಷ್ಮವಾಗಿ ಕಟ್ಟಿ ಕೊಡುವ ಪ್ರಯತ್ನವನ್ನು ನಿರ್ದೇಶಕರು ಮಾಡಿದ್ದಾರೆ. ಇಲ್ಲಿ ಮಳೆ ಇದೆ, ಬೆಂಕಿ ಇದೆ, ತಣ್ಣನೆಯ ಗಾಳಿ ಇದೆ, ಬಿರುಗಾಳಿಯೂ ಇದೆ. ಹಾಗಾಗಿ ಇದೊಂದು ಆ್ಯಕ್ಷನ್ ಕಮ್ ಲವ್ ಸ್ಟೋರಿ ಎನ್ನಬಹುದು. ಕೆಲವು ಕಡೆ ಅನಗತ್ಯ ದೃಶ್ಯಗಳಿವೆ. ಆಗಾಗ ಬೇಡವೆನಿಸುವ ಮಾತುಗಳೂ ಇವೆ. ಅಂತಹ ಸಮಯದಲ್ಲಿ ಮನಸ್ಸಿಗೆ ನಾಟುವ ಮುದವೆನಿಸುವ ಹಾಡು ಕಾಣಿಸಿಕೊಂಡು ಆ ಮಿಸ್ಟೇಕ್ ಗಳನ್ನು ದೂರ ತಳ್ಳುತ್ತವೆ. ಆದ್ದರಿಂದ ಈ 90ರ ಕಾಲಘಟ್ಟದ ಕಥೆ ನೋಡುಗರಿಗೆ ಆಪ್ತವೆನಿಸುತ್ತಾ ಹೋಗುತ್ತದೆ.
ಸಿನಿಮಾದಲ್ಲಿ ಆಗಿನ ಕಥೆ ಹೇಳಿರುವುದು ತುಸು ಕಷ್ಟದ ಕೆಲಸವೇ. ಕೆಲವು ಕಡೆ ಅದು ಹರಸಾಹಸವಾಗಿಯೂ ಕಾಣುತ್ತದೆ. ಆದರೆ, ನಿರ್ದೇಶಕರ ಜಾಣತನ ಇಲ್ಲಿ ವರ್ಕೌಟ್ ಆಗಿರುವುದರಿಂದಲೇ ಸಿನಿಮಾ ಎಲ್ಲೂ ಬೋರ್ ಎನಿಸದೆ, ನೋಡಿಸಿಕೊಂಡು ಹೋಗುತ್ತದೆ. ಸಿನಿಮಾದ ಅವಧಿ ಕೊಂಚ ಜಾಸ್ತಿ ಆಯ್ತು ಅನ್ನುವ ಮಾತುಗಳನ್ನು ಬಿಟ್ಟರೆ, ಸಿನಿಮಾದಲ್ಲಿ ಬೇರೆ ಯಾವ ಮೈನಸ್ ಅಂಶಗಳು ಸಿಗುವುದಿಲ್ಲ. ಅವಧಿಯನ್ನು ಕೊಂಚ ಕಡಿಮೆ ಮಾಡಿದರೆ, ಮನಸ್ಸಿಗೆ ಇನ್ನಷ್ಟು ಆಪ್ತವಾಗುವ ಎಲ್ಲಾ ಸಾಧ್ಯತೆಗಳೂ ಇವೆ.
ಸಿನಿಮಾದ ಮೊದಲರ್ಧ ಜಾಲಿಯಾಗಿ ಕರೆದುಕೊಂಡು ಹೋಗುವ ಈ ಚಿತ್ರದ ಕಥೆ, ದ್ವಿತಿಯಾರ್ಧದಲ್ಲಿ ಒಂದಷ್ಟು ತಿರುವುಗಳನ್ನು ಕೊಡುತ್ತಾ ಹೋಗುತ್ತದೆ. ಚಿತ್ರದ ಕ್ಲ್ಯೆಮ್ಯಾಕ್ಸ್ ನಿಜಕ್ಕೂ ಊಹೆ ಮಾಡಿಕೊಳ್ಳಲಾಗುವುದಿಲ್ಲ. ಸಿನಿಮಾ ನೋಡಿ ಹೊರಬಂದವರಿಗೆ ಒಂದಷ್ಟು ಎದೆಭಾರ ಎನಿಸುವುದು ದಿಟ. ಆಗಿನ ಕಾಲಘಟ್ಟದ ಕಥೆಯಾದರೂ, ಈಗಿನ ಟ್ರೆಂಡ್ ಗೂ ಒಪ್ಪುವ ಮತ್ತು ಅಪ್ಪುವಂತಹ ಮೇಕಿಂಗ್ ಇಲ್ಲಿದೆ. ಎಲ್ಲಾ ವರ್ಗಕ್ಕೂ ನಾಟುವ ಎಳೆ ಇಲ್ಲಿರುವುದರಿಂದ ನೋಡುಗರನ್ನು ಒಂದಷ್ಟು ಭಾವುಕತೆಗೆ ದೂಡುತ್ತದೆ. ಸಿನಿಮಾದಲ್ಲಿ ಸಂಭಾಷಣೆಗೆ ಇನ್ನಷ್ಟು ಧಮ್ ಕಟ್ಟಿಕೊಡಬಹುದಿತ್ತು. ಸಂಕಲನ ಚಿತ್ರದ ವೇಗವನ್ನು ಎತ್ತಿ ಹಿಡಿದಿದೆ. ಸಿನಿಮಾದಲ್ಲಿ ಮಾತನಾಡುವ ಮತ್ತೊಂದು ಅಂಶವೆಂದರೆ ಅದು ಕಲಾತ್ಮಕತೆ. ಕಲಾನಿರ್ದೇಶಕರ ಕೈ ಚಳಕ ಆಗಿನ ಕಾಲಘಟ್ಟಕ್ಕೆ ಕರೆದೊಯ್ಯುತ್ತದೆ. ಇದು ಸಿನಿಮಾದ ಮತ್ತೊಂದು ಪ್ಲಸ್.
ಕಥೆ ಏನು?
