ಮದ್ವೆ ಸಡಗರದಲ್ಲಿ ಲವ್‌ ಮಾಕ್ಟೇಲ್‌ ಜೋಡಿ
ಸ್ಯಾಂಡಲ್‌ವುಡ್‌ನಲ್ಲೀಗ ಮದುವೆ ಸುದ್ದಿ. ಹೌದು, ಲಾಕ್‌ಡೌನ್ ಶುರುವಾದಾಗಿನಿಂದ ದೊಡ್ಡ ಮಟ್ಟದ ಮನರಂಜನೆ ಸೇರಿದಂತೆ ಯಾವುದೇ ಚಟುವಟಿಕೆಗಳು ನಡೆದಿರಲಿಲ್ಲ. ಅದರಲ್ಲೂ ಸಿನಿಮಾ ರಂಗದಲ್ಲಿ ಇಂತಹ ಕಾರ್ಯಕ್ರಮಗಳು ನಡೆದಿರಲಿಲ್ಲ. ಈಗ “ಲವ್‌ ಮಾಕ್ಟೇಲ್‌” ಜೋಡಿಯ ಮದ್ವೆ ಸುದ್ದಿ ಜೋರು ಸದ್ದು ಮಾಡುತ್ತಿದೆ.
ಹೌದು, ಮಿಲನಾ ನಾಗರಾಜ್ ಮತ್ತು ಡಾರ್ಲಿಂಗ್ ಕೃಷ್ಣ ಮದುವೆ ಮೂಡ್‌ನಲ್ಲಿದ್ದಾರೆ. ಮಿಲನಾ ನಾಗರಾಜ್ ಹಾಗೂ ಕೃಷ್ಣ ಇಬ್ಬರೂ ಪ್ರೀತಿಸಿ ಮದ್ವೆಯಾಗುತ್ತಿದ್ದಾರೆ ಅನ್ನೋದು ವಿಶೇಷ. ಕನ್ನಡ ಸಿನಿಮಾರಂಗದಲ್ಲಿ ಹಾಗೊಮ್ಮೆ ಹಿಂದಿರುಗಿ ನೋಡಿದರೆ, ಬಹುತೇಕ ನಟ,ನಟಿಯರು ಲವ್‌ ಮಾಡಿಯೇ ಮದ್ವೆಯಾಗಿದ್ದಾರೆ. ಆ ಸಾಲಿಗೆ ಕೃಷ್ಣ ಹಾಗೂ ಮಿಲನಾ ಕೂಡ ಸೇರುತ್ತಿದ್ದಾರೆ.
ಇವರಿಬ್ಬರ ಪ್ರೀತಿಯ ಬಗ್ಗೆ ಸುದ್ದಿ ಇತ್ತಾದರೂ, ಎಲ್ಲೂ ಅವರು ಓಪನ್‌ ಆಗಿ ಹೇಳಿಕೊಂಡಿರಲಿಲ್ಲ. ಯಾವಾಗ “ಲವ್‌ ಮಾಕ್ಟೇಲ್‌” ಚಿತ್ರ ಗೆಲುವು ಕೊಟ್ಟಿತೋ, ಆ ಸಕ್ಸಸ್‌ನ ಸಂಭ್ರಮದಲ್ಲೇ ತಮ್ಮ ಪ್ರೀತಿ ವಿಷಯವನ್ನು ಹಂಚಿಕೊಂಡಿದ್ದಲ್ಲದೆ, ಮದ್ವೆ ಆಗುತ್ತಿರುವ ವಿಷಯವನ್ನೂ ಹೇಳಿಕೊಂಡಿದ್ದರು. ಅದರಂತೆ ಅವರು, ಚಿತ್ರರಂಗದ ಬಹುತೇಕರಿಗೆ ತಮ್ಮ ಮದುವೆಗೆ ಆಹ್ವಾನಿಸಿದ್ದಾರೆ.
ಇನ್ನು, ಮದ್ವೆ ಫೆ.೧೪ರ ಪ್ರೇಮಿಗಳ ದಿನದಂದು ನಡೆಯಲಿದೆ. ಅಂದೇ ಸಂಜೆ ಅರತಕ್ಷತೆಯೂ ಇದೆ. ಸದ್ಯಕ್ಕೆ ಈ ಜೋಡಿ ಹಾಸನದ ಹೊರವಲಯದಲ್ಲಿರುವ ನಂದಗೋಕುಲ ಹಾಲ್‌ನಲ್ಲಿ ಅದ್ಧೂರಿಯಾಗಿ ಮೆಹಂದಿ ಕಾರ್ಯಕ್ರಮವನ್ನು ಆಯೋಜಿಸಿದ್ದಾರೆ.
ಮಿಲನಾ ನಾಗರಾಜ್ ಕೂಡ ಮೂಲತಃ ಹಾಸನದವರೆ ಆಗಿದ್ದು, ತನ್ನೂರಿನಲ್ಲಿಯೇ ಕಾರ್ಯಕ್ರಮವನ್ನು ಏರ್ಪಡಿಸಿದ್ದಾರೆ. ಪ್ರೀತಿಸುತ್ತಲೇ ಜೊತೆಗೊಂದು ಸಕ್ಸಸ್‌ಫುಲ್‌ ಸಿನಿಮಾ ಕೊಟ್ಟ ಈ ಜೋಡಿ, ಬದುಕಲ್ಲೂ ಒಂದಾಗುತ್ತಿದೆ. ಸದ್ಯ ಅವರಿಬ್ಬರ ಅಭಿಮಾನಿಗಳ ಖುಷಿಗೆ ಪಾರವೇ ಇಲ್ಲ.
