ನಟಿಯಾಗಿಯೂ ಮಿಂಚುತ್ತಿರುವ ಸಾತ್ವಿಕಾ ಎಂಬ ಕನಸು ಕಂಗಳ ಚೆಲುವೆ
…………………………………………………………………….
ಕಪ್ಪು- ಬಿಳಿಕಣ್ಣಲ್ಲಿ ಕಲರ್ ಫುಲ್ ಕನಸು, ಸಿನಿ ಜಗತ್ತಿನತ್ತ ಮೋಹಕ ಬೆಡಗಿಯ ಚಿತ್ತ, ಅಲ್ಟ್ರಾ ಮಾರ್ಡನ್ ಹುಡುಗಿಗೆ ಬಣ್ಣದ ಲೋಕದಲ್ಲಿ ಮಿಂದೇಳುವ ಬಯಕೆ
ಹಿತ್ತಲ ಗಿಡ ಮದ್ದಲ್ಲ ಅಂತಾರೆ. ಕನ್ನಡದ ಕೆಲವು ನಟಿಯರ ವಿಚಾರಕ್ಕೆ ಈ ಮಾತು ಅಕ್ಷರಶಃ ಸತ್ಯ.ಪ್ರತಿಭೆ ಇದ್ದರೂ ಹುಟ್ಟೂರಿನಲ್ಲಿ ಅವಕಾಶ ಸಿಗದೆ ಪಕ್ಕದ ಭಾಷೆಗಳಿಗೆ ಹೋಗಿ ಬೇಡಿಕೆಯ ನಟಿಯಾಗಿ ಗುರುತಿಸಿ ಕೊಂಡವರು ಹಲವರು.ಆ ಪೈಕಿ ಬೆಂಗಳೂರು ಹುಡುಗಿ ಸಾತ್ವಿಕ್ ಕೂಡ ಒಬ್ಬರು. ಈಗ ಕನ್ನಡದಲ್ಲೇ ಮಿಂಚಬೇಕೆಂದು ಬಂದಿದ್ದಾರೆ. ಒಂದೆರೆಡು ಸಿನಿಮಾ ಅವಕಾಶವೂ ಸಿಕ್ಕಿವೆ. ಹೊಸ ಅವಕಾಶಗಳತ್ತ ಮುಖ ಮಾಡಿರುವ ಈ ಮೋಹಕ ತಾರೆ, ಚೆಂದದ ಫೋಟೋಶೂಟ್ ನಲ್ಲಿ ಅಲ್ಟ್ರಾ ಮಾರ್ಡನ್ ಹುಡುಗಿಯಾಗಿ ಮಿರ ಮಿರ ಮಿಂಚಿದ್ದು ಹೀಗೆ…( Exclusive photos)
ಈಕೆ ಬೆಳ್ಳಿತೆರೆಯ ಕನಸು ಕಂಗಳ ಚೆಲುವೆ. ಸಿನಿ‌ದುನಿಯಾ ಎಂಬ ಕಲರ್ ಫುಲ್ ಜಗತ್ತಿನಲ್ಲಿ ಕಲರ್ ಫುಲ್ ಕನಸು ಕಂಡ ಮೋಹಕ ಬೆಡಗಿ. ನಾಯಕಿಯೋ, ಸಹ ನಟಿಯೋ ಯಾವುದೇ ಪಾತ್ರಕ್ಕೂ ಸೈ ಎನ್ನುವ ಅಲ್ಟ್ರಾ ಮಾರ್ಡನ್ ಹುಡುಗಿ. ಹೆಸರು ಸಾತ್ವಿಕಾ. ಕನ್ನಡ ಸಿನಿಮಾ ಮತ್ತು ಸೀರಿಯಲ್ ಜಗತ್ತಿಗೆ ಈಗಷ್ಟೇ ಪರಿಚಯವಾಗುತ್ತಿರುವ ಹೆಸರು. ಆದರೆ ತೆಲುಗು ಸೀರಿಯಲ್ ಜಗತ್ತಿನಲ್ಲಿ ಸಾಕಷ್ಟು ಹೆಸರು ಮಾಡಿದ ಪ್ರತಿಭಾವಂತೆ. ತೆಲುಗು