ಕನ್ನಡ ನಿರ್ದೇಶಕ ಸುಧೀರ್ ಅತ್ತಾವರ್ ದೂರದ ಮುಂಬೈನಲ್ಲಿದ್ದುಕೊಂಡೇ ಒಂದಷ್ಟು ಸುದ್ದಿ ಮಾಡುತ್ತಿದ್ದಾರೆ. ಈಗಾಗಲೇ ಬಾಲಿವುಡ್ ಅಂಗಳದಲ್ಲಿ ತಮ್ಮದೇ ಆದ ಸಕ್ಸಸ್ ಫಿಲ್ಮ್ಸ್ ಹೆಸರಿನ ಸ್ಟುಡಿಯೊ ಶುರು ಮಾಡಿ ಬಾಲಿವುಡ್ ಮಂದಿಯ ಫೇವರ್ ಎನಿಸಿರುವ ಸುಧೀರ್ ಅತ್ತಾವರ್, ಈಗ ಹೊಸದೊಂದು ಸಾಹಸಕ್ಕೆ ಕೈ ಹಾಕಿದ್ದಾರೆ. ಹಾಗಂತ ಅವರು ಹೊಸ ಹಿಂದಿ ಸಿನಿಮಾ ಶುರು ಮಾಡಿದ್ದಾರಾ? ಈ ಪ್ರಶ್ನೆ ಸಹಜ. ಅವರು ಈಗಾಗಲೇ ಮರಾಠಿ ಹಾಗು ಹಿಂದಿ ಭಾಷೆಯ ಸಿನಿಮಾ ಮಾಡಿದ್ದಾಗಿದೆ. ಹೊಸದೊಂದು ಪ್ಯಾನ್ ಇಂಡಿಯಾ ಚಿತ್ರಕ್ಕೂ ಪ್ಲಾನ್ ಮಾಡಿದ್ದಾರೆ. ಇದರ ಜೊತೆ ಹೊಸ ಕಾರ್ಯಕ್ಕೆ ಮುಂದಾಗಿದ್ದಾರೆ ಅನ್ನೋದೇ ಈ ಹೊತ್ತಿನ ವಿಶೇಷ.
ಹೌದು, ನಿರ್ದೇಶಕ ಸುಧೀರ್ ಅತ್ತಾವರ್ ಅವರು ಈಗ ಕೈ ಹಾಕಿರೋದು ದೇಶದ ಮಹಾನ್ ಸ್ವಾತಂತ್ರ್ಯ ಹೋರಾಟಗಾರರನ್ನು ಪರಿಚಯಿಸುವಂತಹ ಕೆಲಸಕ್ಕೆ. ಈಗಾಗಲೇ ಅದು ಬಾನುಲಿ ಸರಣಿ ಮೂಲಕ ಪ್ರಸಾರವಾಗುತ್ತಿದೆ. ಅಂದಹಾಗೆ, ‘ಹಮಾರೇ ಸ್ವತಂತ್ರ್ಯ ತಾ ಸೇನಾನಿ’ ಶೀರ್ಷಿಕೆಯಡಿ ಹೊಸ ಸರಣಿ ಶುರು ಮಾಡಿದ್ದು, ಎಲ್ಲೆಡೆಯಿಂದ ಉತ್ತಮ ಪ್ರತಿಕ್ರಿಯೆ ಸಿಗುತ್ತಿದೆ.
ಸುಧೀರ್ ಅತ್ತಾವರ್ ಅವರು ಮುಂಬೈನಲ್ಲಿರೋ ತಮ್ಮಸಕ್ಸಸ್ ಫಿಲ್ಮ್ಸ್ ಮೂಲಕ ಈ ಬಾನುಲಿ ಸರಣಿಯನ್ನು ನಿರ್ಮಾಣ ಮಾಡಿದ್ದಾರೆ. ಡಿ.ಕೆ ಫ್ಲ್ಯಾಗ್ ಫೌಂಡೇಷನ್ ಈ ಕಾರ್ಯಕ್ರಮವನ್ನು ಅರ್ಪಿಸಿದ್ದು, ಡಿ.ಕೆ. ಫ್ಲ್ಯಾಗ್ ಫೌಂಡೇಷನ್ ನ ಡಾ. ರಾಕೇಶ್ ಬಕ್ಷಿ ಈ ಸರಣಿಯನ್ನು ನಡೆಸಿಕೊಡಲಿದ್ದಾರೆ. ಖ್ಯಾತ ಹಿನ್ನೆಲೆ ಗಾಯಕರಾದ ಶಾನ್, ಶರೋನ್ ಪ್ರಭಾಕರ್, ಆರತಿ ಮುಖರ್ಜಿ, ಡಾ.ಸಂದೇಶ್ ಮಾಯೆಕರ್, ಹಾಕಿ ಪ್ಲೇಯರ್ ಧನರಾಜ್ ಪಿಳೈ, ಹಜ್ ಹೌಸ್ ಅಧ್ಯಕ್ಷ ಮಕ್ಸೂದ್ ಅಹ್ಮದ್ ಖಾನ್, ಬೀನಾ ಸಂತೋಷ್ ಸೇರಿದಂತೆ ಇತರರು ಇಲ್ಲಿ ಭಾಗವಹಿಸುತ್ತಿದ್ದಾರೆ ಅನ್ನೋದು ವಿಶೇಷ.
ಅಂದಹಾಗೆ, ಈ ಕಾರ್ಯಕ್ರಮ ದೆಹಲಿ, ಮುಂಬೈ, ಕೋಲ್ಕತಾ, ಚೆನೈ,ಹೈದರಾಬಾದ್, ಫೋರ್ಟ್ ಬ್ಲೇರ್, ಚಂಡೀಘರ್,ಲಕ್ನೋ, ಅಹಮದಾಬಾದ್,ಪೂನಾ, ನಾಗ್ಪುರ, ಬೆಂಗಳೂರು, ಮಂಗಳೂರು ಸೇರಿ ದೇಶದ ಪ್ರಮುಖ ಬಾನುಲಿ ಕೇಂದ್ರಗಳಲ್ಲಿ ಈಗಾಗಲೇ ಶರುವಾಗಿದೆ. ಆಗಸ್ಟ್ 15ರವರೆಗೆ ಪ್ರತಿ ದಿನ ಸಂಜೆ4.30ರಿಂದ ಪ್ರಸಾರವಾಗುತ್ತಿದೆ. ವಿಶೇಷವೆಂದರೆ, ಈ ಬಾನುಲಿ ಸರಣಿ ಕಾರ್ಯಕ್ರಮ 75ನೇ ಸ್ವಾತಂತ್ರ್ಯ ಹೋರಾಟಗಾರರ ಕುರಿತಾಗಿದ್ದು, 15 ಕಂತುಗಳಲ್ಲಿ ಪ್ರಸಾರವಾಗಲಿದೆ.
ಅದೇನೆ ಇರಲಿ, ಕನ್ನಡಿಗ ಸುಧೀರ್ ಅತ್ತಾವರ್, ದೂರದ ಮುಂಬೈನಲ್ಲಿದ್ದುಕೊಂಡೇ ತಮ್ಮ ಪ್ರತಿಭಾವಂತರ ತಂಡ ಕಟ್ಟಿಕೊಂಡು, ಹೊಸ ಪ್ರಯತ್ನ ಮಾಡುತ್ತಲೇ ಇದ್ದಾರೆ. ಆ ಸಾಲಿಗೆ ಈ ಬಾನುಲಿ ಸರಣಿ ಕೂಡ ವಿನೂತನ ಪ್ರಯತ್ನ. ಇದು ಆ ತಂಡದ ದೇಶಾಭಿಮಾನಕ್ಕೊಂದು ಸಾಕ್ಷಿ ಅಲ್ಲದೆ ಮತ್ತೇನು? ಇನ್ನು ಇಂತಹ ಹಲವು ವಿಶೇಷ ಕಾರ್ಯಕ್ರಮಗಳು ಅವರ ಸಕ್ಸಸ್ ಫಿಲ್ಮ್ಸ್ ಮೂಲಕ ಬರಲಿ. ಹಾಗೆಯೇ ಅವೆಲ್ಲವೂ ಸಕ್ಸಸ್ ಆಗಲಿ ಅನ್ನೋದು ‘ಸಿನಿಲಹರಿ’ ಆಶಯ.
ಡಾಲಿ ಧನಂಜಯ್ ಗಂಧದಗುಡಿಯ ಹೆಮ್ಮೆಯ ಕಲಾವಿದ. ತಮ್ಮ ಅಘಾದವಾದ ಪ್ರತಿಭೆಯಿಂದ ಗಡಿದಾಟಿ ಗುರ್ತಿಸಿಕೊಂಡಿದ್ದಾರೆ. ಸ್ಯಾಂಡಲ್ ವುಡ್ ಗಷ್ಟೇ ಸೀಮಿತವಾಗಿದ್ದ ಧನಂಜಯ್ ಈಗ ಸೌತ್ ಸಿನಿಮಾ ಇಂಡಸ್ಟ್ರಿ ತುಂಬೆಲ್ಲಾ ಹೆಸರು ಮಾಡೋದಕ್ಕೆ ಅವಕಾಶ ಸಿಕ್ಕಿದೆ. ಪರಭಾಷಾ ಅಂಗಳದಲ್ಲಿ ಬ್ರ್ಯಾಂಡ್ ಆಗುವತ್ತ ಲಗ್ಗೆ ಇಡುತ್ತಿರುವ ಡಾಲಿ ಹೆಡ್ ಬುಷ್ ಮೂಲಕ ಪ್ಯಾನ್ ಇಂಡಿಯಾ ತಲುಪಲಿದ್ದಾರೆ. ಆಲ್ ಓವರ್ ಇಂಡ್ಯಾ ಡಾಲಿ ಸ್ಟಾರ್ ಆಗುವಂತಹ ಹೆಡ್ ಬುಷ್ ಚಿತ್ರಕ್ಕೆ ತೆಲುಗು ಪಿಲ್ಲಾ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ. ಆ ನಟಿಯ ಹೆಸರು ಪಾಯಲ್ ರಜಪೂತ್.
ಪಾಯಲ್ ರಜಪೂತ್ ಹೆಸರು ಕೇಳಿದರೆ ಥಟ್ ಅಂತ ಆಕೆ ನೆನಪಾಗದೇ ಇರಬಹುದು. ಆದರೆ, ‘ಆರ್ ಎಕ್ಸ್ 100’ ಅಂದಾಕ್ಷಣ ಆಕೆ ನಿಮ್ಮ ಕಣ್ಮುಂದೆ ಬಂದು ನಿಲ್ಲೋದು ಪಕ್ಕಾ. ಆ ಸೆಕ್ಸಿ ಸುಂದರಿಯನ್ನೇ ಹೆಡ್ ಬುಷ್ ಚಿತ್ರತಂಡ ಕನ್ನಡಕ್ಕೆ ಕರೆತರುತ್ತಿದ್ದಾರೆ. ಸೆನ್ಸೇಷನಲ್ ಡಾಲಿ ಪಕ್ಕದಲ್ಲಿ ನಿಂತು ಹಲ್ ಚಲ್ ಎಬ್ಬಿಸೋಕೆ ಪಾಯಲ್ ಒಪ್ಪಿಕೊಂಡಿದ್ದಾರೆ. ವಿಕ್ಟರಿ ವೆಂಕಟೇಶ್, ನಾಗಚೈತನ್ಯ, ಮಾಸ್ ಮಹರಾಜ ರವಿತೇಜ ಸೇರಿದಂತೆ ಹಲವು ಸ್ಟಾರ್ ಗಳ ಚಿತ್ರಗಳಲ್ಲಿ ಪಾಯಲ್ ನಟಿಸಿದ್ದಾರೆ.
ಹೆಡ್- ಬುಷ್ ಬೆಂಗಳೂರಿನ ಭೂಗತ ದೊರೆ ಎಂ.ಪಿ. ಜಯರಾಜ್ ಅವರ ಜೀವನಾಧರಿತ ಚಿತ್ರ. ಮಾಜಿ ಡಾನ್ ಪಾತ್ರದಲ್ಲಿ ಡಾಲಿ ಧನಂಜಯ್ ಅಟ್ಟಹಾಸ ಮೆರೆಯಲಿದ್ದಾರೆ. ಅಗ್ನಿ ಶ್ರೀಧರ್ ಅವರು ಕಥೆ ಚಿತ್ರಕಥೆ ಎಣೆದಿದ್ದು, ಶೂನ್ಯ ಎನ್ನುವ ಹೊಸ ಪ್ರತಿಭೆ ಆಕ್ಷನ್ ಕಟ್ ಹೇಳ್ತಿದ್ದಾರೆ. ನಾಳೆಯಿಂದ ಅಂದರೆ ಆಗಸ್ಟ್ 09 ರಿಂದ ಚಿತ್ರೀಕರಣ ಶುರುವಾಗಲಿದೆ. ಮೈ ಕೊಡವಿಕೊಂಡು ಹೆಡ್ ಬುಷ್ ಚಿತ್ರತಂಡ ಅಖಾಡಕ್ಕೆ ಇಳಿಯಲಿದೆ.