ಚಿಕ್ಕಂದಿನಲ್ಲೇ ನಾಯಕ (ಅರುಣ್) ಕೋಪಿಷ್ಠ. ಅದು ದೊಡ್ಡವನಾದ ಮೇಲೂ ಮುಂದುವರೆಯುತ್ತೆ. ಊರಿನ ಬ್ರಾಹ್ಮಣ ಪೂಜಾರಿ ಮೇಲೆ ಅವನಿಗೆ ಎಲ್ಲಿಲ್ಲದ ಕೋಪ. ಕಾರಣ ಚಿಕ್ಕಂದಿನಲ್ಲಿ ಆದಂತಹ ಅವಮಾನ. ಅದು ಎಷ್ಟರಮಟ್ಟಿಗೆ ಅಂದರೆ, ಬ್ರಾಹ್ಮಣ ಮಗಳನ್ನು ಕಿಚಾಯಿಸುವಷ್ಟು. ಆದರೆ, ಮುಂಗೋಪಿ ನಾಯಕನೆಂದರೆ, ಆ ಬ್ರಾಹ್ಮಣ ಮಗಳಿಗೆ ಪ್ರೀತಿ. ಕಲ್ಲು ಮನಸ್ಸಿನ ನಾಯಕನನ್ನು ಹೇಗೆ ಮೃದುಗೊಳಿಸಿ, ಪ್ರೀತಿಯತ್ತ ಕರೆದೊಯ್ಯುತ್ತಾಳೆ ಅನ್ನೋದೇ ಕಥೆಯ ಒನ್ ಲೈನ್. ಇಬ್ಬರ ಪ್ರೀತಿ ಶುರುವಾಗೋಕೆ ಮೊದಲರ್ಧ ಮುಗಿಯುತ್ತೆ. ದ್ವಿತಿಯಾರ್ಧದಲ್ಲಿ ನಿರೀಕ್ಷಿಸದ ಸಂಗತಿಗಳು ನಡೆದುಹೋಗುತ್ತವೆ. ಸಿನಿಮಾದ ಕೊನೆಯಲ್ಲೆ ಎಲ್ಲವೂ ನಿಶಬ್ಧ. ಅಲ್ಲೊಂದಷ್ಟು ಘಟನೆಗಳು ನಡೆದುಹೋಗುತ್ತವೆ. ಈ ನಡುವೆ, ಜಾತಿ, ಧರ್ಮ, ಅಧರ್ಮ, ಪ್ರೀತಿ, ದ್ವೇಷ ಎಲ್ಲವೂ ಇಣುಕಿ ನೋಡುತ್ತವೆ. ತಣ್ಣಗೆ ಶುರುವಾದ ಪ್ರೀತಿ ಕೊನೆಗೆ ಕೆಂಡವಾಗುತ್ತೆ. ಅಂತ್ಯದಲ್ಲೇ ಏನಾಗುತ್ತೆ ಅನ್ನೋದೇ ಸಸ್ಪೆನ್ಸ್. ಆ ಕುತೂಹಲವಿದ್ದರೆ ಒಮ್ಮೆ 1990s ಸಿನಿಮಾ ನೋಡಲ್ಲಡ್ಡಿಯಿಲ್ಲ.
ನಾಯಕ ಅರುಣ್ ಫೈಟ್ ಮತ್ತು ಡ್ಯಾನ್ಸ್ ನಲ್ಲಿ ಇಷ್ಟವಾಗುತ್ತಾರೆ. ನಟನೆಯಲ್ಲೂ ಸೈ ಎನಿಸಿಕೊಂಡಿದ್ದಾರೆ. ಬಾಡಿಲಾಂಗ್ವೇಜ್, ಡೈಲಾಗ್ ಡಿಲವರಿಯಲ್ಲಿ ಹಿಂದೆ ಬಿದ್ದಿಲ್ಲ. ಫಸ್ಟ್ ಸಿನಿಮಾ ಆಗಿದ್ದರೂ, ಅನುಭವಿ ನಟರಂತೆ ಕಾಣುತ್ತಾರೆ. ಸಣ್ಣಪುಟ್ಟ ಮಿಸ್ಟೇಕ್ ಸರಿಪಡಿಸಿಕೊಂಡರೆ, ಕನ್ನಡಕ್ಕೊಬ್ಬ ಒಳ್ಳೆಯ ಹೀರೋ ಆಗುವ ಎಲ್ಲಾ ಲಕ್ಷಣಗಳಿವೆ. ನಾಯಕಿ ರಾಣಿವರದ್ ಅಂದದಷ್ಟೇ ಪಾತ್ರವನ್ನೂ ಕಟ್ಟಿಕೊಟ್ಟಿದ್ದಾರೆ. ಕ್ಲ್ಯೆಮ್ಯಾಕ್ಸ್ ನಲ್ಲಿ ಎಲ್ಲರನ್ನೂ ಮೌನವಾಗಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಉಳಿದಂತೆ ಅರುಣ್ ಕುಮಾರ್, ಶಾಸ್ತ್ರಿ ಪಾತ್ರದಲ್ಲಿ ಮೆಚ್ಚುಗೆ ಆಗುತ್ತಾರೆ. ಉಳಿದಂಂತೆ ಸ್ವಪ್ನ ಶೆಟ್ಟಿಗಾರ್ ಪಾತ್ರ ಗಮನಸೆಳೆಯುತ್ತೆ. ದೇವ್, ಶಿವಾನಂದ ಇತರರು ಪಾತ್ರಕ್ಕೆ ನ್ಯಾಯ ಒದಗಿಸಿದ್ದಾರೆ. ಮಹಾರಾಜ ಅವರ ಸಂಗೀತ ಇಲ್ಲಿ ಮಾತಾಡಿದೆ. ಅಪ್ಪ ನಿನ್ನ ಕಣ್ಣ ನೀರು, ಕಂಡೊಡನೆ ಮೌನಿ ನಾನು ಹಾತು ಮತ್ತು ಮಳೆ ಕುರಿತ ಸಾಂಗ್ ಇಷ್ಟವಾಗುತ್ತವೆ. ಹಾಲೇಶ್ ಅವರ ಕ್ಯಾಮೆರಾ ಕೈಚಳಕ ಸಿನಿಮಾದ ಅಂದವನ್ನು ಹೆಚ್ಚಿಸಿದೆ.
ಗಡಿದಾಟಿ ದಾಖಲೆ ಬರೆದ ‘ಟಾಕ್ಸಿಕ್’…ಜಾಗತಿಮಟ್ಟದಲ್ಲಿ ಕೆವಿಎನ್-ಯಶ್ ಹೊಸ ಕ್ರಾಂತಿ
ರಾಕಿಂಗ್ ಸ್ಟಾರ್ ಯಶ್ ಹಾಗೂ ಕೆವಿಎನ್ ನಿಮಾರ್ತೃ ವೆಂಕಟ್ ಕೊನಂಕಿ ಯೋಜನೆ ಹಾಗೂ ಯೋಚನೆ ಎರಡು ದೊಡ್ಡದಾಗಿದೆ ಅನ್ನೋದಕ್ಕೆ ಟಾಕ್ಸಿಕ್ ಸಿನಿಮಾ ಅಂಗಳದಿಂದ ಸಿಕ್ಕಿರುವ ಲೇಟೆಸ್ಟ್ ಮಾಹಿತಿಯೇ ಸಾಕ್ಷಿ. ರಾಕಿಂಗ್ ಸ್ಟಾರ್ ಆಗಿದ್ದ ಯಶ್ ಕೆಜಿಎಫ್ ಸಿನಿಮಾ ಮೂಲಕ ನ್ಯಾಷನಲ್ ಸ್ಟಾರ್ ಆಗಿ ಹೊರಹೊಮ್ಮಿದ್ದಾರೆ. ಟಾಕ್ಸಿಕ್ ಮೂಲಕ ಮತ್ತೊಂದು ದೊಡ್ಡ ಹೆಜ್ಜೆ ಇಟ್ಟಿರುವ ಯಶ್ ಪ್ಯಾನ್ ಇಂಡಿಯಾ ಬಿಟ್ಟು ಈಗ ಪ್ಯಾನ್ ವರ್ಲ್ಡ್ ಗುರಿ ಇಟ್ಟಿದ್ದಾರೆ. ಯಶ್ ವಿಷನ್ ಗೆ ಕೆವಿಎನ್ ಸಂಪೂರ್ಣವಾಗಿ ಬೆಂಬಲ ಕೊಟ್ಟಿದೆ.