ಈ ಟಿವಿಯಲ್ಲಿ ಪ್ರಸಾರವಾದ ದ’ ಅತ್ತಾರಿಂಟಿಕಿ ದಾರೆದಿ’ ಹೆಸರಿನ ಧಾರಾವಾಹಿಯಲ್ಲಿ ಸಾತ್ವಿಕಾ ಖಡಕ್ ವಿಲನ್ ಮಿಂಚಿದವರು. ವಿಲನ್ ಅಂದ್ರೆ ಬರೀ ವಿಲನ್ ಅಲ್ಲ, ಅದೇ ಅಲ್ಲಿನ ಮೈನ್ ಕ್ಯಾರೆಕ್ಟರ್. ಅವರ ಇನ್ಸ್ಟಾಗ್ರಾಮ್ ಅಕೌಂಟ್ ನಲ್ಲಿದ್ದ ಫೋಟೋ ನೋಡಿಯೇ ಸಾತ್ವಿಕಾ, ಆ ಕ್ಯಾರೆಕ್ಟರ್ ಗೆ ಸೆಲೆಕ್ಟ್ ಆಗಿದ್ರಂತೆ. ಸಾತ್ವಿಕಾ ಮೊದಲೇ ಛಲಗಾತಿ. ಅದೃಷ್ಟವೇ ಎನ್ನುವ ಹಾಗೆ ಸಿಕ್ಕ ಅವಕಾಶವನ್ನು ಸಮರ್ಥವಾಗಿ ಬಳಸಿಕೊಂಡರು. ಆ ಮೂಲಕ ಅಲ್ಲಿ ಮನೆ ಮಾತಾದರು. ಹಾಗಂತ ಪಕ್ಕದೂರು ಎಷ್ಟು ದಿನ?
ಕನ್ನಡವೇ ನನ್ನಮ್ಮ ..
ಕನ್ನಡದವಳಾಗಿ ಕನ್ನಡದಲ್ಲೇ ನಟಿಯಾಗಿ ಮಿಂಚ ಬೇಕೆನ್ನುವ ಮಹಾದಾಸೆ ಹೊತ್ತು, ಈಗ ಸ್ಯಾಂಡಲ್ ವುಡ್ ಅಂಗಳಕ್ಕೂ ದಾಂಗುಡಿಯಿಟ್ಟಿದ್ದಾರೆ. ಎಂಟ್ರಿಯಲ್ಲೇ ನಟ ದಿಗಂತ್ ಅಭಿನಯದ ‘ ಮಾರಿಗೋಲ್ಡ್’ ಹೆಸರಿನ ಒಂದು ಚಿತ್ರದಲ್ಲಿ ಪ್ರಮುಖ ಪಾತ್ರವೊಂದಕ್ಕೂ ಬಣ್ಣ ಹಚ್ಚಿದ್ದಾರೆ. ಆ ಚಿತ್ರ ರಿಲೀಸ್ ಗೂ ರೆಡಿ ಆಗುತ್ತಿದೆ. ಹಾಗೆಯೇ ಶಿವು ಜಮಖಂಡಿ ನಿರ್ದೇಶನದ ಮತ್ತೊಂದು ಚಿತ್ರಕ್ಕೂ ಸೆಲೆಕ್ಟ್ ಆಗಿದ್ದಾರಂತೆ. ಸದ್ಯಕ್ಕೆ ಕನ್ನಡ ಸಿನಿ ದುನಿಯಾದಲ್ಲೆ ನಟಿಯಾಗಿ ಗುರುತಿಸಿಕೊಳ್ಳುವ ಮಹಾದಾಸೆ ಅವರದು. ಹಾಗಾಗಿಯೇ ಈಗ ಹೊಸ ಅವಕಾಶಗಳತ್ತ ಮುಖ ಮಾಡಿರುವ ಸಾತ್ವಿಕಾ, ಒಂದು ಚೆಂದದ ಫೋಟೋಶೂಟ್ ಮಾಡಿಸಿದ್ದಾರೆ. ಹೈಟು, ವೈಟು, ಲುಕು, ಫೇಸು…ಉಹುಂ ಯಾವುದರಲ್ಲೂ ಕಮ್ಮಿಯಿಲ್ಲ ಈ ನಟಿ.
ಕ್ಯಾರೆಕ್ಟರ್ ಮುಖ್ಯ..