ಡಾಲಿಯ ಹೆಡ್ ಬುಷ್ ಚಿತ್ರಕ್ಕೆ ಪವರ್ ಸ್ಟಾರ್ ಪುನೀತ್ ಚಾಲನೆ ಕೊಟ್ಟಿದ್ದರು. ಟೈಟಲ್ ಅನೌನ್ಸ್ ಮಾಡಿ ಶುಭಕೋರಿದ್ದರು. ಅಶು ಬೆದ್ರ ಚಿತ್ರದ ನಿರ್ಮಾಣದ ಹೊಣೆ ಹೊತ್ತಿದ್ದರು. ಆದ್ರೀಗ ಹೆಡ್ ಬುಷ್ ಚಿತ್ರವನ್ನು ಕೈಬಿಟ್ಟಿದ್ದಾರೆ. ಆದ್ದರಿಂದ ಡಾಲಿ ಧನಂಜಯ್ ಹೆಡ್ ಬುಷ್ ನ ಟೇಕಾಫ್ ಮಾಡ್ತಿದ್ದಾರೆ. ಡಾಲಿ ಪಿಕ್ಚರ್ಸ್ ಬ್ಯಾನರ್ ಅಡಿಯಲ್ಲಿ ಸಿನಿಮಾ ನಿರ್ಮಾಣ ಗೊಳ್ಳುತ್ತಿದ್ದು ಡಾಲಿ ಜೊತೆಗೆ ತ್ರಿವಿಕ್ರಮ ಚಿತ್ರದ ನಿರ್ಮಾಪಕ ಸೋಮಣ್ಣ ಕೈಜೋಡಿಸ್ತಿದ್ದಾರೆ. ಈ ಹಿಂದೆ ಹೇಳಿದಂತೆ ಹೆಡ್ ಬುಷ್ ಆರು ಭಾಷೆಯಲ್ಲಿ ನಿರ್ಮಾಣಗೊಳ್ತಿದೆ. ಎರಡು ಚಾಪ್ಟರ್ ಗಳಾಗಿ ತಯ್ಯಾರಾಗುತ್ತಿದ್ದು, ಆಗಸ್ಟ್ 23 ರಂದು ಡಾಲಿ ಬರ್ತ್ ಡೇ ದಿನ ಹೆಡ್ ಬುಷ್ ಫಸ್ಟ್ ಲುಕ್ ರಿಲೀಸ್ ಆಗಲಿದೆ. ಶೀಘ್ರದಲ್ಲೇ ಚಿತ್ರದ ಅತೀ ದೊಡ್ಡ ತಾರಾ ಬಳಗದ ಲಿಸ್ಟ್ ಹೊರಬೀಳಲಿದೆ.
ಎಲ್ಲಾ ಕ್ಷೇತ್ರಕ್ಕೂ ಹೀಗೇನಾ ಅಥವಾ ಸಿನಿಮಾ ರಂಗಕ್ಕೆ ಮಾತ್ರ ಹೀಗೇನಾ…? – ಹೀಗಂತ ಗಾಂಧಿನಗರದ ಮಂದಿ ಮಾತಾಡಿಕೊಳ್ಳುವಂತಾಗಿದೆ. ಹೌದು, ಇದಕ್ಕೆ ಕಾರಣ, ಕೊರೊನಾ ಭಯ. ಕೊರೊನಾ ಹಾವಳಿಯಿಂದ ಚಿತ್ರರಂಗಕ್ಕೇ ದೊಡ್ಡ ಹೊಡೆತ ಬಿದ್ದಿರುವುದಂತೂ ನಿಜ. ಕೊರೊನಾ ಹೊಡೆತಕ್ಕೆ ತತ್ತರಿಸಿದ್ದ ಚಿತ್ರರಂಗ ಮೆಲ್ಲನೆ ಚೇತರಿಸಿಕೊಂಡಿದೆ. ಇನ್ನೇನು ಚಿತ್ರಮಂದಿರಗಳಲ್ಲಿ ಮತ್ತೆ ಅಬ್ಬರಿಸಬೇಕು ಎಂಬ ಉತ್ಸಾಹದಲ್ಲಿರುವಾಗಲೇ, ಕೊರೊನಾ ಹಿನ್ನೆಲೆಯಲ್ಲಿ ಚಿತ್ರಮಂದಿರಗಳು ಸಂಪೂರ್ಣ ಬಂದ್‌ ಆಗಿದ್ದೂ ಗೊತ್ತೇ ಇತ್ತು. ಲಾಕ್ಡೌನ್ ಬಳಿಕ ಸರ್ಕಾರ ಅನುಮತಿ ಕೊಟ್ಟಿದ್ದೇನೋ ನಿಜ. ಆದರೆ, ಚಿತ್ರಮಂದಿರಗಳು ಬಾಗಿಲು ತೆರೆದರೂ, ಅದೇಕೋ ಏನೋ, ಸ್ಟಾರ್ ಸಿನಿಮಾಗಳು ಬಿಡುಗಡೆ ಮಾಡುವ ಆಸಕ್ತಿ ತೋರಲೇ ಇಲ್ಲ. ಬಿಡುಗಡೆಯಾದ ಸಿನಿಮಾಗಳೇ ಮರು ಬಿಡುಗಡೆಯಾಗುತ್ತಿವೆಯಾದರೂ, ಜನರು ಚಿತ್ರಮಂದಿರ ಒಳ ಬರುತ್ತಿಲ್ಲ. ಇದಕ್ಕೆ ಕಾರಣ ಮತ್ತದೇ ಕೊರೊನಾ ಭಯ!
ಹೌದು, ಕೊರೊನಾ ಭಯ ಒಂದು ಕಡೆಯಾದರೆ, ಸರ್ಕಾರ ಈಗ ಶೇ.೫೦ರಷ್ಟು ಮಾತ್ರ ಆಸನ ಭರ್ತಿಗೆ ಅವಕಾಶ ನೀಡಿದೆ. ಈ ಹಿನ್ನೆಲೆಯಲ್ಲಿ ಪ್ರೇಕ್ಷಕ ಪ್ರಭುಗಳು ಕೂಡ ಚಿತ್ರಮಂದಿರದತ್ತ ಮುಖ ಮಾಡುತ್ತಿಲ್ಲ. ಸಿನಿಮಾಗಳು ಕೂಡ ತೆರೆಗೆ ಅಪ್ಪಳಿಸಲು ಮನಸ್ಸು ಮಾಡುತ್ತಿಲ್ಲ. ಸರ್ಕಾರ ಒಂದು ವೇಳೆ ಶೇ.100 ಆಸನ ಭರ್ತಿಗೆ ಅವಕಾಶ ಕೊಟ್ಟರೆ, ಸ್ಟಾರ್ ನಟರ ಒಂದೊಂದೇ ಸಿನಿಮಾಗಳು ತೆರೆಮೇಲೆ ಮೂಡುತ್ತವೆ. ಆಗ ಜನ ಕೂಡ ಉತ್ಸಾಹದಲ್ಲೇ ಚಿತ್ರಮಂದಿರದತ್ತ ಮುಖ ಮಾಡುತ್ತಾರೆ ಎಂಬ ದೊಡ್ಡ ಆಸೆ ಚಿತ್ರರಂಗಕ್ಕಿದೆ. ಆದಾಗ್ಯೂ ಸರ್ಕಾರ ಈಗ ಶೇ.೧೦೦ರಷ್ಟು ಭರ್ತಿಗೆ ಅವಕಾಶ ಕೊಟ್ಟಿಲ್ಲ. ಕೊಡುತ್ತದೆ ಎಂಬ ಆಶಾಭಾವದಲ್ಲೇ ಸಿನಿಮಾ ಮಂದಿ ಇದ್ದಾರೆ. ಹಾಗೇನಾದರೂ, ಶೇ.೧೦೦ ರಷ್ಟು ಅನುಮತಿ ಸಿಕ್ಕರೆ, ನಿರ್ಮಾಪಕರು ತಮ್ಮ ಸಿನಿಮಾ ಬಿಡುಗಡೆಯ ದಿನಾಂಕವನ್ನು ಘೋಷಣೆ ಮಾಡಲಿದ್ದಾರೆ. ಅದಕ್ಕಾಗಿಯೇ ಈಗ ಎದುರು ನೋಡುತ್ತಿದ್ದಾರೆ.
ಬಿಡುಗಡೆ ಮಾತು ದೂರ… ಈಗ ಪರಿಸ್ಥಿತಿ ಮೊದಲಿನಂತಿಲ್ಲ. ಶೇ.50ರಷ್ಟು ಕೊಟ್ಟರೂ, ಚಿತ್ರಮಂದಿರದತ್ತ ಯಾವೊಬ್ಬ ಸ್ಟಾರ್ ಸಿನಿಮಾನೂ ತಿರುಗಿ ನೋಡಿಲ್ಲ. ಹಾಗೊಂದು ವೇಳೆ ಶೇ.100ರಷ್ಟು ಅನುಮತಿ ಕೊಟ್ಟರೂ. ಬಿಡುಗಡೆಗೆ ಸಾಧ್ಯವಾ? ಈ ಪ್ರಶ್ನೆ ಈಗ ಎದ್ದಿದೆ. ಕಾರಣ, ಸರ್ಕಾರ ಈಗ ಹೊಸದೊಂದು ನಿಯಮ ಜಾರಿ ಮಾಡಿದೆ. ಗಡಿ ರಾಜ್ಯಗಳಲ್ಲಿ ಕೊರೊನಾ ಸೋಂಕು ತೀವ್ರಗೊಂಡಿದೆ. ಈ ಹಿನ್ನೆಲೆಯಲ್ಲಿ ಸರ್ಕಾರ ಕರ್ನಾಟಕದಲ್ಲೂ ಎಚ್ಚರಿಕೆ ಕ್ರಮ ಜರುಗಿಸಿದೆ. ಗಡಿ ಜಿಲ್ಲೆಗಳಲ್ಲಿ ವೀಕೆಂಡ್‌ ಲಾಕ್ಡೌನ್ ಮತ್ತು ನೈಟ್‌ ಕರ್ಫ್ಯೂ ಜಾರಿ ಮಾಡಿ ಆದೇಶಿಸಿದೆ. ಇದರಿಂದಾಗಿ ರಾಜ್ಯದ ಗಡಿ ಜಿಲ್ಲೆಗಳಲ್ಲಿ ರಾತ್ರಿ ಪ್ರದರ್ಶನಗಳು ರದ್ದಾಗಿವೆ. ಇದರೊಂದಿಗೆ ವೀಕೆಂಡ್‌ ಪ್ರದರ್ಶನಗಳೂ ರದ್ದಾಗಿವೆ. ಹೀಗಾಗಿ ಚಿತ್ರರಂಗ ಮತ್ತಷ್ಟು ಸಂಕಷ್ಟಕ್ಕೆ ಸಿಲುಕಿರುವುದಂತೂ ದಿಟ.
ಹೇಗೋ ಶೇ.50ರಷ್ಟು ಭರ್ತಿಗೆ ಆದೇಶ ಕೊಟ್ಟಿತ್ತು. ಇರುವ ಆಸನಗಳು ತುಂಬುವುದೇ ಕಷ್ಟ ಇದ್ದ ಸಂದರ್ಭದಲ್ಲಿ ಈಗ ರಾತ್ರಿ ಕರ್ಫ್ಯೂ ಜಾರಿ ಮಾಡಿರುವುದರಿಂದ ಇದ್ದ ಸಣ್ಣ ಆಸೆಗೂ ಕಲ್ಲು ಬಿದ್ದಂತಾಗಿದೆ. ನಿರ್ಮಾಪಕರು ಹೇಗೋ ಬಂದಷ್ಟು ಬರಲಿ ಅಂತ ತಮ್ಮ ಸಿನಿಮಾ ರಿಲೀಸ್‌ಗೆ ರೆಡಿಯಾಗುತ್ತಿದ್ದರು. ಪೂರ್ಣ ಪ್ರದರ್ಶನಕ್ಕೆ ಅವಕಾಶ ಸಿಗುತ್ತೆ ಅನ್ನುವಾಗಲೇ ಈಗ ಸಮಸ್ಯೆ ಎದುರಾಗಿದೆ. ಮತ್ತೆ ಕೊರೊನಾ ತೀವ್ರತೆಯಾಗಿ, ಲಾಕ್ಡೌನ್ ಆಗಿಬಿಟ್ಟರೆ, ಸಿನಿಮಾರಂಗದ ಕಥೆ ಏನು? ಎಂಬ ಆತಂಕ ಕೂಡ ಸಿನಿಮಾ ಮಂದಿಯಲ್ಲಿ ಶುರುವಾಗಿದೆ. ಇಡೀ ಚಿತ್ರರಂಗ ಈಗ ಶೇ.100ರಷ್ಟು ಅವಕಾಶವನ್ನೇ ಎದುರು ನೋಡುತ್ತಿದೆ. ಇಂತಹ ಸಂದರ್ಭದಲ್ಲೇ ಕೊರೊನಾ ಮತ್ತೆ ಆವರಿಸಿಕೊಳ್ಳುವ ಸೂಚನೆ ನೀಡುತ್ತಿದೆ. ಹೀಗೇ ಮುಂದುವರೆದರೆ, ಚಿತ್ರರಂಗದ ಮೇಲೆ ಕರಿನೆರಳು ಗ್ಯಾರಂಟಿ.
