ಅನುರಾಗ್ ಕಶ್ಯಪ್ ನಿರ್ದೇಶನದ ‘ದೋಬಾರಾ’ ಹಿಂದಿ ಚಿತ್ರದಲ್ಲಿ ತಾಪ್ಸಿ ಪನ್ನು ನಟಿಸುತ್ತಿದ್ದಾರೆ. ತಾಪ್ಸಿಗೆ ಕಶ್ಯಪ್ ಜೊತೆ ಇದು ಮೂರನೇ ಪ್ರಯೋಗ. ಇದು ‘ನ್ಯೂ ಏಜ್ ಥ್ರಿಲ್ಲರ್’ ಸಿನಿಮಾ ಎಂದಿರುವ ಕಶ್ಯಪ್ ಆಕರ್ಷಕ ಟೀಸರ್‌ನೊಂದಿಗೆ ಸಿನಿಮಾ ಘೋಷಿಸಿರುವುದು ವಿಶೇಷ. ಟೀಸರ್‌ನಲ್ಲಿ, ಹೊರಗಿನಿಂದ ಮನೆಗೆ ಬರುವ ತಾಪ್ಸಿ ಏನಾದರೂ ವಿಶೇಷವಾಗಿದ್ದನ್ನು ಪ್ಲೇ ಮಾಡುವಂತೆ ‘ಅಲೆಕ್ಸಾ’ಗೆ ಹೇಳುತ್ತಾರೆ. ಟೀವಿಯಲ್ಲಿ ನಿರ್ದೇಶಕ ಅನುರಾಗ್ ಕಶ್ಯಪ್ ಕಾಣಿಸುತ್ತಾರೆ!
“ನೀವೇಕೆ ನನ್ ಟೀವೀಲಿ ಬಂದಿದ್ದೀರಿ?” ಎನ್ನುತ್ತಾರೆ ತಾಪ್ಸಿ. “ಏನಾದರೂ ವಿಶೇಷವಾಗಿರೋದು ಪ್ಲೇ ಮಾಡೋಕೆ ಹೇಳಿದ್ಯಲ್ಲ, ಅದಕ್ಕೆ ನಾನು ಬಂದಿದ್ದೇನೆ. ನಿನ್ನಲ್ಲಿ ಸ್ಕ್ರಿಪ್ಟ್ ಇದೆ ನೋಡು” ಎನ್ನುತ್ತಾರೆ ಕಶ್ಯಪ್. ಸ್ಕ್ರಿಪ್ಟ್ ಮೇಲೆ ಕಣ್ಣಾಡಿಸುವ ತಾಪ್ಸಿ, “ಚಿತ್ರದ ಶೀರ್ಷಿಕೆ ಏನು?” ಎಂದು ಕೇಳುತ್ತಾರೆ. ‘ಈಗ ಟೈಂ ಎಷ್ಟು?’ ಎನ್ನುವ ಕಶ್ಯಪ್ ಪ್ರಶ್ನೆ ತಾಪ್ಸಿಗೆ ಅಚ್ಚರಿ ಮೂಡಿಸುತ್ತದೆ. “ಈಗ ಗಡಿಯಾರ ತೋರಿಸುತ್ತಿರುವ ಸಮಯವೇ ಚಿತ್ರದ ಶೀರ್ಷಿಕೆ” ಎಂದು ಕಶ್ಯಪ್ ಹೇಳುತ್ತಲೇ ತಾಪ್ಸಿ ವಾಚ್ ನೋಡುತ್ತಾರೆ. ‘ದೋ ಬಾರಾ’ ಎಂದು ಉದ್ಘರಿಸುತ್ತಾರೆ ಆಕೆ!
2018ರಲ್ಲಿ ಅನುರಾಗ್ ಕಶ್ಯಪ್ ನಿರ್ದೇಶನದ ‘ಮನ್‌ಮರ್ಝಿಯಾ’ ಚಿತ್ರದಲ್ಲಿ ನಟಿಸಿದ್ದರು ತಾಪ್ಸಿ. “ಇದೊಂದು ವಿಶಿಷ್ಠ ಥ್ರಿಲ್ಲರ್ ಸಿನಿಮಾ ಆಗಲಿದೆ. ಇಲ್ಲಿಯವರೆಗೆ ನಾನು ನಟಿಸಿರುವ ಥ್ರಿಲ್ಲರ್ ಚಿತ್ರಗಳ ಪಟ್ಟಿಗೆ ಇದೊಂದು ಮಹತ್ವದ ಪ್ರಯೋಗವಾಗಿ ಸೇರ್ಪಡೆಯಾಗಲಿದೆ” ಎನ್ನುತ್ತಾರೆ ತಾಪ್ಸಿ. ಇನ್ನು ನಿರ್ದೇಶಕ ಕಶ್ಯಪ್ ಚಿತ್ರದ ಬಗ್ಗೆ ಹೇಳುತ್ತಾ, “ಥ್ರಿಲ್ಲರ್ ಮಾದರಿಯಲ್ಲಿ ಇದೊಂದು ತಾಜಾ ಪ್ರಯೋಗವಾಗಿರಲಿದೆ” ಎಂದಿದ್ದಾರೆ. ಏಕ್ತಾ ಕಪೂರ್ ಮತ್ತಿಬ್ಬರ ಸಹಯೋಗದೊಂದಿಗೆ ಚಿತ್ರ ನಿರ್ಮಿಸುತ್ತಿದ್ದಾರೆ.