ಸಿನಿಮಾ ಅಥವಾ ಸೀರಿಯಲ್ ಎಲ್ಲದ್ದಕ್ಕೂ ಸೈ ಎನ್ನುವಂತಿರುವ ಪಕ್ಕಾ ಅಲ್ಟ್ರಾ ಮಾಡ್ರನ್ ಹುಡುಗಿ. ದುಂಡು ಮುಖದ ಈ ಚೆಲುವೆ, ತನ್ನ ಅಂದದ ನೋಟದೊಂದಿಗೆ ಬಣ್ಣದ ಲೋಕದಲ್ಲಿ ಹೊಸ ಖದರ್ ತೋರಿಸುವ ತವಕದ. ಪಕ್ಕಾ ಮಾರ್ಡನ್ ಲುಕ್ ಕ್ಯಾರೆಕ್ಟರ್ ಗಳಿಗೆ ಹೇಳಿ ಮಾಡಿಸಿದಂತಿದ್ದರೂ, ಸೀರಿಯಲ್ ದುನಿಯಾದಲ್ಲಿ ಹೋಮ್ಲಿ‌ಗರ್ಲ್ ಆಗಿಯೂ ಮಿಂಚಿದವರು. ಯಾವುದೇ ಪಾತ್ರವಾದರೂ ಸರಿ ಎನ್ನುವ ಪ್ರತಿಭಾವಂತೆ.’ ನಟಿ ಎನ್ನುವುದಕ್ಕಿಂತ ನನಗಿರುವ ಆಸೆ, ಒಬ್ಬ ಕಲಾವಿದೆಯಾಗಿ ಗುರುತಿಸಿಕೊಳ್ಳಬೇಕೆನ್ನುವುದು. ಹಾಗಾಗಿ ಇಂತಹದೇ ಪಾತ್ರ ಬೇಕು ಎನ್ನುವ ಯಾವುದೇ ನಿಬಂಧನೆ ನನ್ನಲ್ಲಿಲ್ಲ. ಪಾತ್ರ ಚೆನ್ನಾಗಿರಬೇಕು, ನನ್ನ ಮನಸ್ಸಿಗೆ ಹಿಡಿಸಬೇಕು, ಜನರಿಗೂ ಅದು ಇಷ್ಟ ಆಗಬೇಕು’ ಎನ್ನುತ್ತಾರೆ ನಟಿ ಸಾತ್ವಿಕಾ.
ಸಾಧನೆಯ ಸಾಹಸಿ..
ಸಾತ್ವಿಕಾ ಬರೀ ನಟಿ ಯಲ್ಲ! ಹೊಸ ತಲೆಮಾರಿನ ಯುವತಿಯರಿಗೆ ಮಾದರಿಯಾಗಬಲ್ಲ ಸಾಧನೆಯ ಛಲಗಾತಿ. ನಟನೆಯ ಮೇಲಿನ ಆಸಕ್ತಿ ಕತೆ ಒಂದು ಕಡೆಯಾದರೆ, ಮತ್ತೊಂದಡೆ ಬಣ್ಣದ ಲೋಕದಲ್ಲೆ ಏನಾದರೂ ಸಾಧಿಸಬೇಕೆನ್ನುವ ಅವರ ಸಾಹಸವೇ ರೋಚಕವಾಗಿದೆ. ಸಿನಿಮಾ ಮತ್ತು ಸಿರೀಯಲ್ ಚಿತ್ರೀಕರಣಕ್ಕೆ ಬೇಕಾಗುವ ಸುಂದರ ಮನೆಗಳನ್ನು ಬಾಡಿಗೆ ಆಧಾರದಲ್ಲಿ ಒದಗಿಸುವುದು ಅವರ ಪ್ರಮುಖ ಉದ್ಯೋಗ. ಅದು ಬಿಟ್ಟರೆ ಈಗ ತಮ್ಮದೇ ಒಂದು ಪ್ರೊಡಕ್ಷನ್ ಹೌಸ್ ತೆರೆಯುವ ಸಾಹಸದಲ್ಲಿದ್ದಾರೆ. ಒಳ್ಳೆಯ ಸಿನಿಮಾ, ಸೀರಿಯಲ್ ನಿರ್ಮಾಣ ಮಾಡ್ಬೇಕು, ಹೊಸ ಪ್ರತಿಭೆಗಳಿಗೆ ಅವಕಾಶ ಕಲ್ಪಿಸಿಕೊಡ ಬೇಕೆನ್ನುವುದು ಅವರ ಕನಸು. ಅಂದುಕೊಂಡಂತೆ ಅವರ ಆ ಕನಸು ಈಡೇರಲಿ, ನಟಿಯಾಗಿಯೂ ಸಾತ್ವಿಕಾ ಮಿಂಚಲಿ ಎನ್ನುವುದು ಸಿನಿಲಹರಿ ಹಾರೈಕೆ.