ಸರ್ಕಾರ ಶೇ.100ರಷ್ಟು ಅನುಮತಿ ಕೊಟ್ಟ ಬಳಿಕ ಸ್ಟಾರ್ ಸಿನಿಮಾಗಳು ತೆರೆಗೆ ಬರಲು ಸಜ್ಜಾಗಿದ್ದವು. ಆದರೆ, ಈಗ ಎಲ್ಲಾ ಸಿನಿಮಾಗಳೂ ಗೊಂದಲದಲ್ಲಿವೆ. ದುನಿಯಾ ವಿಜಯ್‌ ಅಭಿನಯದ ಸಲಗ ವರಮಹಾಲಕ್ಷ್ಮಿ ಹಬ್ಬಕ್ಕೆ ಬರುವುದಾಗಿ ಹೇಳಿತ್ತು. ಅಂದೇ ನಿನ್ನ ಸನಿಹಕೆ ಸಿನಿಮಾ ಕೂಡ ಬರುವುದಾಗಿ ಹೇಳಿಕೊಂಡಿತ್ತು. ಆದರೆ, ಈಗ ರಾತ್ರಿ ಕರ್ಫ್ಯೂ ಜಾರಿ ಮಾಡಿ, ಗಡಿ ಭಾಗದಲ್ಲಿ ವೀಕೆಂಡ್‌ ಲಾಕ್ಡೌನ್ ಮಾಡಿರುವುದರಿಂದ ಅದಕ್ಕೂ ಕಲ್ಲು ಬಿದ್ದಂತಾಗಿದೆ. ಅಲ್ಲಿಗೆ ಸಿನಿಮಾ ಬಿಡುಗಡೆ ಮಾಡುವ ನಿರ್ಧಾರ ಕೂಡ ಹಿಂದಕ್ಕೆ ಹೋಗಿದೆ. ಅದೇನೆ ಇರಲಿ, ಚಿತ್ರರಂಗಕ್ಕೆ ಮಾತ್ರ ಕಳೆದ ಎರಡು ವರ್ಷಗಳಿಂದ ದೊಡ್ಡ ನಷ್ಟವೇ ಆಗಿದೆ. ಈ ವರ್ಷ ಕೂಡ ಅದೇ ಆತಂಕದಲ್ಲಿದೆ. ಮುಂದಿನ ದಿನಗಳಲ್ಲಿ ಮತ್ತದೇ ಗತವೈಭವ ನೋಡಲು ಸಿನಿಮಾ ಮಂದಿ ಉತ್ಸುಕರಾಗಿದ್ದಾರೆ. ಅಂತಹ ದಿನಗಳು ಬರಲಿ ಎಂಬುದೇ ಸಿನಿಲಹರಿ ಆಶಯ.
ಉಸಿರಾಟದ ತೊಂದರೆಯಿಂದ ಬಾಲ್ಯದಲ್ಲೇ ಮಂಜಣ್ಣ ಕೋಮಾಗೆ ಹೋಗಿದ್ದರು. ಆಸ್ಪತ್ರೆಗೆ ಹೋದರೂ ಮಂಜಣ್ಣ ಉಸಿರಾಡಿದ್ದು ಶ್ರೀಮಂಜುನಾಥಸ್ವಾಮಿ ತೀರ್ಥ- ಪ್ರಸಾದ ಸೇವಿಸಿದ ಮೇಲೆ! ಮಗನ ಆರೋಗ್ಯ ಹದಗೆಟ್ಟಿದ್ದೇ ತಡ, ಮಂಜಣ್ಣ ತಂದೆ ಧರ್ಮಸ್ಥಳದ ಮಂಜುನಾಥನ ಸನ್ನಿಧಿಗೆ ತೆರಳಿ, ನನ್ನ ಕುಡಿಯನ್ನು ಉಳಿಸಿಕೊಡು ಭಗವಂತ ಅಂತ ಶಿರಸಾಷ್ಟಾಂಗ ಹಾಕಿ ಬೇಡಿದ್ದರು. ಸ್ವಾಮಿಯ ತೀರ್ಥ -ಪ್ರಸಾದ ತಂದು ಪುತ್ರ ಮಂಜಣ್ಣನಿಗೆ ಕೊಟ್ಟರು. ಅದಾಗಿ ಸ್ವಲ್ಪ ಹೊತ್ತಲ್ಲೇ ಮಂಜಣ್ಣ ನಿಟ್ಟುಸಿರು ಬಿಟ್ಟರು…
ವಿಶಾಲಾಕ್ಷಿ
ನಂಬಿದ ಭಕ್ತರನ್ನು ಭಗವಂತ ಯಾವುದೇ ಕಾರಣಕ್ಕೂ ಕೈಬಿಡುವುದಿಲ್ಲ ಎನ್ನುವ ಮಾತಿದೆ. ತನ್ನನ್ನು ಆರಾಧಿಸುವ, ಪೂಜಿಸುವ, ಸ್ಮರಿಸುವ ಭಕ್ತ ಬಳಗವನ್ನು ಭಗವಂತ ಕಣ್ಣಲ್ಲಿ ಕಣ್ಣಿಟ್ಟು ಕಾಪಾಡುತ್ತಾನೆ ಅಂತ ಪೂರ್ವಜರು ಹೇಳ್ತಾರೆ, ಪುರಾಣಗಳು ಹೇಳುತ್ತವೆ. ಅಷ್ಟಕ್ಕೂ, ನಾವು ಇವತ್ತು ಭಗವಂತ-ದೇವರು ಅಂತ ಬರೆಯುತ್ತಿರುವುದಕ್ಕೆ ಕಾರಣ ಮಂಜು ಪಾವಗಡ. ಬಿಗ್ಬಾಸ್ ಫೈನಲ್‌ಗೆ ಲಗ್ಗೆ ಇಟ್ಟಿರುವ ಮಂಜಣ್ಣ, ತಮ್ಮ ಬದುಕಿನಲ್ಲಿ ಧರ್ಮಸ್ಥಳದ ಶ್ರೀಮಂಜುನಾಥಸ್ವಾಮಿಯ ಪವಾಡ ಎಂತಹದ್ದು ಅನ್ನೋದನ್ನು ವಿವರಿಸಿದ್ದಾರೆ. ಸಾವು-ಬದುಕಿನ ನಡುವೆ ಹೋರಾಟ ಮಾಡುತ್ತಿದ್ದಾಗ, ಮಂಜುನಾಥ ಸ್ವಾಮಿ ಬದುಕಿಸಿದ ಘಟನೆಯನ್ನು ನೆನೆದು ಭಾವುಕರಾಗಿದ್ದಾರೆ. ಆ ಅಚ್ಚರಿಯ ಕಥೆಯನ್ನ ಈ ಕ್ಷಣ ನಿಮ್ಮ ಮುಂದೆ ಇಡಲಿದ್ದೇವೆ.
ಮಂಜು ಪಾವಗಡ ಕಡು ಬಡತನದ ಕುಟುಂಬಕ್ಕೆ ಸೇರಿದ ಕುಡಿ. ತಂದೆ ಹನುಮಂತರಾಯಪ್ಪ, ತಾಯಿ ಲಕ್ಷ್ಮಮ್ಮ. ಕೂಲಿನಾಲಿ ಮಾಡಿಕೊಂಡು ಜೀವನ ಮಾಡುವಂತಹ ಕುಟುಂಬ. ಹೀಗೆ ಬದುಕು ಸಾಗುತ್ತಿರುವಾಗ ಮಂಜಣ್ಣ ತೀರಾ ಚಿಕ್ಕವನು. ಆಗಿನ್ನೂ ಹೆಸರಿಟ್ಟಿರಲಿಲ್ಲ. ಮಗನ ನಾಮಕರಣಕ್ಕೆ ಸಕಲ ತಯ್ಯಾರಿ ನಡೆದಿತ್ತು. ಮಂಜು ಅವರ ತಂದೆ ರೇಷ್ಮೆಗೂಡನ್ನು ಹಾಕಿಕೊಂಡು ರಾಮನಗರಕ್ಕೆ ಹೋಗಿದ್ದರು. ಅಲ್ಲಿಂದ ಅವರು ಬರುವಷ್ಟರಲ್ಲಿ ಮಂಜಣ್ಣನಿಗೆ ತೀರಾ ಸೀರಿಯಸ್ಸ್ ಆಗಿಬಿಟ್ಟಿತ್ತು. ಉಸಿರಾಟಕ್ಕೆ ತೊಂದರೆಯಾಗಿ ಬಾಲ್ಯದಲ್ಲೇ ಮಂಜಣ್ಣ ಕೋಮಾಗೆ ಹೋಗಿ ಬಿಟ್ಟಿದ್ದ. ಆಸ್ಪತ್ರೆಗೆ ತೋರಿಸಿದರಾದರೂ ಕೂಡ ಮಂಜಣ್ಣ ಉಸಿರಾಡಿದ್ದು ಶ್ರೀಮಂಜುನಾಥಸ್ವಾಮಿಯ ತೀರ್ಥ ಹಾಗೂ ಪ್ರಸಾದ ಹೊಟ್ಟೆಗೆ ಹೋದ್ಮೇಲೆ.
ಹೌದು, ಮಗನ ಆರೋಗ್ಯ ಹದಗೆಟ್ಟಿದ್ದೇ ತಡ, ಮಂಜಣ್ಣ ಅವರ ತಂದೆ ಧರ್ಮಸ್ಥಳ ಬಸ್ ಏರಿ ಶ್ರೀಮಂಜುನಾಥನ ಸನ್ನಿಧಿಗೆ ತೆರಳಿದರು. ಸಾವು-ಬದುಕಿನ ಮಧ್ಯೆ ಹೋರಾಡುತ್ತಿರುವ ನನ್ನ ಕುಡಿಯನ್ನು ಉಳಿಸಿಕೊಡು ಭಗವಂತ ಅಂತ ಶಿರಸಾಷ್ಟಾಂಗ ನಮಸ್ಕಾರ ಹಾಕಿ ಬೇಡಿಕೊಂಡರು. ವಿಶೇಷ ಪೂಜೆ ಮಾಡಿಸಿಕೊಂಡು ತೀರ್ಥ-ಪ್ರಸಾದ ತೆಗೆದುಕೊಂಡು ಬಂದರು. ಉಸಿರಾಡೋದಕ್ಕೆ ಕಷ್ಟಪಡುತ್ತಿದ್ದ ಪುತ್ರ ಮಂಜಣ್ಣನಿಗೆ ಮಂಜುನಾಥ ಸ್ವಾಮಿ ತೀರ್ಥ ಸೇವನೆ ಮಾಡಿಸಿದರು. ಇದಾಗಿ ಸ್ವಲ್ಪ ಹೊತ್ತಲ್ಲೇ ಮಂಜಣ್ಣ ನಿಟ್ಟುಸಿರು ಬಿಟ್ಟ. ಅಂದಿನಿಂದ ಇಂದಿನಿವರೆಗೂ ಮಂಜಣ್ಣ ಧರ್ಮಸ್ಥಳದ ಶ್ರೀಮಂಜುನಾಥಸ್ವಾಮಿಗೆ ನಡೆದುಕೊಳ್ತಾರೆ. ಕಷ್ಟ-ಸುಖ-ಸಂತೋಷ ಯಾವುದೇ ಇರಲಿ ಅಲ್ಲಿಗೆ ಹೋಗಿ ಆಶೀರ್ವಾದ ಬೇಡಿಕೊಂಡು ಬರುತ್ತಾರಂತೆ.