ಟಾಕ್ಸಿಕ್ ಕೇವಲ ಪ್ಯಾನ್ ಇಂಡಿಯನ್ ಸಿನಿಮಾವಲ್ಲ. ಜಾಗತಿಕ ಮಟ್ಟದಲ್ಲಿ ಈ ಚಿತ್ರವನ್ನು ಕೊಂಡೊಯ್ಯುವ ನಿಟ್ಟಿನಲ್ಲಿ ನಿರ್ಮಾಪಕ ವೆಂಕಟ್ ಹಾಗೂ ಚಿತ್ರದ ನಾಯಕ ಯಶ್ ಶ್ರಮಿಸುತ್ತಿದ್ದಾರೆ. ಭಾರತೀಯ ಚಿತ್ರರಂಗದ ಅದ್ಧೂರಿ ಹಾಗೂ ದುಬಾರಿ ಸಿನಿಮಾವಾಗಿರುವ ಈ ಚಿತ್ರವನ್ನು ಕನ್ನಡ ಮತ್ತು ಇಂಗ್ಲಿಷ್ನಲ್ಲಿ ಚಿತ್ರೀಕರಿಸಲಾಗುತ್ತಿದೆ. ಬಳಿಕ ತೆಲುಗು, ತಮಿಳು, ಮಲಯಾಳಂ, ಹಿಂದಿ ಸೇರಿ ಇನ್ನೂ ಹಲವು ಅಂತಾರಾಷ್ಟ್ರೀಯ ಭಾಷೆಗಳಲ್ಲಿ ಡಬ್ ಮಾಡಲಾಗುತ್ತದೆ.
ಸಾಮಾನ್ಯವಾಗಿ ಸಿನಿಮಾವನ್ನು ಮೊದಲು ಮೂಲ ಭಾಷೆಯಲ್ಲಿ ಶೂಟ್ ಮಾಡಿ ಉಳಿದ ಭಾಷೆಗೆ ಡಬ್ ಮಾಡಿ ರಿಲೀಸ್ ಮಾಡಲಾಗುತ್ತದೆ. ಕೆಲವೊಮ್ಮೆ ಎರಡು ಭಾಷೆಗಳಲ್ಲಿ ಸಿನಿಮಾಗಳು ಒಟ್ಟಿಗೆ ಶೂಟ್ ಆದ ಉದಾಹರಣೆ ಇದೆ. ಆದರೆ, ಕನ್ನಡ ಹಾಗೂ ಇಂಗ್ಲಿಷ್ನಲ್ಲಿ ಒಟ್ಟಿಗೆ ಸಿನಿಮಾ ಶೂಟ್ ಈವರೆಗೆ ಆಗಿಲ್ಲ. ಟಾಕ್ಸಿಕ್ ತಂಡ ಈಗ ಕನ್ನಡ ಹಾಗೂ ಇಂಗ್ಲಿಷ್ನಲ್ಲಿ ಒಟ್ಟಿಗೆ ಸಿನಿಮಾ ಶೂಟ್ ಮಾಡಿ ಹೊಸ ದಾಖಲೆ ಬರೆದಿದೆ. ಈ ಮೂಲಕ ಅಪರೂಪದ ದಾಖಲೆಯನ್ನು ತನ್ನದಾಗಿಸಿಕೊಂಡಿದೆ. ಭಾಷೆ, ಗಡಿ, ಸಂಸ್ಕೃತಿ, ಈ ಎಲ್ಲ ಮೀತಿಗಳನ್ನು ಮೀರಿ ಹೊರಹೊಮ್ಮುವ ಚಿತ್ರವಾಗಬೇಕು ಎಂಬ ಚಿತ್ರತಂಡ ಶ್ರಮಿಸುತ್ತಿದೆ.
ಟಾಕ್ಸಿಕ್ ಸಿನಿಮಾವನ್ನು ವೆಂಕಟ್ ಕೆ. ನಾರಾಯಣ ಸಾರಥ್ಯದ ಕೆವಿಎನ್ ಪ್ರೊಡಕ್ಷನ್ ಹಾಗೂ ಯಶ್ ಮೊನಸ್ಟಾರ್ ಮೈಂಡ್ ಕ್ರಿಯೇಷನ್ ಜೊತೆಯಾಗಿ ಸೇರಿ ನಿರ್ಮಾಣ ಮಾಡುತ್ತಿದೆ. ಈಗಾಗಲೇ ಹಲವು ಅಂತಾರಾಷ್ಟ್ರೀಯ ಪ್ರಶಸ್ತಿ ಪಡೆದ ಗೀತು ಮೋಹನದಾಸ್ ಈ ಸಿನಿಮಾಗೆ ನಿರ್ದೇಶನ ಮಾಡುತ್ತಿದ್ದು. ಈ ಸಿನಿಮಾವನ್ನು ಪ್ಯಾನ್ ವರ್ಲ್ಡ್ ಹಂತಕ್ಕೆ ತೆಗೆದುಕೊಂಡು ಹೋಗಲು ಇಡೀ ಸಿನಿಮಾ ತಂಡ ಸಜ್ಜಾಗಿದೆ.
ಮನಸ್ಸು ಮಲ್ಲಿಗೆ ಕಂಬೈನ್ಸ್ ಲಾಂಛನದಲ್ಲಿ ನಿರ್ಮಾಣವಾಗಿರುವ, ನಂದಕುಮಾರ್ C M ನಿರ್ದೇಶಿಸಿರುವ ಹಾಗೂ ಅರುಣ್ – ರಾಣಿ ವರದ್ ಅಭಿನಯದ “1990s” ಚಿತ್ರ ಫೆಬ್ರವರಿ 28ಕ್ಕೆ ರಾಜ್ಯಾದ್ಯಂತ ಬಿಡುಗಡೆ ಕಾಣುತ್ತಿದೆ.
ಹಲವು ವರ್ಷಗಳಿಂದ ಚಿತ್ರರಂಗದೊಂದಿಗೆ ಒಡನಾಟವಿರುವ ನಂದ ಅವರಿಗೆ ಇದು ನಿರ್ದೇಶಕರಾಗಿ ಚೊಚ್ಚಲ ಚಿತ್ರ. ಇದು 1990 ರಲ್ಲಿ ನಡೆಯುವ ಪ್ರೇಮಕಥೆ. ಚಿತ್ರದ ಕಥೆ ನಡೆಯುವುದು ಈ ಕಾಲಘಟ್ಟದಲ್ಲಾದರೂ ನಾಯಕನ ಕಲ್ಪನೆ 35ವರ್ಷಗಳ ಹಿಂದಿನಾದಗಿರುತ್ತದೆ. ಈವರೆಗೂ ಸಾಕಷ್ಟು ಪ್ರೇಮಕಥೆಗಳು ಬಂದಿವೆಯಾದರೂ ನಮ್ಮ ಚಿತ್ರದ ಕಥೆ ವಿಭಿನ್ನ. ಚಿತ್ರದಲ್ಲಿ 1990s ಭಾಗ 90% ಇರುತ್ತದೆ. ಮಿಕ್ಕ 10% ಮಾತ್ರ ಈ ಕಾಲಘಟ್ಟದ್ದು.
ಇದು ಎಲ್ಲಾ ಭಾಷೆಗಳಿಗೂ ಸಲ್ಲುವ ಕಥೆ ಎಂದು ಸಾಕಷ್ಟು ಜನರು ಅಭಿಪ್ರಾಯ ಪಟ್ಟರು. ಈಗ “1990” s ಚಿತ್ರ ಐದು ಭಾಷೆಗಳಲ್ಲಿ ಪ್ಯಾನ್ ಇಂಡಿಯಾ ಚಿತ್ರವಾಗಿ ನಿರ್ಮಾಣವಾಗಿದೆ. ಎಂಬುದು ನಿರ್ದೇಶಕ ನಂದಕುಮಾರ್ ಮಾತು.
