ತಾವು ದೊಡ್ಡ ಸಂಖ್ಯೆಯಲ್ಲಿ ಪ್ರೇಕ್ಷಕರನ್ನು ಥಿಯೇಟರ್‌ಗೆ ಸೆಳೆಯಬಲ್ಲೆನು ಎನ್ನುವುದನ್ನು ‘ಮಾಸ್ಟರ್‌’ ತಮಿಳು ಚಿತ್ರದ ಮೂಲಕ ನಟ ವಿಜಯ್ ಮತ್ತೊಮ್ಮೆ ಸಾಬೀತು ಮಾಡಿದರು. ಕೋವಿಡ್‌ನಿಂದಾಗಿ ಥಿಯೇಟರ್‌ನಲ್ಲಿ ಶೇ.50ರಷ್ಟು ಪ್ರೇಕ್ಷಕರಿಗಷ್ಟೇ ಅವಕಾಶವಿತ್ತು. ಆದಾಗ್ಯೂ ವಿಜಯ್ ಸಿನಿಮಾ ದೊಡ್ಡ ಮಟ್ಟದಲ್ಲಿ ಗಳಿಕೆ ಮಾಡಿತು. ಆ ಚಿತ್ರದಲ್ಲಿ ಖಳನಾಗಿ ನಟಿಸಿದ್ದ ವಿಜಯ್ ಸೇತುಪತಿ ಕೂಡ ಭರ್ಜರಿಯಾಗಿ ಮಿಂಚಿದರು.
ಇದೀಗ ವಿಜಯ್‌ರ 65ನೇ ಚಿತ್ರದಲ್ಲೂ ಪ್ರಭಾವಿ ನಟ ಖಳಪಾತ್ರ ಮಾಡುವ ಸೂಚನೆ ಸಿಕ್ಕಿದೆ. ಬಾಲಿವುಡ್‌ನ ಪ್ರತಿಭಾವಂತ ನಟ ನವಾಜುದ್ದೀನ್ ಸಿದ್ದಿಕಿ ಅವರಿಗೆ ಈ ಪಾತ್ರದಲ್ಲಿ ನಟಿಸುವಂತೆ ಕರೆ ಹೋಗಿದೆ.
ನೆಲ್ಸನ್ ದಿಲೀಪ್ ಕುಮಾರ್ ನಿರ್ದೇಶಿಸುತ್ತಿರುವ ‘ವಿಜಯ್ 65’ ಚಿತ್ರದಲ್ಲಿ ಖಳಪಾತ್ರಕ್ಕೆ ಹೆಚ್ಚಿನ ಪ್ರಾಮುಖ್ಯತೆ ಇರಲಿದೆಯಂತೆ. ಹಾಗಾಗಿ ದೊಡ್ಡ ನಟನೇ ಆಗಬೇಕು ಎನ್ನುವುದು ಯೋಜನೆ. ಸಿದ್ದಿಕಿ ಅವರನ್ನು ಕರೆತಂದರೆ ಉತ್ತರ ಭಾರತದ ಪ್ರೇಕ್ಷಕರನ್ನೂ ಆಕರ್ಷಿಸಬಹುದು ಎನ್ನುವ ದೂರದ ಆಲೋಚನೆ ಕೂಡ ಸಹಜವೇ. ಸಿದ್ದಿಕಿ ಅವರು ಇದೀಗಷ್ಟೇ ‘ಸಂಗೀನ್‌’ ಚಿತ್ರೀಕರಣ ಮುಗಿಸಿಕೊಂಡು ಲಂಡನ್‌ನಿಂದ ಬಂದಿದ್ದಾರೆ. ಸದ್ಯ ವಿಜಯ್ ಸಿನಿಮಾಗೆ ಸಂಬಂಧಿಸಿದಂತೆ ಮಾತುಕತೆ ಜಾರಿಯಲ್ಲಿದ್ದು, ಸಿದ್ದಿಕಿ ಓಕೆ ಎನ್ನಬೇಕಿದೆ.