ಹಸನಾದ ಬದುಕು…
ಸಾವು-ಬದುಕಿನ ಮಧ್ಯೆ ಹೋರಾಡುತ್ತಿದ್ದ ಮಂಜಣ್ಣನನ್ನು ಬದುಕಿಸಿಕೊಟ್ಟ ಮಂಜುನಾಥಸ್ವಾಮಿ, ಮಂಜಣ್ಣನಿಗೆ ಹಸನಾದ ಬದುಕು ಕಟ್ಟಿಕೊಟ್ಟಿದ್ದಾನೆ. ನಾನು ಕಲಾವಿದ ಆಗ್ಬೇಕು ಎನ್ನುವುದು ಬಾಲ್ಯದ ಕನುಸು ಮಂಜುನಾಥ ದಯವಿಟ್ಟು ಅದೊಂದು ಮಹದಾಸೆಯನ್ನು ಈಡೇರಿಸಿಕೊಡೆಂದು ಒಮ್ಮೆ ಧರ್ಮಸ್ಥಳಕ್ಕೆ ಹೋಗಿ ಅಡ್ಡಬಿದ್ದು ಮಂಜಣ್ಣ ಬೇಡಿಕೊಂಡಿದ್ದತೆ. ಆ ಕನಸು ಮಜಾ ಭಾರತದ ಮೂಲಕ ಕೊನೆಗೂ ಈಡೇರಿಬಿಡ್ತು. ಕಲರ್ಸ್ ಕನ್ನಡದ ಮಜಾ ಅಂಗಳಕ್ಕೆ ಬರುವುದಕ್ಕೂ ಮೊದಲು ಲ್ಯಾಂಗ್ ಮಂಜಣ್ಣ ಬೇಜಾನ್ ಸೈಕಲ್ ಹೊಡೆದಿದ್ದಾರೆ. ತಾನೊಬ್ಬ ಕಲಾವಿದ ಎಂದು ಸಾಬೀತುಪಡಿಸುವುದಕ್ಕೆ ಸಾಕಷ್ಟು ಕಷ್ಟ-ನೋವು-ಅವಮಾನ-ಅಪಮಾನ-ನಿಂದನೆ ಎದುರಿಸಿದ್ದಾರೆ. ಅದಕ್ಕೆ ಇವತ್ತು ದೊಡ್ಮನೆ ಅಂಗಳದಲ್ಲಿ ನಿಂತಿದ್ದಾರೆ. ನಾಲ್ಕು ಜನ ನನ್ನ ಗುರ್ತಿಸಿದರೇ ಸಾಕು ಎನ್ನುತ್ತಿದ್ದ ಲ್ಯಾಂಗ್ ಮಂಜಣ್ಣರನ್ನ ಇವತ್ತು ಇಡೀ ಕರುನಾಡಿನ ಏಳುಕೋಟಿ ಜನರು ಗುರ್ತಿಸುತ್ತಿದ್ದಾರೆ ಜೊತೆಗೆ ತಲೆಮೇಲೆ ಹೊತ್ತುಕೊಂಡು ಮೆರೆಸುತ್ತಿದ್ದಾರೆ.
ಕೆಲವೇ ಗಂಟೆಯಲ್ಲಿ ಬಿಗ್ಬಾಸ್ ಯಾರೆಂಬ ಉತ್ತರ!
ದೊಡ್ಮನೆ ಅಂಗಳಕ್ಕೆ ಗ್ರ್ಯಾಂಡ್ ಎಂಟ್ರಿಪಡೆಯವುದು ಅಷ್ಟು ಸುಲಭವಲ್ಲ. ಅಲ್ಲಿಗೆ ಜಿಗಿದ್ಮೇಲೆ ಎದುರಾಳಿ ಸ್ಪರ್ಧಿಗಳಿಗೆ ಟಕ್ಕರ್ ಕೊಡುತ್ತಾ, ಗೇಮ್ಸ್ ಗಳಲ್ಲಿ ಜೆನ್ಯೂನ್ ಆಗಿ ಆಡುತ್ತಾ, ಕರುನಾಡ ಮಂದಿಯನ್ನು ರಂಜಿಸುತ್ತಾ ಗ್ರ್ಯಾಂಡ್ ಫಿನಾಲೆವರೆಗೂ ಬರೋದು ತಮಾಷೆ ಮಾತಲ್ಲ. ಅಂತದ್ರಲ್ಲಿ ಲ್ಯಾಗ್ ಮಂಜಣ್ಣ ಬಿಗ್ಬಾಸ್ ಫೈನಲ್ಸ್ ತಲುಪಿದ್ದಾರೆ. ಬಿಗ್ಬಾಸ್ ಗೆಲ್ತಾರೆ, ಕಿರೀಟ ಮುಡಿಗೇರಿಸಿಕೊಂಡು ಕರುನಾಡ ಅಂಗಳದಲ್ಲಿ ಮೆರವಣಿಗೆ ಹೊರಡ್ತಾರೆ ಎನ್ನುವ ಸುದ್ದಿ ಕೂಡ ಟಪ್ಪಾಂಗುಚ್ಚಿ ಸ್ಟೆಪ್ ಹಾಕ್ತಿದೆ. ಇನ್ನು ಕೆಲವೇ ಕೆಲವು ಗಂಟೆಗಳಲ್ಲಿ ಬಿಗ್ಬಾಸ್ ಸೀಸನ್ 8ರ ವಿನ್ನರ್-ರನ್ನರ್ ಯಾರಾಗ್ತಾರೆ ಎನ್ನುವ ಮಿಲಿಯನ್ ಡಾಲರ್ ಪ್ರಶ್ನೆಗೆ ಉತ್ತರ ಸಿಗಲಿದೆ.
ಆ ಅಂತಿಮ ಉತ್ತರಕ್ಕೂ ಮೊದಲೇ ಕರ್ನಾಟಕದ ಬಹುತೇಕ ಮಂದಿ ಮಂಜು ಪಾವಗಡ ಅವರೇ ಗೆಲ್ಲಬೇಕು ಅಂತ ಆಶಿಸುತ್ತಿದ್ದಾರೆ. ಕೋಮಾದಲ್ಲಿದ್ದಾಗ ಶ್ರೀಮಂಜುನಾಥ ಸ್ವಾಮಿಯೇ ಬದುಕಿಸಿದ್ದು ಅಂತ ಮಂಜಣ್ಣ ಹೇಳಿದ್ಮೇಲಂತೂ ಹಲವು ಮಂದಿ ಬಾಯಲ್ಲಿ ಅದೇ ಮಂಜುನಾಥ ಸ್ವಾಮಿ ಬಿಗ್‌ಬಾಸ್‌ನಲ್ಲಿ ಮಂಜಣ್ಣನ್ನು ಗೆಲ್ಲಿಸೋದು ಖಚಿತವೆಂದು ಮಾತನಾಡಿಕೊಳ್ತಿದ್ದಾರೆ. ನೋಡೋಣ ಮಂಜುನಾಥಸ್ವಾಮಿಯ ಅಭಯಹಸ್ತ ಟಾಪ್ ಫೈವ್ ಕಂಟೆಸ್ಟೆಂಟ್‌ಗಳಲ್ಲಿ ಯಾರ ಮೇಲಿದೆ ಅಂತ.
ಯಾರು ಎಷ್ಟೇ ಎತ್ತರಕ್ಕೆ ಬೆಳೆದರೂ ತನ್ನೂರು, ತನ್ನ ಜನರನ್ನ ಒಂದಲ್ಲ ಒಂದು ದಿನ ನೆನಪಿಸಿಕೊಳ್ಳೋದು ಸಹಜ. ಕನ್ನಡ ಚಿತ್ರರಂಗದ ಅನೇಕ ಸ್ಟಾರ್ ನಟ, ನಟಿಯರು ಕೂಡ ತಮ್ಮ ಊರು, ಅಲ್ಲಿನ ಪರಿಸರ, ತಾವು ಬಾಲ್ಯದಲ್ಲಿ ಓಡಾಡಿಕೊಂಡ ಬೀದಿ, ಜೊತೆಯಾಗಿದ್ದ ಗೆಳೆಯರು, ಪ್ರೀತಿ ತೋರಿದ ಜನರ ಬಗ್ಗೆ ಹೇಳಿಕೊಂಡಿದ್ದಾರೆ. ಈಗಲೂ ಹಲವರು ಬಿಡುವು ಸಿಕ್ಕಾಗೆಲ್ಲ, ತನ್ನೂರಿಗೆ ತೆರಳಿ ಒಂದಷ್ಟು ಸಮಯ ಕಳೆದು ಬರುತ್ತಾರೆ. ಆ ಸಾಲಿಗೆ ಈಗ ನಟಿ ಅದಿತಿ ಪ್ರಭುದೇವ ಕೂಡ ತನ್ನ ಹಳ್ಳಿ ಕಡೆ ಒಂದು ಸುತ್ತು ಹೋಗಿ ಬಂದಿದ್ದಾರೆ. ಹಾಗಂತ, ಹಳ್ಳಿಗೆ ಸುಮ್ಮನೆ ವಿಸಿಟ್‌ ಹಾಕಿಬಂದಿಲ್ಲ. ಅವರು, ಹಳ್ಳಿಯಲ್ಲಿರೋ ತಮ್ಮ ಹೊಲಕ್ಕೆ ಭೇಟಿ ನೀಡಿದ್ದಾರೆ. ಅಷ್ಟೇ ಅಲ್ಲ, ಕೃಷಿ ಮಾಡಿಯೂ ಸೈ ಎನಿಸಿಕೊಂಡಿದ್ದಾರೆ. ಎಷ್ಟೇ ಆಗಲಿ, ಹಳ್ಳಿ ಹುಡುಗಿ ಅಲ್ಲವೇ?
ಅದಿತಿ ಪ್ರಭುದೇವ ಅವರು ಇತ್ತೀಚೆಗೆ ದಾವಣಗೆರೆ ಸಮೀಪದ ತಮ್ಮ ಹಳ್ಳಿಗೆ ಹೋಗಿ ಒಂದಷ್ಟು ಸಮಯ ಕಳೆದುಬಂದಿದ್ದಾರೆ. ಅವರ ಊರಲ್ಲಿರುವ ಹೊಲದಲ್ಲಿ ಓಡಾಡಿ, ಒಂದಷ್ಟು ಕೃಷಿ ಚಟುವಟಕೆಯಲ್ಲಿ ತೊಡಗಿ ಖುಷಿಗೊಂಡಿದ್ದಾರೆ. ಸದ್ಯ ಅದಿತಿ ಪ್ರಭುದೇವ ಅವರು ಅವರದೇ ಆದ ಯುಟ್ಯೂಬ್‌ ಚಾನೆಲ್‌ನಲ್ಲಿ ಭೂಮಿ ಉಳುಮೆ ಮಾಡಿ, ಮನೆಗೆಲಸ ಮಾಡುತ್ತಿರುವ ವಿಡಿಯೋವನ್ನು ಹಾಕಿಕೊಂಡಿದ್ದಾರೆ. ಅವರ ಕೃಷಿ ಪ್ರೀತಿ ಹಾಗು ಹಳ್ಳಿಯಲ್ಲಿ ಸಮಯ ಕಳೆದ ಬಗ್ಗೆ ಅವರ ಫ್ಯಾನ್ಸ್‌ ಸಾಕಷ್ಟು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಹಾಗೆ ನೋಡಿದರೆ, ಅದಿತಿ ಪ್ರಭುದೇವ ಅವರು ಕೃಷಿ ಹಿನ್ನೆಲೆಯ ಕುಟುಂಬದಿಂದ ಬಂದವರು. ಹೇಗೋ, ಆರಂಭದ ದಿನಗಳಲ್ಲಿ ವೇದಿಕೆ ಮೇಲೇರಿ ನಿರೂಪಣೆ ಮಾಡುತ್ತಿದ್ದ ಅದಿತಿ ಅವರಿಗೆ ಕಿರುತೆರೆ ಪ್ರವೇಶಿಸುವ ಅವಕಾಶ ಸಿಕ್ತು. ಅಲ್ಲಿಂದ ಬೆಳ್ಳಿತೆರೆಗೂ ಜಂಪ್‌ ಮಾಡಿದ ಅವರು, ಸ್ಯಾಂಡಲ್‌ವುಡ್‌ನಲ್ಲಿ ಗಟ್ಟಿ ನೆಲೆ ಕಂಡಿದ್ದು ಎಲ್ಲರಿಗೂ ಗೊತ್ತೇ ಇದೆ. ಸಾಲು ಸಾಲು ಸಿನಿಮಾಗಳಲ್ಲಿ ನಟಿಸಿ, ಈಗಲೂ ಕೈ ತುಂಬಾ ಸಿನಿಮಾಗಳಿರುವ ಅದಿತಿ ಸದ್ಯದ ಮಟ್ಟಿಗೆ ಬ್ಯುಝಿ.