ನಾಲ್ಕು ಜನ ಸ್ನೇಹಿತರು ಸೇರಿ ಮನಸ್ಸು ಮಲ್ಲಿಗೆ ಕ್ರಿಯೇಷನ್ಸ್ ಸಂಸ್ಥೆಯ ಮೂಲಕ ನಿರ್ಮಾಣ ಮಾಡಿರುವ ನವಿರಾದ ಪ್ರೇಮಕಥೆ “1990”s ಚಿತ್ರಕ್ಕೆ ನಿಮ್ಮೆಲ್ಲರ ಬೆಂಬಲವಿರಲಿ ಎಂಬುದು ನಿರ್ಮಾಪಕ ಅರುಣ್ ಕುಮಾರ್ ಮಾತು.
ನಾಯಕ ಅರುಣ್ ರಂಗ ಭೂಮಿ ಕಲಾವಿದರು. ಇದು ಅವರ ಮೊದಲ ಚಿತ್ರ. ಚಿತ್ರದಲ್ಲಿ ನನ್ನದು ಮುಗ್ದ ಪ್ರೇಮಿಯ ಪಾತ್ರ. ಎಲ್ಲರಿಗೂ ಇದು ಇಷ್ಟವಾಗುತ್ತೆ ಎಂದರು ನಾಯಕ ಅರುಣ್.
ರಾಣಿ ವರದ್ ಅವರಿಗೆ ಇದು ವಿಶೇಷ ಸಿನಿಮಾ ಆಗಲಿದೆ ಎಂಬ ನಂಬಿಕೆ ಇದೆಯಂತೆ.
ಹಾಲೇಶ್ ಕ್ಯಾಮರಾ ಇದೆ. , ಅಶೋಕ್, ಸ್ಟಂಟ್ ಮಾಡಿಸಿದ್ದಾರೆ. ಸಾಧಿಕ್ ಸರ್ದಾರ್ ನೃತ್ಯ ನಿರ್ದೇಶಿಸಿದ್ದಾರೆ.ಕೃಷ್ಣ ಸಂಕಲನವಿದೆ.
ಚಿತ್ರ : ರಾಜು ಜೇಮ್ಸ್ ಬಾಂಡ್ ನಿರ್ದೇಶನ: ದೀಪಕ್ ಮಧುವನಹಳ್ಳಿ ನಿರ್ಮಾಣ: ಮಂಜುನಾಥ್ ವಿಶ್ವಕರ್ಮ, ಕಿರಣ್ ಭರ್ತೂರ್ ತಾರಾಗಣ: ಗುರುನಂದನ್, ಅಚ್ಯುತ್ ರಾವ್, ಚಿಕ್ಕಣ್ಣ, ರವಿಶಂಕರ್, ಮೃದುಲಾ, ಜೈ ಜಗದೀಶ್ ಇತರರು.
ಕನ್ನಡದಲ್ಲಿ ಈಗಾಗಲೇ ಅನೇಕ ಬಾಂಡ್ ಸಿನಿಮಾಗಳು ಬಂದಿವೆ. ಅವೆಲ್ಲಾ ಪಕ್ಕಾ ಬಾಂಡ್ ಛಾಯೆಯ ಸಿನಿಮಾಗಳು. ಆ ಸಾಲಿಗೆ ಈ ರಾಜು ಜೇಮ್ಸ್ ಬಾಂಡ್ ಕೂಡ ಸೇರಿಸಲು ಅಡ್ಡಿಯಿಲ್ಲ. ಆದರೆ, ಈ ಬಾಂಡ್ ಪಕ್ಕಾ ಲೋಕಲ್! ಹಾಗಂತ ತುಂಬಾ ಸೀರಿಯಸ್ ಜೇಮ್ಸ್ ಬಾಂಡ್ ಅಂತೂ ಅಲ್ಲ. ನೋಡುಗರನ್ನು ಮನರಂಜಿಸಿ, ಕಳಿಸುವ ಬಾಂಡ್ ಇವನು.
ಇಲ್ಲಿರುವ ಹೀರೋಗೆ ಬ್ಯಾಂಕ್ ವೊಂದರಲ್ಲಿ ಕೆಲಸ ಹಿಡಿದು ತಾನು ಪ್ರೀತಿಸೋ ಹುಡುಗಿನ ಮದ್ವೆ ಆಗಿ ಸೆಟ್ಲ್ ಆಗುವ ಅಸೆ. ಆದರೆ ಅವನ ಲೈಫಲ್ಲಿ ನಡೆಯೋದೇ ಬೇರೆ. ಅದೇ ಸಿನಿಮಾದ ಹೈಲೆಟ್.
ಆರಂಭದಿಂದ ಅಂತ್ಯದವರೆಗೆ ನಗಿಸುವ ಸಿನಿಮಾ ಇದು. ಹಾಗಂತ ಬರೀನಗು ತುಂಬಿಲ್ಲ. ಅಲ್ಲಲ್ಲಿ ಬೋಧನೆಯೂ ಇದೆ. ಬದುಕಿನ ಪಾಠವಿದೆ. ಗೆಳೆತನ, ಪ್ರೀತಿ, ತಾಯಿ ಸೆಂಟಿಮೆಂಟ್ ಇತ್ಯಾದಿ ಅಂಶಗಳು ಸಿನಿಮಾದ ಆಕರ್ಷಣೆ.
ಕಥೆ ಸರಳವಾಗಿದೆ. ಚಿತ್ರಕಥೆ ಇನ್ನಷ್ಟು ಬಿಗಿಯಾಗಿರಬೇಕಿತ್ತು. ಚಿತ್ರದ ವೇಗಕ್ಕೆ ಸಿನಿಮಾದ ಡೈಲಾಗ್ಸ್ ಸಾಥ್ ಕೊಟ್ಟಿವೆ. ಎಲ್ಲೋ ಒಂದು ಕಡೆ ಸಣ್ಣ ಪುಟ್ಟ ಕೊರತೆಗಳು ಕಾಣುತ್ತವೆ. ಹಾಗಂತ ಸಿನಿಮಾ ನೋಡುಗರಿಗೆ ಬೋರ್ ಎನಿಸಲ್ಲ. ಮಕ್ಕಳಿಂದ ಹಿಡಿದು ವಯಸ್ಸಾದವರೂ ಈ ಬಾಂಡ್ ಅವಾಂತರಗಳನ್ನು ಒಮ್ಮೆ ನೋಡಬಹುದು.
ಕಥೆ ಒಂದೇ ಊರಲ್ಲಿ ನಡೆಯುತ್ತೆ. ಇಲ್ಲಿ ಬಾಂಡ್ ಛಾಯೆ ಬದಲು ಆ ಹೀರೋನ ಆಸೆ ಆಕಾಂಕ್ಷೆಗಳು ಕಾಣಸಿಗುತ್ತವೆ. ಮೊದಲರ್ಧ ಕಾಮನ್ ಆಗಿ ಸಾಗುವ ಸಿನಿಮಾ ದ್ವಿತಿಯಾರ್ಧ ಮಜವೆನಿಸುತ್ತೆ. ಅಲ್ಲಲ್ಲಿ ಕುತೂಹಲದ ಜೊತೆ ಸ್ವಲ್ಪ ಟ್ವಿಸ್ಟ್ ಕೊಟ್ಟು ನೋಡುಗರನ್ನು ಟೆಸ್ಟ್ ಮಾಡುತ್ತೆ.