ಅದಿತಿ ಪ್ರಭುದೇವ ಅವರು, ಬೇಡಿಕೆ ನಟಿಯಾಗಿದ್ದರೂ, ಅವರ ಸರಳತೆ ಎಲ್ಲರಿಗೂ ಇಷ್ಟವಾಗುತ್ತೆ. ಯಾರೇ ಮಾತಾಡಿಸಿದರೂ, ಆ ಕ್ಷಣಕ್ಕೆ ಸ್ಪಂದಿಸುವ ಗುಣ ಅವರದು. ಹಳ್ಳಿ ಬದುಕಿನ ಬಗ್ಗೆ ಅಪಾರವಾಗಿ ತಿಳಿದಿರುವ ಅವರು, ರೈತರ ಶ್ರಮದ ಬಗ್ಗೆಯೂ ಅರಿತಿದ್ದಾರೆ. ಸಮಯ ಸಿಕ್ಕಾಗೆಲ್ಲಾ ಹಳ್ಳಿಗೆ ಹೋಗಿ ಬರುವ ಅದಿತಿ, ಈ ಬಾರಿ, ಅವರ ಹೊಲದಲ್ಲಿ ತಾವೇ ಕೆಲಸ ಮಾಡಿದ್ದಾರೆ. ಹೊಲ ಬಿತ್ತುವ ಸಂದರ್ಭದಲ್ಲಿ ಅದಿತಿ ಕೂಡ ಟ್ರಾಕ್ಟರ್ ಏರಿ ಬಿತ್ತನೆಗೆ ಮುಂದಾಗಿದ್ದಾರೆ. ಎತ್ತುಗಳನ್ನು ಓಡಿಸುವ ಮೂಲಕ ಹೊಲವನ್ನು ಉಳುಮೆ ಮಾಡಿದ್ದಾರೆ. ಈ ವಿಡಿಯೋ ಸದ್ಯ ಸಾಕಷ್ಟು ಮೆಚ್ಚುಗೆ ಪಡೆಯುತ್ತಿದೆ.
ಇದರೊಂದಿಗೆ ಅದಿತಿ ಅವರು, ಹೊಲದ ಮನೆಯಲ್ಲಿ ಸಾಕಿರುವ ಹಸುಗಳ ಸಗಣಿ ಬಾಚಿದ್ದಾರೆ. ನಂತರ ಹಾಲು ಕರೆದು ಸೈ ಎನಿಸಿಕೊಂಡಿದ್ದಾರೆ. ಅಷ್ಟೇ ಅಲ್ಲ, ಆ ಹೊಲದ ಮನೆಯಲ್ಲೇ ಕಟ್ಟಿಗೆ ಒಲೆ ಮುಂದೆ ಕೂತು ರೊಟ್ಟಿ ತಟ್ಟಿದ್ದಾರೆ. ಅದೇನೆ ಇರಲಿ, ಕೃಷಿ ಕುಟುಂಬದ ಹುಡುಗಿಯಾಗಿ, ರೈತ ಮಾಡುವ ಕೆಲಸವನ್ನು ಪ್ರೀತಿಸಿ, ತಾನೂ ಒಂದಷ್ಟು ಸಮಯ ಹೊಲದಲ್ಲಿ ಕಳೆದು ಖುಷಿಯಾಗಿರುವ ಅದಿತಿ ಅವರ ಕೆಲಸಕ್ಕೆ ಎಲ್ಲಡೆಯಿಂದ ಮೆಚ್ಚುಗೆ ಸಿಗುತ್ತಿದೆ.
ಶುಭ ಶುಕ್ರವಾರ ಸಿನಿ ಶುಕ್ರವಾರ ಚಿತ್ರಮಂದಿರಕ್ಕೆ ಸಿನಿಮಾವೊಂದು ಲಗ್ಗೆ ಇಟ್ಟಿದೆ. ಚಿತ್ರಮಂದಿರಗಳು ಮದುವಣಗಿತ್ತಿಯಂತೆ ಕಂಗೊಳ್ಳಿಸುತ್ತಿವೆ, ಪ್ರೇಕ್ಷಕ ಮಹಾಷಯರು ಸಾಗರೋಪಾದಿಯಲ್ಲಿ ಥಿಯೇಟರ್‌ನತ್ತ ದೌಡಾಯಿಸುತ್ತಿದ್ದಾರೆ. ಈಗಾಗಲೇ ಹೌಸ್‌ಫುಲ್ ಬೋರ್ಡ್ಬಿದ್ದಿದೆ. ಫಿಲಂ ಟೀಮ್ ಮೊಗದಲ್ಲಿ ಮಂದಹಾಸ ಮೂಡಿದೆ. ಈ ರೀತಿ ಬರೆಯುವ ಸಂದರ್ಭ ಆದಷ್ಟು ಬೇಗ ಬರಬೇಕು. ಸದ್ಯದ ಪರಿಸ್ಥಿತಿಯನ್ನು ನೋಡಿದ್ರೆ, ಕೊರೊನಾ ಮೂರನೇ ಅಲೆಯ ಅವಾಂತರವನ್ನು ಸೂಕ್ಷವಾಗಿ ಗಮನಿಸಿದರೆ ಅಂತಹದ್ದೊಂದು ಸಂದರ್ಭ ಹಾಗೂ ಸನ್ನಿವೇಶ ಸದ್ಯಕ್ಕಿಲ್ಲ ಎನ್ನುವ ಸೂಚನೆ ಸಿಕ್ಕರೂ ಕೂಡ ಹುಂಬು ಧೈರ್ಯ ಮಾಡಿ ಮಲ್ಟಿಪ್ಲೆಕ್ಸ್ ಅಖಾಡಕ್ಕೆ ಧುಮ್ಕಿರುವ `ಕಲಿವೀರ’ನ ಕಾನ್ಫಿಡೆನ್ಸ್‌ಗೆ ಉಘೇ ಉಘೇ ಎನ್ನಲೆಬೇಕು.
ಕಲಿವೀರ ಕೊರೊನಾ ಎರಡನೇ ಅಲೆಯ ನಂತರ ಬಿಡುಗಡೆಯಾಗಿರುವ ಕನ್ನಡದ ಮೊದಲ ಚಿತ್ರ. ಕೊರೊನಾ ಮೂರನೇ ಅಲೆ ಶುರುವಾಗುತ್ತಂತೆ, ಮತ್ತೆ ಲಾಕ್ಡೌನ್ ಮಾಡ್ತಾರಂತೆ ಎನ್ನುವ ಸದ್ದುಗದ್ದಲ್ಲದ ನಡುವೆಯೂ ಕೂಡ `ಕಲಿವೀರ’ ಚಿತ್ರವನ್ನು ರಿಲೀಸ್ ಮಾಡಿದ್ದಾರೆ. ಚಿತ್ರಮಂದಿರಕ್ಕೆ ಸರ್ಕಾರ ಶೇಕಡ 100ರಷ್ಟು ವಿನಾಯಿತಿಯನ್ನು ನೀಡದ ಕಾರಣ ಸಿಂಗಲ್ ಸ್ಕ್ರೀನಿಂಗ್‌ ಚಿತ್ರಮಂದಿರಗಳು ಇನ್ನೂ ಬಾಗಿಲು ತೆರೆದಿಲ್ಲ. ಆದರೆ, ಮಾಲ್ ಮಂದಿ 50 ಪರ್ಸೆಂಟ್ ಆದರೂ ಪರವಾಗಿಲ್ಲ ಸಿನಿಮಾ ಹಾಕೋದಕ್ಕೆ ರೆಡಿ ಇರೋದ್ರಿಂದ ಕಲಿವೀರ ಚಿತ್ರತಂಡ ಕರ್ನಾಟಕದಾದ್ಯಂತ ಬಹುತೇಕ ಮಲ್ಟಿಪ್ಲೆಕ್ಸ್ ಗಳಲ್ಲಿ ತಮ್ಮ ಚಿತ್ರವನ್ನು ಬಿಡುಗಡೆಗೊಳಿಸಿದೆ.
ಹಾಗಾದ್ರೆ, ಕಲಿವೀರ ಚಿತ್ರ ಹೇಗಿದೆ? ಕಥೆಯ ತಿರುಳೇನು? ಮಲ್ಟಿಪ್ಲೆಕ್ಸ್‌ನಲ್ಲಿ ಸಿನಿಮಾ ನೋಡಿದ ಕ್ಲಾಸ್ ಮಂದಿ ಏನಂದ್ರು? ಹುಂಬು ಧೈರ್ಯ ಮಾಡಿ ರಿಲೀಸ್ ಮಾಡಿದ ಚಿತ್ರತಂಡ ಖುಷಿಯಾಗಿದೆಯಾ? ಕಲಿವೀರನ ಹುಚ್ಚು ಸಾಹಸಕ್ಕೆ ಮೆಚ್ಚುಗೆ ಸಿಕ್ಕಿತಾ? ಏಕಲವ್ಯನ ಚೊಚ್ಚಲ ಅಭಿನಯಕ್ಕೆ ಸಿನಿರಸಿಕರು ಉಘೇ ಉಘೇ ಎಂದರಾ? ಈ ರೀತಿ ಒಂದಿಷ್ಟು ಪ್ರಶ್ನೆಗಳು ಕಾಡುತ್ತವೆ. ಕಲಿವೀರನ ಬಗ್ಗೆ ಹೇಳುವುದಾದರೆ..,
ಕಲಿವೀರ' ಸ್ಯಾಂಡಲ್‌ವುಡ್ ಅಂಗಳದಲ್ಲಿ ಟೀಸರ್ ಹಾಗೂ ಟ್ರೇಲರ್‌ನಿಂದಲೇ ಕೂತೂಹಲ ಕೆರಳಿಸಿದ್ದ ಚಿತ್ರ. ಕಥೆ-ಚಿತ್ರಕಥೆ ಹೇಗಿರಬಹುದು ಎನ್ನುವ ಲೆಕ್ಕಚ್ಚಾರಕ್ಕಿಂತ ನಾಯಕ ಏಕಲವ್ಯನ ಆಕ್ಷನ್ ಧಮಾಕ ನೋಡುವುದಕ್ಕೆ ಒಂದಿಷ್ಟು ಮಂದಿ ಕೌತುಕದಿಂದ ಕಾಯ್ತಿದ್ದರು. ಆ ಕೂತೂಹಲಕ್ಕೆ ಇವತ್ತು ತೆರೆಬಿದ್ದಿದೆ. ಡ್ಯೂಪ್-ರೋಪ್ ಹಾಕಿಸಿಕೊಳ್ಳದೆ ಕಲಿವೀರ ಹೊಡೆದಾಡಿರುವುದನ್ನು ನೋಡಿದರೆ ಎದೆ ಝಲ್ ಎನಿಸುತ್ತೆ. ಕಳರಿಪಯಟ್ಟು ಸಮರ ಕಲೆಯಲ್ಲಿ ಪ್ರವೀಣರಾಗಿರುವ ಏಕಲವ್ಯ ʼಕಲಿವೀರ’ನಾಗಿ ಕಮಾಲ್ ಮಾಡಿದ್ದಾರೆ. ಚೊಚ್ಚಲ ಸಿನಿಮಾ ಆದರೂ ಕೂಡ ಹತ್ತಾರು ಸಿನಿಮಾ ಮಾಡಿರುವ ನಟರಂತೆ ಕ್ಯಾಮೆರಾ ಎದುರಿಸಿದ್ದಾರೆ. ಏನಾದರೊಂದು ಸಾಧನೆ ಮಾಡೋವರೆಗೂ ಗಡ್ಡ ತೆಗಿಯಲ್ಲ-ಮೀಸೆ ಬೋಳಿಸಲ್ಲ ಅಂತ ಪಣತೊಟ್ಟು ಸಾಧಿಸಿ ತೋರಿಸಿದ್ದಾರೆ. ಭರ್ತಿ ಮೂವತ್ತು ವರ್ಷದ ಕನಸನ್ನು ನನಸು ಮಾಡಿದ್ದಾರೆ. ಜೀವಂತವಾಗಿ ಉಳಿದಿಲ್ಲದ ಹೆತ್ತವ್ವನ ಮಹದಾಸೆಯೊಂದನ್ನು ಈಡೇರಿಸಿ ಬೆಳ್ಳಿಪರದೆ ಮೇಲೆ ಮೆರವಣಿಗೆ ಹೊರಟಿದ್ದಾರೆ.