ಸಿನಿಮಾದಲ್ಲಿ ಮನರಂಜನೆ ಗ್ಯಾರಂಟಿ. ಸಿನಿಮಾ ಟೈಟಲ್ ನೋಡಿ ಒಳಬಂದರೆ ಜೇಮ್ಸ್ ಶೈಲಿಯ ಕಂಟೆಂಟ್ ಮರೆಯಬೇಕು. ಇದು ಹಿರೋ ತನಗೆ ತಾನು ಇಟ್ಟುಕೊಂಡಿರೋ ಹೆಸರಷ್ಟೇ. ಹಾಗಂತ ನೋಡೋಕೆ ಯಾವ ಮೋಸನು ಇಲ್ಲ.
ರಾಜುಗೆ ತನ್ನ ತಾಯಿ ಮನೆ ಪ್ರಾಣ. ಅತ್ತ ಪ್ರೀತಿಸೋ ಹುಡುಗಿ ಕೈ ಹಿಡಿಯುವ ಛಲ. ಇವೆರೆಡರ ಮಧ್ಯೆ ಹಣ ಆಸ್ತಿ ಅಡ್ಡಿಯಾಗುತ್ತೆ. ಆಗ ಬದುಕಲ್ಲಿ ತಾಯಿ ಕಟ್ಟಿದ ಮನೆ ಉಳಿಸಿಕೊಳ್ಳಬೇಕು. ಲವ್ವು ಮಾಡಿದ ಹುಡುಗಿ ಮದ್ವೆ ಆಗಬೇಕು. ಆಗ ಅವನ ಮುಂದೆ ಒಂದು ಐಡಿಯಾ ಬರುತ್ತೆ. ಅದೇ ಸಿನಿಮಾದ ಟ್ವಿಸ್ಟು. ಇಡೀ ಸಿನಿಮಾ ಅದರ ಮೇಲೆನೆ ಸಾಗುತ್ತೆ. ಕೊನೆಗೆ ಅವನು ಅಂದುಕೊಂಡಿದ್ದು ಆಗುತ್ತಾ ಅನ್ನೋದೇ ಕಥೆ. ಆ ಕುತೂಹಲ ಇದ್ದರೆ ಸಿನಿಮಾ ನೋಡಿ.
ಗುರುನಂದನ್ ಇಲ್ಲಿ ಎಂದಿಗಿಂತ ಇಷ್ಟವಾಗುತ್ತಾರೆ. ಅವರ ಪಾತ್ರವನ್ನು ಅಚ್ಚುಕಟ್ಟಾಗಿ ನಿರ್ವಹಿಸಿದ್ದಾರೆ. ಡ್ಯಾನ್ಸ್, ಫೈಟಲ್ಲೂ ಹಿಂದೆ ಬಿದ್ದಿಲ್ಲ. ಮೃದುಲಾ ಪಾತ್ರ ಮೃದುವಾಗಿದೆ. ಸಿಕ್ಕ ಪಾತ್ರಕ್ಕೆ ಮೋಸ ಮಾಡಿಲ್ಲ. ಉಳಿದಂತೆ ಅಚ್ಯುತ, ಚಿಕ್ಕಣ್ಣ, ಸಾಧುಕೋಕಿಲ ಎಲ್ಲರೂ ನಗಿಸುವಲ್ಲಿ ಹಿಂದೆ ಬಿದ್ದಿಲ್ಲ. ರವಿಶಂಕರ್ ವಿಶೇಷ ಪಾತ್ರದ ಮೂಲಕ ಗಮನ ಸೆಳೆದಿದ್ದಾರೆ. ಸಂಗೀತದ ಎರಡು ಹಾಡು ಚೆನ್ನಾಗಿವೆ. ಛಾಯಾಗ್ರಹಣ ಇಡೀ ಚಿತ್ರದ ಅಂದವನ್ನು ಹೆಚ್ಚಿಸಿದೆ.
ಮಂಗಳ ಅಂದರೆ ಜೀವ. ಜೀವನೇ ಇರದ ಮುಖ ಹೇಗೆ ನೋಡಲಿ… ಸಿದ್ಲಿಂಗು ಈ ರೀತಿ ಹೇಳುವ ಮೂಲಕ ಕಥೆ ಶುರುವಾಗುತ್ತೆ. ನೋಡುಗರು ಈ ಸಿದ್ಲಿಂಗು ಮೇಲೆ ನಿರೀಕ್ಷೆ ಇಟ್ಟುಕೊಂಡು ಬಂದರೆ ಮೋಸ ಆಗಲ್ಲ. ಈ ಬಾರಿ ನಿರ್ದೇಶಕರ ಮೂಲ ಆಶಯ ತಲುಪಿದೆ. ಸಿದ್ಲಿಂಗು ಚಿತ್ರದಲ್ಲಿ ನಿರ್ದೇಶಕರು ಇಷ್ಟವಾಗಿದ್ದರು. ಆದರೆ, ಒಂದಷ್ಟು ಡಬ್ಬಲ್ ಮೀನಿಂಗ್ ಮಾತುಗಳಿಂದ ಅದು ಬೇಕಿತ್ತಾ ಎಂಬ ಪ್ರಶ್ನೆಗೂ ಕಾರಣರಾಗಿದ್ದರು. ಆದರೆ, ಸಿದ್ಲಿಂಗು 2 ಸಿನಿಮಾದಲ್ಲಿ ವಿಜಯ ಪ್ರಸಾದ್ ಅವರು ಸಂಪೂರ್ಣ ಬದಲಾಗಿದ್ದಾರೆ ಅಂತಾನೇ ಹೇಳಬಹುದು. ಅದಕ್ಕೆ ಕಾರಣ, ಅವರು ಮುಂದುವರೆಸಿರುವ ಗಟ್ಟಿ ಕಥೆ. ಕಟ್ಟಿಕೊಟ್ಟಿರುವ ಚಿತ್ರಣ. ಮಾತುಗಳಲ್ಲಿರುವ ಹಿಡಿತ. ಹಾಗಾಗಿ ಒಂದೊಳ್ಳೆಯ ಸಿನಿಮಾ ಕೊಡಬೇಕೆಂಬ ಅವರ ಆಶಯ ಇಲ್ಲಿ ಈಡೇರಿದಂತಿದೆ.
ಮುಖ್ಯವಾಗಿ ಇಲ್ಲಿ ಗಮನಿಸಬೇಕಾದ್ದು ಅವರ ಚಿತ್ರಕಥೆ. ಅದು ಸುಮ್ಮನೆ ನೋಡಿಸಿಕೊಂಡು ಹೋಗುತ್ತೆ. ಇಲ್ಲೂ ತಮಾಷೆ ಇದೆ, ಹೇರಳ ಮಾತುಗಳೂ ಇವೆ. ಆದರೆ, ಅವ್ಯಾವು ಅಪಾರ್ಥ ತರುವುದಿಲ್ಲ. ಅಶ್ಲೀಲ ಎನಿಸುವುದಿಲ್ಲ. ಡಬ್ಬಲ್ ಮೀನಿಂಗ್ ಅಲ್ಲೇ ಅಲ್ಲ. ಆದರೂ, ಪಾತ್ರಗಳ ಮೂಲಕ ಹೊರಬರುವ ಮಾತುಗಳಲ್ಲಿ ನಗುವಿದೆ. ಅಲ್ಲಲ್ಲಿ ಅಪಹಾಸ್ಯವೂ ಇದೆ. ಹಾಗಾಗಿ ಈ ಚಿತ್ರ ನೋಡುಗರಿಗೆ ಸಂಪೂರ್ಣ ರುಚಿಸುತ್ತೆ. ಇಲ್ಲೂ ವಿಶಾಲು, ಮಿಣಿ ಮಿಣಿ, ಮುಕುಂದರಾಯ, ಅಮವಾಸ್ಯೆ ಆನಂದ ಹೀಗೆ ಒಂದಷ್ಟು ವಿಶೇಷ ಎನಿಸುವ ಪಾತ್ರಗಳು ಗಮನಸೆಳೆಯುತ್ತವೆ. ಅಲ್ಲಿ ಮಂಗಳಾ ಟೀಚರ್ ಇದ್ದರು. ಇಲ್ಲಿ ನಿವೇದಿತಾ ಎಂಬ ಹೊಸ ಟೀಚರ್ ಬಂದಿದ್ದಾರೆ. ಇಲ್ಲೂ ಅವರ ಕನಸಿನ ಕಾರು ಇದೆ. ಆದರೆ, ಈ ಸಲ ಆ ಕಾರು ತಮ್ಮದಾಗಿಸಿಕೊಳ್ತಾರ ಸಿದ್ಲಿಂಗು ಅನ್ನುವ ಕುತೂಹಲವಿದ್ದರೆ ಒಮ್ಮೆ ಸಿನಿಮಾ ನೋಡಬಹುದು.
ಮೊದಲರ್ಧ ಸುಮ್ಮನೆ ನೋಡಿಸಿಕೊಂಡು ಹೋಗುವ ಸಿನಿಮಾದಲ್ಲಿ ಮಜವೆನಿಸುವ ದೃಶ್ಯಗಳಿವೆ. ಡೈಲಾಗ್ ಇವೆ. ತರಹೇವಾರಿ ಪಾತ್ರಗಳೂ ಇವೆ. ಇಲ್ಲಿ ಮೈಸೂರನ್ನು ಸೊಗಸಾಗಿ ತೋರಿಸಿರುವ ಪ್ರಯತ್ನ ಸಫಲವಾಗಿದೆ. ಎಲ್ಲೂ ಬೋರ್ ಎನಿಸದೆ, ಡೈಲಾಗ್ ಮೂಲಕವೇ ಹೂರಣ ತಿಂದಷ್ಟೇ ಖುಷಿಪಡಿಸಿದ್ದಾರೆ ನಿರ್ದೇಶಕರು. ಆದರೆ, ಸಿನಿಮಾದಲ್ಲಿ ಹಾಡುಗಳು ಗುನುಗುವಂತಿಲ್ಲ. ಇಲ್ಲಿ ಅನೂಪ್ ಸೀಳಿನ್ ಅವರು ಹೆಚ್ಚು ಗಮನಸೆಳೆದಿಲ್ಲ. ಹಿನ್ನೆಲೆ ಸಂಗೀತಕ್ಕೆ ಇನ್ನಷ್ಟು ಹೆಚ್ಚು ಒತ್ತು ಕೊಡಬಹುದಿತ್ತು. ನಿರ್ದೇಶಕರು ಇಲ್ಲಿ ಒಂದು ಜಾಣತನ ಮೆರೆದಿದ್ದಾರೆ. ಅದೇನೆಂದರೆ, ಪ್ರತಿ ಪಾತ್ರಗಳಲ್ಲೂ ಆಗಾಗ ಒಂದಷ್ಟು ರಾಜಕಾರಣಿಗಳು, ಸಿನಿಮಾ ನಟರು, ಕ್ರಿಕೆಟಿಗರು ಬಂದು ಹೋಗುತ್ತಾರೆ. ಇಲ್ಲಿ ಸಿದ್ಧರಾಮಯ್ಯ, ಡಿ.ಕೆ.ಶಿವಕುಮಾರ್, ಶಿವಣ್ಣ, ಪೂಜಾಗಾಂಧಿ, ರಮ್ಯಾ, ಟೈಗರ್ ಪ್ರಭಾಕರ್, ಮುನಿರತ್ನ, ಪಬ್ಲಿಕ್ ಟಿವಿ ರಂಗಣ್ಣ ಹೀಗೆ ಒಂದಷ್ಟು ಖ್ಯಾತನಾಮರ ಹೆಸರುಗಳು ಬಂದು ಹೋಗುತ್ತವೆ. ಸಂದರ್ಭಕ್ಕೆ ನಗುವನ್ನೂ ತರಿಸುತ್ತವೆ. ಯಾಕೆ ಅನ್ನುವುದನ್ನು ಸಿನಿಮಾದಲ್ಲೇ ನೋಡಬೇಕು. ಇನ್ನು ಕೆಲವು ಕಡೆ ಎಮೋಷನಲ್ ಕೂಡ ಇದೆ. ಪ್ರೀತಿಯ ಜೊತೆ, ಭಾವುಕತೆ ಎನಿಸುವ ದೃಶ್ಯಗಳಿವೆ. ಅದು ಸಿನಿಮಾದ ಮತ್ತೊಂದು ಪ್ಲಸ್ ಎನ್ನಬಹುದು.
ಸಿನಿಮಾ ಕಥೆ ಸರಳವಾಗಿದೆ. ಎಲ್ಲೂ ಅದ್ಧೂರಿತನ ಎಂಬುದಿಲ್ಲ. ನೀಟ್ ಆಗಿ ನೋಡಿಸಿಕೊಂಡು ಹೋಗುವ ಸಿನಿಮಾ ಇದು. ವಿನಾಕಾರಣ ದೃಶ್ಯಗಳಿಲ್ಲ. ಅನಗತ್ಯ ಕಿರಿ ಕಿರಿ ಎನಿಸುವ ಮಾತುಗಳಿಲ್ಲ. ಆದರೆ, ಭಾವುಕತೆಯನ್ನು ಮತ್ತಷ್ಟು ಗಟ್ಟಿಯಾಗಿ ಕಟ್ಟಿಕೊಡಬಹುದಿತ್ತು. ಅದಿ್ಲ್ಲಿ ಅಷ್ಟಾಗಿ ವರ್ಕೌಟ್ ಆಗಿಲ್ಲ. ಸಿನಿಮಾದಲ್ಲಿ ಹುಡುಕಿದರೆ ಸಣ್ಣಪುಟ್ಟ ಮೈನಸ್ ಅಂಶಗಳಿವೆಯಾದರೂ, ಪ್ರತೀ ದೃಶ್ಯಗಳಲ್ಲಿ ಹಾಸ್ಯ ಹಿಡಿದಿಟ್ಟುಕೊಂಡಿರುವುದರಿಂದ ಅವೆಲ್ಲವೂ ಮಾಯವಾಗುತ್ತವೆ. ಒಟ್ಟಾರೆ, ಒಂದು ನೀಟ್ ಸಿನಿಮಾ ಇದಾಗಿದ್ದು, ಕೊಟ್ಟ ಕಾಸಿಗೆ ಮೋಸ ಆಗಲ್ಲ.