ಇಷ್ಟೆಲ್ಲಾ ಹೇಳಿದ್ಮೇಲೆ ಕಲಿವೀರ' ಕಥೆ ಏನು? ಕೊರೊನಾ ಆತಂಕಬಿಟ್ಟು ನಾವ್ಯಾಕೆ ಮಲ್ಟಿಪ್ಲೆಕ್ಸ್‌ಗೆ ಹೋಗಿ ಸಿನಿಮಾ ನೋಡ್ಬೇಕು? ಒಂದು ವೇಳೆ ದುಡ್ಡು ಕೊಟ್ಟು ಮಾಲ್‌ಗೆ ಹೋಗಿ ಸಿನಿಮಾ ನೋಡಿದರೆಕಲಿವೀರ’ ನಮ್ಮನ್ನು ರಂಜಿಸುತ್ತಾನೆಯೇ? ಕೊಟ್ಟ ದುಡ್ಡಿಗೆ ನಮಗೆ ಮೋಸ ಆಗುವುದಿಲ್ಲವೇ? ಕಂಪ್ಲೀಟ್ ಫ್ಯಾಮಿಲಿ ಕರೆದುಕೊಂಡು ಹೋಗಿ ಸಿನಿಮಾ ನೋಡಬಹುದೇ? ಹಂಡ್ರೆಡ್‌ ಪರ್ಸೆಂಟ್ ಅಲ್ಲ ಅಂದರೂ ಕೂಡ ೫೦ ಪರ್ಸೆಂಟ್ ಶ್ಯೂರಿಟಿ ಕೊಡಬಹುದು. `ಕಲಿವೀರ’ ನಿಮ್ಮನ್ನ ಸೀಟಿನಲ್ಲಿ ಕೂರಿಸುತ್ತಾನೆ. ಕಣ್ಣುಬ್ಬು ಎಗಿರಿಸುತ್ತಾ, ಕಣ್ಣಲ್ಲೇ ಅಭಿನಯಿಸುತ್ತಾ, ಜಬರ್ದಸ್ತ್ ಆಕ್ಷನ್ ಮಾಡುವ ಜೊತೆಗೆ ಪ್ರಾಣಿ-ಪಕ್ಷಿಯಂತೆ ಸೌಂಡ್ ಮಾಡುತ್ತಾ ರಂಜಿಸುತ್ತಾನೆ. ತಬಲನಾಣಿಯವರ ಕಾಮಿಡಿ, ಅನಿತಾಭಟ್‌ ಅವರ ಗ್ಲಾಮರ್ ನೋಟ ಕಿಕ್ ಕೊಡುತ್ತೆ. ಪಾವನಗೌಡ-ಚಿರಶ್ರೀ ಅಂಚನ್ ಇಬ್ಬರು ನಟಿಯರು ಗಮನ ಸೆಳೆಯುತ್ತಾರೆ. ಡ್ಯಾನಿ ಕುಟ್ಟಪ್ಪ ಖಳನಾಯಕರಾಗಿ, ರಮೇಶ್ ಪಂಡಿತ್ ಮಂತ್ರವಾದಿಯಾಗಿ ಮಂತ್ರಮುಗ್ದಗೊಳಿಸ್ತಾರೆ.
ಯಾರು ಈ ಕಲಿ?
ʼಕಲಿ' ಒಬ್ಬ ಆದಿವಾಸಿ ಜನಾಂಗಕ್ಕೆ ಸೇರಿದವ. ತಮ್ಮ ಸಮುದಾಯಕ್ಕೆ ಆಗುವ ಅನ್ಯಾಯದ ವಿರುದ್ದ ಸಿಡಿದೆದ್ದು ಪ್ರತಿಕಾರ ತೀರಿಸಿಕೊಳ್ತಾನೆ. ವಜ್ರದ ಶಿವಲಿಂಗವೇ ಕಲಿವೀರ’ ಚಿತ್ರ ಕಥೆಯ ಪ್ರಮುಖ ತಿರುಳು. ಆದಿವಾಸಿ ಸಮುದಾಯ ಈ ವಜ್ರದ ಶಿವಲಿಂಗವನ್ನು ಕಣ್ಣಲ್ಲಿ ಕಣ್ಣಿಟ್ಟು ಕಾಪಾಡಿಕೊಳ್ಳುತ್ತಿತ್ತು. ಈ ವಜ್ರದ ಶಿವಲಿಂಗದ ಮೇಲೆ ಆಫ್ಗಾನ್ ದೊರೆ ಘಡಾಫು ಕಣ್ಣಿಟ್ಟು ಸಂಚು ರೂಪಿಸ್ತಾನೆ. ಹೇಗಾದರೂ ಮಾಡಿ ಆದಿವಾಸಿ ಸಮುದಾಯವನ್ನು ಮಟ್ಟ ಹಾಕಿ ವಜ್ರದ ಶಿವಲಿಂಗ ವಶಪಡಿಸಿಕೊಳ್ಳೋಕೆ ಪ್ಲಾನ್ ರೂಪಿಸ್ತಾನೆ. ಅದರಂತೇ ಎಲ್ಲರನ್ನೂ ನಾಶಪಡಿಸುತ್ತಾನೆ. ಆದರೆ, ಕಲಿಯನ್ನು ಮಟ್ಟ ಹಾಕೋದಕ್ಕೆ ಸಾಧ್ಯವಾಗೋದಿಲ್ಲ. ವಜ್ರದ ಶಿವಲಿಂಗ ಆಫ್ಗಾನ್ ದೊರೆ ಘಡಾಫು ಕೈ ಸೇರಲ್ಲ. ಅದು ಹೇಗೆ ಎಂತ ಅನ್ನೋದಕ್ಕೆ ನೀವು ಚಿತ್ರಮಂದಿರಕ್ಕೆ ಹೋಗಿ ಸಿನಿಮಾ ನೋಡ್ಬೇಕು. ಅಂದ್ಹಾಗೇ, ಮೊಹಮ್ಮದ್ ಘಜ್ನಿ ಹಾಗೂ ಮೊಹಮ್ಮದ್ ಘೋರಿ ಹಿಂದೂ ಸ್ಥಾನದ ಮೇಲೆ ದಂಡೆತ್ತಿ ಬಂದು ಎಷ್ಟೋ ದೇವಸ್ತಾನಗಳನ್ನು ಹೊಡೆದುರುಳಿಸಿ ಬೆಲೆಬಾಳುವ ವಸ್ತುಗಳನ್ನು ದೋಚಿದ್ದಾರೆನ್ನುವುದಕ್ಕೆ ಇತಿಹಾಸ ಪುಟದಲ್ಲಿ ಪುರಾವೆಗಳಿವೆ. ಆ ಪುರಾವೆಯನ್ನ ಇಟ್ಕೊಂಡು ಕಾಲ್ಪನಿಕವಾಗಿ ಕಥೆ ಮಾಡಿಟ್ಟುಕೊಂಡ ನಿರ್ದೇಶಕ ಅವಿಯವರು, `ಕಲಿವೀರ’ ಚಿತ್ರ ಮಾಡಿದ್ದಾರೆ. ಕಥೆಯಷ್ಟೇ ನಿರೂಪಣೆ ಕೂಡ ಸೊಗಸಾಗಿದೆ. ಅಲ್ಲಿ ದೇಸಿ ಸೊಗಡನ್ನು ಅಷ್ಟೇ ಅರ್ಥಪೂರ್ಣವಾಗಿ ಬಿಂಬಿಸಿದ್ದಾರೆ ಕೂಡ. ಇನ್ನು, ಚಿತ್ರಕ್ಕೆ ಪೂರಕವಾಗಿ ಕ್ಯಾಮೆರಾ ಕಣ್ಣು ಏಕಲವ್ಯನ ಸ್ಪೀಡ್‌ಗೆ ತಕ್ಕಂತೆ ವರ್ತಿಸಿದೆ. ಸಂಗೀತ ಕೂಡ ಚಿತ್ರದ ವೇಗಕ್ಕೆ ಹೆಗಲು ಕೊಟ್ಟಿದೆ. ಸಿನಿಮಾಗೆ ಸಂಕಲನ ಕೂಡ ಮುಖ್ಯ. ಇಲ್ಲಿ ಕತ್ತರಿ ಪ್ರಯೋಗವೂ ತನ್ನ ವೇಗ ಕಳೆದುಕೊಂಡಿಲ್ಲ. ಇಷ್ಟಾಗಿಯೂ ಈ ಕಲಿವೀರನ ಬಗ್ಗೆ ನೋಡುವ ಕುತೂಹಲವೇನಾದರೂ ಇದ್ದರೆ, ಥಿಯೇಟರ್‌ನತ್ತ ಮುಖಮಾಡಬಹುದು.
“ಗ್ರೂಫಿ”… ಇದು ಹೊಸಬರ ಸಿನಿಮಾ. ಏನಿದು ಗ್ರೂಫಿ? ಸಾಮಾನ್ಯವಾಗಿ ಎಲ್ಲರಿಗೂ ಇದೊಂದೇ ಈ ಪ್ರಶ್ನೆ. ಒಬ್ಬರೇ ಫೋಟೋ ಕ್ಲಿಕ್ಕಿಸಿಕೊಂಡರೆ ಸೆಲ್ಫಿ. ಅದೇ ಗುಂಪಾಗಿ ತೆಗೆದುಕೊಳ್ಳುವುದಕ್ಕೆ ಗ್ರೂಫಿ ಅಂತಾರೆ. ಅಂದಹಾಗೆ, ಈ ಚಿತ್ರವನ್ನು ರವಿ ಅರ್ಜುನ್ ನಿರ್ದೇಶಿಸಿದ್ದಾರೆ. ಚಿತ್ರಕ್ಕೆ ಅರ್ಯನ್‌ ಹೀರೋ. ಪದ್ಮಶ್ರೀ ಸಿ.ಜೈನ್‌ ಅವರಿಗೆ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. ಇತ್ತೀಚೆಗೆ ಅರ್ಜುನ್ ಜನ್ಯ ಅವರು ಸಾಂಗ್‌ ರಿಲೀಸ್ ಮಾಡಿ ಶುಭಹಾರೈಸಿದರು. ಈ ವೇಳೆ ಮಾತಿಗಿಳಿದ ಅವರು, ಸಿನಿಮಾ ಹಾಡುಗಳು ಚೆನ್ನಾಗಿವೆ. ನನ್ನ ಪ್ರಕಾರ ಗ್ರೂಫಿ ಅಂದರೆ ಹೆಮ್ಮೆ ಅಂತ. ಸಂಗೀತ ನಿರ್ದೇಶಕ ವಿಜೇತ್ ಕೃಷ್ಣ ಹಾಗೂ ನಿರ್ದೇಶಕ ರವಿ ಅರ್ಜುನ್ ಸ್ನೇಹಿತರು. ಇಪ್ಪತ್ತು ವರ್ಷದ ಹಿಂದೆ ಇದೇ ಚಾಮುಂಡೇಶ್ವರಿ ಸ್ಟುಡಿಯೋದಲ್ಲಿ ವಿ.ಮನೋಹರ್ ಅವರ ಬಳಿ ನನ್ನ ಸಂಗೀತ ಪಯಣ ಆರಂಭವಾಗಿತ್ತು. ನನ್ನ ಸ್ನೇಹಿತನ ಮೊದಲ ಸಿನಿಮಾ ಆಡಿಯೋ ರಿಲೀಸ್ ಇಲ್ಲೇ ಆಗುತ್ತಿರುವುದು ಕಾಕತಾಳೀಯ. ಇಡೀ ತಂಡಕ್ಕೆ ಶುಭವಾಗಲಿ ಎಂಬುದು ಅರ್ಜುನ್ ಜನ್ಯ ಮಾತು.
ನಿರ್ದೇಶಕ ರವಿ ಅರ್ಜುನ್ ಹೇಳುವಂತೆ, “ಗ್ರೂಫಿ ಇದೊಂದು ಸಸ್ಪೆನ್ಸ್ ಥ್ರಿಲ್ಲರ್ ಕಥೆ ಆಧಾರಿತ ಸಿನಿಮಾ. ಒಬ್ಬರೆ ಫೋಟೋ ತೆಗೆದುಕೊಂಡರೆ ಸೆಲ್ಫಿ. ಗುಂಪಾಗಿ ತೆಗೆದುಕೊಳ್ಳುವುದನ್ನು “ಗ್ರೂಫಿ” ಎನ್ನುತ್ತಾರೆ ಈಗಿನ ಯುವಪೀಳಿಗೆ. ಚಿತ್ರದ ಶೀರ್ಷಿಕೆಗೆ ಹಾಗೂ ಕಥೆಗೆ ಸಂಬಂಧವಿದೆ ಹಾಗಾಗಿ ಈ ಹೆಸರಿಟ್ಟಿದ್ದೇವೆ. ಈ ಚಿತ್ರದ ಮೂಲಕ ಸಮಾಜಕ್ಕೆ ಉತ್ತಮ ಸಂದೇಶ ನೀಡುವ ಪ್ರಯತ್ನ ಮಾಡಿದ್ದೇವೆ. ಬೆಂಗಳೂರು, ಹೊನ್ನಾವರ, ಮಡಿಕೇರಿ ಹಾಗೂ ಪಶ್ಚಿಮ ಘಟ್ಟಗಳ ಸುಂದರ ಪರಿಸರದಲ್ಲಿ ಚಿತ್ರೀಕರಣ ನಡೆದಿದೆ ಎಂಬುದು ರವಿ ಅರ್ಜುನ್ ಮಾತು.