ಯೋಗಿ ಇಲ್ಲಿ ನಿಜಕ್ಕೂ ಹೈಲೆಟ್ ಆಗಿದ್ದಾರೆ. ಮೊದಲ ಸಿದ್ಲಿಂಗು ಸಿನಿಮಾದಲ್ಲಿ ಅವರ ತುಂಟತನ ಜಾಸ್ತಿ ಇತ್ತು. ಪೋಲಿ ಎನಿಸುವ ಮಾತುಗಳಿದ್ದವು. ಆದರೆ, ಇಲ್ಲಿ ಅದು ಕಮ್ಮಿ. ಒಂದಷ್ಟು ಪ್ರಬುದ್ಧರಾಗಿದ್ದಾರೆ. ಆ ಮೂಲಕ ಎಲ್ಲರಿಗೂ ಇಷ್ಟವಾಗುತ್ತಾರೆ. ಸೋನು ಗೌಡ ಅವರಿಲ್ಲಿ ನಿವೇದಿತಾ ಟೀಚರ್ ಆಗಿ ಇಷ್ಟವಾಗುತ್ತಾರೆ. ಸಿದ್ಲಿಂಗು ಕನಸಿಗೆ ಬಣ್ಣ ತುಂಬುವ ಹುಡುಗಿಯಾಗಿ ಸೈ ಎನಿಸಿಕೊಂಡಿದ್ದಾರೆ. ಬಿ.ಸುರೇಶ ಅವರ ಎಂದಿನ ಗತ್ತಿನ ನಟನೆ ಇಲ್ಲೂ ಮುಂದುವರೆದಿದೆ. ಮುಖ್ಯವಾಗಿ ಇಲ್ಲಿ ಪದ್ಮಜಾರಾವ್ ಗಮನಸೆಳೆದಿದ್ದಾರೆ. ಸುಮನ್ ರಂಗನಾಥ್ ಇಲ್ಲೂ ಇದ್ದಾರೆ. ಇರುವಷ್ಟು ಕಾಲ ಇಷ್ಟವಾಗುತ್ತಾರೆ. ಮಂಜುನಾಥ್ ಹೆಗಡೆ ನಟನೆ ಇಲ್ಲಿ ಆಕರ್ಷಣೆ ಎನಿಸುತ್ತೆ. ಮಹಾಂತೇಶ್ ಹಿರೇಮಠ ಇತರರು ಸಿಕ್ಕ ಪಾತ್ರಕ್ಕೆ ಮೋಸ ಮಾಡಿಲ್ಲ. ಇಲ್ಲಿ ನಿರ್ದೇಶಕರೂ ಇದ್ದಾರೆ. ಅದನ್ನು ಸಿನಿಮಾದಲ್ಲೇ ನೋಡಿ ಜೈ ಎನ್ನಬೇಕು.
ನೀವು ಎಲ್ಲಿಗೆ ಹೋಗೋದು? ನಾನು ಕನ್ಯಾಕುಮಾರಿಗೆ ಹೋಗ್ತಾ ಇದೀನಿ… ನಾನು ಅಲ್ಲಿಗೇ ಬರ್ತೀನಿ…
ಸಿನಿಮಾ ಶುರುವಾದ ಸ್ವಲ್ಪ ಹೊತ್ತಿಗೆ ಬರುವ ಆ ಇಬ್ಬರ ನಡುವಿನ ಸಂಭಾಷಣೆ ಇದು. ಅವರಿಬ್ಬರೂ ಕನ್ಯಾಕುಮಾರಿಯತ್ತ ಪಯಣ ಬೆಳೆಸುತ್ತಾರೆ. ಆ ಜರ್ನಿ ನಡುವೆ ಅವರಿಬ್ಬರ ಮಾತು, ತುಂಟತನ, ಎಮೋಷನ್, ನಗು, ಅಳು ಎಲ್ಲವೂ ಮೇಳೈಸುತ್ತಲೇ ನೋಡುಗರನ್ನು ಭಾವುಕತೆಗೆ ದೂಡುತ್ತಾ ಹೋಗುತ್ತೆ. ಸಿನಿಮಾದ ಕಥೆ ತುಂಬಾ ಸಿಂಪಲ್. ಆದರ, ಅದರ ಆಶಯ ಹೊಸದಾಗಿದೆ. ಪ್ರೀತಿ ಮಾಡುವುದು ದೊಡ್ಡದ್ದಲ್ಲ. ಅದನ್ನು ಕೊನೆಯವರೆಗೆ ಉಳಿಸಿಕೊಳ್ಳೋದು ದೊಡ್ಡದು ಅನ್ನುವ ಸಾರಾಂಶ ಇಲ್ಲಿದೆ. ಇದೊಂದು ಮನಸ್ಸಿಗೆ ನಾಟುವ ಲವ್ ಸ್ಟೋರಿ. ಇಲ್ಲಿ ಇಬ್ಬರು ಹೀರೋಗಳಿದ್ದಾರೆ. ಅವರಿಬ್ಬರಿಗೂ ಒಬ್ಬೊಬ್ಬ ನಾಯಕಿಯರಿದ್ದಾರೆ. ಇಬ್ಬರದೂ ಲವ್ ಸ್ಟೋರಿ ಇದೆ. ಆ ಎರಡು ಲವ್ ಸ್ಟೋರಿ ಟ್ರಾಕ್ ಮಾತ್ರ ಬೇರೆ ಬೇರೆ. ಕೊನೆಯವರೆಗೂ ಅವರಿಬ್ಬರ ಪ್ರೇಮಕಥೆ ಕಾಡುತ್ತೆ, ಅಲ್ಲಲ್ಲಿ ಅಳಿಸುತ್ತೆ, ಕೊಂಚ ಭಾವನಾಲೋಕಕ್ಕೆ ದೂಡುತ್ತೆ. ಅಷ್ಟಕ್ಕೂ ಅವರಿಬ್ಬರ ಲವ್ ಎಂಥದ್ದು ಅನ್ನುವುದಕ್ಕೆ ಒಮ್ಮೆ ಸಿನಿಮಾ ನೋಡಲ್ಲಡ್ಡಿಯಿಲ್ಲ.
ಇಲ್ಲಿ ಆಳವಾದ ಪ್ರೀತಿ ಇದೆ. ಒರಟುತನದೊಳಗಿನ ಮೃದುಧೋರಣೆಯ ಮನಸ್ಸಿದೆ. ಮುಗ್ಧತೆ ಇದೆ. ದಡ್ಡತನವಿದೆ. ಜಾಣತನವೂ ಇದೆ. ಒಟ್ಟಾರೆ. ಇಡೀ ಸಿನಿಮಾ ಮುದ ಕೊಡುವಂತಹ ವಾತಾವರಣ ಸೃಷ್ಟಿಸುತ್ತೆ ಅನ್ನುವುದರಲ್ಲಿ ಎರಡು ಮಾತಿಲ್ಲ. ಪ್ರೀತಿಯ ಕಥೆಗಳಿಗೆ ಅದರದ್ದೇ ಆದ ಶಕ್ತಿ ಇರುತ್ತೆ. ಅಂಥದ್ದೊಂದು ಶಕ್ತಿ, ಸೆಳೆತ ಈ ಕಥೆಯಲ್ಲಿದೆ. ನಿರ್ದೇಶಕರ ನಿರೂಪಣೆಯಲ್ಲಿ ಇನ್ನಷ್ಟು ಬಿಗಿ ಹಿಡಿತ ಬೇಕಿತ್ತು. ಅದನ್ನು ಹೊರತು ಪಡಿಸಿದರೆ ಚಿತ್ರಕಥೆಯ ವೇಗ ಸಿನಿಮಾವನ್ನು ನೋಡುವಂತೆ ಮಾಡಿದೆ. ಉಳಿದಂತೆ ಚಿತ್ರದುದ್ದಕ್ಕೂ ಬರುವ ಕೆಲ ಟ್ವಿಸ್ಟುಗಳು ಸಿನಿಮಾದ ಹೈಲೆಟ್ ಅನ್ನಬಹುದು. ಇಲ್ಲೂ ಕೆಲವು ಅನಗತ್ಯ ದೃಶ್ಯಗಳಿವೆ. ಅದನ್ನು ಬದಿಗೊತ್ತಿ ನೋಡಿದರೆ, ಸಿನಿಮಾ ಆಪ್ತವಾಗುತ್ತ ಹೋಗುತ್ತದೆ.