ನಾಯಕ ಆರ್ಯನ್ ಇಲ್ಲಿ ಛಾಯಾಗ್ರಾಹಕನ ಪಾತ್ರ ಮಾಡಿದ್ದಾರಂತೆ. ಚಿತ್ರ ನೋಡಿ ಹರಸಿ ಅನ್ನುತ್ತಾರೆ ನಾಯಕ ಆರ್ಯನ್. ನಾಯಕಿ ಪದ್ಮಶ್ರೀ ಸಿ.ಜೈನ್‌ ಅವರಿಲ್ಲಿ ವಿಭಿನ್ನವಾಗಿ ಕಾಣಿಸಿಕೊಂಡಿದ್ದಾರೆ. ಅವರು ಎಲ್ಲರೊಂದಿಗೆ ಸೆಲ್ಫಿ ತೆಗೆದುಕೊಂಡು, ಅದನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಾಕುವುದು. ಎಷ್ಟು ಲೈಕ್ ಹಾಗೂ ಕಾಮೆಂಟ್ ಬರುತ್ತದೆ ಎಂದು ಕಾಯುವ ಹುಡುಗಿಯಾಗಿ ಕಾಣಿಸಿಕೊಂಡಿದ್ದಾರಂತೆ. ಸಂಗೀತ ನಿರ್ದೇಶಕ ವಿಜೇತ್ ಕೃಷ್ಣ ಅವರಿಗೆ ಅವರ ಗುರು ಅರ್ಜುನ್ ಜನ್ಯ ಅವರು ಸಾಂಗ್‌ ರಿಲೀಸ್ ಮಾಡಿದ್ದು ಖುಷಿ ಕೊಟ್ಟಿದೆಯಂತೆ.
ಇನ್ನು ನಿರ್ಮಾಪಕ ಕೆ.ಜಿ.ಸ್ವಾಮಿ ಅವರಿಗೆ ನಿರ್ದೇಶಕರು ಹೇಳಿದ ಕಥೆ ಇಷ್ಟವಾಯಿತಂತೆ. ವರಮಹಾಲಕ್ಷ್ಮೀ ಹಬ್ಬದಂದು ಸುಮಾರು ನೂರಿಪ್ಪತ್ತಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ನಮ್ಮ ಚಿತ್ರ ಬಿಡುಗಡೆ ಮಾಡುತ್ತಿದ್ದೇವೆ. ಉತ್ತಮ ಸಂದೇಶ ಇರುವ ಈ ಚಿತ್ರಕ್ಕೆ ನಿಮ್ಮ ಬೆಂಬಲವಿರಲಿ ಎಂದರು ಅವರು. ಅಜಯ್ ಲಕ್ಷ್ಮೀಕಾಂತ್ ಛಾಯಾಗ್ರಹಣ ಮಾಡಿದರೆ, ವಿಜೇತ್ ಚಂದ್ರ ಸಂಕಲನ ಮತ್ತು ಇಮ್ರಾನ್ ಸರ್ದಾರಿಯಾ, ಮೋಹನ್ ನೃತ್ಯ ನಿರ್ದೇಶನವಿದೆ. ಚಿತ್ರದಲ್ಲಿ ಗಗನ್, ಉಮಾ ಮಯೂರಿ, ಪ್ರಜ್ವಲ್, ಸಂಧ್ಯಾ, ಶ್ರೀಧರ್, ಹನುಮಂತೇಗೌಡ, ಸಂಗೀತ, ರಜನಿಕಾಂತ್ ನಟಿಸಿದ್ದಾರೆ.
ಚಿತ್ರದ ನಾಲ್ಕು ಹಾಡುಗಳಿಗೆ ಜಯಂತ ಕಾಯ್ಕಿಣಿ, ಹೃದಯ ಶಿವ, ಚೇತನ್ ಕುಮಾರ್, ರವಿ ಅರ್ಜುನ್ ಬರೆದಿದ್ದಾರೆ. ಸಂತೋಷ್ ವೆಂಕಿ, ಮಾನಸ ಹೊಳ್ಳ, ಅನಿರುದ್ಧ ಶಾಸ್ತ್ರಿ, ವಿಜೇತ್ ಕೃಷ್ಣ ಹಾಗೂ ರಕ್ಷ ಹಾಡಿದ್ದಾರೆ.
ಒಬ್ಬ ನಟನ ವೃತ್ತಿ ಬದುಕಲ್ಲಿ ಐನೂರನೇ ಸಿನಿಮಾ ಅನ್ನೋದು ನಿಜಕ್ಕೂ ಮೈಲಿಗಲ್ಲು. ಅದರಲ್ಲೂ ಅಪರೂಪದ ನಟರಾಗಿ ಗುರುತಿಸಿಕೊಂಡಿರುವ ಹಾಸ್ಯ ನಟ ವೈಜನಾಥ್ ಬಿರಾದಾರ್‌ ಅವರು ಯಶಸ್ವಿ ಐನೂರನೇ ಸಿನಿಮಾಗೆ ಬಣ್ಣ ಹಚ್ಚಿ ದಾಖಲೆ ಬರೆದಿದ್ದಾರೆ. ಅಷ್ಟೇ ಅಲ್ಲ, ಆ ಸಿನಿಮಾ ಇತ್ತೀಚೆಗೆ ಡಬ್ಬಿಂಗ್ ಕಾರ್ಯವನ್ನೂ ಮುಗಿಸಿದೆ. ಹೌದು, “ನೈಂಟಿ ಹೊಡಿ ಮನೀಗ್ ನಡಿ” ಸಿನಿಮಾ ಈಗ ಬಿಡುಗಡೆಯತ್ತ ಸಾಗಿದೆ. ಅಂದಹಾಗೆ, ಅಮ್ಮಾ ಟಾಕೀಸ್ ಬಾಗಲಕೋಟೆ ಬ್ಯಾನರಿನಡಿ ನಿರ್ಮಾಣವಾಗಿರುವ “ನೈಂಟಿ ಹೊಡಿ ಮನೀಗ್ ನಡಿ” ಚಿತ್ರ ಇತ್ತೀಚೆಗಷ್ಟೇ ಡಬ್ಬಿಂಗ್ ಮುಗಿಸಿದೆ.
ಈ ಸಿನಿಮಾ ನಟ ವೈಜನಾಥ ಬಿರದಾರ್ ಅವರ ಐನೂರನೇ ಚಿತ್ರ ಅನ್ನೋದು ವಿಶೇಷ. ಇತ್ತೀಚೆಗೆ ಬೆಂಗಳೂರಿನ ಸುತ್ತಮುತ್ತ ಕೊನೆಯ ಹಂತದ ಚಿತ್ರೀಕರಣ ಮುಗಿಸಿತ್ತು. ಉಮೇಶ್ ಬಾದರದಿನ್ನಿ ಮತ್ತು ನಾಗರಾಜ್ ಅರೆಹೊಳೆ ಈ ಚಿತ್ರವನ್ನು ನಿರ್ದೇಶನ ಮಾಡುತ್ತಿದ್ದಾರೆ. ಇದೊಂದು ಔಟ್ ಆಂಡ್ ಔಟ್ ಕಮರ್ಷಿಯಲ್ ಕಾಮಿಡಿ ಥ್ರಿಲ್ಲರ್ ಚಿತ್ರವಾಗಿದ್ದು, ರತ್ನಮಾಲಾ ಬಾದರದಿನ್ನಿ ಅವರು ಚಿತ್ರದ ನಿರ್ಮಾಪಕರು.
ಚಿತ್ರದಲ್ಲಿ ವೈಜನಾಥ ಬಿರಾದರ್ ಅವರಿಗೆ ಜೋಡಿಯಾಗಿ ನೀತು ಕಾಣಿಸಿಕೊಂಡಿದ್ದಾರೆ. ಉಳಿದಂತೆ ಚಿತ್ರದಲ್ಲಿ ಪ್ರೀತು ಪೂಜಾ, ಹಿರಿಯ ನಟರಾದ ಕರಿಸುಬ್ಬು, ಧರ್ಮ, ಪ್ರಶಾಂತ್ ಸಿದ್ಧಿ, ಅಭಯ್ ವೀರ್, ಆರ್.ಡಿ. ಬಾಬು, ವಿವೇಕ್ ಜಂಬಗಿ, ರುದ್ರಗೌಡ ಬಾದರದಿನ್ನಿ, ಹೊಸಕೋಟೆ ಮುರುಳಿ, ಸಂತು ಸೊಕನಾದಗಿ, ರಾಜು ಗೂಗವಾಡ, ಎಲ್ಐಸಿ ಲೋಕೇಶ್ ಸೇರಿದಂತೆ ಇತರರು ನಟಿಸಿದ್ದಾರೆ.
ಚಿತ್ರಕ್ಕೆ ಕೃಷ್ಣ ನಾಯ್ಕರ್ ಛಾಯಾಗ್ರಹಣ ಮಾಡಿದರೆ, ರಾಕಿ ರಮೇಶ್ ಸಾಹಸವಿದೆ. ಯುಡಿವಿ ವೆಂಕಿ ಸಂಕಲನ ಮಾಡಿದ್ದಾರೆ. ನಾಗೇಂದ್ರ ಪ್ರಸಾದ್ ಸಾಹಿತ್ಯವಿದೆ. ಕಿರಣ್ ಶಂಕರ್ ಸಂಗೀತ ನೀಡಿದ್ದಾರೆ. ರಾಜೇಶ್ ಕೃಷ್ಣನ್ ಹಾಡಿದ್ದಾರೆ. ಉತ್ತರ ಕರ್ನಾಟಕದ ನಾಟಿ ಶೈಲಿಯ ಹಾಡಿಗೆ “ಚುಟು ಚುಟು” ಖ್ಯಾತಿಯ ಶಿವು ಭೆರ್ಗಿ ಸಾಹಿತ್ಯ ಬರೆದು, ಸಂಗೀತ ನೀಡಿದದಾರೆ. ಆ ಹಾಡಿಗೆ ರವೀಂದ್ರ ಸೋರಗಾಂವಿ ಮತ್ತು ಶಮಿತಾ ಮಲ್ನಾಡ್ ಧ್ವನಿಯಾಗಿದ್ದಾರೆ. ಭೂಷಣ್ ನೃತ್ಯ ನಿರ್ದೇಶನವಿದೆ. ಸದ್ಯ ಬಾಲಾಜಿ ಡಿಜಿ ಸ್ಟುಡಿಯೋದಲ್ಲಿ ಡಬ್ಬಿಂಗ್ ಮುಗಿಸಿ, ಬಿಡುಗಡೆ ಕೆಲಸದತ್ತ ಚಿತ್ರತಂಡ ತೊಡಗಿಕೊಂಡಿದೆ.
ಸ್ಯಾಂಡಲ್‌ವುಡ್‌ನ ಹೆಸರಾಂತ ನಿರ್ಮಾಪಕ ಕೆ.ಮಂಜು ಅವರ ಪುತ್ರ ಶ್ರೇಯಸ್ ಮಂಜು ಗಂಧದಗುಡಿಯಲ್ಲಿ ಪಡ್ಡೆಹುಲಿಯಾಗಿ ಘರ್ಜಿಸಿದ್ದನ್ನ ಇಡೀ ಕರುನಾಡು ನೋಡಿದೆ. ಬೆಳ್ಳಿಪರದೆ ಹಾಗೂ ಬಾಕ್ಸ್ಆಫೀಸ್ ಕೂಡ ಸಂತಸಪಟ್ಟಿದೆ. ಶ್ರೇಯಸ್ ಮಗದೊಮ್ಮೆ ಸಿಲ್ವರ್‌ಸ್ಕ್ರೀನ್ ಮೇಲೆ ಧಗಧಗಿಸುವ ಗಳಿಗೆಗಾಗಿ ಅವರ ಅಭಿಮಾನಿಗಳು ಕೂಡ ಕಾತುರದಿಂದ ಕಾಯ್ತಿದ್ದಾರೆ. ವಿಷ್ಣುಪ್ರಿಯನಾಗಿ ಮೆರವಣಿಗೆ ಹೊರಡುವ ಮುನ್ನವೇ ಶ್ರೇಯಸ್ `ರಾಣ’ ಚಿತ್ರದ ಶೂಟಿಂಗ್ ಅಖಾಡಕ್ಕೆ ಧುಮುಕುತ್ತಿದ್ದಾರೆ. ಅದಕ್ಕೂ ಮುನ್ನ ರಾಣ ಟೈಟಲ್ ಸ್ಟೋರಿಯನ್ನೊಮ್ಮೆ ನೋಡಿಬಿಡೋಣ.
ರಾಣಾ' ಚಿತ್ರ ರಾಕಿಂಗ್‌ಸ್ಟಾರ್ ಯಶ್ ಮಾಡ್ತಾರೆನ್ನುವ ಸುದ್ದಿಯಿತ್ತು. ಆದರೆ, ಕೆಜಿಎಫ್ ಮೂಲಕ ರಾಕಿ ಧೂಳೆಬ್ಬಿಸಿದ ಮೇಲೆರಾಣ’ ಚಿತ್ರದ ಸುದ್ದಿಗೆ ಪರ್ಮನೆಂಟಾಗಿ ಫುಲ್‌ಸ್ಟಾಪ್ ಬಿತ್ತು. ಇದ್ರಿಂದ ರಾಣಾ ಟೈಟಲ್‌ಗೂ ಬೇಜಾರಾಗಿತ್ತು ಆದರೆ ಅಪ್ನಾ ಟೈಮ್ ಆಯೇಗಾ' ಅಂತ ಕಾದುಕುಳಿತಿದ್ದ ರಾಣ ಟೈಟಲ್‌ಗೆ ಒಂದೊಳ್ಳೆ ಟೈಮ್ ಬಂತು. ನಿರ್ದೇಶಕ ನಂದಕಿಶೋರ್ ಮಾಡಿಟ್ಟುಕೊಂಡಿದ್ದ ಕಥೆಗೆರಾಣ’ ಟೈಟಲ್ ಫರ್ಪೆಕ್ಟ್ ಮ್ಯಾಚ್ ಆಯ್ತು. ನಾಯಕನಟರಾಗಿ ಶ್ರೇಯಸ್ ಮಂಜು ಫೈನಲ್ ಆದರು, ನಿರ್ಮಾಪಕ ಕೆ ಮಂಜು ತಮ್ಮ ಬಳಿಯಿಟ್ಟುಕೊಂಡಿದ್ದ `ರಾಣ’ ಟೈಟಲ್‌ನ ಮಗನಿಗಾಗಿ ಬಿಟ್ಟುಕೊಟ್ಟರು.
ಕಳೆದೊಂದು ತಿಂಗಳ ಹಿಂದೆ ಬಂಡಿಮಹಾಕಾಳಮ್ಮನ ಸನ್ನಿಧಿಯಲ್ಲಿ ರಾಣಾ' ಸಿನಿಮಾ ಸೆಟ್ಟೇರ್ತು. ರಿಯಲ್‌ಸ್ಟಾರ್ ಉಪೇಂದ್ರ ಹಾಗೂ ಪ್ರಿಯಾಂಕ ಉಪೇಂದ್ರರಾಣ’ ಮೊದಲ ದೃಶ್ಯಕ್ಕೆ ಚಾಲನೆ ಕೊಟ್ಟಿದ್ದರು. ತಾಯಿಯ ಸನ್ನಿಧಿಯಲ್ಲಿ ಮುಹೂರ್ತ ನೆರವೇರಿಸಿಕೊಂಡ ಚಿತ್ರತಂಡ ಶೀಘ್ರದಲ್ಲೇ ಚಿತ್ರೀಕರಣಕ್ಕೆ ಹೊರಡೋದಾಗಿ ಹೇಳಿಕೊಂಡಿತ್ತು. ಫೈನಲೀ, ಫಿಲ್ ಟೀಮ್ ಶೂಟಿಂಗ್ ಅಖಾಡಕ್ಕೆ ಧುಮ್ಕೊದಕ್ಕೆ ಸಿದ್ದತೆ ನಡೆಸಿದೆ.
ಈ ಮಧ್ಯೆ ರಾಣ ಡೈರೆಕ್ಟರ್ ನಂದಕಿಶೋರ್ ಹಾಗೂ ಪ್ರೊಡ್ಯೂಸರ್ ಮಂಜಣ್ಣ ಕುರುಡು ಮಲೆಯ ಶ್ರೀ ವಿನಾಯಕ ಸ್ವಾಮಿ ಸನ್ನಿಧಿಗೆ ಭೇಟಿಕೊಟ್ಟು ವಿಶೇಷ ಪೂಜೆ ಸಲ್ಲಿಸಿದ್ದಾರೆ. `ರಾಣ’ ಚಿತ್ರಕ್ಕೆ ಒಳಿತಾಗಲೆಂದು ಆಶೀರ್ವಾದ ಬೇಡಿದ್ದಾರೆ.
ರಾಣ' ಟೈಟಲ್‌ನಲ್ಲೇ ಒಂದು ಫೈಯರ್ ಇದೆ. ಪಡ್ಡೆಹುಲಿಯ ಖದರ್ ಜೊತೆಗೆ ಪೊಗರು ಪವರ್ ಇರೋದ್ರಿಂದರಾಣ’ ಮೇಲೆ ಒಂದಿಷ್ಟು ನಿರೀಕ್ಷೆಯಿದೆ. ಇದೊಂದು ಪವರ್‌ಪ್ಯಾಕ್ಡ್ ಆಕ್ಷನ್ ಥ್ರಿಲ್ಲರ್ ಚಿತ್ರವಾಗಿದ್ದು ಶ್ರೇಯಸ್ ಮೈ ಹುರಿಗೊಳಿಸಿಕೊಂಡಿದ್ದಾರೆ. ಪೊಗದಸ್ತಾದ ಬಾಡಿಬಿಲ್ಡ್ ಮಾಡಿಕೊಂಡಿರುವ ಶ್ರೇಯಸ್‌ಗೆ ರೀಷ್ಮಾ ನಾಣಯ್ಯ, ರಜಿನಿ ಭಾರದ್ವಾಜ್ ಸಾಥ್ ನೀಡಲಿದ್ದಾರೆ. ಪೊಗರು ಸಿನಿಮಾದ ತಂತ್ರಜ್ಞರು ಈ ಚಿತ್ರಕ್ಕೆ ಬೆವರು ಸುರಿಸಲಿದ್ದು, ಗುಜ್ಜಾಲ್ ಪುರುಷೋತ್ತಮ್ ಜೊತೆಗೆ ಕೆ. ಮಂಜು ಕೂಡ ಬಂಡವಾಳ ಸುರಿಯಲಿದ್ದಾರೆ. `ರಾಣ’ ಚಿತ್ರವನ್ನ ಅದ್ದೂರಿಯಾಗಿ ತೆರೆಮೇಲೆ ತರೋದಕ್ಕೆ ತಯ್ಯಾರಿ ಮಾಡಿಕೊಂಡಿದ್ದಾರೆ.
ಕನ್ನಡದ ಕಿರುತೆರೆಯಲ್ಲಿ ಈಗಂತೂ ನಟ,ನಟಿಯರದ್ದೇ ಕಲರವ! ಹಾಗಂತ, ಅವರೆಲ್ಲರೂ ಧಾರಾವಾಹಿಗಳಲ್ಲಿ ನಟಿಸುತ್ತಿದ್ದಾರೆ ಅಂದುಕೊಳ್ಳುವಂತಿಲ್ಲ. ಅಲ್ಲಿ ನಡೆಯೋ ರಿಯಾಲಿಟಿ ಶೋಗಳಲ್ಲಿ ಪಾಲ್ಗೊಳ್ಳುತ್ತಿದ್ದಾರೆ. ಈಗಾಗಲೇ ಹಲವು ಸ್ಟಾರ್ ನಟರು, ನಟಿಯರು ಕೂಡ ಭಾಗವಹಿಸಿದ್ದಾಗಿದೆ. ಈಗಲೂ ಕೆಲ ರಿಯಾಲಿಟಿ ಶೋಗಳನ್ನು ನಟ, ನಟಿಯರು ನಡೆಸಿಕೊಡುತ್ತಿದ್ದಾರೆ. ಆ ಸಾಲಿಗೆ ಈಗ ಹರಿಪ್ರಿಯಾ ಕೂಡ ಸೇರುತ್ತಿದ್ದಾರೆ. ಹೌದು, ಸದ್ಯದ ಮಟ್ಟಿಗೆ ಸಿನಿಮಾಗಳಲ್ಲೇ ಬಿಝಿಯಾಗಿರುವ ಹರಿಪ್ರಿಯಾ, ಅದ್ಯಾಕೆ ಕಿರುತೆರೆ ಕಡೆ ಮುಖ ಮಾಡುತ್ತಿದ್ದಾರೆ ಎಂಬ ಪ್ರಶ್ನೆ ಕಾಡಬಹುದು. ಅದಕ್ಕೆ ಉತ್ತರ, ಅದೊಂದು ಡ್ಯಾನ್ಸ್ ಶೋ.
ಹೌದು, ಹರಿಪ್ರಿಯಾ ಅವರು ಡ್ಯಾನ್ಸ್ ರಿಯಾಲಿಟಿ ಶೋನಲ್ಲಿ ಭಾಗವಹಿಸಲಿದ್ದಾರೆ ಎಂಬುದು ಈ ಹೊತ್ತಿನ ಸುದ್ದಿ. ಆ ಡ್ಯಾನ್ಸ್ ರಿಯಾಲಿಟಿ ಶೋನಲ್ಲಿ ಹರಿಪ್ರಿಯಾ ಅವರೊಂದಿಗೆ ಇನ್ನೂ ಇಬ್ಬರು ಪ್ರಮುಖರು ಕಾಣಿಸಿಕೊಳ್ಳುತ್ತಿದ್ದು, ಅವರೂ ನಟ ಮತ್ತು ನಿರ್ದೇಶಕ ಅನ್ನೋದು ವಿಶೇಷ. ‘ಡ್ಯಾನ್ಸ್ ಡ್ಯಾನ್ಸ್’ ಹೆಸರಿನ ಡ್ಯಾನ್ಸ್ ರಿಯಾಲಿಟಿ ಶೋನಲ್ಲಿ ಹರಿಪ್ರಿಯಾ ಜಡ್ಜ್ ಆಗಿ ಭಾಗವಹಿಸುತ್ತಿದ್ದು, ಆ ರಿಯಾಲಿಟಿ ಶೋ ಒಳಾಂಗಣ ಮಾತ್ರವಲ್ಲ, ಹೊರಾಂಗಣ ಚಿತ್ರೀಕರಣವೂ ನಡೆಯಲಿದೆ. ಡ್ಯಾನ್ಸ್ ಡ್ಯಾನ್ಸ್ ರಿಯಾಲಿಟಿ ಶೋನಲ್ಲಿ ಹರಿಪ್ರಿಯಾ ಜೊತೆಗೆ ನಟ ಪ್ರಜ್ವಲ್ ದೇವರಾಜ್ ಮತ್ತು ನೃತ್ಯ ನಿರ್ದೇಶಕ ಹರ್ಷ ಕೂಡ ಈ ಶೋನ ತೀರ್ಪುಗಾರರಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಅಂದಹಾಗೆ, ಈ ರಿಯಾಲಿಟಿ ಶೋಗೆ ಶೈನ್ ಶೆಟ್ಟಿ ಅವರ ನಿರೂಪಣೆ ಇರಲಿದೆ.
ಹರಿಪ್ರಿಯಾ ಕೇವಲ ನಟಿ ಮಾತ್ರವಲ್ಲ, ಅವರೊಬ್ಬ ಒಳ್ಳೆಯ ಡ್ಯಾನ್ಸರ್‌ ಕೂಡ. ಈ ಕಾರಣದಿಂದಾಗಿಯೇ ರಿಯಾಲಿಟಿ ಶೋ ಮುಖ್ಯಸ್ಥರು ಹರಿಪ್ರಿಯಾ ಅವರನ್ನು ತೀರ್ಪುಗಾರರನ್ನಾಗಿ ಆಯ್ಕೆ ಮಾಡಿದ್ದಾರೆ. ಆ ರಿಯಾಲಿಟಿ ಶೋ ಬಗ್ಗೆ ಹೇಳುವ ಹರಿಪ್ರಿಯಾ, “ಈ ಹಿಂದೆ ಕೂಡ ಹಲವು ರಿಯಾಲಿಟಿ ಶೋಗಳಲ್ಲಿ ಪಾಲ್ಗೊಳ್ಳಲು ಅವಕಾಶ ಬಂದಿದ್ದವು. ಆದರೆ, ಸಾಧ್ಯವಾಗಿರಲಿಲ್ಲ. ಈ “ಡ್ಯಾನ್ಸ್ ಡ್ಯಾನ್ಸ್’ ಶೋನ ಪರಿಕಲ್ಪನೆ ವಿಶೇಷ ಎನಿಸಿದೆ. ಹಾಗಾಗಿ ಒಪ್ಪಿದೆ. ಇನ್ನು, ಇಲ್ಲಿ ನಟ-ನಟಿಯರೇ ಸ್ಪರ್ಧಿಗಳಾಗಿರುತ್ತಾರೆ ಅನ್ನೋದು ಇನ್ನೊಂದು ವಿಶೇಷʼ ಎನ್ನುತ್ತಾರೆ. ಅದೇನೆ ಇರಲಿ, ಈಗಾಗಲೇ ಕನ್ನಡದ ಒಂದಷ್ಟು ನಟ,ನಟಿಯರು, ಕಿರುತೆರೆಗೆ ಎಂಟ್ರಿ ಕೊಟ್ಟು, ರಿಯಾಲಿ ಶೋ ನಡೆಸಿಕೊಡುತ್ತಿದ್ದಾರೆ. ಅವರ ಸಾಲಿಗೆ ಈಗ ಹರಿಪ್ರಿಯಾ ಕೂಡ ಸೇರಿದ್ದಂತಾಗಿದೆ.