ಕಥೆ ಏನು?
ನಾಯಕ ಅಭಿ (ಪ್ರಮೋದ್) ಓದುವ ಕಾಲೇಜಿನಲ್ಲೇ ನಾಯಕಿ ರಚೇಲ್ ಡೇವಿಡ್ ಇರ್ತಾಳೆ. ಆಕೆಯನ್ನು ನೋಡಿದ ಕೂಡಲೇ ಅವನು ನೇರವಾಗಿ ಮದ್ವೆ ಆಗ್ತೀಯಾ ಅಂತ ಕೇಳ್ತಾನೆ. ಇಬ್ಬರ ನಡುವೆ ಪ್ರೀತಿ ಹುಟ್ಟುತ್ತೆ. ಅದು ಮದ್ವೆಗೂ ತಿರುಗುತ್ತೆ. ಎಲ್ಲಾ ಪ್ರೇಮಿಗಳ ಕಥೆಯಲ್ಲಿ ಅಪ್ಪಂದಿರೇ ವಿಲನ್. ಇಲ್ಲೂ ನಾಯಕಿಯ ಅಪ್ಪನೇ ವಿಲನ್. ಅವರ ವಿರೋಧದ ನಡುವೆಯೂ ಮದ್ವೆ ಆಗುತ್ತೆ. ಆ ಮದ್ವೆ ಕೊನೆಯವರೆಗೆ ಉಳಿಯುತ್ತಾ ಇಲ್ಲವಾ ಅನ್ನೋದೇ ಒಂದು ಕಥೆ. ಇದು ಒಂದು ಜೋಡಿಯ ಕಥೆಯಾದರೆ, ಇನ್ನೊಂದು ಜೋಡಿಯ ಕಥೆ ಇದಕ್ಕಿಂತಲೂ ಭಿನ್ನ. ಅವನ ಹೆಸರು ರಾಮ್. ತುಂಬ ಮುಗ್ಧ, ಒಂದು ರೀತಿ ಜಾಣದಡ್ಡ! ಬಾಲ್ಯದಲ್ಲಿ ಸಿಗುವ ಗೆಳತಿ ಜೊತೆ ಹೆಚ್ಚು ಒಡನಾಟ. ಯೌವ್ವನಕ್ಕೆ ಬರುವ ಹೊತ್ತಿಗೆ ಇಬ್ಬರ ನಡುವೆ ಚಿಗುರಿದ ಪ್ರೀತಿ. ಆ ಪ್ರೀತಿ ಮೇಲೆ ಒಬ್ಬನ ಕಣ್ಣು. ಈ ಮಧ್ಯೆ ಅವರಿಬ್ಬರ ಪ್ರೀತಿ ಉಳಿಯುತ್ತಾ ಇಲ್ಲವಾ ಅನ್ನೋದು ಕಥೆ. ಇಲ್ಲಿ ಎಮೋಷನಲ್ ಅಂಶಗಳು ತುಂಬಿರುವುದರಿಂದ ನೋಡುಗರ ಕಣ್ಣು ಒದ್ದೆ ಮಾಡುತ್ತದೆ. ಎಲ್ಲೋ ಒಂದು ಕಡೆ ಸಿನಿಮಾದ ವೇಗ ಕಮ್ಮಿ ಆಯ್ತು ಅನ್ನುವ ಹೊತ್ತಿಗೆ ಹಾಡು, ಫೈಟು ಎದುರಾಗಿ ವೇಗಮಿತಿ ಹೆಚ್ಚುತ್ತದೆ. ಒಂದು ನವಿರಾದ ಲವ್ ಸ್ಟೋರಿಯನ್ನು ತುಂಬಾ ಭಾವನಾತ್ಮಕವಾಗಿ ಕಟ್ಟಿಕೊಡುವ ಪ್ರಯತ್ನವನ್ನು ನಿರ್ದೇಶಕರು ಮಾಡಿದ್ದಾರೆ. ಎರಡು ಲವ್ ಸ್ಟೋರಿ ಇಲ್ಲಿದ್ದರೂ, ಎರಡಕ್ಕೂ ತನ್ನದೇ ಆದ ಗಟ್ಟಿತನವಿದೆ. ನೋಡುಗರನ್ನು ಅತ್ತಿತ್ತ ಅಲ್ಲಾಡಿಸದಂತೆ ನೋಡಿಸಿಕೊಂಡು ಹೋಗುವ ತಾಕತ್ತು ಈ ಸ್ಟೋರಿಗಿದೆ.
ಸಿನಿಮಾದಲ್ಲಿ ಪ್ರಮೋದ್ ರಗಡ್ ಆಗಿ ಕಾಣಿಸಿಕೊಂಡಿದ್ದಾರೆ. ಒರಟು ಪಾತ್ರವಾದರೂ, ಅಲ್ಲಲ್ಲಿ ಪಾಪ ಎನಿಸುವಷ್ಟರ ಮಟ್ಟಿಗೆ ಇಷ್ಟವಾಗುತ್ತಾರೆ. ಅವರ ಡೈಲಾಗ್ ಡಿಲವರಿ, ಬಾಡಿಲಾಂಗ್ವೇಜ್ ಎರಡರಲ್ಲೂ ಸೈ ಎನಿಸಿಕೊಂಡಿದ್ದಾರೆ. ಫೈಟ್ ವಿಚಾರದಲ್ಲಿ ಹಿಂದೆ ಬಿದ್ದಿಲ್ಲ. ಇನ್ನು ಪೃಥ್ವಿ ಅಂಬರ್ ಅವರ ಪಾತ್ರ ವಿಶೇಷ ಎನಿಸುತ್ತೆ. ಪೃಥ್ವಿ ಆ ಪಾತ್ರವನ್ನು ಜೀವಿಸಿದ್ದಾರೆ. ನೋಡುಗರಿಗೂ ಇಷ್ಟವಾಗುತ್ತಾರೆ. ಉಳಿದಂತೆ ರಚೇಲ್ ಡೇವಿಡ್ ಅಂದವಾಗಿರುವಷ್ಟೇ ಪಾತ್ರವನ್ನು ಕಟ್ಟಿಕೊಟ್ಟಿದ್ದಾರೆ. ಅಶ್ವತಿ ಪಾತ್ರದ ಮೂಲಕ ಗಮನಸೆಳೆಯುತ್ತಾರೆ. ಉಳಿದಂತೆ ಇಲ್ಲಿ ಶರತ್ ಲೋಹಿತಾಶ್ವ ಮತ್ತು ಅಚ್ಯುತ್ ಕುಮಾರ್ ಪಾತ್ರಕ್ಕೆ ನ್ಯಾಯ ಸಲ್ಲಿಸಿದ್ದಾರೆ. ಸಿನಿಮಾದಲ್ಲಿ ಎರಡು ಹಾಡು ಗುನುಗುವಂತಿದೆ. ಹಿನ್ನೆಲೆ ಸಂಗೀತಕ್ಕಿನ್ನೂ ಧಮ್ ಇರಬೇಕಿತ್ತು. ಛಾಯಾಗ್ರಹಣದಲ್ಲಿ ಸೊಬಗಿದೆ.
